| Library / Tipiṭaka / திபிடக • Tipiṭaka / பேடகோபதே³ஸபாளி • Peṭakopadesapāḷi |
4. ஸுத்தவிசயசதுத்த²பூ⁴மி
4. Suttavicayacatutthabhūmi
40. தத்த² கதமோ ஸுத்தவிசயோ?
40. Tattha katamo suttavicayo?
தத்த² குஸலேஹி த⁴ம்மேஹி அகுஸலேஹி த⁴ம்மேஹி புப்³பா³பரஸோ ஸாது⁴கங் உபபரிக்கி²யதி. கிங்னு கோ² இத³ங் ஸுத்தங் ஆரபி⁴…பே॰… தேஹி ஸுத்தேஹி ஸஹ அதி⁴ஸன்னட்டே²ஹி யுஜ்ஜதி உதா³ஹு ந யுஜ்ஜதீதி?
Tattha kusalehi dhammehi akusalehi dhammehi pubbāparaso sādhukaṃ upaparikkhiyati. Kiṃnu kho idaṃ suttaṃ ārabhi…pe… tehi suttehi saha adhisannaṭṭhehi yujjati udāhu na yujjatīti?
யதா² ப⁴க³வா கிலேஸே ஆதி³ம்ஹி தத்த² தே³ஸேதி. கிங் தே³ஸிதங்? தேஸங் கிலேஸானங் பஹானங் உதா³ஹு நோ தே³ஸிதந்தி உபபரிக்கி²தப்³ப³ங். யதி³ ந தே³ஸிதங் ப⁴க³வதி தேஸங் கிலேஸானங் பஹானங் குஸலா த⁴ம்மா பரியேஸிதப்³பா³ யத்த² தே அகுஸலா பஹானங் க³ச்ச²ந்தி. ஸசே ஸமன்னேஹமானோ ந லப⁴தி. தத்த² அகுஸலா த⁴ம்மா அபகட்³டி⁴தப்³பா³ வீமங்ஸிதப்³பா³, ஸங்கிலேஸபா⁴கி³யஸுத்தங், யதி³ கிலேஸா அபகட்³டி⁴யந்தா. யே வா ந தெ³ந்தி தத்த² உபபரிக்கி²தப்³பா³ அரியமக்³க³த⁴ம்மா தாஸு பூ⁴மீஸு கிலேஸா பஹானங் க³ச்ச²ந்தி, உதா³ஹு ந க³ச்ச²ந்தீதி. யத்தகா பன கிலேஸா தே³ஸிதா. ந தத்தகா அரியத⁴ம்மா தே³ஸிதா. யத்த² கிலேஸா பஹானங் க³ச்ச²ந்தி, தத்த² யே கிலேஸா அரியத⁴ம்மானங் படிபக்கே²ன ந யுஜ்ஜந்தி, தே அபகட்³டி⁴தப்³பா³, ஸசே அபகட்³டி⁴யந்தா யோஜனங் தே³தி. தத்த² ஏவங் வீமங்ஸிதப்³ப³ங். த்³வே தீணி வா தது³த்தரி வா கிலேஸா ஏகேன அரியமக்³கே³ன பஹானங் க³ச்ச²ந்தீதி. ஸசே ஏவங் வீமங்ஸியந்தா யோஜனங் தே³தி, தத்த² உபபரிக்கி²தப்³ப³ங். பரம்பராய வா பிடகஸம்பதா³னேன வா ஸுத்தஸ்ஸ அத்தோ² ச நத்தோ² ச. யங் வா ந ஸக்கா ஸுத்தங் நித்³தி³ஸிதுங் நேவ ஸுத்தங் விசிகிச்சி²தப்³ப³ங். ஏவங் யதா² ஆதி³ம்ஹி குஸலா த⁴ம்மா ஹொந்தி. யே கிலேஸா தே பஹீனெய்யாதி. தே உபபரிக்கி²தப்³பா³. புரோ வா குஸலோ படிபக்கே²ன வா புரோ தே³ஸனா, அனூனா அனதி⁴கா உக்³க³ஹேதப்³பா³. யதா² பட²மோ உத்திலோ யேஸமிதா³னி கிலேஸானங் யே அரியத⁴ம்மா தே³ஸிதா இமே கிலேஸா இமேஹி அரியத⁴ம்மேஹி பஹீயந்தி, உதா³ஹு நப்பஹீயந்தீதி விசினிதப்³பா³. யதி³ உபபரிக்கி²யமானா யுஜ்ஜந்தி, க³ஹேதப்³பா³. அத² ந யுஜ்ஜந்தி, யே கிலேஸா அபடிபக்கா² ஹொந்தி, தே கிலேஸா அபரிபக்கி²தப்³பா³. யே ச அரியத⁴ம்மா படிபக்கா² ஹொந்தி, தே அரியத⁴ம்மா அபகட்³டி⁴தப்³பா³ . ந ஹி அரியத⁴ம்மா அனாகா³மிகிலேஸப்பஹானங் க³ச்ச²ந்தி, நாபி அரியத⁴ம்மா ஸப்³ப³கிலேஸானங் பஹானாய ஸங்வத்தந்தி. யதா² குஸலா மெத்தா அகுஸலோ ராகோ³ ந து குஸலா மெத்தாதி காரெத்வா அகுஸலஸ்ஸ ராக³ஸ்ஸ பஹானாய ஸம்ப⁴வதி ப்³யாபாதோ³ மெத்தாய பஹானங் க³ச்ச²தி. தஸ்மா உபோ⁴ கிலேஸா உபபரிக்கி²தப்³பா³. யோ யோ ச த⁴ம்மோ உபதி³ஸியதி குஸலோ வா அகுஸலோ வா ஸோ அபகட்³டி⁴தப்³போ³. ஸசே தே யுஜ்ஜந்தி அபகட்³டி⁴யமானோ நத்தி² உபபரிக்கி²தப்³ப³ங். த்³வே வா கிலேஸா ஏகேன அரியத⁴ம்மேன பஹீனெய்யாதி த்³வீஹி வா அரியத⁴ம்மேஹி ஏகோ வா கிலேஸோ பஹீயதீதி.
Yathā bhagavā kilese ādimhi tattha deseti. Kiṃ desitaṃ? Tesaṃ kilesānaṃ pahānaṃ udāhu no desitanti upaparikkhitabbaṃ. Yadi na desitaṃ bhagavati tesaṃ kilesānaṃ pahānaṃ kusalā dhammā pariyesitabbā yattha te akusalā pahānaṃ gacchanti. Sace samannehamāno na labhati. Tattha akusalā dhammā apakaḍḍhitabbā vīmaṃsitabbā, saṃkilesabhāgiyasuttaṃ, yadi kilesā apakaḍḍhiyantā. Ye vā na denti tattha upaparikkhitabbā ariyamaggadhammā tāsu bhūmīsu kilesā pahānaṃ gacchanti, udāhu na gacchantīti. Yattakā pana kilesā desitā. Na tattakā ariyadhammā desitā. Yattha kilesā pahānaṃ gacchanti, tattha ye kilesā ariyadhammānaṃ paṭipakkhena na yujjanti, te apakaḍḍhitabbā, sace apakaḍḍhiyantā yojanaṃ deti. Tattha evaṃ vīmaṃsitabbaṃ. Dve tīṇi vā taduttari vā kilesā ekena ariyamaggena pahānaṃ gacchantīti. Sace evaṃ vīmaṃsiyantā yojanaṃ deti, tattha upaparikkhitabbaṃ. Paramparāya vā piṭakasampadānena vā suttassa attho ca nattho ca. Yaṃ vā na sakkā suttaṃ niddisituṃ neva suttaṃ vicikicchitabbaṃ. Evaṃ yathā ādimhi kusalā dhammā honti. Ye kilesā te pahīneyyāti. Te upaparikkhitabbā. Puro vā kusalo paṭipakkhena vā puro desanā, anūnā anadhikā uggahetabbā. Yathā paṭhamo uttilo yesamidāni kilesānaṃ ye ariyadhammā desitā ime kilesā imehi ariyadhammehi pahīyanti, udāhu nappahīyantīti vicinitabbā. Yadi upaparikkhiyamānā yujjanti, gahetabbā. Atha na yujjanti, ye kilesā apaṭipakkhā honti, te kilesā aparipakkhitabbā. Ye ca ariyadhammā paṭipakkhā honti, te ariyadhammā apakaḍḍhitabbā . Na hi ariyadhammā anāgāmikilesappahānaṃ gacchanti, nāpi ariyadhammā sabbakilesānaṃ pahānāya saṃvattanti. Yathā kusalā mettā akusalo rāgo na tu kusalā mettāti kāretvā akusalassa rāgassa pahānāya sambhavati byāpādo mettāya pahānaṃ gacchati. Tasmā ubho kilesā upaparikkhitabbā. Yo yo ca dhammo upadisiyati kusalo vā akusalo vā so apakaḍḍhitabbo. Sace te yujjanti apakaḍḍhiyamāno natthi upaparikkhitabbaṃ. Dve vā kilesā ekena ariyadhammena pahīneyyāti dvīhi vā ariyadhammehi eko vā kileso pahīyatīti.
அத² வா ஏவம்பி உபபரிக்கி²யமானங் யுஜ்ஜதி, தத்த² வீமங்ஸிதப்³ப³ங் வா யதா² யுஜ்ஜதி தத்த² வீமங்ஸிதப்³ப³ங் வா, யதா² நனு ஸக்கா ஸுத்தங் நித்³தி³ஸிதுங், ந ஹி ஸுத்தே விசிகிச்சி²தப்³ப³ங். கிலேஸோ மங் அரியத⁴ம்மேஸு தே³ஸிதேஸு உப⁴யதோ உபபரிக்கி²தப்³ப³ங். கிர யே வா இமே கிலேஸா தே³ஸிதா யே ச அரியத⁴ம்மா தே³ஸிதா கா³தா²ய வா ப்³யாகரணேன வா, கிங் நு கோ² இமே கிலேஸா இமேஹி அரியத⁴ம்மேஹி பஹீயந்தி, உதா³ஹு நப்பஹீயந்தி? இமே வா அரியத⁴ம்மா இமேஸங் கிலேஸானங் பஹானாய ஸங்வத்தந்தீதி. கிஞ்சாபி குஸலேஹி த⁴ம்மேஹி அகுஸலா த⁴ம்மா பஹானங் க³ச்ச²ந்தி. ந து ஸப்³பே³ஹி அரியத⁴ம்மேஹி ஸப்³பா³குஸலா பஹானங் க³ச்ச²ந்தி. யதா² மெத்தா குஸலோ அகுஸலோ ச ராகோ³ ந து குஸலா மெத்தா அகுஸலோ ராகோ³தி காரெத்வா மெத்தாய ராகோ³ பஹானங், ப்³யாபாதோ³ மெத்தாய பஹானங் க³ச்ச²ந்தி. ஏவங் கிலேஸோதி காரெத்வா ஸுத்தேன பஹானங் க³ச்ச²தி. ந ஸுத்தோ த⁴ம்மோதி காரெத்வா ஸப்³ப³ங் கிலேஸஸ்ஸ பஹானாய ஸங்வத்ததி. யங் து ஸுத்தஸ்ஸ அரியத⁴ம்மோ ஸங்கிலேஸபடிபக்கோ², ஸோ தேன பஹானங் க³ச்ச²தீதி.
Atha vā evampi upaparikkhiyamānaṃ yujjati, tattha vīmaṃsitabbaṃ vā yathā yujjati tattha vīmaṃsitabbaṃ vā, yathā nanu sakkā suttaṃ niddisituṃ, na hi sutte vicikicchitabbaṃ. Kileso maṃ ariyadhammesu desitesu ubhayato upaparikkhitabbaṃ. Kira ye vā ime kilesā desitā ye ca ariyadhammā desitā gāthāya vā byākaraṇena vā, kiṃ nu kho ime kilesā imehi ariyadhammehi pahīyanti, udāhu nappahīyanti? Ime vā ariyadhammā imesaṃ kilesānaṃ pahānāya saṃvattantīti. Kiñcāpi kusalehi dhammehi akusalā dhammā pahānaṃ gacchanti. Na tu sabbehi ariyadhammehi sabbākusalā pahānaṃ gacchanti. Yathā mettā kusalo akusalo ca rāgo na tu kusalā mettā akusalo rāgoti kāretvā mettāya rāgo pahānaṃ, byāpādo mettāya pahānaṃ gacchanti. Evaṃ kilesoti kāretvā suttena pahānaṃ gacchati. Na sutto dhammoti kāretvā sabbaṃ kilesassa pahānāya saṃvattati. Yaṃ tu suttassa ariyadhammo saṃkilesapaṭipakkho, so tena pahānaṃ gacchatīti.
41. தத்த² குஸலே தே³ஸிதே ஸுத்தே ப்³யாகரணே வா ஸங்கிலேஸா ந யுஜ்ஜந்தி அரியத⁴ம்மா வா, தே மஹாபதே³ஸே நித்³தி³ஸிதப்³பா³வயவேன அபகட்³டி⁴தப்³பா³ . தத்த² கிலேஸேஹி ச தே³ஸிதேஹி அரியத⁴ம்மேஸு ச யதி³பி தேன அரியத⁴ம்மேன தே கிலேஸா பஹானங் க³ச்ச²ந்தி. தத்த²பி உத்தரி உபபரிக்கி²தப்³ப³ங். கேன காரணேன ஏதே கிலேஸா பஜஹிதப்³பா³, கேன காரணேன அரியத⁴ம்மா தே³ஸிதாதி? யேன யேன வா ஆகாரேன அரியத⁴ம்மா தே³ஸிதா, தேன தேன பகாரேன அயங் கிலேஸோ டி²தோ. அத்தி² ஹி ஏகோ கிலேஸோ, தேன வா அரியத⁴ம்மா ந அஞ்ஞதா² அஞ்ஞதா² பஹாதப்³போ³, யதா² தி³ட்டி² ராகோ³ அவிஜ்ஜா ச த³ஸ்ஸனேன பஹாதப்³பா³. ஸா சே ஏவஞ்ச அவிஜ்ஜா பா⁴வனாய பூ⁴மி வா த⁴ம்மா பா⁴வனாய பஹாதப்³பா³. ஸாயேவ உத்³த⁴ங்பா⁴கி³யங் அஸங்க²தத³ஸ்ஸனாய விமுத்தியா அனிமித்தேன சேதோஸமாதி⁴னா அமனஸிகாரேன பஹீயதி. ஏவங் ஸாத்த²ங் ஸப்³யஞ்ஜனங் உபபரிக்கி²தப்³ப³ங். யே த³ஸ்ஸனேன பஹாதப்³பா³ கிலேஸா த³ஸ்ஸனாகாரேன அரியத⁴ம்மோ தே³ஸிதோ, பா⁴வனாய பஹாதப்³பா³ பா⁴வனாகாரேன அரியத⁴ம்மோ தே³ஸிதோ, பதிஸேவனா பஹாதப்³பா³ பதிஸேவனாகாரேன அரியத⁴ம்மோ தே³ஸிதோ, ஏவங் வினோத³னபஹாதப்³பா³ யாவ ஸத்த ஆஸவா காதப்³பா³, யாவஞ்ஞதா². அஞ்ஞதா² ஹேஸ த⁴ம்மோ பஹாதப்³போ³ அஞ்ஞேனாகாரேன அரியத⁴ம்மோ தே³ஸிதோ, ஸோ அரியத⁴ம்மோ அஞ்ஞதா² பரியேஸிதப்³போ³. யதி³ அயங் த⁴ம்மோ பரியேஸதோ யோ ச தே³ஸேதி யேன யேனாகாரேன, ஸோ அரியத⁴ம்மோ பரியேஸிதப்³போ³, தேனாகாரேன கிலேஸோ பஹீயதி. ஸோ தத்த² உபபரிக்கி²தப்³போ³. அத² ந யுஜ்ஜதி யதி³ ஹி தேன ஸுத்தேன விஹிதங் ஸுத்தங் வீமங்ஸிதப்³ப³ங். யதா² யுஜ்ஜதி, ததா² க³ஹேதப்³ப³ங். யதா² ந யுஜ்ஜதி, ததா² ந க³ஹேதப்³ப³ங், அத்³தா⁴ ஏதங் ப⁴க³வதா ந பா⁴ஸிதங், ஆயஸ்மதா வா து³க்³க³ஹிதங், யதா² மஹாபதே³ஸே நித்³தி³ஸிதப்³ப³ங், ப⁴க³வதா யதா²பூ⁴தங் தே³ஸிதங், யோ ச த⁴ம்மோ தே³ஸிதோ குஸலோ ச அகுஸலோ ச தஸ்ஸ த⁴ம்மஸ்ஸ பச்சயோ பரியேஸிதப்³போ³. ந ஹி பச்சயா வினா த⁴ம்மோ அப்பச்சயோ உப்பஜ்ஜதி. தத்த² கோ ஆகாரோ பரியேஸனாய?
41. Tattha kusale desite sutte byākaraṇe vā saṃkilesā na yujjanti ariyadhammā vā, te mahāpadese niddisitabbāvayavena apakaḍḍhitabbā . Tattha kilesehi ca desitehi ariyadhammesu ca yadipi tena ariyadhammena te kilesā pahānaṃ gacchanti. Tatthapi uttari upaparikkhitabbaṃ. Kena kāraṇena ete kilesā pajahitabbā, kena kāraṇena ariyadhammā desitāti? Yena yena vā ākārena ariyadhammā desitā, tena tena pakārena ayaṃ kileso ṭhito. Atthi hi eko kileso, tena vā ariyadhammā na aññathā aññathā pahātabbo, yathā diṭṭhi rāgo avijjā ca dassanena pahātabbā. Sā ce evañca avijjā bhāvanāya bhūmi vā dhammā bhāvanāya pahātabbā. Sāyeva uddhaṃbhāgiyaṃ asaṅkhatadassanāya vimuttiyā animittena cetosamādhinā amanasikārena pahīyati. Evaṃ sātthaṃ sabyañjanaṃ upaparikkhitabbaṃ. Ye dassanena pahātabbā kilesā dassanākārena ariyadhammo desito, bhāvanāya pahātabbā bhāvanākārena ariyadhammo desito, patisevanā pahātabbā patisevanākārena ariyadhammo desito, evaṃ vinodanapahātabbā yāva satta āsavā kātabbā, yāvaññathā. Aññathā hesa dhammo pahātabbo aññenākārena ariyadhammo desito, so ariyadhammo aññathā pariyesitabbo. Yadi ayaṃ dhammo pariyesato yo ca deseti yena yenākārena, so ariyadhammo pariyesitabbo, tenākārena kileso pahīyati. So tattha upaparikkhitabbo. Atha na yujjati yadi hi tena suttena vihitaṃ suttaṃ vīmaṃsitabbaṃ. Yathā yujjati, tathā gahetabbaṃ. Yathā na yujjati, tathā na gahetabbaṃ, addhā etaṃ bhagavatā na bhāsitaṃ, āyasmatā vā duggahitaṃ, yathā mahāpadese niddisitabbaṃ, bhagavatā yathābhūtaṃ desitaṃ, yo ca dhammo desito kusalo ca akusalo ca tassa dhammassa paccayo pariyesitabbo. Na hi paccayā vinā dhammo appaccayo uppajjati. Tattha ko ākāro pariyesanāya?
தத்த² ததா²ரூபங் ஸஹேது ஸப்பச்சயங் ஸோயங் த⁴ம்மோ வுத்தோதி இத³ங் வீமங்ஸிதப்³ப³ங். ஸோ ச பச்சயோ திவிதோ⁴ – முது³ மஜ்ஜோ² அதி⁴மத்தோ. தத்த² முது³ம்ஹி பச்சயே முது³த⁴ம்மோ க³ஹேதப்³போ³, ஏவங் ஸத்யேஸ பச்சயோ து³விதோ⁴ பரங்பராபச்சயோ ச ஸமனந்தரபச்சயோ ச. ஸோ பச்சயோ முது³தேன ப்³யாதி⁴மத்தங் பரியேஸிதப்³ப³ங். கிங் காரணங்? அஞ்ஞதரோபி பச்சயோ அஞ்ஞேஹி பச்சயேஹி பரியத்திங் வா பாரிபூரிங் வா க³ச்ச²தி . தத்த² யோ த⁴ம்மோ தே³ஸிதோ, தஸ்ஸ த⁴ம்மஸ்ஸ ஏதேன வா காரணேன வா ஹேது பரியேஸிதப்³போ³. யதா² பச்சயோ ஹேதுனா பச்சயேன ச, ஸோ தஸ்ஸ த⁴ம்மஸ்ஸ நிஸ்ஸந்தோ³ பரியேஸிதப்³போ³. யதா² நித்³தி³ட்டோ² அதி⁴ட்டா²னே பதா⁴னங் பரியேஸதி, ஸோ பச்சயோ பரியேஸிதப்³போ³. ந ஹி முது³ஸ்ஸ த⁴ம்மஸ்ஸ அதி⁴மத்தோ நிஸ்ஸந்தோ³ அதி⁴மத்தஸ்ஸ வா நிஸ்ஸந்த³ஸ்ஸ முது³த⁴ம்மோ, அத² முது³ஸ்ஸ முது³ மஜ்ஜா²ய மஜ்ஜோ² அதி⁴மத்தஸ்ஸ அதி⁴மத்தோ யுஜ்ஜதி, தங் க³ஹேதப்³ப³ங், அத² ந யுஜ்ஜதி ந க³ஹேதப்³ப³ங். யஞ்ச ப⁴க³வா ஆரப⁴தி த⁴ம்மங் தே³ஸேதுங், தங்யேவ த⁴ம்மங் மஜ்ஜ²ந்தபரியோஸானங் தே³ஸேதி, யதா² ஸுத்தாதி⁴ட்டா²னே த⁴ம்மா ஆதி³ம்ஹி நித்³தி³ஸதி, தங்யேவ ப³ஹு தஸ்ஸ ஸுத்தஸ்ஸ பரியோஸானங். தஸ்ஸ ஹி த⁴ம்மஸ்ஸ வஸேன தங் ஸுத்தங் ஹோதி கா³தா² வா ப்³யாகரணங் கு²த்³த³கங் மஹந்தங் வா, யதா² பன து³விதா⁴ அனுரூபந்தி வா த²பனா ச தே³ஸனாத²பனா. ரூபந்திபி த⁴ம்மஸ்ஸ பரியேஸிதப்³பா³. யதா² ச ப⁴க³வதா பஞ்சன்னங் இந்த்³ரியானங் ஸங்வரணங் தே³ஸிதங் தண்ஹாய நிக்³க³ஹணத்த²ங் இச்சா²வ ஹோதி. தே³ஸேதி யதா² கோ³பாலகோபமே ஸுத்தே அஞ்ஞேஹிபி ஸுத்தேஹி ப⁴க³வா பா⁴ஸதி இச்சா²வ ஹோதி மஜ்ஜி²மனிகாயே விதக்கோ அயங் ப⁴க³வதோ தே³ஸனானுரூபந்தி இதி ஸோ த⁴ம்மோ அஞ்ஞேஸுபி வெய்யாகரணேஸு பரியேஸிதப்³போ³. ந ஹி ஏகங் ஹி ஸுத்தே த³ட்ட²ப்³போ³. யுஜ்ஜனங் தங் க³ஹேதப்³ப³ங்.
Tattha tathārūpaṃ sahetu sappaccayaṃ soyaṃ dhammo vuttoti idaṃ vīmaṃsitabbaṃ. So ca paccayo tividho – mudu majjho adhimatto. Tattha mudumhi paccaye mududhammo gahetabbo, evaṃ satyesa paccayo duvidho paraṃparāpaccayo ca samanantarapaccayo ca. So paccayo mudutena byādhimattaṃ pariyesitabbaṃ. Kiṃ kāraṇaṃ? Aññataropi paccayo aññehi paccayehi pariyattiṃ vā pāripūriṃ vā gacchati . Tattha yo dhammo desito, tassa dhammassa etena vā kāraṇena vā hetu pariyesitabbo. Yathā paccayo hetunā paccayena ca, so tassa dhammassa nissando pariyesitabbo. Yathā niddiṭṭho adhiṭṭhāne padhānaṃ pariyesati, so paccayo pariyesitabbo. Na hi mudussa dhammassa adhimatto nissando adhimattassa vā nissandassa mududhammo, atha mudussa mudu majjhāya majjho adhimattassa adhimatto yujjati, taṃ gahetabbaṃ, atha na yujjati na gahetabbaṃ. Yañca bhagavā ārabhati dhammaṃ desetuṃ, taṃyeva dhammaṃ majjhantapariyosānaṃ deseti, yathā suttādhiṭṭhāne dhammā ādimhi niddisati, taṃyeva bahu tassa suttassa pariyosānaṃ. Tassa hi dhammassa vasena taṃ suttaṃ hoti gāthā vā byākaraṇaṃ khuddakaṃ mahantaṃ vā, yathā pana duvidhā anurūpanti vā thapanā ca desanāthapanā. Rūpantipi dhammassa pariyesitabbā. Yathā ca bhagavatā pañcannaṃ indriyānaṃ saṃvaraṇaṃ desitaṃ taṇhāya niggahaṇatthaṃ icchāva hoti. Deseti yathā gopālakopame sutte aññehipi suttehi bhagavā bhāsati icchāva hoti majjhimanikāye vitakko ayaṃ bhagavato desanānurūpanti iti so dhammo aññesupi veyyākaraṇesu pariyesitabbo. Na hi ekaṃ hi sutte daṭṭhabbo. Yujjanaṃ taṃ gahetabbaṃ.
42. தத்த² கதமங் அனுஞ்ஞாதங்? யங் கிஞ்சி ஸுத்தங் ப⁴க³வதா ந பா⁴ஸிதங் தஞ்ச ஸுத்தேஸுயேவ ந்தி³ஸ்ஸதி, ஏவமேதங் தா⁴ரேதப்³ப³ங். யதா² அஸுகேன பா⁴ஸிதந்தி, தங் ஸுத்தங் வீமங்ஸிதப்³ப³ங். கிங் நு கோ² இமங் ஸுத்தங் அனுஞ்ஞாதங் க²மங் ப⁴க³வதோ உதா³ஹு நானுஞ்ஞாதங் க²மங், கிஞ்சி ரூபஞ்ச ஸுத்தங் ப⁴க³வதோ அனுஞ்ஞாதங் க²மங் கிஞ்சி ரூபஞ்ச நானுஞ்ஞாதங் க²மங்? யங் ஸப்³ப³ஸோ அனோதாரெத்வா த³ஸப³லோ கோ³சரங் தே³ஸேதி, தங் ஸப்³ப³ங் ஸுத்தங் ப⁴க³வதோ நானுஞ்ஞாதங் க²மங். அத்தி²பி ஸோ ஸாவகோ த³ஸப³லானங் கோ³சரங் ஜானாதி ஓதி⁴ஸோ அனோதி⁴ஸோ, தங் பன ப³லங் ஸப்³ப³ஸோ ந ஜானாதி அஞ்ஞதா² நாம ஸவனேன, யதா² ஆயஸ்மதா ஸாரிபுத்தேன யேன ப்³ராஹ்மணோ ஓவதி³தோ, தஸ்ஸ ஆயஸ்மதோ நத்தி² இந்த்³ரியப³லவேமத்தஞாணங், தேன புக்³க³லபரோ 1 பரஞ்ச தங் அஜானந்தோ ஸதி உத்தரிகரணீயே உப்பாதி³தோ, ஸோ ப⁴க³வதா அபஸாதி³தோ. யதா²வ ஆயஸ்மா மஹாகஸ்ஸபோ பா⁴கி³னெய்யங் ஓவத³தி அனந்தரியஸமன்னாக³தோ இத்³தி⁴பாடிஹீரேன அங்கு³லியோ அதீ³பெத்வா யங் ஸப்³பே³ஸங் த⁴ம்மானங் கம்மஸமாதா³னானங் ஹேதுஸோ டா²னஸோ யதா²பூ⁴தங் ஞாணங், தஸ்ஸ ஆயஸ்மதோ ஸங்விஜ்ஜதே, தேன நங் ஓவத³தி, தங் ப⁴க³வா கரோதி.
42. Tattha katamaṃ anuññātaṃ? Yaṃ kiñci suttaṃ bhagavatā na bhāsitaṃ tañca suttesuyeva ndissati, evametaṃ dhāretabbaṃ. Yathā asukena bhāsitanti, taṃ suttaṃ vīmaṃsitabbaṃ. Kiṃ nu kho imaṃ suttaṃ anuññātaṃ khamaṃ bhagavato udāhu nānuññātaṃ khamaṃ, kiñci rūpañca suttaṃ bhagavato anuññātaṃ khamaṃ kiñci rūpañca nānuññātaṃ khamaṃ? Yaṃ sabbaso anotāretvā dasabalo gocaraṃ deseti, taṃ sabbaṃ suttaṃ bhagavato nānuññātaṃ khamaṃ. Atthipi so sāvako dasabalānaṃ gocaraṃ jānāti odhiso anodhiso, taṃ pana balaṃ sabbaso na jānāti aññathā nāma savanena, yathā āyasmatā sāriputtena yena brāhmaṇo ovadito, tassa āyasmato natthi indriyabalavemattañāṇaṃ, tena puggalaparo 2 parañca taṃ ajānanto sati uttarikaraṇīye uppādito, so bhagavatā apasādito. Yathāva āyasmā mahākassapo bhāgineyyaṃ ovadati anantariyasamannāgato iddhipāṭihīrena aṅguliyo adīpetvā yaṃ sabbesaṃ dhammānaṃ kammasamādānānaṃ hetuso ṭhānaso yathābhūtaṃ ñāṇaṃ, tassa āyasmato saṃvijjate, tena naṃ ovadati, taṃ bhagavā karoti.
‘‘ஸசேபி த³ஸ பஜ்ஜோதே, தா⁴ரயிஸ்ஸஸி கஸ்ஸப;
‘‘Sacepi dasa pajjote, dhārayissasi kassapa;
நேவ த³க்க²தி ரூபானி, சக்கு² தஸ்ஸ ந விஜ்ஜதீ’’தி.
Neva dakkhati rūpāni, cakkhu tassa na vijjatī’’ti.
அபி ச கோ² யதா² தூ³தோ ராஜவசனேன ஸத்தமனுஸாஸதி, ஏவங் ஸேஸானுகோ³ அஞ்ஞாதகங் கோ⁴ஸங் பரேஸங் தே³ஸேதி. அனுஞ்ஞாதக²மஸுத்தங் க³ஹேதப்³ப³ங். அனநுஞ்ஞாதக²மங் ந க³ஹேதப்³ப³ங்.
Api ca kho yathā dūto rājavacanena sattamanusāsati, evaṃ sesānugo aññātakaṃ ghosaṃ paresaṃ deseti. Anuññātakhamasuttaṃ gahetabbaṃ. Ananuññātakhamaṃ na gahetabbaṃ.
தத்த² கதமோ ஸுத்தஸங்கரோ? பஞ்சவித⁴ங் ஸுத்தங், ஸங்கிலேஸபா⁴கி³யங் வாஸனாபா⁴கி³யங் த³ஸ்ஸனபா⁴கி³யங் பா⁴வனாபா⁴கி³யங் அஸெக்க²பா⁴கி³யங். அஞ்ஞங் ஆராதெ⁴ய்ய அஞ்ஞங் தே³ஸேதி அஞ்ஞஸ்ஸ ச ஸுத்தஸ்ஸ அத்த²ங் அஞ்ஞம்ஹி ஸுத்தே நித்³தி³ஸதி. ஸுத்தஸ்ஸ வா ஹி அனேகாகாரங் அத்த²ங் நித்³தி³ஸதி. அரியத⁴ம்மஸாத⁴னே அத்த²ங் விவரதி. வாஸனாபா⁴கி³யஸ்ஸ அத்த²ங் த³ஸ்ஸனபா⁴கி³யேஸு நித்³தி³ஸதி. ஓரம்பா⁴கி³யானங் ஸங்யோஜனானங் அத்த²ங் உத்³த⁴ங்பா⁴கி³யேஸு நித்³தி³ஸதி. முது³மஜ்ஜா²னங் இந்த்³ரியானங் அதி⁴மத்தேஸு ஸுத்தேஸு நித்³தி³ஸதி. இதி அயங் ஸுத்தங் ஸம்பே⁴த³ங் ஹேதுனா ச நிஸ்ஸந்தே³ன ச ப²லேன ச நித்³தே³ஸேன ச முது³மஜ்ஜா²தி⁴மத்ததாயபி ச அத்தே²ன ச ப்³யஞ்ஜனேன ச யோ ஸம்பே⁴தோ³, அயங் வுச்சதி ஸுத்தஸங்கரோ. யோ அஸம்பே⁴தோ³, அயங் வுச்சதி ஸுத்தவிசயோ.
Tattha katamo suttasaṅkaro? Pañcavidhaṃ suttaṃ, saṃkilesabhāgiyaṃ vāsanābhāgiyaṃ dassanabhāgiyaṃ bhāvanābhāgiyaṃ asekkhabhāgiyaṃ. Aññaṃ ārādheyya aññaṃ deseti aññassa ca suttassa atthaṃ aññamhi sutte niddisati. Suttassa vā hi anekākāraṃ atthaṃ niddisati. Ariyadhammasādhane atthaṃ vivarati. Vāsanābhāgiyassa atthaṃ dassanabhāgiyesu niddisati. Orambhāgiyānaṃ saṃyojanānaṃ atthaṃ uddhaṃbhāgiyesu niddisati. Mudumajjhānaṃ indriyānaṃ adhimattesu suttesu niddisati. Iti ayaṃ suttaṃ sambhedaṃ hetunā ca nissandena ca phalena ca niddesena ca mudumajjhādhimattatāyapi ca atthena ca byañjanena ca yo sambhedo, ayaṃ vuccati suttasaṅkaro. Yo asambhedo, ayaṃ vuccati suttavicayo.
தத்தா²யங் உத்³தா³னகா³தா²
Tatthāyaṃ uddānagāthā
புரிமானங் அக்க²ண்ட³ங், யதா²பூ⁴தஸ்ஸ பச்சயோ;
Purimānaṃ akkhaṇḍaṃ, yathābhūtassa paccayo;
நிஸ்ஸந்தோ³ வாஸனாஸத்³தி⁴, அனுஞ்ஞா ஸுத்தஸங்கரோ.
Nissando vāsanāsaddhi, anuññā suttasaṅkaro.
தே²ரஸ்ஸ மஹாகச்சாயனஸ்ஸ
Therassa mahākaccāyanassa
ஸுத்தவிசயோ நாம சதுத்த²பூ⁴மி.
Suttavicayo nāma catutthabhūmi.
Footnotes:
