| Library / Tipiṭaka / திபிடக • Tipiṭaka / பேடகோபதே³ஸபாளி • Peṭakopadesapāḷi |
6. ஸுத்தத்த²ஸமுச்சயபூ⁴மி
6. Suttatthasamuccayabhūmi
60. பு³த்³தா⁴னங் ப⁴க³வந்தானங் ஸாஸனங் திவிதே⁴ன ஸங்க³ஹங் க³ச்ச²தி, க²ந்தே⁴ஸு தா⁴தூஸு ஆயதனேஸு ச. தத்த² பஞ்சக்க²ந்தா⁴ ரூபக்க²ந்தோ⁴ யாவ விஞ்ஞாணக்க²ந்தோ⁴. த³ஸ ரூபஆயதனானி சக்கு² ரூபா ச யாவ காயோ பொ²ட்ட²ப்³பா³ ச, அயங் ரூபக்க²ந்தோ⁴. தத்த² ச² வேத³னாகாயா வேத³னாக்க²ந்தோ⁴ சக்கு²ஸம்ப²ஸ்ஸஜா வேத³னா யாவ மனோஸம்ப²ஸ்ஸஜா வேத³னா, அயங் வேத³னாக்க²ந்தோ⁴. தத்த² ச² ஸஞ்ஞாகாயா ஸஞ்ஞாக்க²ந்தோ⁴, ரூபஸஞ்ஞா யாவ த⁴ம்மஸஞ்ஞா இமே ச² ஸஞ்ஞாகாயா, அயங் ஸஞ்ஞாக்க²ந்தோ⁴. தத்த² ச² சேதனாகாயா ஸங்கா²ரக்க²ந்தோ⁴, ரூபஸஞ்சேதனா யாவ த⁴ம்மஸஞ்சேதனா இமே ச² சேதனாகாயா, அயங் ஸங்கா²ரக்க²ந்தோ⁴. தத்த² ச² விஞ்ஞாணகாயா விஞ்ஞாணக்க²ந்தோ⁴, சக்கு²விஞ்ஞாணங் யாவ மனோவிஞ்ஞாணங் இமே ச² விஞ்ஞாணகாயா, அயங் விஞ்ஞாணக்க²ந்தோ⁴. இமே பஞ்சக்க²ந்தா⁴.
60. Buddhānaṃ bhagavantānaṃ sāsanaṃ tividhena saṅgahaṃ gacchati, khandhesu dhātūsu āyatanesu ca. Tattha pañcakkhandhā rūpakkhandho yāva viññāṇakkhandho. Dasa rūpaāyatanāni cakkhu rūpā ca yāva kāyo phoṭṭhabbā ca, ayaṃ rūpakkhandho. Tattha cha vedanākāyā vedanākkhandho cakkhusamphassajā vedanā yāva manosamphassajā vedanā, ayaṃ vedanākkhandho. Tattha cha saññākāyā saññākkhandho, rūpasaññā yāva dhammasaññā ime cha saññākāyā, ayaṃ saññākkhandho. Tattha cha cetanākāyā saṅkhārakkhandho, rūpasañcetanā yāva dhammasañcetanā ime cha cetanākāyā, ayaṃ saṅkhārakkhandho. Tattha cha viññāṇakāyā viññāṇakkhandho, cakkhuviññāṇaṃ yāva manoviññāṇaṃ ime cha viññāṇakāyā, ayaṃ viññāṇakkhandho. Ime pañcakkhandhā.
தேஸங் கா பரிஞ்ஞா? அனிச்சங் து³க்க²ங் ஸஞ்ஞா அனத்தாதி ஏஸா ஏதேஸங் பரிஞ்ஞா. தத்த² கதமோ க²ந்த⁴த்தோ²? ஸமூஹத்தோ² க²ந்த⁴த்தோ², புஞ்ஜத்தோ² க²ந்த⁴த்தோ², ராஸத்தோ² க²ந்த⁴த்தோ². தங் யதா² த³ப்³ப³க்க²ந்தோ⁴ வனக்க²ந்தோ⁴ தா³ருக்க²ந்தோ⁴ அக்³கி³க்க²ந்தோ⁴ உத³கக்க²ந்தோ⁴ வாயுக்க²ந்தோ⁴ இதி ஏவங் க²ந்தே⁴ஸு ஸப்³ப³ஸங்க³ஹோவ ஏவங் க²ந்த⁴த்தோ².
Tesaṃ kā pariññā? Aniccaṃ dukkhaṃ saññā anattāti esā etesaṃ pariññā. Tattha katamo khandhattho? Samūhattho khandhattho, puñjattho khandhattho, rāsattho khandhattho. Taṃ yathā dabbakkhandho vanakkhandho dārukkhandho aggikkhandho udakakkhandho vāyukkhandho iti evaṃ khandhesu sabbasaṅgahova evaṃ khandhattho.
தத்த² அட்டா²ரஸ தா⁴துயோ சக்கு²தா⁴து ரூபதா⁴து சக்கு²விஞ்ஞாணதா⁴து…பே॰… மனோதா⁴து த⁴ம்மதா⁴து மனோவிஞ்ஞாணதா⁴து. ஏதாயோ அட்டா²ரஸ தா⁴துயோ. தாஸங் பரிஞ்ஞா அனிச்சங் து³க்க²ங் ஸஞ்ஞா அனத்தாதி ஏஸா ஏதாஸங் பரிஞ்ஞா. தத்த² கோ தா⁴துஅத்தோ²? வுச்சதே அவயவத்தோ² தா⁴துஅத்தோ². அவயவோதி சக்கு² நோ பஸாதோ³ சக்கு²தா⁴து. ஏவங் பஞ்சஸு தா⁴தூஸு புன ராக³வவச்சே²த³த்தோ² தா⁴துஅத்தோ². வவச்சி²ன்னா ஹி சக்கு²தா⁴து. ஏவங் பஞ்சஸு புனராஹ ஏகந்திபகத்யத்தே²ன தா⁴துஅத்தோ²தி வுச்சதே. தங் யதா², பகதியா அயங் புரிஸோ பித்திகோ ஸெம்ஹிகோ வாதிகோ ஸன்னிபாதிகோதி ஏவங் பகதிசக்கு²தா⁴து த³ஸன்னங் பியா ச ஸப்³பே³ஸு இந்த்³ரியேஸு…பே॰… விஸபா⁴க³த்தோ² தா⁴துஅத்தோ².
Tattha aṭṭhārasa dhātuyo cakkhudhātu rūpadhātu cakkhuviññāṇadhātu…pe… manodhātu dhammadhātu manoviññāṇadhātu. Etāyo aṭṭhārasa dhātuyo. Tāsaṃ pariññā aniccaṃ dukkhaṃ saññā anattāti esā etāsaṃ pariññā. Tattha ko dhātuattho? Vuccate avayavattho dhātuattho. Avayavoti cakkhu no pasādo cakkhudhātu. Evaṃ pañcasu dhātūsu puna rāgavavacchedattho dhātuattho. Vavacchinnā hi cakkhudhātu. Evaṃ pañcasu punarāha ekantipakatyatthena dhātuatthoti vuccate. Taṃ yathā, pakatiyā ayaṃ puriso pittiko semhiko vātiko sannipātikoti evaṃ pakaticakkhudhātu dasannaṃ piyā ca sabbesu indriyesu…pe… visabhāgattho dhātuattho.
தத்த² த்³வாத³ஸாயதனானி கதமானி? ச² அஜ்ஜ²த்திகானி ச² பா³ஹிரானி. சக்கா²யதனங் யாவ மனாயதனந்தி அஜ்ஜ²த்திகங், ரூபாயதனங் யாவ த⁴ம்மாயதனந்தி பா³ஹிரங். ஏதானி த்³வாத³ஸ ஆயதனானி. ஏதேஸங் கா பரிஞ்ஞா? அனிச்சங் து³க்க²ங் ஸஞ்ஞா அனத்தாதி, ஏஸா ஏதேஸங் பரிஞ்ஞா. அபி ச த்³விதா⁴ பரிஞ்ஞா ஞாதபரிஞ்ஞா ச பஹானபரிஞ்ஞா ச. தத்த² ஞாதபரிஞ்ஞா நாம அனிச்சங் து³க்க²ங் ஸஞ்ஞா அனத்தாதி, ஏஸா ஞாதபரிஞ்ஞா. பஹானபரிஞ்ஞா பன ச²ந்த³ராக³ப்பஹானா, ஏஸா பஹானபரிஞ்ஞா. தத்த² கதமோ ஆயதனத்தோ²? வுச்சதே ஆகாரத்தோ² ஆயதனத்தோ². யதா² ஸுவண்ணாகரோ து³ப்³ப³ண்ணாகரோ, யதா² த்³வீஹி தேஹி ஆகாரேஹி தே தே கா³வா உத்திட்ட²ந்தி. ஏவங் ஏதேஹி சித்தசேதஸிகா கா³வா உத்திட்ட²ந்தி கம்மகிலேஸா து³க்க²த⁴ம்மா ச. புனராஹ ஆயதா³னத்தோ² ஆயதனத்தோ². யதா² ரஞ்ஞோ ஆயதா³னேஹி ஆயோ ப⁴வதி, ஏவங் ஆயதா³னத்தோ² ஆயதனத்தோ².
Tattha dvādasāyatanāni katamāni? Cha ajjhattikāni cha bāhirāni. Cakkhāyatanaṃ yāva manāyatananti ajjhattikaṃ, rūpāyatanaṃ yāva dhammāyatananti bāhiraṃ. Etāni dvādasa āyatanāni. Etesaṃ kā pariññā? Aniccaṃ dukkhaṃ saññā anattāti, esā etesaṃ pariññā. Api ca dvidhā pariññā ñātapariññā ca pahānapariññā ca. Tattha ñātapariññā nāma aniccaṃ dukkhaṃ saññā anattāti, esā ñātapariññā. Pahānapariññā pana chandarāgappahānā, esā pahānapariññā. Tattha katamo āyatanattho? Vuccate ākārattho āyatanattho. Yathā suvaṇṇākaro dubbaṇṇākaro, yathā dvīhi tehi ākārehi te te gāvā uttiṭṭhanti. Evaṃ etehi cittacetasikā gāvā uttiṭṭhanti kammakilesā dukkhadhammā ca. Punarāha āyadānattho āyatanattho. Yathā rañño āyadānehi āyo bhavati, evaṃ āyadānattho āyatanattho.
61. சத்தாரி அரியஸச்சானி து³க்க²ங் ஸமுத³யோ நிரோதோ⁴ மக்³கோ³ ச. து³க்க²ங் யதா² ஸமாஸேன த⁴ம்மாசரியங் மானஸஞ்ச, ஸமுத³யோ ஸமாஸேன அவிஜ்ஜா ச தண்ஹா ச, நிரோதோ⁴ ஸமாஸேன விஜ்ஜா ச விமுத்தி ச, மக்³கோ³ ஸமாஸேன ஸமதோ² ச விபஸ்ஸனா ச.
61. Cattāri ariyasaccāni dukkhaṃ samudayo nirodho maggo ca. Dukkhaṃ yathā samāsena dhammācariyaṃ mānasañca, samudayo samāsena avijjā ca taṇhā ca, nirodho samāsena vijjā ca vimutti ca, maggo samāsena samatho ca vipassanā ca.
தத்த² ஸத்ததிங்ஸ போ³தி⁴பக்கி²கா த⁴ம்மா கதமே? சத்தாரோ ஸதிபட்டா²னா யாவ அரியோ அட்ட²ங்கி³கோ மக்³கோ³, ஏவமேதே ஸத்ததிங்ஸ போ³தி⁴பக்கி²கா த⁴ம்மா. யே த⁴ம்மா அதீதானாக³தபச்சுப்பன்னானங் பு³த்³தா⁴னங் ப⁴க³வந்தானங் பச்சேகபு³த்³தா⁴னங் ஸாவகானங் ச நிப்³பா³னாய ஸங்வத்தந்தீதி, ஸோ மக்³கோ³ சத்தாரோ ஸதிபட்டா²னா. கதமே சத்தாரோ? இத⁴ பி⁴க்கு² காயே காயானுபஸ்ஸீ விஹரதி, ஸம்மப்பதா⁴னங்…பே॰… இத்³தி⁴பாத³ங்…பே॰… இந்த்³ரியானி…பே॰… ப³லானி…பே॰… தத்த² கோ இந்த்³ரியத்தோ²? இந்த³த்தோ² இந்த்³ரியத்தோ², ஆதி⁴பதெய்யத்தோ² இந்த்³ரியத்தோ², பஸாத³த்தோ² இந்த்³ரியத்தோ², அஸாதா⁴ரணங் கஸ்ஸ கிரியத்தோ² இந்த்³ரியத்தோ² அனவபரியத்தோ² ப³லத்தோ², தா²மத்தோ² ப³லத்தோ², உபாதா³யத்தோ² ப³லத்தோ², உபத்த²ம்ப⁴னத்தோ² ப³லத்தோ².
Tattha sattatiṃsa bodhipakkhikā dhammā katame? Cattāro satipaṭṭhānā yāva ariyo aṭṭhaṅgiko maggo, evamete sattatiṃsa bodhipakkhikā dhammā. Ye dhammā atītānāgatapaccuppannānaṃ buddhānaṃ bhagavantānaṃ paccekabuddhānaṃ sāvakānaṃ ca nibbānāya saṃvattantīti, so maggo cattāro satipaṭṭhānā. Katame cattāro? Idha bhikkhu kāye kāyānupassī viharati, sammappadhānaṃ…pe… iddhipādaṃ…pe… indriyāni…pe… balāni…pe… tattha ko indriyattho? Indattho indriyattho, ādhipateyyattho indriyattho, pasādattho indriyattho, asādhāraṇaṃ kassa kiriyattho indriyattho anavapariyattho balattho, thāmattho balattho, upādāyattho balattho, upatthambhanattho balattho.
தத்த² கதமே ஸத்த பொ³ஜ்ஜ²ங்கா³? ஸதிஸம்பொ³ஜ்ஜ²ங்கோ³ யாவ உபெக்கா²ஸம்பொ³ஜ்ஜ²ங்கோ³. தத்த² கதமோ அட்ட²ங்கி³கோ மக்³கோ³? ஸம்மாதி³ட்டி² யாவ ஸம்மாஸமாதி⁴. தத்த² அட்ட²ங்கி³கோ மக்³கோ³தி க²ந்தோ⁴ ஸீலக்க²ந்தோ⁴ ச ஸமாதி⁴க்க²ந்தோ⁴ ச பஞ்ஞாக்க²ந்தோ⁴ ச. தத்த² யா ச ஸம்மாவாசா யோ ச ஸம்மாகம்மந்தோ யோ ச ஸம்மாஆஜீவோ, அயங் ஸீலக்க²ந்தோ⁴. யா ச ஸம்மாஸதி யோ ச ஸம்மாவாயாமோ யோ ச ஸம்மாஸமாதி⁴, அயங் ஸமாதி⁴க்க²ந்தோ⁴. யோ ச ஸம்மாஸங்கப்போ யா ச ஸம்மாதி³ட்டி², அயங் பஞ்ஞாக்க²ந்தோ⁴. ஏவங் தாயோ திஸ்ஸோ ஸிக்கா². ஏவங் தீஹாகாரேஹி த³ஸ பதா³னி…பே॰….
Tattha katame satta bojjhaṅgā? Satisambojjhaṅgo yāva upekkhāsambojjhaṅgo. Tattha katamo aṭṭhaṅgiko maggo? Sammādiṭṭhi yāva sammāsamādhi. Tattha aṭṭhaṅgiko maggoti khandho sīlakkhandho ca samādhikkhandho ca paññākkhandho ca. Tattha yā ca sammāvācā yo ca sammākammanto yo ca sammāājīvo, ayaṃ sīlakkhandho. Yā ca sammāsati yo ca sammāvāyāmo yo ca sammāsamādhi, ayaṃ samādhikkhandho. Yo ca sammāsaṅkappo yā ca sammādiṭṭhi, ayaṃ paññākkhandho. Evaṃ tāyo tisso sikkhā. Evaṃ tīhākārehi dasa padāni…pe….
தத்த² யோகா³வசரோ ஸீலக்க²ந்தே⁴ டி²தோ தோ³ஸங் அகுஸலங் ந உபாதி³யதி, தோ³ஸானுஸயங் ஸமூஹனதி, தோ³ஸஸல்லங் உத்³த⁴ரதி, து³க்க²வேத³னங் பரிஜானாதி, காமதா⁴துங் ஸமதிக்கமதி. ஸமாதி⁴க்க²ந்தே⁴ டி²தோ லோப⁴ங் அகுஸலங் ந உபாதி³யதி, ராகா³னுஸயங் ஸமூஹனதி, லோப⁴ஸல்லங் உத்³த⁴ரதி, ஸுக²வேத³னங் பரிஜானாதி, ரூபதா⁴துங் ஸமதிக்கமதி. பஞ்ஞாக்க²ந்தே⁴ டி²தோ மோஹங் அகுஸலங் ந உபாதி³யதி, அவிஜ்ஜானுஸயங் ஸமூஹனதி, மோஹஸல்லங் தி³ட்டி²ஸல்லஞ்ச உத்³த⁴ரதி, அது³க்க²மஸுக²வேத³னங் பரிஜானாதி, அரூபதா⁴துங் ஸமதிக்கமதி. இதி தீஹி க²ந்தே⁴ஹி தீணி அகுஸலமூலானி ந உபாதி³யதி, சத்தாரி ஸல்லானி உத்³த⁴ரதி, திஸ்ஸோ வேத³னா பரிஜானாதி, தேதா⁴துகங் ஸமதிக்கமதி.
Tattha yogāvacaro sīlakkhandhe ṭhito dosaṃ akusalaṃ na upādiyati, dosānusayaṃ samūhanati, dosasallaṃ uddharati, dukkhavedanaṃ parijānāti, kāmadhātuṃ samatikkamati. Samādhikkhandhe ṭhito lobhaṃ akusalaṃ na upādiyati, rāgānusayaṃ samūhanati, lobhasallaṃ uddharati, sukhavedanaṃ parijānāti, rūpadhātuṃ samatikkamati. Paññākkhandhe ṭhito mohaṃ akusalaṃ na upādiyati, avijjānusayaṃ samūhanati, mohasallaṃ diṭṭhisallañca uddharati, adukkhamasukhavedanaṃ parijānāti, arūpadhātuṃ samatikkamati. Iti tīhi khandhehi tīṇi akusalamūlāni na upādiyati, cattāri sallāni uddharati, tisso vedanā parijānāti, tedhātukaṃ samatikkamati.
62. தத்த² கதமா அவிஜ்ஜா? யங் சதூஸு அரியஸச்சேஸு அஞ்ஞாணந்தி வித்தா²ரேன யதா² ஸோ பாணஸஜ்ஜேஸு கத²ங்கதா² காதப்³ப³ங். தத்த² கதமங் விஞ்ஞாணங்? ச² விஞ்ஞாணகாயா வேத³னா ஸஞ்ஞா சேதனா ப²ஸ்ஸோ மனஸிகாரோ, இத³ங் நாமங். தத்த² கதமங் ரூபங்? சாதுமஹாபூ⁴திகங் சதுன்னங் மஹாபூ⁴தானங் உபாதா³யரூபஸ்ஸ பஞ்ஞத்திங். இதி புரிமகஞ்ச நாமங் இத³ஞ்ச ரூபங் தது³ப⁴யங் நாமரூபந்தி வுச்சதி. தத்த² ச²ளாயதனந்தி ச² அஜ்ஜ²த்திகானி ஆயதனானி, சக்கு² அஜ்ஜ²த்திகங் ஆயதனங் யாவ மனோ அஜ்ஜ²த்திகங் ஆயதனங். ப²ஸ்ஸோதி ச² ப²ஸ்ஸகாயா சக்கு²ஸம்ப²ஸ்ஸோ யாவ மனோஸம்ப²ஸ்ஸோதி ப²ஸ்ஸோ. ச² வேத³னாகாயா வேத³னா. தண்ஹாதி ச² தண்ஹாகாயா தண்ஹா. உபாதா³னந்தி சத்தாரி உபாதா³னானி காமுபாதா³னங் தி³ட்டு²பாதா³னங் ஸீலப்³ப³துபாதா³னங் அத்தவாது³பாதா³னந்தி உபாதா³னங். ப⁴வோதி தயோ ப⁴வா காமப⁴வோ ரூபப⁴வோ அரூபப⁴வோ. தத்த² கதமா ஜாதி? யா பட²மங் க²ந்தா⁴னங் பட²மங் தா⁴தூனங் பட²மங் ஆயதனானங் உப்பத்தி ஜாதி ஸஞ்ஜாதி ஓக்கந்தி அபி⁴னிப்³ப³த்தி க²ந்தா⁴னங் பாதுபா⁴வோ, அயங் ஜாதி. தத்த² கதமா ஜரா? ஜரா நாம யங் தங் க²ண்டி³ச்சங் பாலிச்சங் வலித்தசதா பவிவித்தங் சதுன்னங் மஹாபூ⁴தானங் விவண்ணதங் ப⁴க்³கோ³ தங் ஜரா ஹீயனா பஹீயனா ஆயுனோ ஹானி ஸங்ஹானி இந்த்³ரியானங் பரிபே⁴தோ³ உபனாஹோ பரிபாகோ, அயங் ஜரா. தத்த² கதமங் மரணங்? மரணங் நாம யங் தஸ்மிங் தஸ்மிங் ஸத்தனிகாயே தேஸங் தேஸங் ஸத்தானங் சுதி சவனதா மரணங் காலங்கிரியா உத்³து⁴மாதகானங் பே⁴தோ³ காயஸ்ஸ ஜீவிதிந்த்³ரியஸ்ஸ உபச்சே²தோ³, இத³ங் மரணங். இதி புரிமிகா ச ஜரா இத³ஞ்ச மரணங் தது³ப⁴யங் ஜராமரணங்.
62. Tattha katamā avijjā? Yaṃ catūsu ariyasaccesu aññāṇanti vitthārena yathā so pāṇasajjesu kathaṃkathā kātabbaṃ. Tattha katamaṃ viññāṇaṃ? Cha viññāṇakāyā vedanā saññā cetanā phasso manasikāro, idaṃ nāmaṃ. Tattha katamaṃ rūpaṃ? Cātumahābhūtikaṃ catunnaṃ mahābhūtānaṃ upādāyarūpassa paññattiṃ. Iti purimakañca nāmaṃ idañca rūpaṃ tadubhayaṃ nāmarūpanti vuccati. Tattha chaḷāyatananti cha ajjhattikāni āyatanāni, cakkhu ajjhattikaṃ āyatanaṃ yāva mano ajjhattikaṃ āyatanaṃ. Phassoti cha phassakāyā cakkhusamphasso yāva manosamphassoti phasso. Cha vedanākāyā vedanā. Taṇhāti cha taṇhākāyā taṇhā. Upādānanti cattāri upādānāni kāmupādānaṃ diṭṭhupādānaṃ sīlabbatupādānaṃ attavādupādānanti upādānaṃ. Bhavoti tayo bhavā kāmabhavo rūpabhavo arūpabhavo. Tattha katamā jāti? Yā paṭhamaṃ khandhānaṃ paṭhamaṃ dhātūnaṃ paṭhamaṃ āyatanānaṃ uppatti jāti sañjāti okkanti abhinibbatti khandhānaṃ pātubhāvo, ayaṃ jāti. Tattha katamā jarā? Jarā nāma yaṃ taṃ khaṇḍiccaṃ pāliccaṃ valittacatā pavivittaṃ catunnaṃ mahābhūtānaṃ vivaṇṇataṃ bhaggo taṃ jarā hīyanā pahīyanā āyuno hāni saṃhāni indriyānaṃ paribhedo upanāho paripāko, ayaṃ jarā. Tattha katamaṃ maraṇaṃ? Maraṇaṃ nāma yaṃ tasmiṃ tasmiṃ sattanikāye tesaṃ tesaṃ sattānaṃ cuti cavanatā maraṇaṃ kālaṅkiriyā uddhumātakānaṃ bhedo kāyassa jīvitindriyassa upacchedo, idaṃ maraṇaṃ. Iti purimikā ca jarā idañca maraṇaṃ tadubhayaṃ jarāmaraṇaṃ.
தத்த² அந்த⁴காரதிமிஸா யதா²பூ⁴தங் அப்பஜானநலக்க²ணா அவிஜ்ஜா ஸங்கா²ரானங் பத³ட்டா²னங் ஹ. அபி⁴ஸங்க²ரணலக்க²ணா ஸங்கா²ரா, உபசயபுனப்³ப⁴வாபி⁴ரோபனபச்சுபட்டா²னா. தே விஞ்ஞாணஸ்ஸ பத³ட்டா²னங். வத்து² ஸவிஞ்ஞத்திலக்க²ணங் விஞ்ஞாணங், தங் நாமரூபஸ்ஸ பத³ட்டா²னங். அனேகஸன்னிஸ்ஸயலக்க²ணங் நாமரூபங், தங் ஸளாயதனஸ்ஸ பத³ட்டா²னங். இந்த்³ரியவவத்தா²பனலக்க²ணங் ஸளாயதனங், தங் ப²ஸ்ஸஸ்ஸ பத³ட்டா²னங் . ஸன்னிபாதலக்க²ணோ ப²ஸ்ஸோ, ஸோ வேத³னாய பத³ட்டா²னங். அனுப⁴வனலக்க²ணா வேத³னா, ஸா தண்ஹாய பத³ட்டா²னங். அஜ்ஜோ²ஸானலக்க²ணா தண்ஹா, ஸா உபாதா³னஸ்ஸ பத³ட்டா²னங். ஆதா³னபரிஹனநலக்க²ணங் உபாதா³னங், தங் ப⁴வஸ்ஸ பத³ட்டா²னங் . நானாக³திவிக்கே²பலக்க²ணோ ப⁴வோ, ஸோ ஜாதியா பத³ட்டா²னங். க²ந்தா⁴னங் பாதுபா⁴வலக்க²ணா ஜாதி, ஸா ஜராய பத³ட்டா²னங். உபனயபரிபாகலக்க²ணா ஜரா, ஸா மரணஸ்ஸ பத³ட்டா²னங். ஆயுக்க²யஜீவிதஉபரோத⁴லக்க²ணங் மரணங், தங் து³க்க²ஸ்ஸ பத³ட்டா²னங். காயஸம்பீளனலக்க²ணங் து³க்க²ங், தங் தோ³மனஸ்ஸஸ்ஸ பத³ட்டா²னங். சித்தஸம்பீளனலக்க²ணங் தோ³மனஸ்ஸங், தங் ஸோகஸ்ஸ பத³ட்டா²னங். ஸோசனலக்க²ணோ ஸோகோ, ஸோ பரிதே³வஸ்ஸ பத³ட்டா²னங். வசீனிச்சா²ரணலக்க²ணோ பரிதே³வோ, ஸோ உபாயாஸஸ்ஸ பத³ட்டா²னங். யே ஆயாஸா தே உபாயாஸா.
Tattha andhakāratimisā yathābhūtaṃ appajānanalakkhaṇā avijjā saṅkhārānaṃ padaṭṭhānaṃ ha. Abhisaṅkharaṇalakkhaṇā saṅkhārā, upacayapunabbhavābhiropanapaccupaṭṭhānā. Te viññāṇassa padaṭṭhānaṃ. Vatthu saviññattilakkhaṇaṃ viññāṇaṃ, taṃ nāmarūpassa padaṭṭhānaṃ. Anekasannissayalakkhaṇaṃ nāmarūpaṃ, taṃ saḷāyatanassa padaṭṭhānaṃ. Indriyavavatthāpanalakkhaṇaṃ saḷāyatanaṃ, taṃ phassassa padaṭṭhānaṃ . Sannipātalakkhaṇo phasso, so vedanāya padaṭṭhānaṃ. Anubhavanalakkhaṇā vedanā, sā taṇhāya padaṭṭhānaṃ. Ajjhosānalakkhaṇā taṇhā, sā upādānassa padaṭṭhānaṃ. Ādānaparihananalakkhaṇaṃ upādānaṃ, taṃ bhavassa padaṭṭhānaṃ . Nānāgativikkhepalakkhaṇo bhavo, so jātiyā padaṭṭhānaṃ. Khandhānaṃ pātubhāvalakkhaṇā jāti, sā jarāya padaṭṭhānaṃ. Upanayaparipākalakkhaṇā jarā, sā maraṇassa padaṭṭhānaṃ. Āyukkhayajīvitauparodhalakkhaṇaṃ maraṇaṃ, taṃ dukkhassa padaṭṭhānaṃ. Kāyasampīḷanalakkhaṇaṃ dukkhaṃ, taṃ domanassassa padaṭṭhānaṃ. Cittasampīḷanalakkhaṇaṃ domanassaṃ, taṃ sokassa padaṭṭhānaṃ. Socanalakkhaṇo soko, so paridevassa padaṭṭhānaṃ. Vacīnicchāraṇalakkhaṇo paridevo, so upāyāsassa padaṭṭhānaṃ. Ye āyāsā te upāyāsā.
நவ பதா³னி யத்த² ஸப்³போ³ அகுஸலபக்கோ² ஸங்க³ஹங் ஸமோஸரணங் க³ச்ச²தி. கதமானி நவ பதா³னி? த்³வே மூலகிலேஸா, தீணி அகுஸலமூலானி, சத்தாரோ விபல்லாஸா. தத்த² த்³வே மூலகிலேஸா அவிஜ்ஜா ச ப⁴வதண்ஹா ச, தீணி அகுஸலமூலானி லோபோ⁴ தோ³ஸோ மோஹோ ச. சத்தாரோ விபல்லாஸா 1 – ‘‘அனிச்சே நிச்ச’’ந்தி ஸஞ்ஞாவிபல்லாஸோ சித்தவிபல்லாஸோ தி³ட்டி²விபல்லாஸோ, ‘‘து³க்கே² ஸுக²’’ந்தி ஸஞ்ஞாவிபல்லாஸோ சித்தவிபல்லாஸோ தி³ட்டி²விபல்லாஸோ, ‘‘அனத்தனி அத்தா’’தி ஸஞ்ஞாவிபல்லாஸோ சித்தவிபல்லாஸோ தி³ட்டி²விபல்லாஸோ, ‘‘அஸுபே⁴ ஸுப⁴’’ந்தி ஸஞ்ஞாவிபல்லாஸோ சித்தவிபல்லாஸோ தி³ட்டி²விபல்லாஸோ.
Nava padāni yattha sabbo akusalapakkho saṅgahaṃ samosaraṇaṃ gacchati. Katamāni nava padāni? Dve mūlakilesā, tīṇi akusalamūlāni, cattāro vipallāsā. Tattha dve mūlakilesā avijjā ca bhavataṇhā ca, tīṇi akusalamūlāni lobho doso moho ca. Cattāro vipallāsā 2 – ‘‘anicce nicca’’nti saññāvipallāso cittavipallāso diṭṭhivipallāso, ‘‘dukkhe sukha’’nti saññāvipallāso cittavipallāso diṭṭhivipallāso, ‘‘anattani attā’’ti saññāvipallāso cittavipallāso diṭṭhivipallāso, ‘‘asubhe subha’’nti saññāvipallāso cittavipallāso diṭṭhivipallāso.
63. தத்த² அவிஜ்ஜா நாம சதூஸு அரியஸச்சேஸு யதா²பூ⁴தங் அஞ்ஞாணங், அயங் அவிஜ்ஜா. ப⁴வதண்ஹா நாம யோ ப⁴வேஸு ராகோ³ ஸாராகோ³ இச்சா² முச்சா² பத்த²னா நந்தீ³ அஜ்ஜோ²ஸானங் அபரிச்சாகோ³, அயங் ப⁴வதண்ஹா.
63. Tattha avijjā nāma catūsu ariyasaccesu yathābhūtaṃ aññāṇaṃ, ayaṃ avijjā. Bhavataṇhā nāma yo bhavesu rāgo sārāgo icchā mucchā patthanā nandī ajjhosānaṃ apariccāgo, ayaṃ bhavataṇhā.
தத்த² கதமோ லோபோ⁴ அகுஸலமூலங்?
Tattha katamo lobho akusalamūlaṃ?
லோபோ⁴ நாம ஸோ தேஸு தேஸு பரவத்தூ²ஸு பரத³ப்³பே³ஸு பரட்டா²னேஸு பரஸாபதெய்யேஸு பரபரிக்³க³ஹிதேஸு லோபோ⁴ லுப்³ப⁴னா இச்சா² முச்சா² பத்த²னா நந்தீ³ அஜ்ஜோ²ஸானங் அபரிச்சாகோ³, அயங் லோபோ⁴ அகுஸலமூலங். கஸ்ஸேதங் மூலங்? லோபோ⁴ லோப⁴ஜஸ்ஸ அகுஸலஸ்ஸ காயகம்மஸ்ஸ வசீகம்மஸ்ஸ மனோகம்மஸ்ஸ ச, ததா² யதா² தங்ஸம்பயுத்தானங் சித்தசேதஸிகானங் த⁴ம்மானங் மூலங்.
Lobho nāma so tesu tesu paravatthūsu paradabbesu paraṭṭhānesu parasāpateyyesu parapariggahitesu lobho lubbhanā icchā mucchā patthanā nandī ajjhosānaṃ apariccāgo, ayaṃ lobho akusalamūlaṃ. Kassetaṃ mūlaṃ? Lobho lobhajassa akusalassa kāyakammassa vacīkammassa manokammassa ca, tathā yathā taṃsampayuttānaṃ cittacetasikānaṃ dhammānaṃ mūlaṃ.
தத்த² கதமோ தோ³ஸோ அகுஸலமூலங்?
Tattha katamo doso akusalamūlaṃ?
ஸோ ஸத்தேஸு ஆகா⁴தோ அக்க²ந்தி அப்பச்சயோ ப்³யாபாதோ³ பதோ³ஸோ அனத்த²காமதா சேதஸோ படிகா⁴தோ, அயங் தோ³ஸோ அகுஸலமூலங்.
So sattesu āghāto akkhanti appaccayo byāpādo padoso anatthakāmatā cetaso paṭighāto, ayaṃ doso akusalamūlaṃ.
கஸ்ஸேதங் மூலங்?
Kassetaṃ mūlaṃ?
தோ³ஸஜஸ்ஸ காயகம்மஸ்ஸ வசீகம்மஸ்ஸ மனோகம்மஸ்ஸ ஸம்பயுத்தானஞ்ச சித்தசேதஸிகானங் த⁴ம்மானங் மூலங்.
Dosajassa kāyakammassa vacīkammassa manokammassa sampayuttānañca cittacetasikānaṃ dhammānaṃ mūlaṃ.
தத்த² கதமோ மோஹோ அகுஸலமூலங்?
Tattha katamo moho akusalamūlaṃ?
யங் சதூஸு அரியஸச்சேஸு அனபி⁴ஸமயோ அஸம்பஜ்ஜக்³கா³ஹோ அப்படிவேதோ⁴ மோஹோ முய்ஹனா ஸம்மோஹோ ஸம்முய்ஹனா அவிஜ்ஜா தமோ அந்த⁴காரோ ஆவரணங் நீவரணங் ச²த³னங் அச்ச²த³னங் 3 அபஸச்சா²க³மனங் குஸலானங் த⁴ம்மானங், அயங் மோஹோ அகுஸலமூலங்.
Yaṃ catūsu ariyasaccesu anabhisamayo asampajjaggāho appaṭivedho moho muyhanā sammoho sammuyhanā avijjā tamo andhakāro āvaraṇaṃ nīvaraṇaṃ chadanaṃ acchadanaṃ 4 apasacchāgamanaṃ kusalānaṃ dhammānaṃ, ayaṃ moho akusalamūlaṃ.
கஸ்ஸேதங் மூலங்?
Kassetaṃ mūlaṃ?
மோஹஜஸ்ஸ அகுஸலஸ்ஸ காயகம்மஸ்ஸ வசீகம்மஸ்ஸ மனோகம்மஸ்ஸ ச தங்ஸம்பயுத்தகானஞ்ச சித்தசேதஸிகானங் த⁴ம்மானங் மூலங்.
Mohajassa akusalassa kāyakammassa vacīkammassa manokammassa ca taṃsampayuttakānañca cittacetasikānaṃ dhammānaṃ mūlaṃ.
தத்த² விபல்லாஸா ஜானிதப்³பா³, விபல்லாஸானங் வத்து² ஜானிதப்³ப³ங். யங் விபல்லாஸங் ஸியா, தங் ஜானிதப்³ப³ங். தத்த² ஏகோ விபல்லாஸோ தீணி விபல்லாஸானி சத்தாரி விபல்லாஸவத்தூ²னி. கதமோ ஏகோ விபல்லாஸோ ச, யேன படிபக்கே²ன விபல்லாஸிதங் க³ண்ஹாதி?
Tattha vipallāsā jānitabbā, vipallāsānaṃ vatthu jānitabbaṃ. Yaṃ vipallāsaṃ siyā, taṃ jānitabbaṃ. Tattha eko vipallāso tīṇi vipallāsāni cattāri vipallāsavatthūni. Katamo eko vipallāso ca, yena paṭipakkhena vipallāsitaṃ gaṇhāti?
‘‘அனிச்சே நிச்ச’’ந்தி, ‘‘து³க்கே² ஸுக²’’ந்தி, ‘‘அனத்தனி அத்தா’’தி, ‘‘அஸுபே⁴ ஸுப⁴’’ந்தி, அயங் ஏகோ விபல்லாஸோ.
‘‘Anicce nicca’’nti, ‘‘dukkhe sukha’’nti, ‘‘anattani attā’’ti, ‘‘asubhe subha’’nti, ayaṃ eko vipallāso.
கதமானி சத்தாரி விபல்லாஸவத்தூ²னி?
Katamāni cattāri vipallāsavatthūni?
காயோ வேத³னா சித்தங் த⁴ம்மா ச. இமானி சத்தாரி விபல்லாஸவத்தூ²னி.
Kāyo vedanā cittaṃ dhammā ca. Imāni cattāri vipallāsavatthūni.
கதமானி தீணி விபல்லாஸானி?
Katamāni tīṇi vipallāsāni?
ஸஞ்ஞா சித்தங் தி³ட்டி² ச. இமானி தீணி விபல்லாஸானி.
Saññā cittaṃ diṭṭhi ca. Imāni tīṇi vipallāsāni.
தத்த² மனாபிகே வத்து²ம்ஹி இந்த்³ரியவத்தே² வண்ணாயதனே வா யோ நிமித்தஸ்ஸ உக்³கா³ஹோ, அயங் ஸஞ்ஞாவிபல்லாஸோ. தத்த² விபரீதசித்தஸ்ஸ வத்து²ம்ஹி ஸதி விஞ்ஞத்தி, அயங் சித்தவிபல்லாஸோ. தத்த² விபரீதசித்தஸ்ஸ தம்ஹி ரூபே ‘‘அஸுபே⁴ ஸுப⁴’’ந்தி யா க²ந்தி ருசி உபெக்க²னா நிச்ச²யோ தி³ட்டி² நித³ஸ்ஸனங் ஸந்தீரணா, அயங் தி³ட்டி²விபல்லாஸோ. தத்த² வத்து²பே⁴தே³ன காயேஸு த்³வாத³ஸ விபல்லாஸா ப⁴வந்தி. தயோ காயே தயோ வேத³னாய தயோ சித்தே தயோ த⁴ம்மே, சத்தாரோ ஸஞ்ஞாவிபல்லாஸா சத்தாரோ சித்தவிபல்லாஸா சத்தாரோ தி³ட்டி²விபல்லாஸா, ஆயதனூபசயதோ சக்கு²விஞ்ஞாணஸஞ்ஞாஸமங்கி³ஸ்ஸ ரூபேஸு த்³வாத³ஸ விபல்லாஸா யாவ மனோ ஸஞ்ஞாஸமங்கி³ஸ்ஸ, த⁴ம்மேஸு த்³வாத³ஸ விபல்லாஸா ச² த்³வாத³ஸகா சத்தாரி விபல்லாஸா ப⁴வந்தி. ஆரம்மணனானத்ததோ ஹி அபரிமிதஸங்கெ²ய்யானங் ஸத்தானங் 5 அபரிமிதமஸங்கெ²ய்யா விபல்லாஸா ப⁴வந்தி ஹீனுக்கட்ட²மஜ்ஜி²மதாய.
Tattha manāpike vatthumhi indriyavatthe vaṇṇāyatane vā yo nimittassa uggāho, ayaṃ saññāvipallāso. Tattha viparītacittassa vatthumhi sati viññatti, ayaṃ cittavipallāso. Tattha viparītacittassa tamhi rūpe ‘‘asubhe subha’’nti yā khanti ruci upekkhanā nicchayo diṭṭhi nidassanaṃ santīraṇā, ayaṃ diṭṭhivipallāso. Tattha vatthubhedena kāyesu dvādasa vipallāsā bhavanti. Tayo kāye tayo vedanāya tayo citte tayo dhamme, cattāro saññāvipallāsā cattāro cittavipallāsā cattāro diṭṭhivipallāsā, āyatanūpacayato cakkhuviññāṇasaññāsamaṅgissa rūpesu dvādasa vipallāsā yāva mano saññāsamaṅgissa, dhammesu dvādasa vipallāsā cha dvādasakā cattāri vipallāsā bhavanti. Ārammaṇanānattato hi aparimitasaṅkheyyānaṃ sattānaṃ 6 aparimitamasaṅkheyyā vipallāsā bhavanti hīnukkaṭṭhamajjhimatāya.
64. தத்த² பஞ்சக்க²ந்தா⁴ சத்தாரி அத்தபா⁴வவத்தூ²னி ப⁴வந்தி. யோ ரூபக்க²ந்தோ⁴, ஸோ காயோ அத்தபா⁴வவத்து². யோ வேத³னாக்க²ந்தோ⁴, ஸோ வேத³னா அத்தபா⁴வவத்து². யோ ஸஞ்ஞாக்க²ந்தோ⁴ ச ஸங்கா²ரக்க²ந்தோ⁴ ச, தே த⁴ம்மா அத்தபா⁴வவத்து². யோ விஞ்ஞாணக்க²ந்தோ⁴, ஸோ சித்தங் அத்தபா⁴வவத்து². இதி பஞ்சக்க²ந்தா⁴ சத்தாரி அத்தபா⁴வவத்தூ²னி. தத்த² காயே ‘‘அஸுபே⁴ ஸுப⁴’’ந்தி விபல்லாஸோ ப⁴வதி. ஏவங் வேத³னாஸு…பே॰… சித்தே…பே॰… த⁴ம்மேஸு ச அத்தவிபல்லாஸோ ப⁴வதி. தத்த² சதுன்னங் விபல்லாஸானங் ஸமுக்³கா⁴தனத்த²ங் ப⁴க³வா சத்தாரோ ஸதிபட்டா²னே தே³ஸேதி பஞ்ஞபேதி காயே காயானுபஸ்ஸீ விஹரதோ ‘‘அஸுபே⁴ ஸுப⁴’’ந்தி விபல்லாஸங் ஸமுக்³கா⁴தேதி, ஏவங் வேத³னாஸு, சித்தே, த⁴ம்மேஸு ச காதப்³ப³ங்.
64. Tattha pañcakkhandhā cattāri attabhāvavatthūni bhavanti. Yo rūpakkhandho, so kāyo attabhāvavatthu. Yo vedanākkhandho, so vedanā attabhāvavatthu. Yo saññākkhandho ca saṅkhārakkhandho ca, te dhammā attabhāvavatthu. Yo viññāṇakkhandho, so cittaṃ attabhāvavatthu. Iti pañcakkhandhā cattāri attabhāvavatthūni. Tattha kāye ‘‘asubhe subha’’nti vipallāso bhavati. Evaṃ vedanāsu…pe… citte…pe… dhammesu ca attavipallāso bhavati. Tattha catunnaṃ vipallāsānaṃ samugghātanatthaṃ bhagavā cattāro satipaṭṭhāne deseti paññapeti kāye kāyānupassī viharato ‘‘asubhe subha’’nti vipallāsaṃ samugghāteti, evaṃ vedanāsu, citte, dhammesu ca kātabbaṃ.
தத்த² அந்த⁴காரதிமிஸா அப்படிவேத⁴லக்க²ணா அவிஜ்ஜா, தஸ்ஸா விபல்லாஸபத³ட்டா²னங். அஜ்ஜோ²ஸானலக்க²ணா தண்ஹா, தஸ்ஸா பியரூபஸாதரூபங் பத³ட்டா²னங். அத்தாஸயவஞ்சனாலக்க²ணோ லோபோ⁴, தஸ்ஸ அதி³ன்னாதா³னங் பத³ட்டா²னங். இத⁴ விவாத³லக்க²ணோ தோ³ஸோ, தஸ்ஸ பாணாதிபாதோ பத³ட்டா²னங். வத்து²விப்படிபத்திலக்க²ணோ மோஹோ, தஸ்ஸ மிச்சா²படிபத்தி பத³ட்டா²னங். ஸங்க²தானங் த⁴ம்மானங் அவினாஸக்³க³ஹணலக்க²ணா நிச்சஸஞ்ஞா, தஸ்ஸா ஸப்³ப³ஸங்கா²ரா பத³ட்டா²னங். ஸாஸவப²ஸ்ஸோபக³மனலக்க²ணா ஸுக²ஸஞ்ஞா, தஸ்ஸா மமங்காரோ பத³ட்டா²னங். த⁴ம்மேஸு உபக³மனலக்க²ணா அத்தஸஞ்ஞா , தஸ்ஸா அஹங்காரோ பத³ட்டா²னங். வண்ணஸங்க³ஹணலக்க²ணா ஸுப⁴ஸஞ்ஞா, தஸ்ஸா இந்த்³ரியஅஸங்வரோ பத³ட்டா²னங். ஏதேஹி நவஹி பதே³ஹி உத்³தி³ட்டே²ஹி ஸப்³போ³ அகுஸலபக்கோ² நித்³தி³ட்டோ² ப⁴வதி, ஸோ ச கோ² ப³ஹுஸ்ஸுதேன ஸக்கா ஜானிதுங் நோ அப்பஸ்ஸுதேன, பஞ்ஞவதா நோ து³ப்பஞ்ஞேன, யுத்தேன நோ அயுத்தேன.
Tattha andhakāratimisā appaṭivedhalakkhaṇā avijjā, tassā vipallāsapadaṭṭhānaṃ. Ajjhosānalakkhaṇā taṇhā, tassā piyarūpasātarūpaṃ padaṭṭhānaṃ. Attāsayavañcanālakkhaṇo lobho, tassa adinnādānaṃ padaṭṭhānaṃ. Idha vivādalakkhaṇo doso, tassa pāṇātipāto padaṭṭhānaṃ. Vatthuvippaṭipattilakkhaṇo moho, tassa micchāpaṭipatti padaṭṭhānaṃ. Saṅkhatānaṃ dhammānaṃ avināsaggahaṇalakkhaṇā niccasaññā, tassā sabbasaṅkhārā padaṭṭhānaṃ. Sāsavaphassopagamanalakkhaṇā sukhasaññā, tassā mamaṅkāro padaṭṭhānaṃ. Dhammesu upagamanalakkhaṇā attasaññā , tassā ahaṅkāro padaṭṭhānaṃ. Vaṇṇasaṅgahaṇalakkhaṇā subhasaññā, tassā indriyaasaṃvaro padaṭṭhānaṃ. Etehi navahi padehi uddiṭṭhehi sabbo akusalapakkho niddiṭṭho bhavati, so ca kho bahussutena sakkā jānituṃ no appassutena, paññavatā no duppaññena, yuttena no ayuttena.
நவ பதா³னி குஸலானி யத்த² ஸப்³போ³ குஸலபக்கோ² ஸங்க³ஹோ ஸமோஸரணங் க³ச்ச²ந்தி. கதமானி நவ பதா³னி? ஸமதோ² விபஸ்ஸனா அலோபோ⁴ அதோ³ஸோ அமோஹோ அனிச்சஸஞ்ஞா து³க்க²ஸஞ்ஞா அனத்தஸஞ்ஞா அஸுப⁴ஸஞ்ஞா ச.
Nava padāni kusalāni yattha sabbo kusalapakkho saṅgaho samosaraṇaṃ gacchanti. Katamāni nava padāni? Samatho vipassanā alobho adoso amoho aniccasaññā dukkhasaññā anattasaññā asubhasaññā ca.
தத்த² கதமோ ஸமதோ²? யா சித்தஸ்ஸ டி²தி ஸண்டி²தி அவட்டி²தி டா²னங் பட்டா²னங் உபட்டா²னங் ஸமாதி⁴ ஸமாதா⁴னங் அவிக்கே²போ அவிப்படிஸாரோ வூபஸமோ மானஸோ ஏகக்³க³ங் சித்தஸ்ஸ, அயங் ஸமதோ².
Tattha katamo samatho? Yā cittassa ṭhiti saṇṭhiti avaṭṭhiti ṭhānaṃ paṭṭhānaṃ upaṭṭhānaṃ samādhi samādhānaṃ avikkhepo avippaṭisāro vūpasamo mānaso ekaggaṃ cittassa, ayaṃ samatho.
தத்த² கதமா விபஸ்ஸனா? க²ந்தே⁴ஸு வா தா⁴தூஸு வா ஆயதனேஸு வா நாமரூபேஸு வா படிச்சஸமுப்பாதே³ஸு வா படிச்சஸமுப்பன்னேஸு வா த⁴ம்மேஸு து³க்கே²ஸு வா ஸமுத³யேஸு வா நிரோதே⁴ வா மக்³கே³ வா குஸலாகுஸலேஸு வா த⁴ம்மேஸு ஸாவஜ்ஜஅனவஜ்ஜேஸு வா கண்ஹஸுக்கேஸு வா ஸேவிதப்³ப³அஸேவிதப்³பே³ஸு வா ஸோ யதா²பூ⁴தங் விசயோ பவிசயோ வீமங்ஸா பரவீமங்ஸா கா³ஹனா அக்³கா³ஹனா பரிக்³கா³ஹனா சித்தேன பரிசிதனா துலனா உபபரிக்கா² ஞாணங் விஜ்ஜா வா சக்கு² பு³த்³தி⁴ மேதா⁴ பஞ்ஞா ஓபா⁴ஸோ ஆலோகோ ஆபா⁴ பபா⁴ க²க்³கோ³ நாராசோ 7 த⁴ம்மவிசயஸம்பொ³ஜ்ஜ²ங்கோ³ ஸம்மாதி³ட்டி² மக்³க³ங்க³ங், அயங் விபஸ்ஸனா. தேனேஸா விபஸ்ஸனா இதி வுச்சதி விவிதா⁴ வா ஏஸா விபஸ்ஸனாதி, தஸ்மா ஏஸா விபஸ்ஸனாதி வுச்சதி. த்³விதா⁴ சேஸா ஹி விபஸ்ஸனா த⁴ம்மவிபஸ்ஸனாதி வுச்சதி, த்³விதா⁴ இமாய பஸ்ஸதி ஸுப⁴ஞ்ச அஸுப⁴ஞ்ச கண்ஹஞ்ச ஸுக்கஞ்ச ஸேவிதப்³ப³ஞ்ச அஸேவிதப்³ப³ஞ்ச கம்மஞ்ச விபாகஞ்ச ப³ந்த⁴ஞ்ச விமொக்க²ஞ்ச ஆசயஞ்ச அபசயஞ்ச பவத்திஞ்ச நிவத்திஞ்ச ஸங்கிலேஸஞ்ச வோதா³னஞ்ச, ஏவங் விபஸ்ஸனாதி வுச்சதி. அத² வா விஇதி உபஸக்³கோ³ பஸ்ஸனாதி அத்தோ² தஸ்மா விபஸ்ஸனாதி வுச்சதே, அயங் விபஸ்ஸனா.
Tattha katamā vipassanā? Khandhesu vā dhātūsu vā āyatanesu vā nāmarūpesu vā paṭiccasamuppādesu vā paṭiccasamuppannesu vā dhammesu dukkhesu vā samudayesu vā nirodhe vā magge vā kusalākusalesu vā dhammesu sāvajjaanavajjesu vā kaṇhasukkesu vā sevitabbaasevitabbesu vā so yathābhūtaṃ vicayo pavicayo vīmaṃsā paravīmaṃsā gāhanā aggāhanā pariggāhanā cittena paricitanā tulanā upaparikkhā ñāṇaṃ vijjā vā cakkhu buddhi medhā paññā obhāso āloko ābhā pabhā khaggo nārāco 8 dhammavicayasambojjhaṅgo sammādiṭṭhi maggaṅgaṃ, ayaṃ vipassanā. Tenesā vipassanā iti vuccati vividhā vā esā vipassanāti, tasmā esā vipassanāti vuccati. Dvidhā cesā hi vipassanā dhammavipassanāti vuccati, dvidhā imāya passati subhañca asubhañca kaṇhañca sukkañca sevitabbañca asevitabbañca kammañca vipākañca bandhañca vimokkhañca ācayañca apacayañca pavattiñca nivattiñca saṃkilesañca vodānañca, evaṃ vipassanāti vuccati. Atha vā viiti upasaggo passanāti attho tasmā vipassanāti vuccate, ayaṃ vipassanā.
65. தத்த² த்³வே ரோகா³ ஸத்தானங் அவிஜ்ஜா ச ப⁴வதண்ஹா ச, ஏதேஸங் த்³வின்னங் ரோகா³னங் நிகா⁴தாய ப⁴க³வதா த்³வே பே⁴ஸஜ்ஜானி வுத்தானி ஸமதோ² ச விபஸ்ஸனா ச. இமானி த்³வே பே⁴ஸஜ்ஜானி படிஸேவெந்தோ த்³வே அரோகே³ ஸச்சி²கரோதி ராக³விராக³ங் சேதோவிமுத்திங் அவிஜ்ஜாவிராக³ஞ்ச பஞ்ஞாவிமுத்திங். தத்த² தண்ஹாரோக³ஸ்ஸ ஸமதோ² பே⁴ஸஜ்ஜங், ராக³விராகா³ சேதோவிமுத்தி அரோக³ங். அவிஜ்ஜாரோக³ஸ்ஸ விபஸ்ஸனாபே⁴ஸஜ்ஜங் அவிஜ்ஜாவிராகா³ பஞ்ஞாவிமுத்தி அரோக³ங். ஏவஞ்ஹி ப⁴க³வா சாஹ, ‘‘த்³வே த⁴ம்மா பரிஞ்ஞெய்யா 9 நாமஞ்ச ரூபஞ்ச, த்³வே த⁴ம்மா பஹாதப்³பா³ அவிஜ்ஜா ச ப⁴வதண்ஹா ச, த்³வே த⁴ம்மா பா⁴வேதப்³பா³ ஸமதோ² ச விபஸ்ஸனா ச, த்³வே த⁴ம்மா ஸச்சி²காதப்³பா³ விஜ்ஜா ச விமுத்தி சா’’தி. தத்த² ஸமத²ங் பா⁴வெந்தோ ரூபங் பரிஜானாதி, ரூபங் பரிஜானந்தோ தண்ஹங் பஜஹதி, தண்ஹங் பஜஹந்தோ ராக³விராகா³ சேதோவிமுத்திங் ஸச்சி²கரோதி, விபஸ்ஸனங் பா⁴வெந்தோ நாமங் பரிஜானாதி, நாமங் பரிஜானந்தோ அவிஜ்ஜங் பஜஹதி, அவிஜ்ஜங் பஜஹந்தோ அவிஜ்ஜாவிராகா³ பஞ்ஞாவிமுத்திங் ஸச்சி²கரோதி. யதா³ பி⁴க்கு²னோ த்³வே த⁴ம்மா பரிஞ்ஞாதா ப⁴வந்தி நாமஞ்ச ரூபஞ்ச, ததா²ஸ்ஸ த்³வே த⁴ம்மா பஹீனா ப⁴வந்தி அவிஜ்ஜா ச ப⁴வதண்ஹா ச. த்³வே த⁴ம்மா பா⁴விதா ப⁴வந்தி ஸமதோ² ச விபஸ்ஸனா ச, த்³வே த⁴ம்மா ஸச்சி²காதப்³பா³ ப⁴வந்தி விஜ்ஜா ச விமுத்தி ச. எத்தாவதா பி⁴க்கு² கதகிச்சோ ப⁴வதி. ஏஸா ஸோபாதி³ஸேஸா நிப்³பா³னதா⁴து. தஸ்ஸ ஆயுபரியாதா³னா ஜீவிதிந்த்³ரியஸ்ஸ உபரோதா⁴ இத³ஞ்ச து³க்க²ங் நிருஜ்ஜ²தி, அஞ்ஞஞ்ச து³க்க²ங் ந உப்பஜ்ஜதி. தத்த² யோ இமேஸங் க²ந்தா⁴னங் தா⁴துஆயதனானங் நிரோதோ⁴ வூபஸமோ அஞ்ஞேஸஞ்ச க²ந்த⁴தா⁴துஆயதனானங் அப்படிஸந்தி⁴ அபாதுபா⁴வோ, அயங் அனுபாதி³ஸேஸா நிப்³பா³னதா⁴து.
65. Tattha dve rogā sattānaṃ avijjā ca bhavataṇhā ca, etesaṃ dvinnaṃ rogānaṃ nighātāya bhagavatā dve bhesajjāni vuttāni samatho ca vipassanā ca. Imāni dve bhesajjāni paṭisevento dve aroge sacchikaroti rāgavirāgaṃ cetovimuttiṃ avijjāvirāgañca paññāvimuttiṃ. Tattha taṇhārogassa samatho bhesajjaṃ, rāgavirāgā cetovimutti arogaṃ. Avijjārogassa vipassanābhesajjaṃ avijjāvirāgā paññāvimutti arogaṃ. Evañhi bhagavā cāha, ‘‘dve dhammā pariññeyyā 10 nāmañca rūpañca, dve dhammā pahātabbā avijjā ca bhavataṇhā ca, dve dhammā bhāvetabbā samatho ca vipassanā ca, dve dhammā sacchikātabbā vijjā ca vimutti cā’’ti. Tattha samathaṃ bhāvento rūpaṃ parijānāti, rūpaṃ parijānanto taṇhaṃ pajahati, taṇhaṃ pajahanto rāgavirāgā cetovimuttiṃ sacchikaroti, vipassanaṃ bhāvento nāmaṃ parijānāti, nāmaṃ parijānanto avijjaṃ pajahati, avijjaṃ pajahanto avijjāvirāgā paññāvimuttiṃ sacchikaroti. Yadā bhikkhuno dve dhammā pariññātā bhavanti nāmañca rūpañca, tathāssa dve dhammā pahīnā bhavanti avijjā ca bhavataṇhā ca. Dve dhammā bhāvitā bhavanti samatho ca vipassanā ca, dve dhammā sacchikātabbā bhavanti vijjā ca vimutti ca. Ettāvatā bhikkhu katakicco bhavati. Esā sopādisesā nibbānadhātu. Tassa āyupariyādānā jīvitindriyassa uparodhā idañca dukkhaṃ nirujjhati, aññañca dukkhaṃ na uppajjati. Tattha yo imesaṃ khandhānaṃ dhātuāyatanānaṃ nirodho vūpasamo aññesañca khandhadhātuāyatanānaṃ appaṭisandhi apātubhāvo, ayaṃ anupādisesā nibbānadhātu.
தத்த² கதமங் அலோபோ⁴ குஸலமூலங்? யங்தா⁴துகோ அலோபோ⁴ அலுப்³ப⁴னா அலுப்³பி⁴தத்தங் அனிச்சா² அபத்த²னா அகந்தா அனஜ்ஜோ²ஸானங். அயங் அலோபோ⁴ குஸலமூலங். கஸ்ஸேதங் மூலங்? அலோப⁴ஜஸ்ஸ குஸலஸ்ஸ காயகம்மஸ்ஸ வசீகம்மஸ்ஸ மனோகம்மஸ்ஸ தங்ஸம்பயுத்தானஞ்ச சித்தசேதஸிகானங் த⁴ம்மானங் மூலங். அத² வா அரியோ அட்ட²ங்கி³கோ மக்³கோ³ குஸலந்தி வுச்சதி, ஸோ திண்ணங் மக்³க³ங்கா³னங் மூலங். கதமேஸங் திண்ணங், ஸம்மாஸங்கப்பஸ்ஸ ஸம்மாவாயாமஸ்ஸ ஸம்மாஸமாதி⁴ஸ்ஸ ச இமேஸங் மூலந்தி, தஸ்மா குஸலமூலந்தி வுச்சதி.
Tattha katamaṃ alobho kusalamūlaṃ? Yaṃdhātuko alobho alubbhanā alubbhitattaṃ anicchā apatthanā akantā anajjhosānaṃ. Ayaṃ alobho kusalamūlaṃ. Kassetaṃ mūlaṃ? Alobhajassa kusalassa kāyakammassa vacīkammassa manokammassa taṃsampayuttānañca cittacetasikānaṃ dhammānaṃ mūlaṃ. Atha vā ariyo aṭṭhaṅgiko maggo kusalanti vuccati, so tiṇṇaṃ maggaṅgānaṃ mūlaṃ. Katamesaṃ tiṇṇaṃ, sammāsaṅkappassa sammāvāyāmassa sammāsamādhissa ca imesaṃ mūlanti, tasmā kusalamūlanti vuccati.
தத்த² கதமங் அதோ³ஸோ குஸலமூலங்? யா ஸத்தேஸு வா ஸங்கா²ரேஸு வா அனகா⁴தோ அப்படிகா⁴தோ அப்³யாபத்தி அப்³யாபாதோ³ அதோ³ஸோ மெத்தா மெத்தாயனா அத்த²காமதா ஹிதகாமதா சேதஸோ பஸாதோ³, அயங் அதோ³ஸோ குஸலமூலங். கஸ்ஸேதங் மூலங்? அதோ³ஸஜஸ்ஸ குஸலஸ்ஸ காயகம்மஸ்ஸ வசீகம்மஸ்ஸ மனோகம்மஸ்ஸ தங்ஸம்பயுத்தானஞ்ச சித்தசேதஸிகானங் த⁴ம்மானங் மூலங். அத² வா திண்ணங் மக்³க³ங்கா³னங் மூலங். கதமேஸங் திண்ணங்? ஸம்மாவாசாய ஸம்மாகம்மந்தஸ்ஸ ஸம்மாஆஜீவஸ்ஸ ச இமேஸங் திண்ணங் மக்³க³ங்கா³னங் மூலங், தஸ்மா குஸலமூலந்தி வுச்சதி.
Tattha katamaṃ adoso kusalamūlaṃ? Yā sattesu vā saṅkhāresu vā anaghāto appaṭighāto abyāpatti abyāpādo adoso mettā mettāyanā atthakāmatā hitakāmatā cetaso pasādo, ayaṃ adoso kusalamūlaṃ. Kassetaṃ mūlaṃ? Adosajassa kusalassa kāyakammassa vacīkammassa manokammassa taṃsampayuttānañca cittacetasikānaṃ dhammānaṃ mūlaṃ. Atha vā tiṇṇaṃ maggaṅgānaṃ mūlaṃ. Katamesaṃ tiṇṇaṃ? Sammāvācāya sammākammantassa sammāājīvassa ca imesaṃ tiṇṇaṃ maggaṅgānaṃ mūlaṃ, tasmā kusalamūlanti vuccati.
தத்த² கதமங் அமோஹோ குஸலமூலங்? யங் சதூஸு அரியஸச்சேஸு யதா²பூ⁴தங் ஞாணத³ஸ்ஸனங் அபி⁴ஸமயோ ஸம்மா ச பச்சாக³மோ படிவேதோ⁴ அமோஹோ அஸம்முய்ஹனா அஸம்மோஹோ விஜ்ஜாபகாஸோ ஆலோகோ அனாவரணங் ஸெக்கா²னங் குஸலானங் த⁴ம்மானங், அயங் அமோஹோ குஸலமூலங். கஸ்ஸேதங் மூலங்? அமோஹஜஸ்ஸ குஸலஸ்ஸ காயகம்மஸ்ஸ வசீகம்மஸ்ஸ மனோகம்மஸ்ஸ தங்ஸம்பயுத்தானஞ்ச சித்தசேதஸிகானங் த⁴ம்மானங் மூலங். அத² வா த்³வின்னங் மக்³க³ங்கா³னங் ஏதங் மூலங். கதமேஸங் த்³வின்னங்? ஸம்மாதி³ட்டி²யா ச ஸம்மாஸதியா ச இமேஸங் த்³வின்னங் மக்³க³ங்கா³னங் மூலங், தஸ்மா குஸலமூலந்தி வுச்சதி. ஏவங் இமேஸங் தீஹி குஸலமூலேஹி அட்ட²ங்கி³கோ மக்³கோ³ யோஜேதப்³போ³.
Tattha katamaṃ amoho kusalamūlaṃ? Yaṃ catūsu ariyasaccesu yathābhūtaṃ ñāṇadassanaṃ abhisamayo sammā ca paccāgamo paṭivedho amoho asammuyhanā asammoho vijjāpakāso āloko anāvaraṇaṃ sekkhānaṃ kusalānaṃ dhammānaṃ, ayaṃ amoho kusalamūlaṃ. Kassetaṃ mūlaṃ? Amohajassa kusalassa kāyakammassa vacīkammassa manokammassa taṃsampayuttānañca cittacetasikānaṃ dhammānaṃ mūlaṃ. Atha vā dvinnaṃ maggaṅgānaṃ etaṃ mūlaṃ. Katamesaṃ dvinnaṃ? Sammādiṭṭhiyā ca sammāsatiyā ca imesaṃ dvinnaṃ maggaṅgānaṃ mūlaṃ, tasmā kusalamūlanti vuccati. Evaṃ imesaṃ tīhi kusalamūlehi aṭṭhaṅgiko maggo yojetabbo.
66. தத்த² கதமா அனிச்சஸஞ்ஞா? ‘‘ஸப்³பே³ ஸங்கா²ரா உப்பாத³வயத⁴ம்மினோ’’தி ச யா ஸஞ்ஞா ஸஞ்ஜானநா வவத்த²பனா உக்³கா³ஹோ, அயங் அனிச்சஸஞ்ஞா. தஸ்ஸா கோ நிஸ்ஸந்தோ³? அனிச்சஸஞ்ஞாய பா⁴விதாய ப³ஹுலீகதாய அட்ட²ஸு லோகத⁴ம்மேஸு சித்தங் நானுஸந்த⁴தி ந ஸந்த⁴தி ந ஸண்ட²ஹதி, உபெக்கா² வா படிக்கூலதா வா ஸண்ட²ஹதி, அயமஸ்ஸா நிஸ்ஸந்தோ³.
66. Tattha katamā aniccasaññā? ‘‘Sabbe saṅkhārā uppādavayadhammino’’ti ca yā saññā sañjānanā vavatthapanā uggāho, ayaṃ aniccasaññā. Tassā ko nissando? Aniccasaññāya bhāvitāya bahulīkatāya aṭṭhasu lokadhammesu cittaṃ nānusandhati na sandhati na saṇṭhahati, upekkhā vā paṭikkūlatā vā saṇṭhahati, ayamassā nissando.
தத்த² கதமா து³க்க²ஸஞ்ஞா? ‘‘ஸப்³பே³ ஸங்கா²ரா து³க்கா²’’தி யா ஸஞ்ஞா ஸஞ்ஜானநா வவத்த²பனா உக்³கா³ஹோ, அயங் து³க்க²ஸஞ்ஞா. தஸ்ஸா கோ நிஸ்ஸந்தோ³? து³க்க²ஸஞ்ஞாய பா⁴விதாய ப³ஹுலீகதாய ஆலஸ்ஸே ஸங்பமாதே³ விம்ஹயே ச சித்தங் நானுஸந்த⁴தி ந ஸந்த⁴தி ந ஸண்ட²ஹதி, உபெக்கா² வா படிக்கூலதா வா ஸண்ட²ஹதி, அயமஸ்ஸா நிஸ்ஸந்தோ³.
Tattha katamā dukkhasaññā? ‘‘Sabbe saṅkhārā dukkhā’’ti yā saññā sañjānanā vavatthapanā uggāho, ayaṃ dukkhasaññā. Tassā ko nissando? Dukkhasaññāya bhāvitāya bahulīkatāya ālasse saṃpamāde vimhaye ca cittaṃ nānusandhati na sandhati na saṇṭhahati, upekkhā vā paṭikkūlatā vā saṇṭhahati, ayamassā nissando.
தத்த² கதமா அனத்தஸஞ்ஞா? ‘‘ஸப்³பே³ஸு த⁴ம்மேஸு அனத்தா’’தி யா ஸஞ்ஞா ஸஞ்ஜானநா வவத்த²பனா உக்³கா³ஹோ, அயங் அனத்தஸஞ்ஞா. தஸ்ஸா கோ நிஸ்ஸந்தோ³, அனத்தஸஞ்ஞாய பா⁴விதாய ப³ஹுலீகதாய அஹங்காரோ சித்தங் நானுஸந்த⁴தி ந ஸந்த⁴தி, மமங்காரோ ந ஸண்ட²ஹதி, உபெக்கா² வா படிக்கூலதா வா ஸண்ட²ஹதி, அயமஸ்ஸா நிஸ்ஸந்தோ³.
Tattha katamā anattasaññā? ‘‘Sabbesu dhammesu anattā’’ti yā saññā sañjānanā vavatthapanā uggāho, ayaṃ anattasaññā. Tassā ko nissando, anattasaññāya bhāvitāya bahulīkatāya ahaṅkāro cittaṃ nānusandhati na sandhati, mamaṅkāro na saṇṭhahati, upekkhā vā paṭikkūlatā vā saṇṭhahati, ayamassā nissando.
தத்த² கதமா அஸுப⁴ஸஞ்ஞா? ‘‘ஸத்த ஸங்கா²ரா அஸுபா⁴’’தி யா ஸஞ்ஞா ஸஞ்ஜானநா வவத்த²பனா உக்³கா³ஹோ, அயங் அஸுப⁴ஸஞ்ஞா. தஸ்ஸா கோ நிஸ்ஸந்தோ³? அஸுப⁴ஸஞ்ஞாய பா⁴விதாய ப³ஹுலீகதாய ஸுப⁴னிமித்தே சித்தங் நானுஸந்த⁴தி ந ஸந்த⁴தி ந ஸண்ட²ஹதி, உபெக்கா² வா படிக்கூலதா வா ஸண்ட²ஹதி, அயமஸ்ஸா நிஸ்ஸந்தோ³.
Tattha katamā asubhasaññā? ‘‘Satta saṅkhārā asubhā’’ti yā saññā sañjānanā vavatthapanā uggāho, ayaṃ asubhasaññā. Tassā ko nissando? Asubhasaññāya bhāvitāya bahulīkatāya subhanimitte cittaṃ nānusandhati na sandhati na saṇṭhahati, upekkhā vā paṭikkūlatā vā saṇṭhahati, ayamassā nissando.
தத்த² பஞ்சன்னங் க²ந்தா⁴னங் பரிஞ்ஞா ப⁴க³வதா தே³ஸிதா, யோ தத்த² அஸுப⁴ஸஞ்ஞா ரூபக்க²ந்த⁴ஸ்ஸ பரிஞ்ஞத்தங், து³க்க²ஸஞ்ஞா வேத³னாக்க²ந்த⁴ஸ்ஸ பரிஞ்ஞத்தங், அனத்தஸஞ்ஞா ஸஞ்ஞாக்க²ந்த⁴ஸ்ஸ ஸங்கா²ரக்க²ந்த⁴ஸ்ஸ பரிஞ்ஞத்தங், அனிச்சஸஞ்ஞா விஞ்ஞாணக்க²ந்த⁴ஸ்ஸ பரிஞ்ஞத்தங். தத்த² ஸமதே²ன தண்ஹங் ஸமுக்³கா⁴தேதி, விபஸ்ஸனா அவிஜ்ஜங் ஸமுக்³கா⁴தேதி, அதோ³ஸேன தோ³ஸங் ஸமுக்³கா⁴தேதி, அமோஹேன மோஹங் ஸமுக்³கா⁴தேதி, அனிச்சஸஞ்ஞாய நிச்சஸஞ்ஞங் ஸமுக்³கா⁴தேதி, து³க்க²ஸஞ்ஞாய ஸுக²ஸஞ்ஞங் ஸமுக்³கா⁴தேதி, அனத்தஸஞ்ஞாய அத்தஸஞ்ஞங் ஸமுக்³கா⁴தேதி, அஸுப⁴ஸஞ்ஞாய ஸுப⁴ஸஞ்ஞங் ஸமுக்³கா⁴தேதி.
Tattha pañcannaṃ khandhānaṃ pariññā bhagavatā desitā, yo tattha asubhasaññā rūpakkhandhassa pariññattaṃ, dukkhasaññā vedanākkhandhassa pariññattaṃ, anattasaññā saññākkhandhassa saṅkhārakkhandhassa pariññattaṃ, aniccasaññā viññāṇakkhandhassa pariññattaṃ. Tattha samathena taṇhaṃ samugghāteti, vipassanā avijjaṃ samugghāteti, adosena dosaṃ samugghāteti, amohena mohaṃ samugghāteti, aniccasaññāya niccasaññaṃ samugghāteti, dukkhasaññāya sukhasaññaṃ samugghāteti, anattasaññāya attasaññaṃ samugghāteti, asubhasaññāya subhasaññaṃ samugghāteti.
சித்தவிக்கே²பபடிஸங்ஹரணலக்க²ணோ ஸமதோ², தஸ்ஸ ஜா²னானி பத³ட்டா²னங். ஸப்³ப³த⁴ம்மங் யதா²பூ⁴தங் படிவேத⁴லக்க²ணா விபஸ்ஸனா, தஸ்ஸா ஸப்³ப³னெய்யங் பத³ட்டா²னங். இச்சா²படிஸங்ஹரணலக்க²ணோ அலோபோ⁴, தஸ்ஸ அதி³ன்னாதா³னா வேரமணீ பத³ட்டா²னங். அப்³யாபாத³லக்க²ணோ அதோ³ஸோ, தஸ்ஸ பாணாதிபாதா வேரமணீ பத³ட்டா²னங். வத்து²அப்படிஹதலக்க²ணோ அமோஹோ, தஸ்ஸ ஸம்மாபடிபத்தி பத³ட்டா²னங். ஸங்க²தானங் த⁴ம்மானங் வினாஸக்³க³ஹணலக்க²ணா அனிச்சஸஞ்ஞா, தஸ்ஸா உத³யப்³ப³யோ பத³ட்டா²னங். ஸாஸவப²ஸ்ஸஸஞ்ஜானநலக்க²ணா து³க்க²ஸஞ்ஞா, தஸ்ஸா வேத³னா பத³ட்டா²னங். ஸப்³ப³த⁴ம்மஅனுபக³மனலக்க²ணா அனத்தஸஞ்ஞா, தஸ்ஸா த⁴ம்மஸஞ்ஞா பத³ட்டா²னங். வினீலகவிபுப்³ப³கஉத்³து⁴மாதகஸமுக்³க³ஹணலக்க²ணா அஸுப⁴ஸஞ்ஞா, தஸ்ஸா நிப்³பி³தா³ பத³ட்டா²னங். இமேஸு நவஸு பதே³ஸு உபதி³ட்டே²ஸு ஸப்³போ³ குஸலபக்கோ² உபதி³ட்டோ² ப⁴வதி, ஸோ ச ப³ஹுஸ்ஸுதேன ஸக்கா ஜானிதுங் நோ அப்பஸ்ஸுதேன, பஞ்ஞவதா நோ து³ப்பஞ்ஞேன, யுத்தேன நோ அயுத்தேனாதி.
Cittavikkhepapaṭisaṃharaṇalakkhaṇo samatho, tassa jhānāni padaṭṭhānaṃ. Sabbadhammaṃ yathābhūtaṃ paṭivedhalakkhaṇā vipassanā, tassā sabbaneyyaṃ padaṭṭhānaṃ. Icchāpaṭisaṃharaṇalakkhaṇo alobho, tassa adinnādānā veramaṇī padaṭṭhānaṃ. Abyāpādalakkhaṇo adoso, tassa pāṇātipātā veramaṇī padaṭṭhānaṃ. Vatthuappaṭihatalakkhaṇo amoho, tassa sammāpaṭipatti padaṭṭhānaṃ. Saṅkhatānaṃ dhammānaṃ vināsaggahaṇalakkhaṇā aniccasaññā, tassā udayabbayo padaṭṭhānaṃ. Sāsavaphassasañjānanalakkhaṇā dukkhasaññā, tassā vedanā padaṭṭhānaṃ. Sabbadhammaanupagamanalakkhaṇā anattasaññā, tassā dhammasaññā padaṭṭhānaṃ. Vinīlakavipubbakauddhumātakasamuggahaṇalakkhaṇā asubhasaññā, tassā nibbidā padaṭṭhānaṃ. Imesu navasu padesu upadiṭṭhesu sabbo kusalapakkho upadiṭṭho bhavati, so ca bahussutena sakkā jānituṃ no appassutena, paññavatā no duppaññena, yuttena no ayuttenāti.
67. தத்த² நிச்சஸஞ்ஞாதி⁴முத்தஸ்ஸ அபராபரங் சித்தங் பணாமெந்தோ ஸதிமபச்சவெக்க²தோ அனிச்சஸஞ்ஞா ந உபட்டா²தி, பஞ்சஸு காமகு³ணேஸு ஸுக²ஸ்ஸாதா³தி⁴முத்தஸ்ஸ இரியாபத²ஸ்ஸ அக³திமபச்சவெக்க²தோ து³க்க²ஸஞ்ஞா ந உபட்டா²தி, க²ந்த⁴தா⁴துஆயதனேஸு அத்தாதி⁴முத்தஸ்ஸ நானாதா⁴துஅனேகதா⁴துவினிப்³போ⁴க³மபச்சவெக்க²தோ அனத்தஸஞ்ஞா ந உபட்டா²தி, வண்ணஸண்டா²னாபி⁴ரதஸ்ஸ காயே ஸுபா⁴தி⁴முத்தஸ்ஸ ச விப்படிச்ச²ன்னா அஸுப⁴ஸஞ்ஞா ந உபட்டா²தி.
67. Tattha niccasaññādhimuttassa aparāparaṃ cittaṃ paṇāmento satimapaccavekkhato aniccasaññā na upaṭṭhāti, pañcasu kāmaguṇesu sukhassādādhimuttassa iriyāpathassa agatimapaccavekkhato dukkhasaññā na upaṭṭhāti, khandhadhātuāyatanesu attādhimuttassa nānādhātuanekadhātuvinibbhogamapaccavekkhato anattasaññā na upaṭṭhāti, vaṇṇasaṇṭhānābhiratassa kāye subhādhimuttassa ca vippaṭicchannā asubhasaññā na upaṭṭhāti.
அவிப்படிஸாரலக்க²ணா ஸத்³தா⁴, ஸத்³த³ஹனா பச்சுபட்டா²னங். தஸ்ஸ சத்தாரி ஸோதாபத்தியங்கா³னி பத³ட்டா²னங். ஏவஞ்ஹி வுத்தங் ப⁴க³வதா 11 ஸத்³தி⁴ந்த்³ரியங் பி⁴க்க²வே, குஹிங் த³ட்ட²ப்³ப³ங், சதூஸு ஸோதாபத்தியங்கே³ஸு குஸலேஸு த⁴ம்மேஸு.
Avippaṭisāralakkhaṇā saddhā, saddahanā paccupaṭṭhānaṃ. Tassa cattāri sotāpattiyaṅgāni padaṭṭhānaṃ. Evañhi vuttaṃ bhagavatā 12 saddhindriyaṃ bhikkhave, kuhiṃ daṭṭhabbaṃ, catūsu sotāpattiyaṅgesu kusalesu dhammesu.
ஸூராஅபடிக்கே²பனலக்க²ணங் வீரியிந்த்³ரியங், வீரியிந்த்³ரியாரம்போ⁴ பச்சுபட்டா²னங். தஸ்ஸ அதீதா சத்தாரோ ஸம்மப்பதா⁴னா பத³ட்டா²னங். யதா² வுத்தங் ப⁴க³வதா 13 வீரியிந்த்³ரியங், பி⁴க்க²வே, குஹிங் த³ட்ட²ப்³ப³ங், சதூஸு ஸம்மப்பதா⁴னேஸு.
Sūrāapaṭikkhepanalakkhaṇaṃ vīriyindriyaṃ, vīriyindriyārambho paccupaṭṭhānaṃ. Tassa atītā cattāro sammappadhānā padaṭṭhānaṃ. Yathā vuttaṃ bhagavatā 14 vīriyindriyaṃ, bhikkhave, kuhiṃ daṭṭhabbaṃ, catūsu sammappadhānesu.
ஸதி ஸரணலக்க²ணா, அஸம்மோஹபச்சுபட்டா²னா. தஸ்ஸ அதீதா சத்தாரோ ஸதிபட்டா²னா பத³ட்டா²னங். யதா² வுத்தங் ப⁴க³வதா ஸதிந்த்³ரியங் பி⁴க்க²வே, குஹிங் த³ட்ட²ப்³ப³ங், சதூஸு ஸதிபட்டா²னேஸு.
Sati saraṇalakkhaṇā, asammohapaccupaṭṭhānā. Tassa atītā cattāro satipaṭṭhānā padaṭṭhānaṃ. Yathā vuttaṃ bhagavatā satindriyaṃ bhikkhave, kuhiṃ daṭṭhabbaṃ, catūsu satipaṭṭhānesu.
ஏகக்³க³லக்க²ணோ ஸமாதி⁴, அவிக்கே²பபச்சுபட்டா²னோ, தஸ்ஸ சத்தாரி ஞாணானி பத³ட்டா²னங். யதா² வுத்தங் ப⁴க³வதா ஸமாதி⁴ந்த்³ரியங், பி⁴க்க²வே, குஹிங் த³ட்ட²ப்³ப³ங், சதூஸு ஜா²னேஸு.
Ekaggalakkhaṇo samādhi, avikkhepapaccupaṭṭhāno, tassa cattāri ñāṇāni padaṭṭhānaṃ. Yathā vuttaṃ bhagavatā samādhindriyaṃ, bhikkhave, kuhiṃ daṭṭhabbaṃ, catūsu jhānesu.
பஜானநலக்க²ணா பஞ்ஞா, பூ⁴தத்த²ஸந்தீரணா பச்சுபட்டா²னா, தஸ்ஸ சத்தாரி அரியஸச்சானி பத³ட்டா²னங். யதா² வுத்தங் ப⁴க³வதா 15 பஞ்ஞிந்த்³ரியங், பி⁴க்க²வே, குஹிங் த³ட்ட²ப்³ப³ங், சதூஸு அரியஸச்சேஸு.
Pajānanalakkhaṇā paññā, bhūtatthasantīraṇā paccupaṭṭhānā, tassa cattāri ariyasaccāni padaṭṭhānaṃ. Yathā vuttaṃ bhagavatā 16 paññindriyaṃ, bhikkhave, kuhiṃ daṭṭhabbaṃ, catūsu ariyasaccesu.
சத்தாரி சக்கானி 17 பதிரூபதே³ஸவாஸோ சக்கங், ஸப்புரிஸூபனிஸ்ஸயோ சக்கங், அத்தஸம்மாபணிதா⁴னங் சக்கங், புப்³பே³ கதபுஞ்ஞதா சக்கங். தத்த² அரியஸன்னிஸ்ஸயலக்க²ணோ பதிரூபதே³ஸவாஸோ, ஸோ ஸப்புரிஸூபனிஸ்ஸயஸ்ஸ பத³ட்டா²னங். அரியஸன்னிஸ்ஸயலக்க²ணோ ஸப்புரிஸ்ஸூபனிஸ்ஸயோ, ஸோ அத்தஸம்மாபணிதா⁴னஸ்ஸ பத³ட்டா²னங். ஸம்மாபடிபத்திலக்க²ணங் அத்தஸம்மாபணிதா⁴னங், தங் புஞ்ஞானங் பத³ட்டா²னங். குஸலத⁴ம்மோபசயலக்க²ணங் புஞ்ஞங், தங் ஸப்³ப³ஸம்பத்தீனங் பத³ட்டா²னங்.
Cattāri cakkāni 18 patirūpadesavāso cakkaṃ, sappurisūpanissayo cakkaṃ, attasammāpaṇidhānaṃ cakkaṃ, pubbe katapuññatā cakkaṃ. Tattha ariyasannissayalakkhaṇo patirūpadesavāso, so sappurisūpanissayassa padaṭṭhānaṃ. Ariyasannissayalakkhaṇo sappurissūpanissayo, so attasammāpaṇidhānassa padaṭṭhānaṃ. Sammāpaṭipattilakkhaṇaṃ attasammāpaṇidhānaṃ, taṃ puññānaṃ padaṭṭhānaṃ. Kusaladhammopacayalakkhaṇaṃ puññaṃ, taṃ sabbasampattīnaṃ padaṭṭhānaṃ.
ஏகாத³ஸஸீலமூலகா த⁴ம்மா ஸீலவதோ அவிப்படிஸாரோ ப⁴வதி…பே॰… ஸோ விமுத்திஞாணத³ஸ்ஸனங் ‘‘நாபரங் இத்த²த்தாயா’’தி பஜானநா. தத்த² வேரமணிலக்க²ணங் ஸீலங், தங் அவிப்படிஸாரஸ்ஸ பத³ட்டா²னங். ந அத்தானுவாத³லக்க²ணோ அவிப்படிஸாரோ, ஸோ பாமோஜ்ஜஸ்ஸ பத³ட்டா²னங். அபி⁴ப்பமோத³னலக்க²ணங் பாமோஜ்ஜங், தங் பீதியா பத³ட்டா²னங். அத்தமனலக்க²ணா பீதி , ஸா பஸ்ஸத்³தி⁴யா பத³ட்டா²னங். கம்மனியலக்க²ணா பஸ்ஸத்³தி⁴, ஸா ஸுக²ஸ்ஸ பத³ட்டா²னங். அப்³யாபாத³லக்க²ணங் ஸுக²ங், தங் ஸமாதி⁴னோ பத³ட்டா²னங். அவிக்கே²பனலக்க²ணோ ஸமாதி⁴, ஸோ யதா²பூ⁴தஞாணத³ஸ்ஸனஸ்ஸ பத³ட்டா²னங். அவிபரீதஸந்தீரணலக்க²ணா பஞ்ஞா, ஸா நிப்³பி³தா³ய பத³ட்டா²னங் அனாலயனலக்க²ணா நிப்³பி³தா³, ஸா விராக³ஸ்ஸ பத³ட்டா²னங். அஸங்கிலேஸலக்க²ணோ விராகோ³, ஸோ விமுத்தியா பத³ட்டா²னங். அகுஸலத⁴ம்மவிவேகலக்க²ணா விமுத்தி, ஸா விமுத்தினோ வோதா³னஸ்ஸ பத³ட்டா²னங்.
Ekādasasīlamūlakā dhammā sīlavato avippaṭisāro bhavati…pe… so vimuttiñāṇadassanaṃ ‘‘nāparaṃ itthattāyā’’ti pajānanā. Tattha veramaṇilakkhaṇaṃ sīlaṃ, taṃ avippaṭisārassa padaṭṭhānaṃ. Na attānuvādalakkhaṇo avippaṭisāro, so pāmojjassa padaṭṭhānaṃ. Abhippamodanalakkhaṇaṃ pāmojjaṃ, taṃ pītiyā padaṭṭhānaṃ. Attamanalakkhaṇā pīti , sā passaddhiyā padaṭṭhānaṃ. Kammaniyalakkhaṇā passaddhi, sā sukhassa padaṭṭhānaṃ. Abyāpādalakkhaṇaṃ sukhaṃ, taṃ samādhino padaṭṭhānaṃ. Avikkhepanalakkhaṇo samādhi, so yathābhūtañāṇadassanassa padaṭṭhānaṃ. Aviparītasantīraṇalakkhaṇā paññā, sā nibbidāya padaṭṭhānaṃ anālayanalakkhaṇā nibbidā, sā virāgassa padaṭṭhānaṃ. Asaṃkilesalakkhaṇo virāgo, so vimuttiyā padaṭṭhānaṃ. Akusaladhammavivekalakkhaṇā vimutti, sā vimuttino vodānassa padaṭṭhānaṃ.
68. சதஸ்ஸோ அரியபூ⁴மியோ சத்தாரி ஸாமஞ்ஞப²லானி. தத்த² யோ யதா²பூ⁴தங் பஜானாதி, ஏஸா த³ஸ்ஸனபூ⁴மி. ஸோதாபத்திப²லஞ்ச ஸோ யதா²பூ⁴தங் பஜானித்வா நிப்³பி³ந்த³தி, இத³ங் தனுகாமராக³ஸ்ஸ பத³ட்டா²னங் ப்³யாபாதா³னங். ஸகதா³கா³மிப²லஞ்ச ஸண்ஹங் விரஜ்ஜதி, அயங் ராக³விராகா³ சேதோவிமுத்தி. அனாகா³மிப²லஞ்ச யங் அவிஜ்ஜாவிராகா³ விமுச்சதி, அயங் கதாபூ⁴மி. அரஹத்தஞ்ச ஸாமஞ்ஞப²லானீதி கோ வசனத்தோ², அரியோ அட்ட²ங்கி³கோ மக்³கோ³ ஸாமஞ்ஞங், தஸ்ஸேதானி ப²லானி ஸாமஞ்ஞப²லானீதி வுச்சதி. கிஸ்ஸ ப்³ரஹ்மஞ்ஞப²லானீதி வுச்சந்தே? ப்³ரஹ்மஞ்ஞஅரியோ அட்ட²ங்கி³கோ மக்³கோ³, தஸ்ஸ தானி ப²லானீதி ப்³ரஹ்மஞ்ஞப²லானீதி வுச்சந்தே.
68. Catasso ariyabhūmiyo cattāri sāmaññaphalāni. Tattha yo yathābhūtaṃ pajānāti, esā dassanabhūmi. Sotāpattiphalañca so yathābhūtaṃ pajānitvā nibbindati, idaṃ tanukāmarāgassa padaṭṭhānaṃ byāpādānaṃ. Sakadāgāmiphalañca saṇhaṃ virajjati, ayaṃ rāgavirāgā cetovimutti. Anāgāmiphalañca yaṃ avijjāvirāgā vimuccati, ayaṃ katābhūmi. Arahattañca sāmaññaphalānīti ko vacanattho, ariyo aṭṭhaṅgiko maggo sāmaññaṃ, tassetāni phalāni sāmaññaphalānīti vuccati. Kissa brahmaññaphalānīti vuccante? Brahmaññaariyo aṭṭhaṅgiko maggo, tassa tāni phalānīti brahmaññaphalānīti vuccante.
தத்த² ஸோதாபன்னோ கத²ங் ஹோதி? ஸஹ ஸச்சாபி⁴ஸமயா அரியஸாவகஸ்ஸ தீணி ஸங்யோஜனானி பஹீயந்தி ஸக்காயதி³ட்டி² விசிகிச்சா² ஸீலப்³ப³தபராமாஸோ ச, இமேஸங் திண்ணங் ஸங்யோஜனானங் பஹானா பரிக்க²யா அரியஸாவகோ ஹோதி ஸோதாபன்னோ அவினிபாதத⁴ம்மோ யாவ து³க்க²ஸ்ஸந்தங் கரோதி.
Tattha sotāpanno kathaṃ hoti? Saha saccābhisamayā ariyasāvakassa tīṇi saṃyojanāni pahīyanti sakkāyadiṭṭhi vicikicchā sīlabbataparāmāso ca, imesaṃ tiṇṇaṃ saṃyojanānaṃ pahānā parikkhayā ariyasāvako hoti sotāpanno avinipātadhammo yāva dukkhassantaṃ karoti.
தத்த² கதமா ஸக்காயதி³ட்டி²? அஸ்ஸுதவா பா³லோ புது²ஜ்ஜனோ யாவ அரியத⁴ம்மே அகோவிதோ³, ஸோ ரூபங் அத்ததோ ஸமனுபஸ்ஸதி யாவ விஞ்ஞாணஸ்மிங் அத்தானங், ஸோ இமேஸு பஞ்சஸு க²ந்தே⁴ஸு அத்தக்³கா³ஹோ வா அத்தனியக்³கா³ஹோ வா ஏஸோஹமஸ்மி ஏகஸ்மிங் வஸவத்திகோ 19 பக்கி²த்தோ அனுக்³க³ஹோ அனுஸயந்தோ அங்க³மங்க³ந்தி பரதி. யா ததா²பூ⁴தஸ்ஸ க²ந்தி ருசி பெக்க²னா ஆகாரபரிவிதக்கோ தி³ட்டி²னிஜ்ஜா²யனா அபி⁴ப்பஸன்னா, அயங் வுச்சதே ஸக்காயதி³ட்டீ²தி.
Tattha katamā sakkāyadiṭṭhi? Assutavā bālo puthujjano yāva ariyadhamme akovido, so rūpaṃ attato samanupassati yāva viññāṇasmiṃ attānaṃ, so imesu pañcasu khandhesu attaggāho vā attaniyaggāho vā esohamasmi ekasmiṃ vasavattiko 20 pakkhitto anuggaho anusayanto aṅgamaṅganti parati. Yā tathābhūtassa khanti ruci pekkhanā ākāraparivitakko diṭṭhinijjhāyanā abhippasannā, ayaṃ vuccate sakkāyadiṭṭhīti.
தத்த² பஞ்ச தி³ட்டி²யோ உச்சே²த³ங் ப⁴ஜந்தி. கதமாயோ பஞ்ச? ரூபங் அத்ததோ ஸமனுபஸ்ஸதி, யாவ விஞ்ஞாணங் அத்ததோ ஸமனுபஸ்ஸதி, இமாயோ பஞ்ச உச்சே²த³ங் ப⁴ஜந்தி, அவஸேஸாயோ பன்னரஸ ஸஸ்ஸதங் ப⁴ஜந்தி. இதி ஸக்காயதி³ட்டி²பஹானா த்³வாஸட்டி²தி³ட்டி²க³தானி பஹீயந்தி. பஹானா உச்சே²த³ங் ஸஸ்ஸதஞ்ச ந ப⁴ஜதி. இதி உச்சே²த³ஸஸ்ஸதப்பஹானா அரியஸாவகஸ்ஸ ந கிஞ்சி தி³ட்டி²க³தங் ப⁴வதி, அஞ்ஞா வா லோகுத்தராய ஸம்மாதி³ட்டி²யா. கத²ங் பன ஸக்காயதி³ட்டி² ந ப⁴வதி? இத⁴ அரியஸாவகோ ஸுதவா ஹோதி, ஸப்³போ³ ஸுக்கபக்கோ² காதப்³போ³, யாவ அரியத⁴ம்மேஸு கோவிதோ³ ரூபங் அனத்ததோ ஸமனுபஸ்ஸதி, யாவ விஞ்ஞாணங்…பே॰… ஏவமஸ்ஸ ஸமனுபஸ்ஸந்தஸ்ஸ ஸக்காயதி³ட்டி² ந ப⁴வதி.
Tattha pañca diṭṭhiyo ucchedaṃ bhajanti. Katamāyo pañca? Rūpaṃ attato samanupassati, yāva viññāṇaṃ attato samanupassati, imāyo pañca ucchedaṃ bhajanti, avasesāyo pannarasa sassataṃ bhajanti. Iti sakkāyadiṭṭhipahānā dvāsaṭṭhidiṭṭhigatāni pahīyanti. Pahānā ucchedaṃ sassatañca na bhajati. Iti ucchedasassatappahānā ariyasāvakassa na kiñci diṭṭhigataṃ bhavati, aññā vā lokuttarāya sammādiṭṭhiyā. Kathaṃ pana sakkāyadiṭṭhi na bhavati? Idha ariyasāvako sutavā hoti, sabbo sukkapakkho kātabbo, yāva ariyadhammesu kovido rūpaṃ anattato samanupassati, yāva viññāṇaṃ…pe… evamassa samanupassantassa sakkāyadiṭṭhi na bhavati.
கத²ங் விசிகிச்சா² ந ப⁴வதி? இத⁴ அரியஸாவகோ பு³த்³தே⁴ ந கங்க²தி, ந விசிகிச்ச²தி அபி⁴ப்பஸீத³தி, இதிபி ஸோ ப⁴க³வாதி ஸப்³ப³ங். த⁴ம்மே ந கங்க²தி ந விசிகிச்ச²தி ஸப்³ப³ங். யாவ தண்ஹக்க²யோ விராகோ³ நிரோதோ⁴ நிப்³பா³னந்தி, இமினா து³தியேன ஆகங்கி²யேன த⁴ம்மேன ஸமன்னாக³தோ ஹோதி. ஸங்கே⁴ ந கங்க²தி…பே॰… யாவ பூஜா தே³வானஞ்ச மனுஸ்ஸானஞ்சாதி, இமினா ததியேன ஆகங்கி²யேன த⁴ம்மேன ஸமன்னாக³தோ ஹோதி.
Kathaṃ vicikicchā na bhavati? Idha ariyasāvako buddhe na kaṅkhati, na vicikicchati abhippasīdati, itipi so bhagavāti sabbaṃ. Dhamme na kaṅkhati na vicikicchati sabbaṃ. Yāva taṇhakkhayo virāgo nirodho nibbānanti, iminā dutiyena ākaṅkhiyena dhammena samannāgato hoti. Saṅghe na kaṅkhati…pe… yāva pūjā devānañca manussānañcāti, iminā tatiyena ākaṅkhiyena dhammena samannāgato hoti.
ஸப்³பே³ ஸங்கா²ரா து³க்கா²தி ந கங்க²தி ந விசிகிச்ச²தி அதி⁴முச்சதி அபி⁴ப்பஸீத³தி. தண்ஹா து³க்க²ஸமுத³யோதி ந கங்க²தி ந விசிகிச்ச²தி. தண்ஹானிரோதா⁴ து³க்க²னிரோதோ⁴தி ந கங்க²தி ந விசிகிச்ச²தி. அரியோ அட்ட²ங்கி³கோ மக்³கோ³ து³க்க²னிரோத⁴கா³மினீ படிபதா³தி ந கங்க²தி ந விசிகிச்ச²தி அதி⁴முச்சதி அபி⁴ப்பஸீத³தி. யாவ பு³த்³தே⁴ வா த⁴ம்மே வா ஸங்கே⁴ வா து³க்கே² வா ஸமுத³யே வா நிரோதே⁴ வா மக்³கே³ வா கங்கா²யனா விமதி விசிகிச்சா² த்³வேதா⁴பதா² ஆஸப்பனா 21 பரிஸப்பனா அனவட்டா²னங் அதி⁴ட்டா²க³மனங் 22 அனேகங்ஸோ அனேகங்ஸிகதா, தே தஸ்ஸ பஹீனா ப⁴வந்தி பணுன்னா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா.
Sabbe saṅkhārā dukkhāti na kaṅkhati na vicikicchati adhimuccati abhippasīdati. Taṇhā dukkhasamudayoti na kaṅkhati na vicikicchati. Taṇhānirodhā dukkhanirodhoti na kaṅkhati na vicikicchati. Ariyo aṭṭhaṅgiko maggo dukkhanirodhagāminī paṭipadāti na kaṅkhati na vicikicchati adhimuccati abhippasīdati. Yāva buddhe vā dhamme vā saṅghe vā dukkhe vā samudaye vā nirodhe vā magge vā kaṅkhāyanā vimati vicikicchā dvedhāpathā āsappanā 23 parisappanā anavaṭṭhānaṃ adhiṭṭhāgamanaṃ 24 anekaṃso anekaṃsikatā, te tassa pahīnā bhavanti paṇunnā ucchinnamūlā tālāvatthukatā anabhāvaṃkatā āyatiṃ anuppādadhammā.
69. தத்த² ஸீலப்³ப³தபராமாஸோ த்³விதா⁴ – ஸீலஸ்ஸ வா ஸுத்³த⁴ஸ்ஸ வா. தத்த² ஸீலஸ்ஸ ஸீலப்³ப³தபராமாஸோ இமினாஹங் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா தத்த² கபோதபாதா³ஹி அச்ச²ராஹி ஸத்³தி⁴ங் கீளிஸ்ஸாமி ரமிஸ்ஸாமி பரிசரிஸ்ஸாமீதி. யதா²பூ⁴தத³ஸ்ஸனந்தி ருசிவிமுத்தி ராகோ³ ராக³பரிவத்தகா தி³ட்டி²ரூபனா பஸ்ஸனா அஸந்துஸ்ஸிதஸ்ஸ ஸீலப்³ப³தபராமாஸோ. தத்த² கதமோ ஸுத்³த⁴ஸ்ஸ ஸீலப்³ப³தபராமாஸோ? இதே⁴கச்சோ ஸீலங் பராமஸதி, ஸீலேன ஸுஜ்ஜ²தி, ஸீலேன நீயதி, ஸீலேன முச்சதி, ஸுக²ங் வீதிக்கமதி, து³க்க²ங் வீதிக்கமதி, ஸுக²து³க்க²ங் வீதிக்கமதி அனுபாபுணாதி உபரிமேன. தது³ப⁴யங் ஸீலவதங் பராமஸதி தது³ப⁴யேன ஸீலவதேன ஸுஜ்ஜ²ந்தி முச்சந்தி நீயந்தி, ஸுக²ங் வீதிக்கமந்தி, து³க்க²ங் வீதிக்கமந்தி, ஸுக²து³க்க²ங் வீதிக்கமந்தி, அனுபாபுணந்தீதி அவிஸுசிகரங் த⁴ம்மங் அவிமுத்திகரங் த⁴ம்மங் விஸுசிதோ விமுத்திதோ பச்சாக³ச்ச²ந்தஸ்ஸ யா ததா²பூ⁴தஸ்ஸ க²ந்தி ருசி முத்தி பெக்க²னா ஆகாரபரிவிதக்கோ தி³ட்டி²னிஜ்ஜா²யனா பஸ்ஸனா, அயங் ஸுத்³த⁴ஸ்ஸ ஸீலப்³ப³தபராமாஸோ. ஏதே உபோ⁴ பராமாஸா அரியஸாவகஸ்ஸ பஹீனா ப⁴வந்தி யாவ ஆயதிங் அனுப்பாத³த⁴ம்மா, ஸோ ஸீலவா ப⁴வதி அரியகந்தேஹி ஸீலேஹி ஸமன்னாக³தோ அக்க²ண்டே³ஹி யாவ உபஸமஸங்வத்தனிகேஹி. இமேஸங் திண்ணங் ஸங்யோஜனானங் பஹானா ஸுதவா அரியஸாவகோ ப⁴வதி ஸோதாபன்னோ அவினிபாதத⁴ம்மோ, ஸப்³ப³ங்.
69. Tattha sīlabbataparāmāso dvidhā – sīlassa vā suddhassa vā. Tattha sīlassa sīlabbataparāmāso imināhaṃ sīlena vā vatena vā tapena vā brahmacariyena vā devo vā bhavissāmi devaññataro vā tattha kapotapādāhi accharāhi saddhiṃ kīḷissāmi ramissāmi paricarissāmīti. Yathābhūtadassananti rucivimutti rāgo rāgaparivattakā diṭṭhirūpanā passanā asantussitassa sīlabbataparāmāso. Tattha katamo suddhassa sīlabbataparāmāso? Idhekacco sīlaṃ parāmasati, sīlena sujjhati, sīlena nīyati, sīlena muccati, sukhaṃ vītikkamati, dukkhaṃ vītikkamati, sukhadukkhaṃ vītikkamati anupāpuṇāti uparimena. Tadubhayaṃ sīlavataṃ parāmasati tadubhayena sīlavatena sujjhanti muccanti nīyanti, sukhaṃ vītikkamanti, dukkhaṃ vītikkamanti, sukhadukkhaṃ vītikkamanti, anupāpuṇantīti avisucikaraṃ dhammaṃ avimuttikaraṃ dhammaṃ visucito vimuttito paccāgacchantassa yā tathābhūtassa khanti ruci mutti pekkhanā ākāraparivitakko diṭṭhinijjhāyanā passanā, ayaṃ suddhassa sīlabbataparāmāso. Ete ubho parāmāsā ariyasāvakassa pahīnā bhavanti yāva āyatiṃ anuppādadhammā, so sīlavā bhavati ariyakantehi sīlehi samannāgato akkhaṇḍehi yāva upasamasaṃvattanikehi. Imesaṃ tiṇṇaṃ saṃyojanānaṃ pahānā sutavā ariyasāvako bhavati sotāpanno avinipātadhammo, sabbaṃ.
ஸஹஸச்சாபி⁴ஸமயா, இதி கோ வசனத்தோ²? சத்தாரோ அபி⁴ஸமயா, பரிஞ்ஞாபி⁴ஸமயோ பஹானாபி⁴ஸமயோ ஸச்சி²கிரியாபி⁴ஸமயோ பா⁴வனாபி⁴ஸமயோ.
Sahasaccābhisamayā, iti ko vacanattho? Cattāro abhisamayā, pariññābhisamayo pahānābhisamayo sacchikiriyābhisamayo bhāvanābhisamayo.
தத்த² அரியஸாவகோ து³க்க²ங் பரிஞ்ஞாபி⁴ஸமயேன அபி⁴ஸமேதி, ஸமுத³யங் பஹானாபி⁴ஸமயேன அபி⁴ஸமேதி, நிரோத⁴ங் ஸச்சி²கிரியாபி⁴ஸமயேன அபி⁴ஸமேதி, மக்³க³ங் பா⁴வனாபி⁴ஸமயேன அபி⁴ஸமேதி. கிங் காரணங்? து³க்க²ஸ்ஸ பரிஞ்ஞாபி⁴ஸமயோ, ஸமுத³யஸ்ஸ பஹானாபி⁴ஸமயோ, நிரோத⁴ஸ்ஸ ஸச்சி²கிரியாபி⁴ஸமயோ, மக்³க³ஸ்ஸ பா⁴வனாபி⁴ஸமயோ. ஸமத²விபஸ்ஸனாய கத²ங் அபி⁴ஸமேதி? ஆரம்மணே சித்தங் உபனிப³ந்தெ⁴த்வா பஞ்சக்க²ந்தே⁴ து³க்க²தோ பஸ்ஸதி. தத்த² யோ உபனிப³ந்தோ⁴, அயங் ஸமதோ². யா பரியோகா³ஹனா, அயங் விபஸ்ஸனா. பஞ்சக்க²ந்தே⁴ து³க்கா²தி பஸ்ஸதோ யோ பஞ்சக்க²ந்தே⁴ஸு ஆலயோ நிகந்தி உபக³மனங் அஜ்ஜோ²ஸானா இச்சா² முச்சா² பணிதி⁴ பத்த²னா பஹீயதி. தத்த² பஞ்சக்க²ந்தா⁴ து³க்க²ங். யோ தத்த² ஆலயோ நிகந்தி உபக³மனங் அஜ்ஜோ²ஸானங் இச்சா² முச்சா² பணிதி⁴ பத்த²னா, அயங் ஸமுத³யோ. யங் தஸ்ஸ பஹானங், ஸோ நிரோதோ⁴ ஸமதோ² விபஸ்ஸனா ச மக்³கோ³, ஏவங் தேஸங் சதுன்னங் அரியஸச்சானங் ஏககாலே ஏகக்க²ணே ஏகசித்தே அபுப்³ப³ங் அசரிமங் அபி⁴ஸமயோ ப⁴வதி. தேனாஹ ப⁴க³வா ‘‘ஸஹஸச்சாபி⁴ஸமயா அரியஸாவகஸ்ஸ தீணி ஸங்யோஜனானி பஹீயந்தீ’’தி.
Tattha ariyasāvako dukkhaṃ pariññābhisamayena abhisameti, samudayaṃ pahānābhisamayena abhisameti, nirodhaṃ sacchikiriyābhisamayena abhisameti, maggaṃ bhāvanābhisamayena abhisameti. Kiṃ kāraṇaṃ? Dukkhassa pariññābhisamayo, samudayassa pahānābhisamayo, nirodhassa sacchikiriyābhisamayo, maggassa bhāvanābhisamayo. Samathavipassanāya kathaṃ abhisameti? Ārammaṇe cittaṃ upanibandhetvā pañcakkhandhe dukkhato passati. Tattha yo upanibandho, ayaṃ samatho. Yā pariyogāhanā, ayaṃ vipassanā. Pañcakkhandhe dukkhāti passato yo pañcakkhandhesu ālayo nikanti upagamanaṃ ajjhosānā icchā mucchā paṇidhi patthanā pahīyati. Tattha pañcakkhandhā dukkhaṃ. Yo tattha ālayo nikanti upagamanaṃ ajjhosānaṃ icchā mucchā paṇidhi patthanā, ayaṃ samudayo. Yaṃ tassa pahānaṃ, so nirodho samatho vipassanā ca maggo, evaṃ tesaṃ catunnaṃ ariyasaccānaṃ ekakāle ekakkhaṇe ekacitte apubbaṃ acarimaṃ abhisamayo bhavati. Tenāha bhagavā ‘‘sahasaccābhisamayā ariyasāvakassa tīṇi saṃyojanāni pahīyantī’’ti.
70. தத்த² ஸமத²விபஸ்ஸனா யுக³னத்³தா⁴ வத்தமானா ஏககாலே ஏகக்க²ணே ஏகசித்தே சத்தாரி கிச்சானி கரோதி, து³க்க²ங் பரிஞ்ஞாபி⁴ஸமயேன அபி⁴ஸமேதி, யாவ மக்³க³ங் பா⁴வனாபி⁴ஸமயேன அபி⁴ஸமேதி. கிங் காரணா? து³க்க²ங் பரிஞ்ஞாபி⁴ஸமயோ, யாவ மக்³க³ங் பா⁴வனாபி⁴ஸமயோ. ஏவங் தி³ட்ட²ந்தோ யதா² நாவா ஜலங் க³ச்ச²ந்தீ சத்தாரி கிச்சானி கரோதி, பாரிமங் தீரங் பாபேதி, ஓரிமங் தீரங் ஜஹதி, பா⁴ரங் வஹதி, ஸோதங் சி²ந்த³தி; ஏவமேவ ஸமத²விபஸ்ஸனா யுக³னத்³தா⁴ வத்தமானா ஏககாலே ஏகக்க²ணே ஏகசித்தே சத்தாரி கிச்சானி கரோதி , து³க்க²ங் பரிஞ்ஞாபி⁴ஸமயேன அபி⁴ஸமேதி, யாவ மக்³க³ங் பா⁴வனாபி⁴ஸமயேன அபி⁴ஸமேதி. யதா² வா ஸூரியோ உத³யந்தோ ஏககாலே அபுப்³ப³ங் அசரிமங் சத்தாரி கிச்சானி கரோதி, அந்த⁴காரங் வித⁴மதி, ஆலோகங் பாதுகரோதி, ரூபங் நித³ஸ்ஸீயதி, ஸீதங் பரியாதி³யதி; ஏவமேவ ஸமத²விபஸ்ஸனா யுக³னத்³தா⁴ வத்தமானா ஏககாலே…பே॰… யதா² பதீ³போ ஜலந்தோ ஏககாலே அபுப்³ப³ங் அசரிமங் சத்தாரி கிச்சானி கரோதி, அந்த⁴காரங் வித⁴மதி, ஆலோகங் பாதுகரோதி, ரூபங் நித³ஸ்ஸீயதி, உபாதா³னங் பரியாதி³யதி; ஏவமேவ ஸமத²விபஸ்ஸனா யுக³னத்³தா⁴ வத்தமானா ஏககாலே…பே॰….
70. Tattha samathavipassanā yuganaddhā vattamānā ekakāle ekakkhaṇe ekacitte cattāri kiccāni karoti, dukkhaṃ pariññābhisamayena abhisameti, yāva maggaṃ bhāvanābhisamayena abhisameti. Kiṃ kāraṇā? Dukkhaṃ pariññābhisamayo, yāva maggaṃ bhāvanābhisamayo. Evaṃ diṭṭhanto yathā nāvā jalaṃ gacchantī cattāri kiccāni karoti, pārimaṃ tīraṃ pāpeti, orimaṃ tīraṃ jahati, bhāraṃ vahati, sotaṃ chindati; evameva samathavipassanā yuganaddhā vattamānā ekakāle ekakkhaṇe ekacitte cattāri kiccāni karoti , dukkhaṃ pariññābhisamayena abhisameti, yāva maggaṃ bhāvanābhisamayena abhisameti. Yathā vā sūriyo udayanto ekakāle apubbaṃ acarimaṃ cattāri kiccāni karoti, andhakāraṃ vidhamati, ālokaṃ pātukaroti, rūpaṃ nidassīyati, sītaṃ pariyādiyati; evameva samathavipassanā yuganaddhā vattamānā ekakāle…pe… yathā padīpo jalanto ekakāle apubbaṃ acarimaṃ cattāri kiccāni karoti, andhakāraṃ vidhamati, ālokaṃ pātukaroti, rūpaṃ nidassīyati, upādānaṃ pariyādiyati; evameva samathavipassanā yuganaddhā vattamānā ekakāle…pe….
யதா³ அரியஸாவகோ ஸோதாபன்னோ ப⁴வதி அவினிபாதத⁴ம்மோ நியதோ யாவ து³க்க²ஸ்ஸந்தங் கரோதி, அயங் த³ஸ்ஸனபூ⁴மி. ஸோதாபத்திப²லஞ்ச ஸோதாபத்திப²லே டி²தோ உத்தரி ஸமத²விபஸ்ஸனங் பா⁴வெந்தோ யுக³னத்³தா⁴ வத்தமானா காமராக³ப்³யாபாதா³னங் யேபு⁴ய்யேன பஹானா அரியஸாவகோ ஹோதி. ஸகதா³கா³மி பரினிட்டி²தத்தா ஸகிதே³வ இமங் லோகங் ஆக³ந்த்வா து³க்க²ஸ்ஸந்தங் கரோதி, அயங் தனுபூ⁴மி.
Yadā ariyasāvako sotāpanno bhavati avinipātadhammo niyato yāva dukkhassantaṃ karoti, ayaṃ dassanabhūmi. Sotāpattiphalañca sotāpattiphale ṭhito uttari samathavipassanaṃ bhāvento yuganaddhā vattamānā kāmarāgabyāpādānaṃ yebhuyyena pahānā ariyasāvako hoti. Sakadāgāmi pariniṭṭhitattā sakideva imaṃ lokaṃ āgantvā dukkhassantaṃ karoti, ayaṃ tanubhūmi.
ஸகதா³கா³மிப²லஞ்ச யோ ஸகதா³கா³மிப²லே டி²தோ விபஸ்ஸனங் பா⁴வெந்தோ காமராக³ப்³யாபாதே³ ஸானுஸயே அனவஸேஸங் பஜஹதி, காமராக³ப்³யாபாதே³ஸு அனவஸேஸங் பஹீனேஸு பஞ்சோரம்பா⁴கி³யானி ஸங்யோஜனானி பஹீனானி ப⁴வந்தி ஸக்காயதி³ட்டி² ஸீலப்³ப³தபராமாஸோ விசிகிச்சா² காமச்ச²ந்தோ³ ப்³யாபாதோ³ ச, இமேஸங் பஞ்சன்னங் ஓரம்பா⁴கி³யானங் ஸங்யோஜனானங் பஹானா 25 அரியஸாவகோ ஹோதி அனாகா³மீ தத்த² பரினிப்³பா³யீ அனாவத்தித⁴ம்மோ தஸ்மா லோகா, அயங் வீதராக³பூ⁴மி.
Sakadāgāmiphalañca yo sakadāgāmiphale ṭhito vipassanaṃ bhāvento kāmarāgabyāpāde sānusaye anavasesaṃ pajahati, kāmarāgabyāpādesu anavasesaṃ pahīnesu pañcorambhāgiyāni saṃyojanāni pahīnāni bhavanti sakkāyadiṭṭhi sīlabbataparāmāso vicikicchā kāmacchando byāpādo ca, imesaṃ pañcannaṃ orambhāgiyānaṃ saṃyojanānaṃ pahānā 26 ariyasāvako hoti anāgāmī tattha parinibbāyī anāvattidhammo tasmā lokā, ayaṃ vītarāgabhūmi.
அனாகா³மிப²லஞ்ச அனாகா³மிப²லே டி²தோ உத்தரி ஸமத²விபஸ்ஸனங் பா⁴வெந்தோ பஞ்ச உத்³த⁴ம்பா⁴கி³யானி ஸங்யோஜனானி பஜஹதி ரூபராக³அரூபராக³மானஉத்³த⁴ச்சஅவிஜ்ஜஞ்ச. இமேஸங் பஞ்சன்னங் உத்³த⁴ம்பா⁴கி³யானங் ஸங்யோஜனானங் பஹானா அரியஸாவகோ அரஹா ப⁴வதி, கீ²ணாஸவோ வுஸிதவா ஸம்மத³ஞ்ஞா 27 விமுத்தோ பரிக்கீ²ணப⁴வஸங்யோஜனோ அனுப்பத்தஸத³த்தோ², அயங் கதாபூ⁴மி.
Anāgāmiphalañca anāgāmiphale ṭhito uttari samathavipassanaṃ bhāvento pañca uddhambhāgiyāni saṃyojanāni pajahati rūparāgaarūparāgamānauddhaccaavijjañca. Imesaṃ pañcannaṃ uddhambhāgiyānaṃ saṃyojanānaṃ pahānā ariyasāvako arahā bhavati, khīṇāsavo vusitavā sammadaññā 28 vimutto parikkhīṇabhavasaṃyojano anuppattasadattho, ayaṃ katābhūmi.
அரஹந்தோவ அயங் ஸோபாதி³ஸேஸா நிப்³பா³னதா⁴து. தஸ்ஸ ஆயுக்க²யா ஜீவிதிந்த்³ரியாபரோதா⁴ இத³ஞ்ச து³க்க²ங் நிருஜ்ஜ²தி, அஞ்ஞஞ்ச து³க்க²ங் ந உப்பஜ்ஜதி. யோ இமஸ்ஸ து³க்க²ஸ்ஸ நிரோதோ⁴ வூபஸமோ, அஞ்ஞஸ்ஸ ச அபாதுபா⁴வோ, அயங் அனுபாதி³ஸேஸா நிப்³பா³னதா⁴து. இமா த்³வே நிப்³பா³னதா⁴துயோ. இதி ஸச்சானி வுத்தானி. ஸச்சாபி⁴ஸமயோ வுத்தோ, கிலேஸவவத்தா²னங் வுத்தங், பஹானங் வுத்தங், பூ⁴மியோ வுத்தா, ப²லானி வுத்தானி, நிப்³பா³னதா⁴துயோ வுத்தா. ஏவமிமேஸு வுத்தேஸு ஸப்³ப³போ³தி⁴ வுத்தா ப⁴வதி. எத்த² யோகோ³ கரணீயோ.
Arahantova ayaṃ sopādisesā nibbānadhātu. Tassa āyukkhayā jīvitindriyāparodhā idañca dukkhaṃ nirujjhati, aññañca dukkhaṃ na uppajjati. Yo imassa dukkhassa nirodho vūpasamo, aññassa ca apātubhāvo, ayaṃ anupādisesā nibbānadhātu. Imā dve nibbānadhātuyo. Iti saccāni vuttāni. Saccābhisamayo vutto, kilesavavatthānaṃ vuttaṃ, pahānaṃ vuttaṃ, bhūmiyo vuttā, phalāni vuttāni, nibbānadhātuyo vuttā. Evamimesu vuttesu sabbabodhi vuttā bhavati. Ettha yogo karaṇīyo.
71. தத்த² கதமாயோ நவ அனுபுப்³ப³ஸமாபத்தியோ? சத்தாரி ஜா²னானி சதஸ்ஸோ ச அரூபஸமாபத்தியோ நிரோத⁴ஸமாபத்தி ச. தத்த² சத்தாரி ஜா²னானி கதமானி? இத⁴, பி⁴க்க²வே, 29 பி⁴க்கு² விவிச்சேவ காமேஹீதி வித்தா²ரேன காதப்³பா³னி. தத்த² கதமா சத்தாரோ அரூபஸமாபத்தியோ? விராகி³னோ வத வத்தப்³போ³, யாவ நிரோத⁴ஸமாபத்தி வித்தா²ரேன காதப்³பா³. இமாயோ நவ அனுபுப்³ப³ஸமாபத்தியோ.
71. Tattha katamāyo nava anupubbasamāpattiyo? Cattāri jhānāni catasso ca arūpasamāpattiyo nirodhasamāpatti ca. Tattha cattāri jhānāni katamāni? Idha, bhikkhave, 30 bhikkhu vivicceva kāmehīti vitthārena kātabbāni. Tattha katamā cattāro arūpasamāpattiyo? Virāgino vata vattabbo, yāva nirodhasamāpatti vitthārena kātabbā. Imāyo nava anupubbasamāpattiyo.
தத்த² கதமங் பட²மங் ஜா²னங்? பஞ்சங்க³விப்பயுத்தங் பஞ்சங்க³ஸமன்னாக³தங். கதமேஹி பஞ்சஹி அங்கே³ஹி விப்பயுத்தங்? பஞ்சஹி நீவரணேஹி. தத்த² கதமானி பஞ்ச நீவரணானி? காமச்ச²ந்தோ³தி வித்தா²ரேதப்³போ³. தத்த² கதமோ காமச்ச²ந்தோ³? யோ பஞ்சஸு காமகு³ணேஸு ச²ந்த³ராகோ³ பேமங் நிகந்தி அஜ்ஜோ²ஸானங் இச்சா² முச்சா² பத்த²னா அபரிச்சாகோ³ அனுஸயோ பரியுட்டா²னங், அயங் காமச்ச²ந்த³னீவரணங். தத்த² கதமங் ப்³யாபாத³னீவரணங்? யோ ஸத்தேஸு ஸங்கா²ரேஸு ச ஆகா⁴தோ…பே॰… யதா² தோ³ஸே ததா² நிஒட்டா²னா, அயங் ப்³யாபாதோ³ நீவரணங். தத்த² கதமங் மித்³த⁴ங்? யா சித்தஸ்ஸ ஜளதா சித்தஸ்ஸ க³ருத்தங் சித்தஸ்ஸ அகம்மனீயதா சித்தஸ்ஸ நிக்கே²போ நித்³தா³யனா பசலிகதா பசலாயனா பசலாயனங், இத³ங் மித்³த⁴ங். தத்த² கதமங் தி²னங் 31? யா காயஸ்ஸ தி²னதா ஜளதா காயஸ்ஸ க³ருத்தா காயஸ்ஸ அப்பஸ்ஸத்³தி⁴, இத³ங் தி²னங். இதி இத³ஞ்ச தி²னங் புரிமகஞ்ச மித்³த⁴ங் தது³ப⁴யங் தி²னமித்³த⁴னீவரணந்தி வுச்சதி. தத்த² கதமங் உத்³த⁴ச்சங்? யோ அவூபஸமோ சித்தஸ்ஸ, இத³ங் உத்³த⁴ச்சங். தத்த² கதமங் குக்குச்சங்? யோ சேதஸோ விலேகோ² அலஞ்சனா விலஞ்சனா ஹத³யலேகோ² விப்படிஸாரோ, இத³ங் குக்குச்சங். இதி இத³ஞ்ச குக்குச்சங் புரிமகஞ்ச உத்³த⁴ச்சங் தது³ப⁴யங் உத்³த⁴ச்சகுக்குச்சனீவரணந்தி வுச்சதி. தத்த² கதமங் விசிகிச்சா²னீவரணங்? யோ பு³த்³தே⁴ வா த⁴ம்மே வா ஸங்கே⁴ வா…பே॰… அயங் விசிகிச்சா². அபி ச கோ² பன பஞ்ச விசிகிச்சா²யோ ஸமனந்தராயிகா தே³ஸந்தராயிகா ஸமாபத்தந்தராயிகா மக்³க³ந்தராயிகா ஸக்³க³ந்தராயிகா, இமாயோ பஞ்ச விசிகிச்சா²யோ . இத⁴ பன ஸமாபத்தந்தராயிகா விசிகிச்சா² அதி⁴ப்பேதா. இமே பஞ்ச நீவரணா.
Tattha katamaṃ paṭhamaṃ jhānaṃ? Pañcaṅgavippayuttaṃ pañcaṅgasamannāgataṃ. Katamehi pañcahi aṅgehi vippayuttaṃ? Pañcahi nīvaraṇehi. Tattha katamāni pañca nīvaraṇāni? Kāmacchandoti vitthāretabbo. Tattha katamo kāmacchando? Yo pañcasu kāmaguṇesu chandarāgo pemaṃ nikanti ajjhosānaṃ icchā mucchā patthanā apariccāgo anusayo pariyuṭṭhānaṃ, ayaṃ kāmacchandanīvaraṇaṃ. Tattha katamaṃ byāpādanīvaraṇaṃ? Yo sattesu saṅkhāresu ca āghāto…pe… yathā dose tathā nioṭṭhānā, ayaṃ byāpādo nīvaraṇaṃ. Tattha katamaṃ middhaṃ? Yā cittassa jaḷatā cittassa garuttaṃ cittassa akammanīyatā cittassa nikkhepo niddāyanā pacalikatā pacalāyanā pacalāyanaṃ, idaṃ middhaṃ. Tattha katamaṃ thinaṃ 32? Yā kāyassa thinatā jaḷatā kāyassa garuttā kāyassa appassaddhi, idaṃ thinaṃ. Iti idañca thinaṃ purimakañca middhaṃ tadubhayaṃ thinamiddhanīvaraṇanti vuccati. Tattha katamaṃ uddhaccaṃ? Yo avūpasamo cittassa, idaṃ uddhaccaṃ. Tattha katamaṃ kukkuccaṃ? Yo cetaso vilekho alañcanā vilañcanā hadayalekho vippaṭisāro, idaṃ kukkuccaṃ. Iti idañca kukkuccaṃ purimakañca uddhaccaṃ tadubhayaṃ uddhaccakukkuccanīvaraṇanti vuccati. Tattha katamaṃ vicikicchānīvaraṇaṃ? Yo buddhe vā dhamme vā saṅghe vā…pe… ayaṃ vicikicchā. Api ca kho pana pañca vicikicchāyo samanantarāyikā desantarāyikā samāpattantarāyikā maggantarāyikā saggantarāyikā, imāyo pañca vicikicchāyo . Idha pana samāpattantarāyikā vicikicchā adhippetā. Ime pañca nīvaraṇā.
தத்த² நீவரணானீதி கோ வசனத்தோ², குதோ நிவாரயந்தீதி? ஸப்³ப³தோ குஸலபக்கி²கா நிவாரயந்தி. கத²ங் 33 நிவாரயந்தி? காமச்ச²ந்தோ³ அஸுப⁴தோ நிவாரயதி, ப்³யாபாதோ³ மெத்தாய 34 நிவாரயதி, தி²னங் பஸ்ஸத்³தி⁴தோ நிவாரயதி, மித்³த⁴ங் வீரியாரம்ப⁴தோ நிவாரயதி, உத்³த⁴ச்சங் ஸமத²தோ நிவாரயதி, குக்குச்சங் அவிப்படிஸாரதோ நிவாரயதி, விசிகிச்சா² பஞ்ஞாதோ படிச்சஸமுப்பாத³தோ நிவாரயதி.
Tattha nīvaraṇānīti ko vacanattho, kuto nivārayantīti? Sabbato kusalapakkhikā nivārayanti. Kathaṃ 35 nivārayanti? Kāmacchando asubhato nivārayati, byāpādo mettāya 36 nivārayati, thinaṃ passaddhito nivārayati, middhaṃ vīriyārambhato nivārayati, uddhaccaṃ samathato nivārayati, kukkuccaṃ avippaṭisārato nivārayati, vicikicchā paññāto paṭiccasamuppādato nivārayati.
அபரோ பரியாயோ. காமச்ச²ந்தோ³ அலோப⁴தோ குஸலமூலதோ நிவாரயதி, ப்³யாபாதோ³ அதோ³ஸதோ நிவாரயதி, தி²னமித்³த⁴ங் ஸமாதி⁴தோ நிவாரயதி, உத்³த⁴ச்சகுக்குச்சங் ஸதிபட்டா²னேஹி நிவாரயதி, விசிகிச்சா² அமோஹதோ குஸலமூலதோ நிவாரயதி.
Aparo pariyāyo. Kāmacchando alobhato kusalamūlato nivārayati, byāpādo adosato nivārayati, thinamiddhaṃ samādhito nivārayati, uddhaccakukkuccaṃ satipaṭṭhānehi nivārayati, vicikicchā amohato kusalamūlato nivārayati.
அபரோ பரியாயோ. தயோ விஹாரா தி³ப்³ப³விஹாரோ ப்³ரஹ்மவிஹாரோ அரியவிஹாரோ. தி³ப்³ப³விஹாரோ சத்தாரி ஜா²னானி, ப்³ரஹ்மவிஹாரோ சத்தாரி அப்பமாணானி, அரியவிஹாரோ ஸத்ததிங்ஸ போ³தி⁴பக்கி²யா த⁴ம்மா. தத்த² காமச்ச²ந்தோ³ உத்³த⁴ச்சங் குக்குச்சஞ்ச தி³ப்³ப³விஹாரங் நிவாரயதி, ப்³யாபாதோ³ ப்³ரஹ்மவிஹாரங் நிவாரயதி, தி²னமித்³த⁴ங் விசிகிச்சா² ச அரியவிஹாரங் நிவாரயதி.
Aparo pariyāyo. Tayo vihārā dibbavihāro brahmavihāro ariyavihāro. Dibbavihāro cattāri jhānāni, brahmavihāro cattāri appamāṇāni, ariyavihāro sattatiṃsa bodhipakkhiyā dhammā. Tattha kāmacchando uddhaccaṃ kukkuccañca dibbavihāraṃ nivārayati, byāpādo brahmavihāraṃ nivārayati, thinamiddhaṃ vicikicchā ca ariyavihāraṃ nivārayati.
அபரோ பரியாயோ. காமச்ச²ந்தோ³ ப்³யாபாதோ³ உத்³த⁴ச்சகுக்குச்சஞ்ச ஸமத²ங் நிவாரயந்தி, தி²னமித்³த⁴ங் விசிகிச்சா² ச விபஸ்ஸனங் நிவாரயந்தி, அதோ நீவரணந்தி வுச்சந்தே. இமேஹி பஞ்சஹி அங்கே³ஹி விப்பயுத்தங் பட²மங் ஜா²னங்.
Aparo pariyāyo. Kāmacchando byāpādo uddhaccakukkuccañca samathaṃ nivārayanti, thinamiddhaṃ vicikicchā ca vipassanaṃ nivārayanti, ato nīvaraṇanti vuccante. Imehi pañcahi aṅgehi vippayuttaṃ paṭhamaṃ jhānaṃ.
கதமேஹி பஞ்சஹி அங்கே³ஹி ஸம்பயுத்தங் பட²மங் ஜா²னங்? விதக்கவிசாரேஹி பீதியா ஸுகே²ன ச சித்தேகக்³க³தாய ச. இமேஸங் பஞ்சன்னங் அங்கா³னங் உப்பாத³படிலாப⁴ஸமன்னாக³மோ ஸச்சி²கிரியங் பட²மங் ஜா²னங் படிலத்³த⁴ந்தி வுச்சதி. இமானி பஞ்ச அங்கா³னி உப்பாதெ³த்வா விஹரதீதி, தேன வுச்சதே பட²மங் ஜா²னங் உபஸம்பஜ்ஜ விஹரதீதி தி³ப்³பே³ன விஹாரேன.
Katamehi pañcahi aṅgehi sampayuttaṃ paṭhamaṃ jhānaṃ? Vitakkavicārehi pītiyā sukhena ca cittekaggatāya ca. Imesaṃ pañcannaṃ aṅgānaṃ uppādapaṭilābhasamannāgamo sacchikiriyaṃ paṭhamaṃ jhānaṃ paṭiladdhanti vuccati. Imāni pañca aṅgāni uppādetvā viharatīti, tena vuccate paṭhamaṃ jhānaṃ upasampajja viharatīti dibbena vihārena.
தத்த² து³தியங் ஜா²னங் சதுரங்க³ஸமன்னாக³தங் பீதிஸுகே²ன சித்தேகக்³க³தாய அஜ்ஜ²த்தங் ஸம்பஸாத³னேன இமானி சத்தாரி அங்கா³னி உப்பாதெ³த்வா ஸம்பாதெ³த்வா விஹரதி, தேன வுச்சதி து³தியங் ஜா²னங் உபஸம்பஜ்ஜ விஹரதீதி.
Tattha dutiyaṃ jhānaṃ caturaṅgasamannāgataṃ pītisukhena cittekaggatāya ajjhattaṃ sampasādanena imāni cattāri aṅgāni uppādetvā sampādetvā viharati, tena vuccati dutiyaṃ jhānaṃ upasampajja viharatīti.
தத்த² பஞ்சங்க³ஸமன்னாக³தங் ததியங் ஜா²னங் ஸதியா ஸம்பஜஞ்ஞே ஸுகே²ன சித்தேகக்³க³தாய உபெக்கா²ய இமானி பஞ்சங்கா³னி உப்பாதெ³த்வா ஸம்பாதெ³த்வா விஹரதி, தேன வுச்சதி ததியங் ஜா²னங் உபஸம்பஜ்ஜ விஹரதீதி.
Tattha pañcaṅgasamannāgataṃ tatiyaṃ jhānaṃ satiyā sampajaññe sukhena cittekaggatāya upekkhāya imāni pañcaṅgāni uppādetvā sampādetvā viharati, tena vuccati tatiyaṃ jhānaṃ upasampajja viharatīti.
தத்த² சதுத்த²ங் ஜா²னங் சதுரங்க³ஸமன்னாக³தங் உபெக்கா²ய ஸதிபாரிஸுத்³தி⁴யா அது³க்க²மஸுகா²ய வேத³னாய சித்தேகக்³க³தா ச, இமேஹி சதூஹங்கே³ஹி ஸமன்னாக³தங் சதுத்த²ங் ஜா²னங். இதி இமேஸங் சதுன்னங் அங்கா³னங் உப்பாதோ³ படிலாபோ⁴ ஸமன்னாக³மோ ஸச்சி²கிரியா சதுத்த²ங் ஜா²னங் படிலத்³த⁴ந்தி வுச்சதி. இமானி சத்தாரி ஜா²னானி உப்பாதெ³த்வா ஸம்பாதெ³த்வா உபஸம்பஜ்ஜ விஹரதி, தேன வுச்சதி தி³ப்³பே³ன விஹாரேன விஹரதீதி.
Tattha catutthaṃ jhānaṃ caturaṅgasamannāgataṃ upekkhāya satipārisuddhiyā adukkhamasukhāya vedanāya cittekaggatā ca, imehi catūhaṅgehi samannāgataṃ catutthaṃ jhānaṃ. Iti imesaṃ catunnaṃ aṅgānaṃ uppādo paṭilābho samannāgamo sacchikiriyā catutthaṃ jhānaṃ paṭiladdhanti vuccati. Imāni cattāri jhānāni uppādetvā sampādetvā upasampajja viharati, tena vuccati dibbena vihārena viharatīti.
தத்த² கதமோ அனிச்சட்டோ²? பீளனட்டோ² அனிச்சட்டோ² பப⁴ங்க³ட்டோ² ஸம்பாபனட்டோ² விவேகட்டோ² அனிச்சட்டோ², அயங் அனிச்சட்டோ².
Tattha katamo aniccaṭṭho? Pīḷanaṭṭho aniccaṭṭho pabhaṅgaṭṭho sampāpanaṭṭho vivekaṭṭho aniccaṭṭho, ayaṃ aniccaṭṭho.
தத்த² கதமோ து³க்க²ட்டோ²? பீளனட்டோ² து³க்க²ட்டோ² ஸம்பீளனட்டோ² ஸங்வேக³ட்டோ² ப்³யாதி⁴னட்டோ², அயங் து³க்க²ட்டோ².
Tattha katamo dukkhaṭṭho? Pīḷanaṭṭho dukkhaṭṭho sampīḷanaṭṭho saṃvegaṭṭho byādhinaṭṭho, ayaṃ dukkhaṭṭho.
தத்த² கதமோ ஸுஞ்ஞட்டோ²? அனுபலித்தோ ஸுஞ்ஞட்டோ², அஸம்பா⁴ஜனட்டோ² க³தபட்டோ² 37 விவட்டட்டோ², அயங் ஸுஞ்ஞட்டோ².
Tattha katamo suññaṭṭho? Anupalitto suññaṭṭho, asambhājanaṭṭho gatapaṭṭho 38 vivaṭṭaṭṭho, ayaṃ suññaṭṭho.
தத்த² கதமோ அனத்தட்டோ²? அனிஸ்ஸரியட்டோ² அனத்தட்டோ², அவஸவத்தனட்டோ², அகாமகாரிட்டோ² பரிவித³ட்டோ², அயங் அனத்தட்டோ²தி.
Tattha katamo anattaṭṭho? Anissariyaṭṭho anattaṭṭho, avasavattanaṭṭho, akāmakāriṭṭho parividaṭṭho, ayaṃ anattaṭṭhoti.
ஸுத்தத்த²ஸமுச்சயோ நாம ஸங்வத்திஸந்திகா பேடகபூ⁴மி ஸமத்தா.
Suttatthasamuccayo nāma saṃvattisantikā peṭakabhūmi samattā.
Footnotes:
