| Library / Tipiṭaka / តិបិដក • Tipiṭaka / បេតវត្ថុបាឡិ • Petavatthupāḷi |
១១. សុត្តបេតវត្ថុ
11. Suttapetavatthu
៣៤១.
341.
‘‘អហំ បុរេ បព្ពជិតស្ស ភិក្ខុនោ, សុត្តំ អទាសិំ ឧបសង្កម្ម យាចិតា;
‘‘Ahaṃ pure pabbajitassa bhikkhuno, suttaṃ adāsiṃ upasaṅkamma yācitā;
តស្ស វិបាកោ វិបុលផលូបលព្ភតិ, ពហុកា ច មេ ឧប្បជ្ជរេ 1 វត្ថកោដិយោ។
Tassa vipāko vipulaphalūpalabbhati, bahukā ca me uppajjare 2 vatthakoṭiyo.
៣៤២.
342.
‘‘បុប្ផាភិកិណ្ណំ រមិតំ 3 វិមានំ, អនេកចិត្តំ នរនារិសេវិតំ;
‘‘Pupphābhikiṇṇaṃ ramitaṃ 4 vimānaṃ, anekacittaṃ naranārisevitaṃ;
សាហំ ភុញ្ជាមិ ច បារុបាមិ ច, បហូតវិត្តា ន ច តាវ ខីយតិ។
Sāhaṃ bhuñjāmi ca pārupāmi ca, pahūtavittā na ca tāva khīyati.
៣៤៣.
343.
‘‘តស្សេវ កម្មស្ស វិបាកមន្វយា, សុខញ្ច សាតញ្ច ឥធូបលព្ភតិ;
‘‘Tasseva kammassa vipākamanvayā, sukhañca sātañca idhūpalabbhati;
សាហំ គន្ត្វា បុនទេវ មានុសំ, កាហាមិ បុញ្ញានិ នយយ្យបុត្ត ម’’ន្តិ។
Sāhaṃ gantvā punadeva mānusaṃ, kāhāmi puññāni nayayyaputta ma’’nti.
៣៤៤.
344.
‘‘សត្ត តុវំ វស្សសតា ឥធាគតា,
‘‘Satta tuvaṃ vassasatā idhāgatā,
ជិណ្ណា ច វុឌ្ឍា ច តហិំ ភវិស្សសិ;
Jiṇṇā ca vuḍḍhā ca tahiṃ bhavissasi;
សព្ពេវ តេ កាលកតា ច ញាតកា,
Sabbeva te kālakatā ca ñātakā,
កិំ តត្ថ គន្ត្វាន ឥតោ ករិស្សសី’’តិ។
Kiṃ tattha gantvāna ito karissasī’’ti.
៣៤៥.
345.
‘‘សត្តេវ វស្សានិ ឥធាគតាយ មេ, ទិព្ពញ្ច សុខញ្ច សមប្បិតាយ;
‘‘Satteva vassāni idhāgatāya me, dibbañca sukhañca samappitāya;
សាហំ គន្ត្វាន បុនទេវ មានុសំ, កាហាមិ បុញ្ញានិ នយយ្យបុត្ត ម’’ន្តិ។
Sāhaṃ gantvāna punadeva mānusaṃ, kāhāmi puññāni nayayyaputta ma’’nti.
៣៤៦.
346.
សោ តំ គហេត្វាន បសយ្ហ ពាហាយំ, បច្ចានយិត្វាន ថេរិំ សុទុព្ពលំ;
So taṃ gahetvāna pasayha bāhāyaṃ, paccānayitvāna theriṃ sudubbalaṃ;
‘‘វជ្ជេសិ អញ្ញម្បិ ជនំ ឥធាគតំ, ‘ករោថ បុញ្ញានិ សុខូបលព្ភតិ’’។
‘‘Vajjesi aññampi janaṃ idhāgataṃ, ‘karotha puññāni sukhūpalabbhati’’.
៣៤៧.
347.
‘‘ទិដ្ឋា មយា អកតេន សាធុនា, បេតា វិហញ្ញន្តិ តថេវ មនុស្សា;
‘‘Diṭṭhā mayā akatena sādhunā, petā vihaññanti tatheva manussā;
កម្មញ្ច កត្វា សុខវេទនីយំ, ទេវា មនុស្សា ច សុខេ ឋិតា បជា’’តិ។
Kammañca katvā sukhavedanīyaṃ, devā manussā ca sukhe ṭhitā pajā’’ti.
សុត្តបេតវត្ថុ ឯកាទសមំ។
Suttapetavatthu ekādasamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បេតវត្ថុ-អដ្ឋកថា • Petavatthu-aṭṭhakathā / ១១. សុត្តបេតវត្ថុវណ្ណនា • 11. Suttapetavatthuvaṇṇanā
