| Library / Tipiṭaka / திபிடக • Tipiṭaka / பேடகோபதே³ஸபாளி • Peṭakopadesapāḷi |
3. ஸுத்தாதி⁴ட்டா²னததியபூ⁴மி
3. Suttādhiṭṭhānatatiyabhūmi
32. தத்த² கதமங் ஸுத்தாதி⁴ட்டா²னங்?
32. Tattha katamaṃ suttādhiṭṭhānaṃ?
லோபா⁴தி⁴ட்டா²னங் தோ³ஸாதி⁴ட்டா²னங் மோஹாதி⁴ட்டா²னங் அலோபா⁴தி⁴ட்டா²னங் அதோ³ஸாதி⁴ட்டா²னங் அமோஹாதி⁴ட்டா²னங் காயகம்மாதி⁴ட்டா²னங் வாசாகம்மாதி⁴ட்டா²னங் மனோகம்மாதி⁴ட்டா²னங் ஸத்³தி⁴ந்த்³ரியாதி⁴ட்டா²னங் வீரியிந்த்³ரியாதி⁴ட்டா²னங் ஸதிந்த்³ரியாதி⁴ட்டா²னங் ஸமாதி⁴ந்த்³ரியாதி⁴ட்டா²னங் பஞ்ஞிந்த்³ரியாதி⁴ட்டா²னங்.
Lobhādhiṭṭhānaṃ dosādhiṭṭhānaṃ mohādhiṭṭhānaṃ alobhādhiṭṭhānaṃ adosādhiṭṭhānaṃ amohādhiṭṭhānaṃ kāyakammādhiṭṭhānaṃ vācākammādhiṭṭhānaṃ manokammādhiṭṭhānaṃ saddhindriyādhiṭṭhānaṃ vīriyindriyādhiṭṭhānaṃ satindriyādhiṭṭhānaṃ samādhindriyādhiṭṭhānaṃ paññindriyādhiṭṭhānaṃ.
தத்த² கதமங் லோபா⁴தி⁴ட்டா²னங்?
Tattha katamaṃ lobhādhiṭṭhānaṃ?
விதக்கமதி²தஸ்ஸ 1 ஜந்துனோ, திப்³ப³ராக³ஸ்ஸ ஸுபா⁴னுபஸ்ஸினோ;
Vitakkamathitassa 2 jantuno, tibbarāgassa subhānupassino;
பி⁴ய்யோ தண்ஹா பவட்³ட⁴தி, ஏஸ கோ² கா³ள்ஹங் கரோதி ப³ந்த⁴னங்.
Bhiyyo taṇhā pavaḍḍhati, esa kho gāḷhaṃ karoti bandhanaṃ.
விதக்கமதி²தஸ்ஸாதி காமராகோ³. ஸுபா⁴னுபஸ்ஸினோதி காமராக³வத்து². பி⁴ய்யோ தண்ஹா பவட்³ட⁴தீதி காமதண்ஹா. ஏஸ கா³ள்ஹங் கரோதி ப³ந்த⁴னந்தி ராக³ங், இதி யோ யோ த⁴ம்மோ மூலனிக்கி²த்தோ, ஸோ யேவெத்த² த⁴ம்மோ உக்³கா³வஹிதப்³போ³ 3. ந ப⁴க³வா ஏகங் த⁴ம்மங் ஆரப்³ப⁴ அஞ்ஞங் த⁴ம்மங் தே³ஸேதி. யஸ்ஸ விதக்கேதி காமவிதக்கோ தமேவ விதக்கங் காமவிதக்கேன நித்³தி³ஸீயதி. திப்³ப³ராக³ஸ்ஸாதி தஸ்ஸேவ விதக்கஸ்ஸ வத்து²ங் நித்³தி³ஸதி. ஸுபா⁴னுபஸ்ஸினோ பி⁴ய்யோ தண்ஹா பவட்³ட⁴தீதி தமேவ ராக³ங் காமதண்ஹாதி நித்³தி³ஸதி. ஏஸ கா³ள்ஹங் கரோதி ப³ந்த⁴னந்தி தமேவ தண்ஹாஸங்யோஜனங் நித்³தி³ஸதி. ஏவங் கா³தா²ஸு அனுமினிதப்³ப³ங். ஏவங் ஸவெய்யாகரணேஸு.
Vitakkamathitassāti kāmarāgo. Subhānupassinoti kāmarāgavatthu. Bhiyyo taṇhā pavaḍḍhatīti kāmataṇhā. Esa gāḷhaṃ karoti bandhananti rāgaṃ, iti yo yo dhammo mūlanikkhitto, so yevettha dhammo uggāvahitabbo 4. Na bhagavā ekaṃ dhammaṃ ārabbha aññaṃ dhammaṃ deseti. Yassa vitakketi kāmavitakko tameva vitakkaṃ kāmavitakkena niddisīyati. Tibbarāgassāti tasseva vitakkassa vatthuṃ niddisati. Subhānupassino bhiyyo taṇhā pavaḍḍhatīti tameva rāgaṃ kāmataṇhāti niddisati. Esa gāḷhaṃ karoti bandhananti tameva taṇhāsaṃyojanaṃ niddisati. Evaṃ gāthāsu anuminitabbaṃ. Evaṃ saveyyākaraṇesu.
தத்த² ப⁴க³வா ஏகங் த⁴ம்மங் திவித⁴ங் நித்³தி³ஸதி, நிஸ்ஸந்த³தோ ஹேதுதோ ப²லதோ.
Tattha bhagavā ekaṃ dhammaṃ tividhaṃ niddisati, nissandato hetuto phalato.
த³த³ங் பியோ 5 ஹோதி ப⁴ஜந்தி நங் ப³ஹூ, கித்திஞ்ச பப்போதி யஸோ ச வட்³ட⁴தி;
Dadaṃ piyo 6 hoti bhajanti naṃ bahū, kittiñca pappoti yaso ca vaḍḍhati;
அமங்குபூ⁴தோ பரிஸங் விகா³ஹதி, விஸாரதோ³ ஹோதி நரோ அமச்ச²ரீ.
Amaṅkubhūto parisaṃ vigāhati, visārado hoti naro amaccharī.
த³த³ந்தி யங் யங் தா³னங், இத³ங் தா³னமயிகங் புஞ்ஞக்ரியங். தத்த² ஹேது. யங் சேதங். ப⁴ஜந்தி நங் ப³ஹூ, கித்திந்தி யோ ச கல்யாணோ கித்திஸத்³தோ³ லோகே அப்³பு⁴க்³க³ச்ச²தி, யங் ப³ஹுகஸ்ஸ ஜனஸ்ஸ பியோ ப⁴வதி மனாபோ ச. யஞ்ச அவிப்படிஸாரீ காலங்கரோதி அயங் நிஸ்ஸந்தோ³. யங் காயஸ்ஸ பே⁴தா³ தே³வேஸு உபபஜ்ஜதீதி இத³ங் ப²லங். இத³ங் லோபா⁴தி⁴ட்டா²னங்.
Dadanti yaṃ yaṃ dānaṃ, idaṃ dānamayikaṃ puññakriyaṃ. Tattha hetu. Yaṃ cetaṃ. Bhajanti naṃ bahū, kittinti yo ca kalyāṇo kittisaddo loke abbhuggacchati, yaṃ bahukassa janassa piyo bhavati manāpo ca. Yañca avippaṭisārī kālaṅkaroti ayaṃ nissando. Yaṃ kāyassa bhedā devesu upapajjatīti idaṃ phalaṃ. Idaṃ lobhādhiṭṭhānaṃ.
33. தத்த² கதமங் தோ³ஸாதி⁴ட்டா²னங்?
33. Tattha katamaṃ dosādhiṭṭhānaṃ?
யோ பாணமதிபாதேதி, முஸாவாத³ஞ்ச பா⁴ஸதி;
Yo pāṇamatipāteti, musāvādañca bhāsati;
லோகே அதி³ன்னங் ஆதி³யதி, பரதா³ரஞ்ச க³ச்ச²தி;
Loke adinnaṃ ādiyati, paradārañca gacchati;
அப்பஹாய பஞ்ச வேரானி, து³ஸ்ஸீலோ இதி வுச்சதி;
Appahāya pañca verāni, dussīlo iti vuccati;
காயஸ்ஸ பே⁴தா³ து³ப்பஞ்ஞோ, நிரயங் ஸோபபஜ்ஜதி.
Kāyassa bhedā duppañño, nirayaṃ sopapajjati.
யோ பாணமதிபாதேதீதி து³ட்டோ² பாணமதிபாதேதி. முஸாவாத³ஞ்ச பா⁴ஸதீதி தோ³ஸோபகா⁴தாய முஸாவாத³ஞ்ச பா⁴ஸதி. ஸுராமேரயபானஞ்ச, யோ நரோ அனுயுஞ்ஜதீதி தோ³ஸோ நிதா³னங். யோ ச ஸுராமேரயபானங் அனுயுஞ்ஜதி யதா²பரதா³ரவிஹாரீ 9 அமித்தா ஜனயந்தி.
Yo pāṇamatipātetīti duṭṭho pāṇamatipāteti. Musāvādañca bhāsatīti dosopaghātāya musāvādañca bhāsati. Surāmerayapānañca, yo naro anuyuñjatīti doso nidānaṃ. Yo ca surāmerayapānaṃ anuyuñjati yathāparadāravihārī 10 amittā janayanti.
பஞ்ச வேரானி அப்பஹாயாதி பஞ்சன்னங் பி⁴க்கா²பதா³னங் ஸமதிக்கமனங் ஸப்³பே³ஸங் தோ³ஸஜானங் ஸா பண்ணத்தி, தேனேவ தோ³ஸஜனிதேன கம்மேன து³ஸ்ஸீலோ இதி வுச்சதி ஸோபி த⁴ம்மோ ஹேதுனா நித்³தி³ஸிதப்³போ³, நிஸ்ஸந்தே³ன ப²லேன ச.
Pañca verāni appahāyāti pañcannaṃ bhikkhāpadānaṃ samatikkamanaṃ sabbesaṃ dosajānaṃ sā paṇṇatti, teneva dosajanitena kammena dussīlo iti vuccati sopi dhammo hetunā niddisitabbo, nissandena phalena ca.
தீணி பா³லஸ்ஸ பா³லலக்க²ணானி – து³ப்³பா⁴ஸிதபா⁴ஸீ 11 ச ஹோதி, து³ச்சிந்திதசிந்தீ ச து³க்கடகம்மகாரீ ச. தத்த² யங் காயேன ச வாசாய ச பரக்கமதி, இத³மஸ்ஸ து³க்கடகம்மகாரீ. தாயங் யதா² ச முஸாவாத³ங் பா⁴ஸதி யதா² புப்³ப³னித்³தி³ட்ட²ங் , இத³மஸ்ஸ து³ப்³பா⁴ஸிதா. யஞ்ச ஸங்கப்பேதி மனோது³ச்சரிதங் ப்³யாபாத³ங், இத³மஸ்ஸ து³ச்சிந்திதசிந்திதா. யங் ஸோ இமேஹி தீஹி பா³லலக்க²ணேஹி ஸமன்னாக³தோ தீணி தஜ்ஜானி து³க்கா²னி தோ³மனஸ்ஸானி அனுப⁴வதி, ஸோ ச ஹோதி ஸப⁴க்³க³தோ வா பரிஸக்³க³தோ வா தஜ்ஜங் கத²ங் கத²ந்தி. யதா³ ப⁴வதி ஸோ ச பாணாதிபாதாதி³த³ஸஅகுஸலகம்மபதா², ஸோ ததோனிதா³னங் து³க்க²ங் தோ³மனஸ்ஸங் படிஸங்வேதே³தீதி. புன சபரங் யதா³ பஸ்ஸதி சோரங் ராஜாபராதி⁴கங் ரஞ்ஞா க³ஹிதங் ஜீவிதா வோரோபேதங், தஸ்ஸேவங் ப⁴வதி ஸசே மமம்பி ராஜா ஜானெய்ய மமம்பி ராஜா கா³ஹாபெத்வா ஜீவிதா வோரோபெய்யாதி, ஸோ ததோனிதா³னங் து³க்க²ங் தோ³மனஸ்ஸங் படிஸங்வேதே³தி. புன சபரங் பா³லோ யதா³ ப⁴வதி ஆஸனா ஸமாரூள்ஹோ யாவ யா மே க³தி ப⁴விஸ்ஸதி இதோ பேச்ச பரங் மரணாதி ஸோ ததோனிதா³னங் து³க்க²ங் தோ³மனஸ்ஸங் படிஸங்வேதே³தி இதி பா³லலக்க²ணங் ஹேது. தீணி தஜ்ஜானி து³க்கா²னி நிஸ்ஸந்தோ³. காயஸ்ஸ பே⁴தா³ நிரயேஸு உபபஜ்ஜதி, இத³ங் ப²லங். இத³ங் தோ³ஸாதி⁴ட்டா²னங்.
Tīṇi bālassa bālalakkhaṇāni – dubbhāsitabhāsī 12 ca hoti, duccintitacintī ca dukkaṭakammakārī ca. Tattha yaṃ kāyena ca vācāya ca parakkamati, idamassa dukkaṭakammakārī. Tāyaṃ yathā ca musāvādaṃ bhāsati yathā pubbaniddiṭṭhaṃ , idamassa dubbhāsitā. Yañca saṅkappeti manoduccaritaṃ byāpādaṃ, idamassa duccintitacintitā. Yaṃ so imehi tīhi bālalakkhaṇehi samannāgato tīṇi tajjāni dukkhāni domanassāni anubhavati, so ca hoti sabhaggato vā parisaggato vā tajjaṃ kathaṃ kathanti. Yadā bhavati so ca pāṇātipātādidasaakusalakammapathā, so tatonidānaṃ dukkhaṃ domanassaṃ paṭisaṃvedetīti. Puna caparaṃ yadā passati coraṃ rājāparādhikaṃ raññā gahitaṃ jīvitā voropetaṃ, tassevaṃ bhavati sace mamampi rājā jāneyya mamampi rājā gāhāpetvā jīvitā voropeyyāti, so tatonidānaṃ dukkhaṃ domanassaṃ paṭisaṃvedeti. Puna caparaṃ bālo yadā bhavati āsanā samārūḷho yāva yā me gati bhavissati ito pecca paraṃ maraṇāti so tatonidānaṃ dukkhaṃ domanassaṃ paṭisaṃvedeti iti bālalakkhaṇaṃ hetu. Tīṇi tajjāni dukkhāni nissando. Kāyassa bhedā nirayesu upapajjati, idaṃ phalaṃ. Idaṃ dosādhiṭṭhānaṃ.
34. தத்த² கதமங் மோஹாதி⁴ட்டா²னங்?
34. Tattha katamaṃ mohādhiṭṭhānaṃ?
ஸதஞ்சேவ ஸஹஸ்ஸானங், கப்பானங் ஸங்ஸரிஸ்ஸதி;
Satañceva sahassānaṃ, kappānaṃ saṃsarissati;
அத²வா பி ததோ பி⁴ய்யோ, க³ப்³பா⁴ க³ப்³ப⁴ங் க³மிஸ்ஸத².
Athavā pi tato bhiyyo, gabbhā gabbhaṃ gamissatha.
அனுபாதா³ய பு³த்³த⁴வசனங், ஸங்கா²ரே அத்ததோ உபாதா³ய;
Anupādāya buddhavacanaṃ, saṅkhāre attato upādāya;
து³க்க²ஸ்ஸந்தங் கரிஸ்ஸந்தி, டா²னமேதங் ந விஜ்ஜதி.
Dukkhassantaṃ karissanti, ṭhānametaṃ na vijjati.
யோ யங் அனமதக்³க³ஸங்ஸாரங் ஸமாபன்னோ ஜாயதே ச மீயதே ச, அயங் அவிஜ்ஜாஹேதுகா. யானிபி ச ஸங்கா²ரானங் பயோஜனானி, தானிபி அவிஜ்ஜாபச்சயானி, யங் அத³ஸ்ஸனங் பு³த்³த⁴வசனஸ்ஸ, அயங் அவிஜ்ஜாஸுத்தேயேவ நித்³தி³ட்ட²ங். யோ ச ஸங்கா²ரே அத்ததோ ஹரதி பஞ்சக்க²ந்தே⁴ பஞ்ச தி³ட்டி²யோ உபக³ச்ச²தி. ‘‘ஏதங் மம, ஏஸோஹமஸ்மி, ஏஸோ மே அத்தா’’தி இத³ங் ஸுத்தங் அவிஜ்ஜாய நிக்கி²த்தங், அவிஜ்ஜாய நிக்கி²பிதங். ஏவங் ஸத்தா² ஸுத்தே நயேன 13 த⁴ம்மேன நித்³தி³ஸதி. அஸாதா⁴ரணேன தங்யேவ தத்த² நித்³தி³ஸிதப்³ப³ங். ந அஞ்ஞங்.
Yo yaṃ anamataggasaṃsāraṃ samāpanno jāyate ca mīyate ca, ayaṃ avijjāhetukā. Yānipi ca saṅkhārānaṃ payojanāni, tānipi avijjāpaccayāni, yaṃ adassanaṃ buddhavacanassa, ayaṃ avijjāsutteyeva niddiṭṭhaṃ. Yo ca saṅkhāre attato harati pañcakkhandhe pañca diṭṭhiyo upagacchati. ‘‘Etaṃ mama, esohamasmi, eso me attā’’ti idaṃ suttaṃ avijjāya nikkhittaṃ, avijjāya nikkhipitaṃ. Evaṃ satthā sutte nayena 14 dhammena niddisati. Asādhāraṇena taṃyeva tattha niddisitabbaṃ. Na aññaṃ.
யே ஹி கேசி, பி⁴க்க²வே, ஸமணா வா ப்³ராஹ்மணா வா ‘‘இத³ங் து³க்க²’’ந்தி நப்பஜானந்தி சத்தாரி ஸச்சானி வித்தா²ரேன, யங் தத்த² அப்பஜானநா, இத³ங் து³க்க²ங், அயங் ஹேது. அப்பஜானந்தோ விவிதே⁴ ஸங்கா²ரே அபி⁴ஸங்க²ரோதி, அயங் நிஸ்ஸந்தோ³. யஞ்ச தி³ட்டி²க³தானி பராமஸதி ‘‘இத³மேவ ஸச்சங் மோக⁴மஞ்ஞ’’ந்தி அயங் நிஸ்ஸந்தோ³. யங் புனப்³ப⁴வங் நிப்³ப³த்தேதி, இத³ங் ப²லங். அயம்பி த⁴ம்மோ ஸனித்³தி³ட்டோ² ஹேதுதோ ச ப²லதோ ச நிஸ்ஸந்த³தோ ச.
Ye hi keci, bhikkhave, samaṇā vā brāhmaṇā vā ‘‘idaṃ dukkha’’nti nappajānanti cattāri saccāni vitthārena, yaṃ tattha appajānanā, idaṃ dukkhaṃ, ayaṃ hetu. Appajānanto vividhe saṅkhāre abhisaṅkharoti, ayaṃ nissando. Yañca diṭṭhigatāni parāmasati ‘‘idameva saccaṃ moghamañña’’nti ayaṃ nissando. Yaṃ punabbhavaṃ nibbatteti, idaṃ phalaṃ. Ayampi dhammo saniddiṭṭho hetuto ca phalato ca nissandato ca.
எத்த² பன கேசி த⁴ம்மா ஸாதா⁴ரணா ப⁴வந்தி. ஹேது க²லு ஆதி³தோயேவ ஸுத்தே நிக்கி²பிஸ்ஸந்தி. யதா² கிங் ப⁴வே சத்தாரிமானி, பி⁴க்க²வே, அக³திக³மனானி. தத்த² யஞ்ச ச²ந்தா³க³திங் க³ச்ச²தி யஞ்ச ப⁴யாக³திங் க³ச்ச²தி, அயங் லோபோ⁴ அகுஸலமூலங். யங் தோ³ஸா, அயங் தோ³ஸோயேவ . யங் மோஹா, அயங் மோஹோயேவ. ஏவங் இமானி தீணி அகுஸலமூலானி ஆதி³தோயேவ உபபரிக்கி²தப்³பா³னி. யத்த² ஏகங் நித்³தி³ஸிதப்³ப³ங், தத்த² ஏகங் நித்³தி³ஸீயதி. ததா² த்³வே யதா² தீணி, ந ஹி ஆதீ³ஹி அனிக்கி²த்தே ஹேது வா நிஸ்ஸந்தோ³ வா ப²லங் வா நித்³தி³ஸிதப்³ப³ங்.
Ettha pana keci dhammā sādhāraṇā bhavanti. Hetu khalu āditoyeva sutte nikkhipissanti. Yathā kiṃ bhave cattārimāni, bhikkhave, agatigamanāni. Tattha yañca chandāgatiṃ gacchati yañca bhayāgatiṃ gacchati, ayaṃ lobho akusalamūlaṃ. Yaṃ dosā, ayaṃ dosoyeva . Yaṃ mohā, ayaṃ mohoyeva. Evaṃ imāni tīṇi akusalamūlāni āditoyeva upaparikkhitabbāni. Yattha ekaṃ niddisitabbaṃ, tattha ekaṃ niddisīyati. Tathā dve yathā tīṇi, na hi ādīhi anikkhitte hetu vā nissando vā phalaṃ vā niddisitabbaṃ.
அயஞ்செத்த² கா³தா² –
Ayañcettha gāthā –
ச²ந்தா³ தோ³ஸா ப⁴யா மோஹா, யோ த⁴ம்மங் அதிவத்ததி;
Chandā dosā bhayā mohā, yo dhammaṃ ativattati;
கத்த² ச²ந்தா³ ச அயங் லோபோ⁴ யதா² நித்³தி³ட்ட²ங் புப்³பே³. இத³ங் மோஹாதி⁴ட்டா²னங்.
Kattha chandā ca ayaṃ lobho yathā niddiṭṭhaṃ pubbe. Idaṃ mohādhiṭṭhānaṃ.
35. தத்த² கதமங் அலோபா⁴தி⁴ட்டா²னங்?
35. Tattha katamaṃ alobhādhiṭṭhānaṃ?
‘‘அஸுபா⁴னுபஸ்ஸிங் 17 விஹரந்தங், இந்த்³ரியேஸு ஸுஸங்வுதங்;
‘‘Asubhānupassiṃ 18 viharantaṃ, indriyesu susaṃvutaṃ;
போ⁴ஜனம்ஹி ச மத்தஞ்ஞுங், ஸத்³த⁴ங் ஆரத்³த⁴வீரியங்;
Bhojanamhi ca mattaññuṃ, saddhaṃ āraddhavīriyaṃ;
தங் வே நப்பஸஹதி மாரோ, வாதோ ஸேலங்வ பப்³ப³த’’ந்தி.
Taṃ ve nappasahati māro, vāto selaṃva pabbata’’nti.
தத்த² யா அஸுபா⁴ய உபபரிக்கா², அயங் காமேஸு ஆதீ³னவத³ஸ்ஸனேன பரிச்சாகோ³. இந்த்³ரியேஸு ஸுஸங்வுதோ தஸ்ஸேவ அலோப⁴ஸ்ஸ பாரிபூரியங் மம ஆயதனஸோசிதங் அனுபாதா³ய. போ⁴ஜனம்ஹி ச மத்தஞ்ஞுந்தி ரஸதண்ஹாபஹானங். இதி அயங் அலோபோ⁴ அஸுபா⁴னுபஸ்ஸிதாய வத்து²தோ தா⁴ரயதி, ஸோ அலோபோ⁴ ஹேது. இந்த்³ரியேஸு கு³த்தத்³வாரதாய கோ³சரதோ தா⁴ரயதி, போ⁴ஜனேமத்தஞ்ஞுதாய பரதோ தா⁴ரயதி, அயங் நிஸ்ஸந்தோ³. தங் வே நப்பஸஹதி மாரோ, வாதோ ஸேலங் வ பப்³ப³தந்தி, இத³ங் ப²லங். இதி யோயேவ த⁴ம்மோ ஆதி³ம்ஹி நிக்கி²த்தோ, ஸோயேவ மஜ்ஜே² சேவ அவஸானே ச.
Tattha yā asubhāya upaparikkhā, ayaṃ kāmesu ādīnavadassanena pariccāgo. Indriyesu susaṃvuto tasseva alobhassa pāripūriyaṃ mama āyatanasocitaṃ anupādāya. Bhojanamhi ca mattaññunti rasataṇhāpahānaṃ. Iti ayaṃ alobho asubhānupassitāya vatthuto dhārayati, so alobho hetu. Indriyesu guttadvāratāya gocarato dhārayati, bhojanemattaññutāya parato dhārayati, ayaṃ nissando. Taṃ ve nappasahati māro, vāto selaṃ va pabbatanti, idaṃ phalaṃ. Iti yoyeva dhammo ādimhi nikkhitto, soyeva majjhe ceva avasāne ca.
நாஹங், பி⁴க்க²வே, அஞ்ஞங் ஏகத⁴ம்மம்பி ஸமனுபஸ்ஸாமி அஸமுப்பன்னஸ்ஸ காமச்ச²ந்த³ஸ்ஸ அனுப்பாதா³ய உப்பன்னஸ்ஸ வா பஹானாய, யத²யித³ங் 19 அஸுப⁴னிமித்தங். தத்த² அஸுப⁴னிமித்தங் மனஸிகரொந்தஸ்ஸ அனுப்பன்னோ சேவ காமச்ச²ந்தோ³ ந உப்பஜ்ஜதி, உப்பன்னோ ச காமச்ச²ந்தோ³ பஹீயதி. இத³ங் அலோப⁴ஸ்ஸ வத்து². யங் புன அனுப்பன்னோ காமராகோ³ பரியாதி³யதி ரூபராக³ங் அரூபராக³ங், இதி ப²லங். இதி அயம்பி ச த⁴ம்மோ நித்³தி³ட்டோ² ஹேதுதோ ச நிஸ்ஸந்த³தோ ச ப²லதோ ச. இத³ங் அலோபா⁴தி⁴ட்டா²னங்.
Nāhaṃ, bhikkhave, aññaṃ ekadhammampi samanupassāmi asamuppannassa kāmacchandassa anuppādāya uppannassa vā pahānāya, yathayidaṃ 20 asubhanimittaṃ. Tattha asubhanimittaṃ manasikarontassa anuppanno ceva kāmacchando na uppajjati, uppanno ca kāmacchando pahīyati. Idaṃ alobhassa vatthu. Yaṃ puna anuppanno kāmarāgo pariyādiyati rūparāgaṃ arūparāgaṃ, iti phalaṃ. Iti ayampi ca dhammo niddiṭṭho hetuto ca nissandato ca phalato ca. Idaṃ alobhādhiṭṭhānaṃ.
தத்த² கதமங் அதோ³ஸாதி⁴ட்டா²னங்?
Tattha katamaṃ adosādhiṭṭhānaṃ?
ஏகம்பி சே பாணமது³ட்ட²சித்தோ, மெத்தாயதி குஸலோ 21 தேன ஹோதி;
Ekampi ce pāṇamaduṭṭhacitto, mettāyati kusalo 22 tena hoti;
ஸப்³பே³ ச பாணே மனஸானுகம்பங் 23, பஹூதமரியோ பகரோதி புஞ்ஞங்.
Sabbe ca pāṇe manasānukampaṃ 24, pahūtamariyo pakaroti puññaṃ.
ஏகம்பி சே பாணமது³ட்ட²சித்தோ மெத்தாயதீதி அயங் அதோ³ஸோ. நிக்³கா⁴தேன அஸ்ஸாதோ³, குஸலோ தேன ஹோதீதி தேன குஸலேன த⁴ம்மேன ஸங்யுத்தோ த⁴ம்மபஞ்ஞத்திங் க³ச்ச²தி. குஸலோதி யதா² பஞ்ஞாய பஞ்ஞோ பண்டி³ச்சேன பண்டி³தோ. பஹூதமரியோ பகரோதி புஞ்ஞந்தி தஸ்ஸாயேவ விபாகோ அயங் லோகியஸ்ஸ, ந ஹி லோகுத்தரஸ்ஸ. தத்த² யா மெத்தாயனா, அயங் ஹேது. யங் குஸலோ ப⁴வதி அயங் நிஸ்ஸந்தோ³. யாவ அப்³யாபஜ்ஜோ பூ⁴மியங் ப³ஹுபுஞ்ஞங் பஸவதி, இத³ங் ப²லங். இதி அதோ³ஸோ நித்³தி³ட்டோ² ஹேதுதோ ச நிஸ்ஸந்த³தோ ச ப²லதோ ச.
Ekampi ce pāṇamaduṭṭhacitto mettāyatīti ayaṃ adoso. Nigghātena assādo, kusalo tena hotīti tena kusalena dhammena saṃyutto dhammapaññattiṃ gacchati. Kusaloti yathā paññāya pañño paṇḍiccena paṇḍito. Pahūtamariyo pakaroti puññanti tassāyeva vipāko ayaṃ lokiyassa, na hi lokuttarassa. Tattha yā mettāyanā, ayaṃ hetu. Yaṃ kusalo bhavati ayaṃ nissando. Yāva abyāpajjo bhūmiyaṃ bahupuññaṃ pasavati, idaṃ phalaṃ. Iti adoso niddiṭṭho hetuto ca nissandato ca phalato ca.
ஏகாத³ஸானிஸங்ஸா மெத்தாய சேதோவிமுத்தியா. தத்த² யா மெத்தாசேதோவிமுத்தி, அயங் அரியத⁴ம்மேஸு ராக³விராகா³ சேதோவிமுத்தி, லோகிகாய பூ⁴மிகா ஹேது, யங் ஸுக²ங் ஆயதிங் மனாபோ ஹோதி மனுஸ்ஸானங், இமே ஏகாத³ஸ த⁴ம்மா நிஸ்ஸந்தோ³. யஞ்ச அகதாவீ ப்³ரஹ்மகாயே உபபஜ்ஜதி. இத³ங் ப²லங். இத³ங் அதோ³ஸாதி⁴ட்டா²னங்.
Ekādasānisaṃsā mettāya cetovimuttiyā. Tattha yā mettācetovimutti, ayaṃ ariyadhammesu rāgavirāgā cetovimutti, lokikāya bhūmikā hetu, yaṃ sukhaṃ āyatiṃ manāpo hoti manussānaṃ, ime ekādasa dhammā nissando. Yañca akatāvī brahmakāye upapajjati. Idaṃ phalaṃ. Idaṃ adosādhiṭṭhānaṃ.
36. தத்த² கதமங் அமோஹாதி⁴ட்டா²னங்?
36. Tattha katamaṃ amohādhiṭṭhānaṃ?
பஞ்ஞா ஹி ஸெட்டா² லோகஸ்மிங், யாயங் நிப்³பே³த⁴கா³மினீ 25;
Paññā hi seṭṭhā lokasmiṃ, yāyaṃ nibbedhagāminī 26;
யாய ஸம்மா பஜானாதி, ஜாதிமரணஸங்க²யங்.
Yāya sammā pajānāti, jātimaraṇasaṅkhayaṃ.
பஞ்ஞா ஹி ஸெட்டா²தி வத்து²ங். நிப்³பே³த⁴கா³மினீதி நிப்³பா³னகா³மினியங் யதா²பூ⁴தங் படிவிஜ்ஜ²தி. ஸம்மா பஜானாதி, ஜாதிமரணஸங்க²யந்தி அமோஹோ. பஞ்ஞாதி ஹேது. யங் பஜானாதி அயங் நிஸ்ஸந்தோ³. யோ ஜாதிமரணஸங்க²யோ, இத³ங் ப²லங். இதி அமோஹோ நித்³தி³ட்டோ² ஹேதுனா ச நிஸ்ஸந்தே³ன ச ப²லேன ச.
Paññā hi seṭṭhāti vatthuṃ. Nibbedhagāminīti nibbānagāminiyaṃ yathābhūtaṃ paṭivijjhati. Sammā pajānāti, jātimaraṇasaṅkhayanti amoho. Paññāti hetu. Yaṃ pajānāti ayaṃ nissando. Yo jātimaraṇasaṅkhayo, idaṃ phalaṃ. Iti amoho niddiṭṭho hetunā ca nissandena ca phalena ca.
தீணிமானி, பி⁴க்க²வே 27, இந்த்³ரியானி அனஞ்ஞாதஞ்ஞஸ்ஸாமீதிந்த்³ரியங் அஞ்ஞிந்த்³ரியங் அஞ்ஞாதாவிந்த்³ரியங். தத்த² கதமங் அனஞ்ஞாதஞ்ஞஸ்ஸாமீதிந்த்³ரியங்? இத⁴, பி⁴க்க²வே, பி⁴க்கு² அனபி⁴ஸமேதஸ்ஸ து³க்க²ஸ்ஸ அரியஸச்சஸ்ஸ அபி⁴ஸமயாய ச²ந்த³ங் ஜனேதி வாயமதி, வீரியங் ஆரப⁴தி , சித்தங் பக்³க³ண்ஹாதி பத³ஹதி. ஏவங் சதுன்னங் அரியஸச்சானங் காதப்³ப³ங். தத்த² கதமங் அஞ்ஞிந்த்³ரியங்? இத⁴ , பி⁴க்க²வே, பி⁴க்கு² ‘‘இத³ங் து³க்க²ங் அரியஸச்ச’’ந்தி யதா²பூ⁴தங் பஜானாதி, யா ச மக்³கோ³, இத³ங் அஞ்ஞிந்த்³ரியங். ஆஸவக்க²யா அனாஸவோ ஹோதி, இத³ங் வுச்சதி அஞ்ஞாதாவிந்த்³ரியங். ததா²யங் பஞ்ஞா, அயங் ஹேது. யங் ச²ந்த³ங் ஜனேதி வாயமதி, யா பஜானாதி, அயங் நிஸ்ஸந்தோ³. யேன ஸப்³ப³ஸோ ஆஸவானங் க²யா ஹேது, யங் க²யே ஞாணமுப்பஜ்ஜதி, அனுப்பாதே³ ஞாணஞ்ச, அயங் நிஸ்ஸந்தோ³. யங் அரஹத்தங், இத³ங் ப²லங். தத்த² கீ²ணா மே ஜாதி, வுஸிதங் ப்³ரஹ்மசரியங், கதங் கரணீயந்தி, இத³ங் க²யே ஞாணங். நாபரங் இத்த²த்தாயாதி பஜானாமீதி இத³ங் அனுப்பாதே³ ஞாணங். இதி இமானி இந்த்³ரியானி அமோஹோ நித்³தி³ட்டோ² ஹேதுனா ச நிஸ்ஸந்தே³ன ச ப²லேன ச. இமானி அஸாதா⁴ரணானி நித்³தி³ட்டா²னி.
Tīṇimāni, bhikkhave 28, indriyāni anaññātaññassāmītindriyaṃ aññindriyaṃ aññātāvindriyaṃ. Tattha katamaṃ anaññātaññassāmītindriyaṃ? Idha, bhikkhave, bhikkhu anabhisametassa dukkhassa ariyasaccassa abhisamayāya chandaṃ janeti vāyamati, vīriyaṃ ārabhati , cittaṃ paggaṇhāti padahati. Evaṃ catunnaṃ ariyasaccānaṃ kātabbaṃ. Tattha katamaṃ aññindriyaṃ? Idha , bhikkhave, bhikkhu ‘‘idaṃ dukkhaṃ ariyasacca’’nti yathābhūtaṃ pajānāti, yā ca maggo, idaṃ aññindriyaṃ. Āsavakkhayā anāsavo hoti, idaṃ vuccati aññātāvindriyaṃ. Tathāyaṃ paññā, ayaṃ hetu. Yaṃ chandaṃ janeti vāyamati, yā pajānāti, ayaṃ nissando. Yena sabbaso āsavānaṃ khayā hetu, yaṃ khaye ñāṇamuppajjati, anuppāde ñāṇañca, ayaṃ nissando. Yaṃ arahattaṃ, idaṃ phalaṃ. Tattha khīṇā me jāti, vusitaṃ brahmacariyaṃ, kataṃ karaṇīyanti, idaṃ khaye ñāṇaṃ. Nāparaṃ itthattāyāti pajānāmīti idaṃ anuppāde ñāṇaṃ. Iti imāni indriyāni amoho niddiṭṭho hetunā ca nissandena ca phalena ca. Imāni asādhāraṇāni niddiṭṭhāni.
தத்த² கதமானி குஸலமூலானி ஸாதா⁴ரணானி? குஸலஞ்ச வோ, பி⁴க்க²வே, தே³ஸெஸ்ஸாமி குஸலமூலஞ்சேவ. தத்த² கதமங் குஸலமூலங்? அலோபோ⁴ அதோ³ஸோ அமோஹோ. தத்த² கதமங் குஸலங்? அட்ட² ஸம்மத்தானி ஸம்மாதி³ட்டி² யாவ ஸம்மாஸமாதி⁴. தத்த² யானி குஸலமூலானி, அயங் ஹேது. யஞ்ச அலோபோ⁴ தீணி கம்மானி ஸமுட்டா²பேதி ஸங்கப்பங் வாயாமங் ஸமாதி⁴ஞ்ச, அயங் அலோப⁴ஸ்ஸ நிஸ்ஸந்தோ³. தத்த² யோ அதோ³ஸோ, அயங் ஹேது. யங் தயோ த⁴ம்மே பட்ட²பேதி ஸம்மாவாசங் ஸம்மாகம்மந்தங் ஸம்மாஆஜீவஞ்ச, அயங் நிஸ்ஸந்தோ³. தத்த² யோ அமோஹோ ஹேது, யங் த்³வே த⁴ம்மே உபட்ட²பேதி அவிபரீதத³ஸ்ஸனம்பி ச அனபி⁴லாபனங், அயங் நிஸ்ஸந்தோ³. இமஸ்ஸ ப்³ரஹ்மசரியஸ்ஸ யங் ப²லங், தா த்³வே விமுத்தியோ ராக³விராகா³ சேதோவிமுத்தி அவிஜ்ஜா விராகா³ ச பஞ்ஞாவிமுத்தி, இத³ங் ப²லங். இதி இமானி தீணி குஸலமூலானி நித்³தி³ட்டா²னி ஹேதுதோ ச நிஸ்ஸந்த³தோ ச ப²லதோ ச. ஏவங் ஸாதா⁴ரணானி குஸலானி படிவிஜ்ஜி²தப்³பா³னி.
Tattha katamāni kusalamūlāni sādhāraṇāni? Kusalañca vo, bhikkhave, desessāmi kusalamūlañceva. Tattha katamaṃ kusalamūlaṃ? Alobho adoso amoho. Tattha katamaṃ kusalaṃ? Aṭṭha sammattāni sammādiṭṭhi yāva sammāsamādhi. Tattha yāni kusalamūlāni, ayaṃ hetu. Yañca alobho tīṇi kammāni samuṭṭhāpeti saṅkappaṃ vāyāmaṃ samādhiñca, ayaṃ alobhassa nissando. Tattha yo adoso, ayaṃ hetu. Yaṃ tayo dhamme paṭṭhapeti sammāvācaṃ sammākammantaṃ sammāājīvañca, ayaṃ nissando. Tattha yo amoho hetu, yaṃ dve dhamme upaṭṭhapeti aviparītadassanampi ca anabhilāpanaṃ, ayaṃ nissando. Imassa brahmacariyassa yaṃ phalaṃ, tā dve vimuttiyo rāgavirāgā cetovimutti avijjā virāgā ca paññāvimutti, idaṃ phalaṃ. Iti imāni tīṇi kusalamūlāni niddiṭṭhāni hetuto ca nissandato ca phalato ca. Evaṃ sādhāraṇāni kusalāni paṭivijjhitabbāni.
யத்த² து³வே யத்த² தீணி. அயஞ்செத்த² கா³தா².
Yattha duve yattha tīṇi. Ayañcettha gāthā.
‘‘துலமதுலஞ்ச ஸம்ப⁴வங், ப⁴வஸங்கா²ரமவஸ்ஸஜி முனி;
‘‘Tulamatulañca sambhavaṃ, bhavasaṅkhāramavassaji muni;
அஜ்ஜ²த்தரதோ ஸமாஹிதோ, அபி⁴ந்தி³ கவசமிவத்தஸம்ப⁴வ’’ந்தி.
Ajjhattarato samāhito, abhindi kavacamivattasambhava’’nti.
துலமதுலஞ்ச ஸம்ப⁴வந்தி துலஸங்க²தங் அதுலஸங்க²தங். தத்த² யே ஸங்க²தா துலங், தே த்³வே த⁴ம்மா அஸ்ஸாதோ³ ச ஆதீ³னவோ ச துலிதா ப⁴வந்தி. எத்தகோ காமேஸு அஸ்ஸாதோ³. எத்தகோ ஆதீ³னவோ இமஸ்ஸ, இத³ங் நிஸ்ஸரணந்தி இதி நிப்³பா³னங் பஜானாதி. த்³வீஹி காரணேஹி அதுலங் ந ச ஸக்கா துலயிதுங். எத்தகங் ஏதங் நேதங் பரமத்தீ²தி தேன அதுலங். அத² பாபுணா ரதனங் கரித்வா அச்ச²ரியபா⁴வேன அதுலங். தத்த² குஸலஸ்ஸ ச அபி⁴ஸம்ப⁴வா ஜானநா பஸ்ஸனா, அயங் அமோஹோ. யங் தத்த² ஞாதா ஓஸிரணா ப⁴வஸங்கா²ரானங், அயங் அலோபோ⁴. யங் அஜ்ஜ²த்தரதோ ஸமாஹிதோதி விக்கே²பபடிஸங்ஹரணா, அயங் அதோ³ஸோ. இதி இமானி தீணி குஸலமூலானி. துலமதுலஸம்ப⁴வந்தி அயங் அமோஹோ. யோ ப⁴வஸங்கா²ரானங் ஸமோஸரணங் லோபோ⁴ ஸம்மாஸமாதீ⁴னங் அஸ்ஸாதோ³, அயங் ஹேது. யங் அஜ்ஜ²த்தரதோ அவிஜ்ஜண்ட³கோஸங் ஸம்பே⁴தோ³, அயங் நிஸ்ஸந்தோ³. ஸா பவத்தி இமானி தீணி நித்³தி³ட்டா²னி குஸலமூலானி ஹேதுதோ ச நிஸ்ஸந்த³தோ ச ப²லதோ ச.
Tulamatulañca sambhavanti tulasaṅkhataṃ atulasaṅkhataṃ. Tattha ye saṅkhatā tulaṃ, te dve dhammā assādo ca ādīnavo ca tulitā bhavanti. Ettako kāmesu assādo. Ettako ādīnavo imassa, idaṃ nissaraṇanti iti nibbānaṃ pajānāti. Dvīhi kāraṇehi atulaṃ na ca sakkā tulayituṃ. Ettakaṃ etaṃ netaṃ paramatthīti tena atulaṃ. Atha pāpuṇā ratanaṃ karitvā acchariyabhāvena atulaṃ. Tattha kusalassa ca abhisambhavā jānanā passanā, ayaṃ amoho. Yaṃ tattha ñātā osiraṇā bhavasaṅkhārānaṃ, ayaṃ alobho. Yaṃ ajjhattarato samāhitoti vikkhepapaṭisaṃharaṇā, ayaṃ adoso. Iti imāni tīṇi kusalamūlāni. Tulamatulasambhavanti ayaṃ amoho. Yo bhavasaṅkhārānaṃ samosaraṇaṃ lobho sammāsamādhīnaṃ assādo, ayaṃ hetu. Yaṃ ajjhattarato avijjaṇḍakosaṃ sambhedo, ayaṃ nissando. Sā pavatti imāni tīṇi niddiṭṭhāni kusalamūlāni hetuto ca nissandato ca phalato ca.
எத்தாவதா ஏஸா பவத்தி ச நிவத்தி ச அகுஸலமூலேஹி பவத்ததி, குஸலமூலேஹி நிவத்ததீதி இமேஹி ச தீஹி ஸப்³ப³ங் அகுஸலமூலங் ஸமோஸரணங் க³ச்ச²தி. ஸோ த⁴ம்மே வா வசனதோ நித்³தி³ட்டோ² தண்ஹாதி வா கோதோ⁴தி வா அஸம்பஜஞ்ஞந்தி வா அனுஸயோதி வா மக்கோ²தி வா பளாஸோதி வா அஸ்ஸதீதி வா இஸ்ஸாதி வா மச்ச²ரியந்தி வா அஞ்ஞாணந்தி வா, தேஹி யே ச வத்தூ²ஹி நித்³தி³ஸிதப்³ப³ங். யஸ்ஸிமானி த்³வே வசனானி த⁴ம்மபதா³னி நித்³தி³ட்டா²னி ந ஸோ அத்தி² கிலேஸா, யோ இமேஸு நவஸு பதே³ஸு ஸமோதா⁴னங் ஸமோஸரணங் க³ச்ச²தி. அயங் கிலேஸோ, ந ச லோபோ⁴, ந ச தோ³ஸோ, ந ச மோஹோ.
Ettāvatā esā pavatti ca nivatti ca akusalamūlehi pavattati, kusalamūlehi nivattatīti imehi ca tīhi sabbaṃ akusalamūlaṃ samosaraṇaṃ gacchati. So dhamme vā vacanato niddiṭṭho taṇhāti vā kodhoti vā asampajaññanti vā anusayoti vā makkhoti vā paḷāsoti vā assatīti vā issāti vā macchariyanti vā aññāṇanti vā, tehi ye ca vatthūhi niddisitabbaṃ. Yassimāni dve vacanāni dhammapadāni niddiṭṭhāni na so atthi kilesā, yo imesu navasu padesu samodhānaṃ samosaraṇaṃ gacchati. Ayaṃ kileso, na ca lobho, na ca doso, na ca moho.
யதா² அகுஸலமூலானி, ஏவங் குஸலானி படிக்கே²பேன நித்³தி³ஸிதப்³பா³னி.
Yathā akusalamūlāni, evaṃ kusalāni paṭikkhepena niddisitabbāni.
இத³ங் அமோஹாதி⁴ட்டா²னங்.
Idaṃ amohādhiṭṭhānaṃ.
37. தத்த² கதமங் காயகம்மாதி⁴ட்டா²னங்?
37. Tattha katamaṃ kāyakammādhiṭṭhānaṃ?
காயேன குஸலங் கரே, அஸ்ஸ காயேன ஸங்வுதோ;
Kāyena kusalaṃ kare, assa kāyena saṃvuto;
காயது³ச்சரிதங் ஹித்வா, காயேன ஸுசரிதங் சரே.
Kāyaduccaritaṃ hitvā, kāyena sucaritaṃ care.
தீணிமானி, பி⁴க்க²வே, ஸுசரிதானி 29. பாணாதிபாதா வேரமணீ, அதி³ன்னாதா³னா வேரமணீ, காமேஸுமிச்சா²சாரா வேரமணீ, இத³ங் காயகம்மாதி⁴ட்டா²னங்.
Tīṇimāni, bhikkhave, sucaritāni 30. Pāṇātipātā veramaṇī, adinnādānā veramaṇī, kāmesumicchācārā veramaṇī, idaṃ kāyakammādhiṭṭhānaṃ.
தத்த² கதமங் வாசாகம்மாதி⁴ட்டா²னங்?
Tattha katamaṃ vācākammādhiṭṭhānaṃ?
ஸுபா⁴ஸிதங் 31 உத்தமமாஹு ஸந்தோ, த⁴ம்மங் ப⁴ணே நாத⁴ம்மங் தங் து³தியங்;
Subhāsitaṃ 32 uttamamāhu santo, dhammaṃ bhaṇe nādhammaṃ taṃ dutiyaṃ;
பியங் ப⁴ணே நாப்பியங் தங் ததியங், ஸச்சங் ப⁴ணே நாலிகங் தங் சதுத்த²ங்.
Piyaṃ bhaṇe nāppiyaṃ taṃ tatiyaṃ, saccaṃ bhaṇe nālikaṃ taṃ catutthaṃ.
சத்தாரிமானி ச வசீஸுசரிதானி இத³ங் வாசாகம்மாதி⁴ட்டா²னங்.
Cattārimāni ca vacīsucaritāni idaṃ vācākammādhiṭṭhānaṃ.
தத்த² கதமங் மனோகம்மாதி⁴ட்டா²னங்?
Tattha katamaṃ manokammādhiṭṭhānaṃ?
மனேன குஸலங் கம்மங், மனஸா ஸங்வுதோ ப⁴வே;
Manena kusalaṃ kammaṃ, manasā saṃvuto bhave;
மனோது³ச்சரிதங் ஹித்வா, மனஸா ஸுசரிதங் சரே.
Manoduccaritaṃ hitvā, manasā sucaritaṃ care.
தீணிமானி மனோஸுசரிதானி, அனபி⁴ஜ்ஜா², அப்³யாபாதோ³, ஸம்மாதி³ட்டி², இத³ங் மனோகம்மாதி⁴ட்டா²னங். இமானி அஸாதா⁴ரணானி ஸுத்தானி.
Tīṇimāni manosucaritāni, anabhijjhā, abyāpādo, sammādiṭṭhi, idaṃ manokammādhiṭṭhānaṃ. Imāni asādhāraṇāni suttāni.
தத்த² கதமானி ஸாதா⁴ரணானி ஸுத்தானி?
Tattha katamāni sādhāraṇāni suttāni?
வாசானுரக்கீ² மனஸா ஸுஸங்வுதோ, காயேன ச நாகுஸலங் கயிரா 33;
Vācānurakkhī manasā susaṃvuto, kāyena ca nākusalaṃ kayirā 34;
ஏதே தயோ கம்மபதே² விஸோத⁴யே, ஆராத⁴யே மக்³க³மிஸிப்பவேதி³தங்.
Ete tayo kammapathe visodhaye, ārādhaye maggamisippaveditaṃ.
திஸ்ஸோ இமா, பி⁴க்க²வே, பாரிஸுத்³தி⁴யோ – காயகம்மபாரிஸுத்³தி⁴, வாசாகம்மபாரிஸுத்³தி⁴, மனோகம்மபாரிஸுத்³தி⁴.
Tisso imā, bhikkhave, pārisuddhiyo – kāyakammapārisuddhi, vācākammapārisuddhi, manokammapārisuddhi.
தத்த² கதமா காயகம்மபாரிஸுத்³தி⁴? பாணாதிபாதா வேரமணீ, அதி³ன்னாதா³னா வேரமணீ, காமேஸுமிச்சா²சாரா வேரமணீ. தத்த² கதமா வசீகம்மபாரிஸுத்³தி⁴? முஸாவாதா³ வேரமணீ…பே॰… ஸம்ப²ப்பலாபா வேரமணீ. தத்த² கதமா மனோகம்மபாரிஸுத்³தி⁴? அனபி⁴ஜ்ஜா² அப்³யாபாதோ³ ஸம்மாதி³ட்டி². இத³ங் ஸாதா⁴ரணஸுத்தங்.
Tattha katamā kāyakammapārisuddhi? Pāṇātipātā veramaṇī, adinnādānā veramaṇī, kāmesumicchācārā veramaṇī. Tattha katamā vacīkammapārisuddhi? Musāvādā veramaṇī…pe… samphappalāpā veramaṇī. Tattha katamā manokammapārisuddhi? Anabhijjhā abyāpādo sammādiṭṭhi. Idaṃ sādhāraṇasuttaṃ.
இதி ஸாதா⁴ரணானி ச ஸுத்தானி அஸாதா⁴ரணானி ச ஸுத்தானி படிவிஜ்ஜி²தப்³பா³னி. படிவிஜ்ஜி²த்வா வாசாய காயேன ச ஸுத்தஸ்ஸ அத்தோ² நித்³தி³ஸிதப்³போ³.
Iti sādhāraṇāni ca suttāni asādhāraṇāni ca suttāni paṭivijjhitabbāni. Paṭivijjhitvā vācāya kāyena ca suttassa attho niddisitabbo.
38. தத்த² கதமங் ஸத்³தி⁴ந்த்³ரியாதி⁴ட்டா²னங்?
38. Tattha katamaṃ saddhindriyādhiṭṭhānaṃ?
ஸீலஞ்ச யஸ்ஸ கல்யாணங், அரியகந்தங் பஸங்ஸிதங்.
Sīlañca yassa kalyāṇaṃ, ariyakantaṃ pasaṃsitaṃ.
ஸங்கே⁴ பஸாதோ³ யஸ்ஸத்தி², உஜுபூ⁴தஞ்ச த³ஸ்ஸனங்;
Saṅghe pasādo yassatthi, ujubhūtañca dassanaṃ;
அத³லித்³தோ³தி தங் ஆஹு, அமோக⁴ங் தஸ்ஸ ஜீவிதங்.
Adaliddoti taṃ āhu, amoghaṃ tassa jīvitaṃ.
ஸத்³தா⁴ வே நந்தி³கா ஆராதி⁴கோ, நோ தஸ்ஸ ஸத்³தோ⁴தி;
Saddhā ve nandikā ārādhiko, no tassa saddhoti;
ஸப்³ப³ங் ஸியாதி ப⁴க³வந்தங், ததா²ரூபோ த⁴ம்மஸம்பஸாதோ³.
Sabbaṃ siyāti bhagavantaṃ, tathārūpo dhammasampasādo.
இத³ங் ஸத்³தி⁴ந்த்³ரியாதி⁴ட்டா²னங்.
Idaṃ saddhindriyādhiṭṭhānaṃ.
தத்த² கதமங் வீரியாதி⁴ட்டா²னங்?
Tattha katamaṃ vīriyādhiṭṭhānaṃ?
து⁴னாத² மச்சுனோ ஸேனங், நளாகா³ரங்வ குஞ்ஜரோ.
Dhunātha maccuno senaṃ, naḷāgāraṃva kuñjaro.
சத்தாரோமே, பி⁴க்க²வே, ஸம்மப்பதா⁴னா, இத³ங் வீரியாதி⁴ட்டா²னங்.
Cattārome, bhikkhave, sammappadhānā, idaṃ vīriyādhiṭṭhānaṃ.
தத்த² கதமங் ஸதிந்த்³ரியாதி⁴ட்டா²னங்?
Tattha katamaṃ satindriyādhiṭṭhānaṃ?
ஸதீமதோ ஸதா³ ப⁴த்³த³ங், ப⁴த்³த³மத்து² ஸதீமதோ;
Satīmato sadā bhaddaṃ, bhaddamatthu satīmato;
சத்தாரோ ஸதிபட்டா²னா வித்தா²ரேன காதப்³பா³, இத³ங் ஸதிந்த்³ரியாதி⁴ட்டா²னங்.
Cattāro satipaṭṭhānā vitthārena kātabbā, idaṃ satindriyādhiṭṭhānaṃ.
தத்த² கதமங் ஸமாதி⁴ந்த்³ரியாதி⁴ட்டா²னங்?
Tattha katamaṃ samādhindriyādhiṭṭhānaṃ?
ஆகங்க²தோ தே நரத³ம்மஸாரதி², தே³வா மனுஸ்ஸா மனஸா விசிந்திதங்;
Ākaṅkhato te naradammasārathi, devā manussā manasā vicintitaṃ;
ஸப்³பே³ன ஜஞ்ஞா கஸிணாபி பாணினோ, ஸந்தங் ஸமாதி⁴ங் அரணங் நிஸேவதோ.
Sabbena jaññā kasiṇāpi pāṇino, santaṃ samādhiṃ araṇaṃ nisevato.
தயோமே , பி⁴க்க²வே, ஸமாதீ⁴ – ஸவிதக்கோ ஸவிசாரோ, அவிதக்கோ விசாரமத்தோ, அவிதக்கோ அவிசாரோ. இத³ங் ஸமாதி⁴ந்த்³ரியாதி⁴ட்டா²னங்.
Tayome , bhikkhave, samādhī – savitakko savicāro, avitakko vicāramatto, avitakko avicāro. Idaṃ samādhindriyādhiṭṭhānaṃ.
தத்த² கதமங் பஞ்ஞிந்த்³ரியாதி⁴ட்டா²னங்?
Tattha katamaṃ paññindriyādhiṭṭhānaṃ?
பஞ்ஞா ஹி ஸெட்டா² லோகஸ்மிந்தி வித்தா²ரேன.
Paññā hi seṭṭhā lokasminti vitthārena.
திஸ்ஸோ இமா, பி⁴க்க²வே, பஞ்ஞா – ஸுதமயீ, சிந்தாமயீ, பா⁴வனாமயீ, இத³ங் பஞ்ஞிந்த்³ரியாதி⁴ட்டா²னங் ஸுத்தங், இமானி இந்த்³ரியாதி⁴ட்டா²னானி அஸாதா⁴ரணானி ஸுத்தானி.
Tisso imā, bhikkhave, paññā – sutamayī, cintāmayī, bhāvanāmayī, idaṃ paññindriyādhiṭṭhānaṃ suttaṃ, imāni indriyādhiṭṭhānāni asādhāraṇāni suttāni.
39. தத்த² கதமானி ஸாதா⁴ரணானி இந்த்³ரியாதி⁴ட்டா²னானி ஸுத்தானி?
39. Tattha katamāni sādhāraṇāni indriyādhiṭṭhānāni suttāni?
ஸத்³தா⁴ ஸதி ச வீரியங், ஸமதோ² ச விபஸ்ஸனா;
Saddhā sati ca vīriyaṃ, samatho ca vipassanā;
தாதி³ஸங் பி⁴க்கு²மாஸஜ்ஜ, புப்³பே³வ உபஹஞ்ஞதி.
Tādisaṃ bhikkhumāsajja, pubbeva upahaññati.
பஞ்சிமானி இந்த்³ரியானி. ஸத்³தி⁴ந்த்³ரியாதி³இந்த்³ரியங் த³ட்ட²ப்³ப³ங். தீஸு அவேச்சப்பஸாதே³ வித்தா²ரேன ஸுத்தங் காதப்³ப³ங். இமானி ஸாதா⁴ரணானி இந்த்³ரியாதி⁴ட்டா²னானி ஸுத்தானி. யங் யஸ்ஸ ஸம்ப³ந்த⁴ங் குஸலஸ்ஸ வா அகுஸலஸ்ஸ வா தேன தேன அதி⁴ட்டா²னேன தங் ஸுத்தங் நித்³தி³ஸிதப்³ப³ங், நத்த²ஞ்ஞோ த⁴ம்மோ நித்³தி³ஸிதப்³போ³. தத்த² ஸாதா⁴ரணங் குஸலங் நாபி குஸலங் அகுஸலங் யதா² ஸாதா⁴ரணானி ச குஸலமூலானி ஸாதா⁴ரணானி ச அகுஸலமூலானி உப்பன்னங் காமவிதக்கங் பஜஹதி…பே॰… சத்தாரோ ஸம்மப்பதா⁴னா குஸலங் அகுஸலஞ்ச.
Pañcimāni indriyāni. Saddhindriyādiindriyaṃ daṭṭhabbaṃ. Tīsu aveccappasāde vitthārena suttaṃ kātabbaṃ. Imāni sādhāraṇāni indriyādhiṭṭhānāni suttāni. Yaṃ yassa sambandhaṃ kusalassa vā akusalassa vā tena tena adhiṭṭhānena taṃ suttaṃ niddisitabbaṃ, natthañño dhammo niddisitabbo. Tattha sādhāraṇaṃ kusalaṃ nāpi kusalaṃ akusalaṃ yathā sādhāraṇāni ca kusalamūlāni sādhāraṇāni ca akusalamūlāni uppannaṃ kāmavitakkaṃ pajahati…pe… cattāro sammappadhānā kusalaṃ akusalañca.
தத்தி²மா உத்³தா³னகா³தா²
Tatthimā uddānagāthā
யோ பாணமதிபாதேதி, தீணி தஸ்ஸ பா³லலக்க²ணங்.
Yo pāṇamatipāteti, tīṇi tassa bālalakkhaṇaṃ.
ஸதஞ்சேவ ஸஹஸ்ஸானங், யே ச ஸமணப்³ராஹ்மணா;
Satañceva sahassānaṃ, ye ca samaṇabrāhmaṇā;
ச²ந்தா³ தோ³ஸா ப⁴யா மோஹா, சதூஹி அக³தீஹி ச.
Chandā dosā bhayā mohā, catūhi agatīhi ca.
அஸுபா⁴னுபஸ்ஸிங் விஹரந்தங், நிமித்தேஸு அஸுபா⁴ ச;
Asubhānupassiṃ viharantaṃ, nimittesu asubhā ca;
ஏகம்பி சே பியங் பாணங், மித்தா ஸசே ஸுபா⁴ஸிதா.
Ekampi ce piyaṃ pāṇaṃ, mittā sace subhāsitā.
பஞ்ஞா ஹி ஸெட்டா² லோகஸ்மிங், அனுஞ்ஞா தீணி இந்த்³ரியானி;
Paññā hi seṭṭhā lokasmiṃ, anuññā tīṇi indriyāni;
குஸலாகுஸலமூலானி ச, துலமதுலஞ்ச ஸம்ப⁴வங்.
Kusalākusalamūlāni ca, tulamatulañca sambhavaṃ.
காயேன குஸலங் கரே, தீணி ஸுசரிதானி ச;
Kāyena kusalaṃ kare, tīṇi sucaritāni ca;
ஸுபா⁴ஸிதங் உத்தமமாஹு, ஸந்தோ வசீஸுசரிதானி ச.
Subhāsitaṃ uttamamāhu, santo vacīsucaritāni ca.
காயேன ச குஸலங் கயிரா, மனோது³ச்சரிதானி ச;
Kāyena ca kusalaṃ kayirā, manoduccaritāni ca;
காயானுரக்கீ² ச ஸதா³, திஸ்ஸோ ச பாரிஸுத்³தி⁴யோ.
Kāyānurakkhī ca sadā, tisso ca pārisuddhiyo.
யஸ்ஸ ஸத்³தா⁴ ததா²க³தே, ஸமுப்பாதே³ ச தே³ஸிதோ;
Yassa saddhā tathāgate, samuppāde ca desito;
ஆரம்ப⁴த² நிக்கமத², யா ச ஸம்மப்பதா⁴னதா.
Ārambhatha nikkamatha, yā ca sammappadhānatā.
ஸதீமதோ ஸதா³ ப⁴த்³த³ங், ஸதிபட்டா²னபா⁴வனா;
Satīmato sadā bhaddaṃ, satipaṭṭhānabhāvanā;
ஆகங்க²தோ ச அனஞ்ஞாணங், யே ச தீணி ஸமாத⁴யோ.
Ākaṅkhato ca anaññāṇaṃ, ye ca tīṇi samādhayo.
பஞ்ஞா ஹி ஸெட்டா² லோகஸ்மிங், திஸ்ஸோ பஞ்ஞா பகாஸிதா;
Paññā hi seṭṭhā lokasmiṃ, tisso paññā pakāsitā;
அவீதராகோ³ காமேஸு, ததே²வ பஞ்சிந்த்³ரியா.
Avītarāgo kāmesu, tatheva pañcindriyā.
இதி தே²ரஸ்ஸ மஹாகச்சாயனஸ்ஸ
Iti therassa mahākaccāyanassa
ஜம்பு³வனவாஸினோ பேடகோபதே³ஸே
Jambuvanavāsino peṭakopadese
ததியபூ⁴மி ஸுத்தாதி⁴ட்டா²னங் நாம.
Tatiyabhūmi suttādhiṭṭhānaṃ nāma.
Footnotes:
