| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೮. ಸೂರಿಯಙ್ಗಪಞ್ಹೋ
8. Sūriyaṅgapañho
೮. ‘‘ಭನ್ತೇ ನಾಗಸೇನ, ‘ಸೂರಿಯಸ್ಸ 1 ಸತ್ತ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ಸತ್ತ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಸೂರಿಯೋ ಸಬ್ಬಂ ಉದಕಂ ಪರಿಸೋಸೇತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸಬ್ಬಕಿಲೇಸಾ ಅನವಸೇಸಂ ಪರಿಸೋಸೇತಬ್ಬಾ। ಇದಂ, ಮಹಾರಾಜ, ಸೂರಿಯಸ್ಸ ಪಠಮಂ ಅಙ್ಗಂ ಗಹೇತಬ್ಬಂ।
8. ‘‘Bhante nāgasena, ‘sūriyassa 2 satta aṅgāni gahetabbānī’ti yaṃ vadesi, katamāni tāni satta aṅgāni gahetabbānī’’ti? ‘‘Yathā, mahārāja, sūriyo sabbaṃ udakaṃ parisoseti, evameva kho, mahārāja, yoginā yogāvacarena sabbakilesā anavasesaṃ parisosetabbā. Idaṃ, mahārāja, sūriyassa paṭhamaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸೂರಿಯೋ ತಮನ್ಧಕಾರಂ ವಿಧಮತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸಬ್ಬಂ ರಾಗತಮಂ ದೋಸತಮಂ ಮೋಹತಮಂ ಮಾನತಮಂ ದಿಟ್ಠಿತಮಂ ಕಿಲೇಸತಮಂ ಸಬ್ಬಂ ದುಚ್ಚರಿತತಮಂ ವಿಧಮಯಿತಬ್ಬಂ। ಇದಂ, ಮಹಾರಾಜ, ಸೂರಿಯಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, sūriyo tamandhakāraṃ vidhamati, evameva kho, mahārāja, yoginā yogāvacarena sabbaṃ rāgatamaṃ dosatamaṃ mohatamaṃ mānatamaṃ diṭṭhitamaṃ kilesatamaṃ sabbaṃ duccaritatamaṃ vidhamayitabbaṃ. Idaṃ, mahārāja, sūriyassa dutiyaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸೂರಿಯೋ ಅಭಿಕ್ಖಣಂ ಚರತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಅಭಿಕ್ಖಣಂ ಯೋನಿಸೋ ಮನಸಿಕಾರೋ ಕಾತಬ್ಬೋ। ಇದಂ, ಮಹಾರಾಜ, ಸೂರಿಯಸ್ಸ ತತಿಯಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, sūriyo abhikkhaṇaṃ carati, evameva kho, mahārāja, yoginā yogāvacarena abhikkhaṇaṃ yoniso manasikāro kātabbo. Idaṃ, mahārāja, sūriyassa tatiyaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸೂರಿಯೋ ರಂಸಿಮಾಲೀ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಆರಮ್ಮಣಮಾಲಿನಾ ಭವಿತಬ್ಬಂ। ಇದಂ, ಮಹಾರಾಜ, ಸೂರಿಯಸ್ಸ ಚತುತ್ಥಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, sūriyo raṃsimālī, evameva kho, mahārāja, yoginā yogāvacarena ārammaṇamālinā bhavitabbaṃ. Idaṃ, mahārāja, sūriyassa catutthaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸೂರಿಯೋ ಮಹಾಜನಕಾಯಂ ಸನ್ತಾಪೇನ್ತೋ ಚರತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಆಚಾರಸೀಲಗುಣವತ್ತಪ್ಪಟಿಪತ್ತಿಯಾ ಝಾನವಿಮೋಕ್ಖಸಮಾಧಿಸಮಾಪತ್ತಿಇನ್ದ್ರಿಯಬಲಬೋಜ್ಝಙ್ಗಸತಿಪಟ್ಠಾನಸಮ್ಮಪ್ಪಧಾನಇದ್ಧಿಪಾದೇಹಿ ಸದೇವಕೋ ಲೋಕೋ ಸನ್ತಾಪಯಿತಬ್ಬೋ। ಇದಂ, ಮಹಾರಾಜ, ಸೂರಿಯಸ್ಸ ಪಞ್ಚಮಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, sūriyo mahājanakāyaṃ santāpento carati, evameva kho, mahārāja, yoginā yogāvacarena ācārasīlaguṇavattappaṭipattiyā jhānavimokkhasamādhisamāpattiindriyabalabojjhaṅgasatipaṭṭhānasammappadhānaiddhipādehi sadevako loko santāpayitabbo. Idaṃ, mahārāja, sūriyassa pañcamaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸೂರಿಯೋ ರಾಹುಭಯಾ ಭೀತೋ ಚರತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ದುಚ್ಚರಿತದುಗ್ಗತಿವಿಸಮಕನ್ತಾರವಿಪಾಕವಿನಿಪಾತಕಿಲೇಸಜಾಲಜಟಿತೇ ದಿಟ್ಠಿಸಙ್ಘಾಟಪಟಿಮುಕ್ಕೇ ಕುಪಥಪಕ್ಖನ್ದೇ ಕುಮ್ಮಗ್ಗಪಟಿಪನ್ನೇ 3 ಸತ್ತೇ ದಿಸ್ವಾ ಮಹತಾ ಸಂವೇಗಭಯೇನ ಮಾನಸಂ ಸಂವೇಜೇತಬ್ಬಂ। ಇದಂ, ಮಹಾರಾಜ, ಸೂರಿಯಸ್ಸ ಛಟ್ಠಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, sūriyo rāhubhayā bhīto carati, evameva kho, mahārāja, yoginā yogāvacarena duccaritaduggativisamakantāravipākavinipātakilesajālajaṭite diṭṭhisaṅghāṭapaṭimukke kupathapakkhande kummaggapaṭipanne 4 satte disvā mahatā saṃvegabhayena mānasaṃ saṃvejetabbaṃ. Idaṃ, mahārāja, sūriyassa chaṭṭhaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸೂರಿಯೋ ಕಲ್ಯಾಣಪಾಪಕೇ ದಸ್ಸೇತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಇನ್ದ್ರಿಯಬಲಬೋಜ್ಝಙ್ಗಸತಿಪಟ್ಠಾನಸಮ್ಮಪ್ಪಧಾನಇದ್ಧಿಪಾದಲೋಕಿಯಲೋಕುತ್ತರಧಮ್ಮಾ ದಸ್ಸೇತಬ್ಬಾ। ಇದಂ, ಮಹಾರಾಜ, ಸೂರಿಯಸ್ಸ ಸತ್ತಮಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ವಙ್ಗೀಸೇನ –
‘‘Puna caparaṃ, mahārāja, sūriyo kalyāṇapāpake dasseti, evameva kho, mahārāja, yoginā yogāvacarena indriyabalabojjhaṅgasatipaṭṭhānasammappadhānaiddhipādalokiyalokuttaradhammā dassetabbā. Idaṃ, mahārāja, sūriyassa sattamaṃ aṅgaṃ gahetabbaṃ. Bhāsitampetaṃ, mahārāja, therena vaṅgīsena –
‘‘‘ಯಥಾಪಿ ಸೂರಿಯೋ ಉದಯನ್ತೋ, ರೂಪಂ ದಸ್ಸೇತಿ ಪಾಣಿನಂ।
‘‘‘Yathāpi sūriyo udayanto, rūpaṃ dasseti pāṇinaṃ;
ಸುಚಿಞ್ಚ ಅಸುಚಿಞ್ಚಾಪಿ, ಕಲ್ಯಾಣಞ್ಚಾಪಿ ಪಾಪಕಂ॥
Suciñca asuciñcāpi, kalyāṇañcāpi pāpakaṃ.
‘‘‘ತಥಾ ಭಿಕ್ಖು ಧಮ್ಮಧರೋ, ಅವಿಜ್ಜಾಪಿಹಿತಂ ಜನಂ।
‘‘‘Tathā bhikkhu dhammadharo, avijjāpihitaṃ janaṃ;
ಪಥಂ ದಸ್ಸೇತಿ ವಿವಿಧಂ, ಆದಿಚ್ಚೋವುದಯಂ ಯಥಾ’’’ತಿ॥
Pathaṃ dasseti vividhaṃ, ādiccovudayaṃ yathā’’’ti.
ಸೂರಿಯಙ್ಗಪಞ್ಹೋ ಅಟ್ಠಮೋ।
Sūriyaṅgapañho aṭṭhamo.
Footnotes:
