| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೯. ಸಕ್ಕಙ್ಗಪಞ್ಹೋ
9. Sakkaṅgapañho
೯. ‘‘ಭನ್ತೇ ನಾಗಸೇನ, ‘ಸಕ್ಕಸ್ಸ ತೀಣಿ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ತೀಣಿ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಸಕ್ಕೋ ಏಕನ್ತಸುಖಸಮಪ್ಪಿತೋ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಏಕನ್ತಪವಿವೇಕಸುಖಾಭಿರತೇನ ಭವಿತಬ್ಬಂ। ಇದಂ, ಮಹಾರಾಜ, ಸಕ್ಕಸ್ಸ ಪಠಮಂ ಅಙ್ಗಂ ಗಹೇತಬ್ಬಂ।
9. ‘‘Bhante nāgasena, ‘sakkassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, sakko ekantasukhasamappito, evameva kho, mahārāja, yoginā yogāvacarena ekantapavivekasukhābhiratena bhavitabbaṃ. Idaṃ, mahārāja, sakkassa paṭhamaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸಕ್ಕೋ ದೇವೇ ದಿಸ್ವಾ ಪಗ್ಗಣ್ಹಾತಿ, ಹಾಸಮಭಿಜನೇತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಕುಸಲೇಸು ಧಮ್ಮೇಸು ಅಲೀನಮತನ್ದಿತಂ ಸನ್ತಂ ಮಾನಸಂ ಪಗ್ಗಹೇತಬ್ಬಂ, ಹಾಸಮಭಿಜನೇತಬ್ಬಂ, ಉಟ್ಠಹಿತಬ್ಬಂ ಘಟಿತಬ್ಬಂ ವಾಯಮಿತಬ್ಬಂ । ಇದಂ, ಮಹಾರಾಜ, ಸಕ್ಕಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, sakko deve disvā paggaṇhāti, hāsamabhijaneti, evameva kho, mahārāja, yoginā yogāvacarena kusalesu dhammesu alīnamatanditaṃ santaṃ mānasaṃ paggahetabbaṃ, hāsamabhijanetabbaṃ, uṭṭhahitabbaṃ ghaṭitabbaṃ vāyamitabbaṃ . Idaṃ, mahārāja, sakkassa dutiyaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸಕ್ಕಸ್ಸ ಅನಭಿರತಿ ನುಪ್ಪಜ್ಜತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸುಞ್ಞಾಗಾರೇ ಅನಭಿರತಿ ನ ಉಪ್ಪಾದೇತಬ್ಬಾ। ಇದಂ, ಮಹಾರಾಜ, ಸಕ್ಕಸ್ಸ ತತಿಯಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಸುಭೂತಿನಾ –
‘‘Puna caparaṃ, mahārāja, sakkassa anabhirati nuppajjati, evameva kho, mahārāja, yoginā yogāvacarena suññāgāre anabhirati na uppādetabbā. Idaṃ, mahārāja, sakkassa tatiyaṃ aṅgaṃ gahetabbaṃ. Bhāsitampetaṃ, mahārāja, therena subhūtinā –
‘‘‘ಸಾಸನೇ ತೇ ಮಹಾವೀರ, ಯತೋ ಪಬ್ಬಜಿತೋ ಅಹಂ।
‘‘‘Sāsane te mahāvīra, yato pabbajito ahaṃ;
ನಾಭಿಜಾನಾಮಿ ಉಪ್ಪನ್ನಂ, ಮಾನಸಂ ಕಾಮಸಂಹಿತ’’’ನ್ತಿ॥
Nābhijānāmi uppannaṃ, mānasaṃ kāmasaṃhita’’’nti.
ಸಕ್ಕಙ್ಗಪಞ್ಹೋ ನವಮೋ।
Sakkaṅgapañho navamo.
