| Library / Tipiṭaka / তিপিটক • Tipiṭaka / জাতকপাল়ি • Jātakapāḷi |
৪২০. সুমঙ্গলজাতকং (৪)
420. Sumaṅgalajātakaṃ (4)
২৭.
27.
ভুসম্হি 1 কুদ্ধোতি অৰেক্খিযান, ন তাৰ দণ্ডং পণযেয্য ইস্সরো।
Bhusamhi 2 kuddhoti avekkhiyāna, na tāva daṇḍaṃ paṇayeyya issaro;
অট্ঠানসো অপ্পতিরূপমত্তনো, পরস্স দুক্খানি ভুসং উদীরযে॥
Aṭṭhānaso appatirūpamattano, parassa dukkhāni bhusaṃ udīraye.
২৮.
28.
যতো চ জানেয্য পসাদমত্তনো, অত্থং নিযুঞ্জেয্য পরস্স দুক্কটং।
Yato ca jāneyya pasādamattano, atthaṃ niyuñjeyya parassa dukkaṭaṃ;
তদাযমত্থোতি সযং অৰেক্খিয, অথস্স দণ্ডং সদিসং নিৰেসযে॥
Tadāyamatthoti sayaṃ avekkhiya, athassa daṇḍaṃ sadisaṃ nivesaye.
২৯.
29.
ন চাপি ঝাপেতি পরং ন অত্তনং, অমুচ্ছিতো যো নযতে নযানযং।
Na cāpi jhāpeti paraṃ na attanaṃ, amucchito yo nayate nayānayaṃ;
যো দণ্ডধারো ভৰতীধ ইস্সরো, স ৰণ্ণগুত্তো সিরিযা ন ধংসতি॥
Yo daṇḍadhāro bhavatīdha issaro, sa vaṇṇagutto siriyā na dhaṃsati.
৩০.
30.
যে খত্তিযা সে অনিসম্মকারিনো, পণেন্তি দণ্ডং সহসা পমুচ্ছিতা।
Ye khattiyā se anisammakārino, paṇenti daṇḍaṃ sahasā pamucchitā;
অৰণ্ণসংযুতা 3 জহন্তি জীৰিতং, ইতো ৰিমুত্তাপি চ যন্তি দুগ্গতিং॥
Avaṇṇasaṃyutā 4 jahanti jīvitaṃ, ito vimuttāpi ca yanti duggatiṃ.
৩১.
31.
ধম্মে চ যে অরিযপ্পৰেদিতে রতা, অনুত্তরা তে ৰচসা মনসা কম্মুনা চ।
Dhamme ca ye ariyappavedite ratā, anuttarā te vacasā manasā kammunā ca;
তে সন্তিসোরচ্চসমাধিসণ্ঠিতা, ৰজন্তি লোকং দুভযং তথাৰিধা॥
Te santisoraccasamādhisaṇṭhitā, vajanti lokaṃ dubhayaṃ tathāvidhā.
৩২.
32.
রাজাহমস্মি নরপমদানমিস্সরো, সচেপি কুজ্ঝামি ঠপেমি অত্তনং।
Rājāhamasmi narapamadānamissaro, sacepi kujjhāmi ṭhapemi attanaṃ;
নিসেধযন্তো জনতং তথাৰিধং, পণেমি দণ্ডং অনুকম্প যোনিসো॥
Nisedhayanto janataṃ tathāvidhaṃ, paṇemi daṇḍaṃ anukampa yoniso.
৩৩.
33.
সিরী চ লক্খী চ তৰেৰ খত্তিয, জনাধিপ মা ৰিজহি কুদাচনং।
Sirī ca lakkhī ca taveva khattiya, janādhipa mā vijahi kudācanaṃ;
অক্কোধনো নিচ্চপসন্নচিত্তো, অনীঘো তুৰং ৰস্সসতানি পালয॥
Akkodhano niccapasannacitto, anīgho tuvaṃ vassasatāni pālaya.
৩৪.
34.
গুণেহি এতেহি উপেত খত্তিয, ঠিতমরিযৰত্তী 5 সুৰচো অকোধনো।
Guṇehi etehi upeta khattiya, ṭhitamariyavattī 6 suvaco akodhano;
সুখী অনুপ্পীল় পসাসমেদিনিং 7, ইতো ৰিমুত্তোপি চ যাহি সুগ্গতিং॥
Sukhī anuppīḷa pasāsamediniṃ 8, ito vimuttopi ca yāhi suggatiṃ.
৩৫.
35.
এৰং সুনীতেন 9 সুভাসিতেন, ধম্মেন ঞাযেন উপাযসো নযং।
Evaṃ sunītena 10 subhāsitena, dhammena ñāyena upāyaso nayaṃ;
নিব্বাপযে সঙ্খুভিতং মহাজনং, মহাৰ মেঘো সলিলেন মেদিনিন্তি 11॥
Nibbāpaye saṅkhubhitaṃ mahājanaṃ, mahāva megho salilena medininti 12.
সুমঙ্গলজাতকং চতুত্থং।
Sumaṅgalajātakaṃ catutthaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / জাতক-অট্ঠকথা • Jātaka-aṭṭhakathā / [৪২০] ৪. সুমঙ্গলজাতকৰণ্ণনা • [420] 4. Sumaṅgalajātakavaṇṇanā
