| Library / Tipiṭaka / តិបិដក • Tipiṭaka / ថេរគាថាបាឡិ • Theragāthāpāḷi |
១០. សុមនត្ថេរគាថា
10. Sumanattheragāthā
៤២៩.
429.
‘‘យទា នវោ បព្ពជិតោ, ជាតិយា សត្តវស្សិកោ;
‘‘Yadā navo pabbajito, jātiyā sattavassiko;
ឥទ្ធិយា អភិភោត្វាន, បន្នគិន្ទំ មហិទ្ធិកំ។
Iddhiyā abhibhotvāna, pannagindaṃ mahiddhikaṃ.
៤៣០.
430.
‘‘ឧបជ្ឈាយស្ស ឧទកំ, អនោតត្តា មហាសរា;
‘‘Upajjhāyassa udakaṃ, anotattā mahāsarā;
អាហរាមិ តតោ ទិស្វា, មំ សត្ថា ឯតទព្រវិ’’។
Āharāmi tato disvā, maṃ satthā etadabravi’’.
៤៣១.
431.
‘‘សារិបុត្ត ឥមំ បស្ស, អាគច្ឆន្តំ កុមារកំ;
‘‘Sāriputta imaṃ passa, āgacchantaṃ kumārakaṃ;
ឧទកកុម្ភមាទាយ, អជ្ឈត្តំ សុសមាហិតំ។
Udakakumbhamādāya, ajjhattaṃ susamāhitaṃ.
៤៣២.
432.
‘‘បាសាទិកេន វត្តេន, កល្យាណឥរិយាបថោ;
‘‘Pāsādikena vattena, kalyāṇairiyāpatho;
សាមណេរោនុរុទ្ធស្ស, ឥទ្ធិយា ច វិសារទោ។
Sāmaṇeronuruddhassa, iddhiyā ca visārado.
៤៣៣.
433.
‘‘អាជានីយេន អាជញ្ញោ, សាធុនា សាធុការិតោ;
‘‘Ājānīyena ājañño, sādhunā sādhukārito;
វិនីតោ អនុរុទ្ធេន, កតកិច្ចេន សិក្ខិតោ។
Vinīto anuruddhena, katakiccena sikkhito.
៤៣៤.
434.
‘‘សោ បត្វា បរមំ សន្តិំ, សច្ឆិកត្វា អកុប្បតំ;
‘‘So patvā paramaṃ santiṃ, sacchikatvā akuppataṃ;
សាមណេរោ ស សុមនោ, មា មំ ជញ្ញាតិ ឥច្ឆតី’’តិ។
Sāmaṇero sa sumano, mā maṃ jaññāti icchatī’’ti.
… សុមនោ ថេរោ…។
… Sumano thero….
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរគាថា-អដ្ឋកថា • Theragāthā-aṭṭhakathā / ១០. សុមនត្ថេរគាថាវណ្ណនា • 10. Sumanattheragāthāvaṇṇanā
