| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
១០. សុធាវគ្គោ
10. Sudhāvaggo
១. សុធាបិណ្ឌិយត្ថេរអបទានវណ្ណនា
1. Sudhāpiṇḍiyattheraapadānavaṇṇanā
បូជារហេ បូជយតោតិអាទិកំ អាយស្មតោ សុធាបិណ្ឌិយត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ សិទ្ធត្ថស្ស ភគវតោ កាលេ ភគវតិ ធរមានេ បុញ្ញំ កាតុមសក្កោន្តោ បរិនិព្ពុតេ ភគវតិ តស្ស ធាតុំ និទហិត្វា ចេតិយេ ករីយមានេ សុធាបិណ្ឌមទាសិ។ សោ តេន បុញ្ញេន ចតុន្នវុតិកប្បតោ បដ្ឋាយ ឯត្ថន្តរេ ចតុរាបាយមទិស្វា ទេវមនុស្សសម្បត្តិយោ អនុភវិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វិញ្ញុតំ បត្វា សត្ថរិ បសីទិត្វា បព្ពជិតោ នចិរស្សេវ អរហា អហោសិ។
Pūjārahepūjayatotiādikaṃ āyasmato sudhāpiṇḍiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle bhagavati dharamāne puññaṃ kātumasakkonto parinibbute bhagavati tassa dhātuṃ nidahitvā cetiye karīyamāne sudhāpiṇḍamadāsi. So tena puññena catunnavutikappato paṭṭhāya etthantare caturāpāyamadisvā devamanussasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā satthari pasīditvā pabbajito nacirasseva arahā ahosi.
១-២. សោ អបរភាគេ អត្តនោ បុព្ពកម្មំ សរិត្វា សោមនស្សជាតោ អត្តនោ បុព្ពចរិតាបទានំ បកាសេន្តោ បូជារហេតិអាទិមាហ។ តត្ថ បូជារហា នាម ពុទ្ធបច្ចេកពុទ្ធអរិយសាវកាចរិយុបជ្ឈាយមាតាបិតុគរុអាទយោ, តេសុ បូជារហេសុ មាលាទិបទុមវត្ថាភរណចតុបច្ចយាទីហិ បូជយតោ បូជយន្តស្ស បុគ្គលស្ស បុញ្ញកោដ្ឋាសំ សហស្សសតសហស្សាទិវសេន សង្ខ្យំ កាតុំ កេនចិ មហានុភាវេនាបិ ន សក្កាតិ អត្ថោ។ ន កេវលមេវ ធរមានេ ពុទ្ធាទយោ បូជយតោ, បរិនិព្ពុតស្សាបិ ភគវតោ ចេតិយបដិមាពោធិអាទីសុបិ ឯសេវ នយោ។
1-2. So aparabhāge attano pubbakammaṃ saritvā somanassajāto attano pubbacaritāpadānaṃ pakāsento pūjārahetiādimāha. Tattha pūjārahā nāma buddhapaccekabuddhaariyasāvakācariyupajjhāyamātāpitugaruādayo, tesu pūjārahesu mālādipadumavatthābharaṇacatupaccayādīhi pūjayato pūjayantassa puggalassa puññakoṭṭhāsaṃ sahassasatasahassādivasena saṅkhyaṃ kātuṃ kenaci mahānubhāvenāpi na sakkāti attho. Na kevalameva dharamāne buddhādayo pūjayato, parinibbutassāpi bhagavato cetiyapaṭimābodhiādīsupi eseva nayo.
៣. តំ ទីបេតុំ ចតុន្នមបិ ទីបានន្តិអាទិមាហ។ តត្ថ ចតុន្នមបិ ទីបានន្តិ ជម្ពុទីបអបរគោយានឧត្តរកុរុបុព្ពវិទេហសង្ខាតានំ ចតុន្នំ ទីបានំ តទនុគតានំ ទ្វិសហស្សបរិត្តទីបានញ្ច ឯកតោ កត្វា សកលចក្កវាឡគព្ភេ ឥស្សរំ ចក្កវត្តិរជ្ជំ ករេយ្យាតិ អត្ថោ។ ឯកិស្សា បូជនាយេតន្តិ ធាតុគព្ភេ ចេតិយេ កតាយ ឯកិស្សា បូជាយ ឯតំ សកលជម្ពុទីបេ សត្តរតនាទិកំ សកលំ ធនំ។ កលំ នាគ្ឃតិ សោឡសិន្តិ ចេតិយេ កតបូជាយ សោឡសក្ខត្តុំ វិភត្តស្ស សោឡសមកោដ្ឋាសស្ស ន អគ្ឃតីតិ អត្ថោ។
3. Taṃ dīpetuṃ catunnamapi dīpānantiādimāha. Tattha catunnamapi dīpānanti jambudīpaaparagoyānauttarakurupubbavidehasaṅkhātānaṃ catunnaṃ dīpānaṃ tadanugatānaṃ dvisahassaparittadīpānañca ekato katvā sakalacakkavāḷagabbhe issaraṃ cakkavattirajjaṃ kareyyāti attho. Ekissā pūjanāyetanti dhātugabbhe cetiye katāya ekissā pūjāya etaṃ sakalajambudīpe sattaratanādikaṃ sakalaṃ dhanaṃ. Kalaṃ nāgghati soḷasinti cetiye katapūjāya soḷasakkhattuṃ vibhattassa soḷasamakoṭṭhāsassa na agghatīti attho.
៤. សិទ្ធត្ថស្ស…បេ.… ផលិតន្តរេតិ នរានំ អគ្គស្ស សេដ្ឋស្ស សិទ្ធត្ថស្ស ភគវតោ ចេតិយេ ធាតុគព្ភម្ហិ សុធាកម្មេ ករីយមានេ បរិច្ឆេទានំ ឧភិន្នមន្តរេ វេមជ្ឈេ, អថ វា បុប្ផទានដ្ឋានានំ អន្តរេ ផលន្តិយា មយា សុធាបិណ្ឌោ ទិន្នោ មក្ខិតោតិ សម្ពន្ធោ។ សេសំ សព្ពត្ថ ឧត្តានមេវាតិ។
4.Siddhatthassa…pe…phalitantareti narānaṃ aggassa seṭṭhassa siddhatthassa bhagavato cetiye dhātugabbhamhi sudhākamme karīyamāne paricchedānaṃ ubhinnamantare vemajjhe, atha vā pupphadānaṭṭhānānaṃ antare phalantiyā mayā sudhāpiṇḍo dinno makkhitoti sambandho. Sesaṃ sabbattha uttānamevāti.
សុធាបិណ្ឌិយត្ថេរអបទានវណ្ណនា សមត្តា។
Sudhāpiṇḍiyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ១. សុធាបិណ្ឌិយត្ថេរអបទានំ • 1. Sudhāpiṇḍiyattheraapadānaṃ
