| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
47. සුද්ධිනිද්දෙසවණ්ණනා
47. Suddhiniddesavaṇṇanā
455. දෙසනා සංවරො එට්ඨි, පච්චවෙක්ඛණ භෙදතොති (පාරා. අට්ඨ. 2.585; විසුද්ධි. 1.19) දෙසනාසුද්ධි සංවරසුද්ධි පරියෙට්ඨිසුද්ධි පච්චවෙක්ඛණසුද්ධීති එවං චතුබ්බිධා සුද්ධීති අත්ථො. ඉදානි තාහි සුද්ධීහි විසුජ්ඣනකෙ දස්සෙතුං ‘‘පාතිමොක්ඛසංවරසම්මත’’න්තිආදිමාහ.
455.Desanāsaṃvaro eṭṭhi, paccavekkhaṇa bhedatoti (pārā. aṭṭha. 2.585; visuddhi. 1.19) desanāsuddhi saṃvarasuddhi pariyeṭṭhisuddhi paccavekkhaṇasuddhīti evaṃ catubbidhā suddhīti attho. Idāni tāhi suddhīhi visujjhanake dassetuṃ ‘‘pātimokkhasaṃvarasammata’’ntiādimāha.
456. ‘‘පුන එවං න කරිස්ස’’න්ති චිත්තාධිට්ඨානසංවරා යස්මා සුජ්ඣති ඉන්ද්රියසංවරො, තස්මා ඉන්ද්රියසංවරො ‘‘සංවරසුද්ධී’’ති වුත්තොති සම්බන්ධො.
456. ‘‘Puna evaṃ na karissa’’nti cittādhiṭṭhānasaṃvarā yasmā sujjhati indriyasaṃvaro, tasmā indriyasaṃvaro ‘‘saṃvarasuddhī’’ti vuttoti sambandho.
457. පහායානෙසනන්ති අනෙසනං පහාය ධම්මෙන උප්පාදෙන්තස්ස පච්චයෙති පාඨසෙසො.
457.Pahāyānesananti anesanaṃ pahāya dhammena uppādentassa paccayeti pāṭhaseso.
458. ‘‘පටිසඞ්ඛා යොනිසො චීවරං පටිසෙවාමි…පෙ.… උප්පන්නානං වෙය්යාබාධිකානං…පෙ.… පරමතායා’’ති (ම. නි. 1.23; අ. නි. 6.58) ච එවං චතූසුපි පච්චයෙසු යථාවුත්තපච්චවෙක්ඛණසුජ්ඣනාති අත්ථො. එත්ථ පන දුවිධං පච්චවෙක්ඛණං පටිලාභකාලෙ ච පරිභොගකාලෙ ච. පටිලාභකාලෙ හි ධාතුවසෙන වා පටික්කූලවසෙන වා පච්චවෙක්ඛිත්වා ඨපිතචීවරාදීනි තතො උත්තරි පරිභුඤ්ජන්තස්ස අනවජ්ජොව පරිභොගො, පරිභොගකාලෙපි. සුද්ධිවිනිච්ඡයො.
458. ‘‘Paṭisaṅkhā yoniso cīvaraṃ paṭisevāmi…pe… uppannānaṃ veyyābādhikānaṃ…pe… paramatāyā’’ti (ma. ni. 1.23; a. ni. 6.58) ca evaṃ catūsupi paccayesu yathāvuttapaccavekkhaṇasujjhanāti attho. Ettha pana duvidhaṃ paccavekkhaṇaṃ paṭilābhakāle ca paribhogakāle ca. Paṭilābhakāle hi dhātuvasena vā paṭikkūlavasena vā paccavekkhitvā ṭhapitacīvarādīni tato uttari paribhuñjantassa anavajjova paribhogo, paribhogakālepi. Suddhivinicchayo.
සුද්ධිනිද්දෙසවණ්ණනා නිට්ඨිතා.
Suddhiniddesavaṇṇanā niṭṭhitā.
