| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
৪৭. সুদ্ধিনিদ্দেসৰণ্ণনা
47. Suddhiniddesavaṇṇanā
৪৫৫. দেসনা সংৰরো এট্ঠি, পচ্চৰেক্খণ ভেদতোতি (পারা॰ অট্ঠ॰ ২.৫৮৫; ৰিসুদ্ধি॰ ১.১৯) দেসনাসুদ্ধি সংৰরসুদ্ধি পরিযেট্ঠিসুদ্ধি পচ্চৰেক্খণসুদ্ধীতি এৰং চতুব্বিধা সুদ্ধীতি অত্থো। ইদানি তাহি সুদ্ধীহি ৰিসুজ্ঝনকে দস্সেতুং ‘‘পাতিমোক্খসংৰরসম্মত’’ন্তিআদিমাহ।
455.Desanāsaṃvaro eṭṭhi, paccavekkhaṇa bhedatoti (pārā. aṭṭha. 2.585; visuddhi. 1.19) desanāsuddhi saṃvarasuddhi pariyeṭṭhisuddhi paccavekkhaṇasuddhīti evaṃ catubbidhā suddhīti attho. Idāni tāhi suddhīhi visujjhanake dassetuṃ ‘‘pātimokkhasaṃvarasammata’’ntiādimāha.
৪৫৬. ‘‘পুন এৰং ন করিস্স’’ন্তি চিত্তাধিট্ঠানসংৰরা যস্মা সুজ্ঝতি ইন্দ্রিযসংৰরো, তস্মা ইন্দ্রিযসংৰরো ‘‘সংৰরসুদ্ধী’’তি ৰুত্তোতি সম্বন্ধো।
456. ‘‘Puna evaṃ na karissa’’nti cittādhiṭṭhānasaṃvarā yasmā sujjhati indriyasaṃvaro, tasmā indriyasaṃvaro ‘‘saṃvarasuddhī’’ti vuttoti sambandho.
৪৫৭. পহাযানেসনন্তি অনেসনং পহায ধম্মেন উপ্পাদেন্তস্স পচ্চযেতি পাঠসেসো।
457.Pahāyānesananti anesanaṃ pahāya dhammena uppādentassa paccayeti pāṭhaseso.
৪৫৮. ‘‘পটিসঙ্খা যোনিসো চীৰরং পটিসেৰামি…পে॰… উপ্পন্নানং ৰেয্যাবাধিকানং…পে॰… পরমতাযা’’তি (ম॰ নি॰ ১.২৩; অ॰ নি॰ ৬.৫৮) চ এৰং চতূসুপি পচ্চযেসু যথাৰুত্তপচ্চৰেক্খণসুজ্ঝনাতি অত্থো। এত্থ পন দুৰিধং পচ্চৰেক্খণং পটিলাভকালে চ পরিভোগকালে চ। পটিলাভকালে হি ধাতুৰসেন ৰা পটিক্কূলৰসেন ৰা পচ্চৰেক্খিত্ৰা ঠপিতচীৰরাদীনি ততো উত্তরি পরিভুঞ্জন্তস্স অনৰজ্জোৰ পরিভোগো, পরিভোগকালেপি। সুদ্ধিৰিনিচ্ছযো।
458. ‘‘Paṭisaṅkhā yoniso cīvaraṃ paṭisevāmi…pe… uppannānaṃ veyyābādhikānaṃ…pe… paramatāyā’’ti (ma. ni. 1.23; a. ni. 6.58) ca evaṃ catūsupi paccayesu yathāvuttapaccavekkhaṇasujjhanāti attho. Ettha pana duvidhaṃ paccavekkhaṇaṃ paṭilābhakāle ca paribhogakāle ca. Paṭilābhakāle hi dhātuvasena vā paṭikkūlavasena vā paccavekkhitvā ṭhapitacīvarādīni tato uttari paribhuñjantassa anavajjova paribhogo, paribhogakālepi. Suddhivinicchayo.
সুদ্ধিনিদ্দেসৰণ্ণনা নিট্ঠিতা।
Suddhiniddesavaṇṇanā niṭṭhitā.
