| Library / Tipiṭaka / តិបិដក • Tipiṭaka / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā |
៦៤-៦៧. សុទ្ធិកបដិសម្ភិទាញាណនិទ្ទេសវណ្ណនា
64-67. Suddhikapaṭisambhidāñāṇaniddesavaṇṇanā
១១០. សុទ្ធិកបដិសម្ភិទាញាណនិទ្ទេសេ ឥមេសំ ញាណានំ បភេទាភាវតោយេវ ហេដ្ឋា វិយ បភេទំ អទស្សេត្វាយេវ អត្ថេសុ ញាណំ អត្ថបដិសម្ភិទាតិអាទិ វុត្តំ។ បញ្ញាបភេទាភាវេបិ អត្តនា បដិវិទ្ធចតុសច្ចធម្មមត្តវសេន នានត្តសព្ភាវតោ អត្ថនានត្តេ បញ្ញា អត្ថបដិសម្ភិទេ ញាណន្តិអាទិ វុត្តំ។ តត្ថ នានត្តេតិ អត្ថាទីនំ អនេកភាវេ។ វវត្ថានេតិ អត្ថាទីនំ និច្ឆយនេ។ សល្លក្ខណេតិ អត្ថាទីនំ សម្មាទស្សនេ។ ឧបលក្ខណេតិ អត្ថាទីនំ ភុសំទស្សនេ។ បភេទេតិ អត្ថាទីនំ នានាភេទេ។ បភាវនេតិ អត្ថាទីនំ បាកដីករណេន ឧប្បាទនេ។ ជោតនេតិ អត្ថាទីនំ ទីបនេ។ វិរោចនេតិ អត្ថាទីនំ វិវិធា ទីបនេ។ បកាសនេតិ អត្ថាទីនំ បភាសនេ ។ ‘‘នានត្តេ’’តិ មូលបទំ កត្វា សព្ពសាធារណវសេន វុត្តំ។ ‘‘វវត្ថានេ’’តិ សោតាបន្នស្ស វសេន, ‘‘សល្លក្ខណេ ឧបលក្ខណេ’’តិ សកទាគាមិស្ស វសេន, ‘‘បភេទេ បភាវនេ’’តិ អនាគាមិស្ស វសេន, ‘‘ជោតនេ វិរោចនេ បកាសនេ’’តិ អរហតោ វសេន វុត្តន្តិ ឯវម្បេត្ថ យោជនា កាតព្ពាតិ។
110. Suddhikapaṭisambhidāñāṇaniddese imesaṃ ñāṇānaṃ pabhedābhāvatoyeva heṭṭhā viya pabhedaṃ adassetvāyeva atthesu ñāṇaṃ atthapaṭisambhidātiādi vuttaṃ. Paññāpabhedābhāvepi attanā paṭividdhacatusaccadhammamattavasena nānattasabbhāvato atthanānatte paññā atthapaṭisambhide ñāṇantiādi vuttaṃ. Tattha nānatteti atthādīnaṃ anekabhāve. Vavatthāneti atthādīnaṃ nicchayane. Sallakkhaṇeti atthādīnaṃ sammādassane. Upalakkhaṇeti atthādīnaṃ bhusaṃdassane. Pabhedeti atthādīnaṃ nānābhede. Pabhāvaneti atthādīnaṃ pākaṭīkaraṇena uppādane. Jotaneti atthādīnaṃ dīpane. Virocaneti atthādīnaṃ vividhā dīpane. Pakāsaneti atthādīnaṃ pabhāsane . ‘‘Nānatte’’ti mūlapadaṃ katvā sabbasādhāraṇavasena vuttaṃ. ‘‘Vavatthāne’’ti sotāpannassa vasena, ‘‘sallakkhaṇe upalakkhaṇe’’ti sakadāgāmissa vasena, ‘‘pabhede pabhāvane’’ti anāgāmissa vasena, ‘‘jotane virocane pakāsane’’ti arahato vasena vuttanti evampettha yojanā kātabbāti.
សុទ្ធិកបដិសម្ភិទាញាណនិទ្ទេសវណ្ណនា និដ្ឋិតា។
Suddhikapaṭisambhidāñāṇaniddesavaṇṇanā niṭṭhitā.
ឥតិ សទ្ធម្មប្បកាសិនិយា បដិសម្ភិទាមគ្គ-អដ្ឋកថាយ
Iti saddhammappakāsiniyā paṭisambhidāmagga-aṭṭhakathāya
បឋមោ ភាគោ និដ្ឋិតោ។
Paṭhamo bhāgo niṭṭhito.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / បដិសម្ភិទាមគ្គបាឡិ • Paṭisambhidāmaggapāḷi / ៦៤-៦៧. សុទ្ធិកបដិសម្ភិទាញាណនិទ្ទេសោ • 64-67. Suddhikapaṭisambhidāñāṇaniddeso
