| Library / Tipiṭaka / ਤਿਪਿਟਕ • Tipiṭaka / ਸੁਤ੍ਤਨਿਪਾਤਪਾਲ਼ਿ • Suttanipātapāḷi |
੪. ਸੁਦ੍ਧਟ੍ਠਕਸੁਤ੍ਤਂ
4. Suddhaṭṭhakasuttaṃ
੭੯੪.
794.
ਪਸ੍ਸਾਮਿ ਸੁਦ੍ਧਂ ਪਰਮਂ ਅਰੋਗਂ, ਦਿਟ੍ਠੇਨ ਸਂਸੁਦ੍ਧਿ ਨਰਸ੍ਸ ਹੋਤਿ।
Passāmi suddhaṃ paramaṃ arogaṃ, diṭṭhena saṃsuddhi narassa hoti;
ਏવਾਭਿਜਾਨਂ 1 ਪਰਮਨ੍ਤਿ ਞਤ੍વਾ, ਸੁਦ੍ਧਾਨੁਪਸ੍ਸੀਤਿ ਪਚ੍ਚੇਤਿ ਞਾਣਂ॥
Evābhijānaṃ 2 paramanti ñatvā, suddhānupassīti pacceti ñāṇaṃ.
੭੯੫.
795.
ਦਿਟ੍ਠੇਨ ਚੇ ਸੁਦ੍ਧਿ ਨਰਸ੍ਸ ਹੋਤਿ, ਞਾਣੇਨ વਾ ਸੋ ਪਜਹਾਤਿ ਦੁਕ੍ਖਂ।
Diṭṭhena ce suddhi narassa hoti, ñāṇena vā so pajahāti dukkhaṃ;
ਅਞ੍ਞੇਨ ਸੋ ਸੁਜ੍ਝਤਿ ਸੋਪਧੀਕੋ, ਦਿਟ੍ਠੀ ਹਿ ਨਂ ਪਾવ ਤਥਾ વਦਾਨਂ॥
Aññena so sujjhati sopadhīko, diṭṭhī hi naṃ pāva tathā vadānaṃ.
੭੯੬.
796.
ਨ ਬ੍ਰਾਹ੍ਮਣੋ ਅਞ੍ਞਤੋ ਸੁਦ੍ਧਿਮਾਹ, ਦਿਟ੍ਠੇ ਸੁਤੇ ਸੀਲવਤੇ ਮੁਤੇ વਾ।
Na brāhmaṇo aññato suddhimāha, diṭṭhe sute sīlavate mute vā;
ਪੁਞ੍ਞੇ ਚ ਪਾਪੇ ਚ ਅਨੂਪਲਿਤ੍ਤੋ, ਅਤ੍ਤਞ੍ਜਹੋ ਨਯਿਧ ਪਕੁਬ੍ਬਮਾਨੋ॥
Puññe ca pāpe ca anūpalitto, attañjaho nayidha pakubbamāno.
੭੯੭.
797.
ਪੁਰਿਮਂ ਪਹਾਯ ਅਪਰਂ ਸਿਤਾਸੇ, ਏਜਾਨੁਗਾ ਤੇ ਨ ਤਰਨ੍ਤਿ ਸਙ੍ਗਂ।
Purimaṃ pahāya aparaṃ sitāse, ejānugā te na taranti saṅgaṃ;
ਤੇ ਉਗ੍ਗਹਾਯਨ੍ਤਿ ਨਿਰਸ੍ਸਜਨ੍ਤਿ, ਕਪੀવ ਸਾਖਂ ਪਮੁਞ੍ਚਂ ਗਹਾਯਂ 3॥
Te uggahāyanti nirassajanti, kapīva sākhaṃ pamuñcaṃ gahāyaṃ 4.
੭੯੮.
798.
ਸਯਂ ਸਮਾਦਾਯ વਤਾਨਿ ਜਨ੍ਤੁ, ਉਚ੍ਚਾવਚਂ ਗਚ੍ਛਤਿ ਸਞ੍ਞਸਤ੍ਤੋ।
Sayaṃ samādāya vatāni jantu, uccāvacaṃ gacchati saññasatto;
વਿਦ੍વਾ ਚ વੇਦੇਹਿ ਸਮੇਚ੍ਚ ਧਮ੍ਮਂ, ਨ ਉਚ੍ਚਾવਚਂ ਗਚ੍ਛਤਿ ਭੂਰਿਪਞ੍ਞੋ॥
Vidvā ca vedehi samecca dhammaṃ, na uccāvacaṃ gacchati bhūripañño.
੭੯੯.
799.
ਸ ਸਬ੍ਬਧਮ੍ਮੇਸੁ વਿਸੇਨਿਭੂਤੋ, ਯਂ ਕਿਞ੍ਚਿ ਦਿਟ੍ਠਂ વ ਸੁਤਂ ਮੁਤਂ વਾ।
Sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vā;
ਤਮੇવ ਦਸ੍ਸਿਂ વਿવਟਂ ਚਰਨ੍ਤਂ, ਕੇਨੀਧ ਲੋਕਸ੍ਮਿ વਿਕਪ੍ਪਯੇਯ੍ਯ॥
Tameva dassiṃ vivaṭaṃ carantaṃ, kenīdha lokasmi vikappayeyya.
੮੦੦.
800.
ਨ ਕਪ੍ਪਯਨ੍ਤਿ ਨ ਪੁਰੇਕ੍ਖਰੋਨ੍ਤਿ, ਅਚ੍ਚਨ੍ਤਸੁਦ੍ਧੀਤਿ ਨ ਤੇ વਦਨ੍ਤਿ।
Na kappayanti na purekkharonti, accantasuddhīti na te vadanti;
ਆਦਾਨਗਨ੍ਥਂ ਗਥਿਤਂ વਿਸਜ੍ਜ, ਆਸਂ ਨ ਕੁਬ੍ਬਨ੍ਤਿ ਕੁਹਿਞ੍ਚਿ ਲੋਕੇ॥
Ādānaganthaṃ gathitaṃ visajja, āsaṃ na kubbanti kuhiñci loke.
੮੦੧.
801.
ਸੀਮਾਤਿਗੋ ਬ੍ਰਾਹ੍ਮਣੋ ਤਸ੍ਸ ਨਤ੍ਥਿ, ਞਤ੍વਾ વ ਦਿਸ੍વਾ વ 5 ਸਮੁਗ੍ਗਹੀਤਂ।
Sīmātigo brāhmaṇo tassa natthi, ñatvā va disvā va 6 samuggahītaṃ;
ਨ ਰਾਗਰਾਗੀ ਨ વਿਰਾਗਰਤ੍ਤੋ, ਤਸ੍ਸੀਧ ਨਤ੍ਥੀ ਪਰਮੁਗ੍ਗਹੀਤਨ੍ਤਿ॥
Na rāgarāgī na virāgaratto, tassīdha natthī paramuggahītanti.
ਸੁਦ੍ਧਟ੍ਠਕਸੁਤ੍ਤਂ ਚਤੁਤ੍ਥਂ ਨਿਟ੍ਠਿਤਂ।
Suddhaṭṭhakasuttaṃ catutthaṃ niṭṭhitaṃ.
Footnotes:
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਖੁਦ੍ਦਕਨਿਕਾਯ (ਅਟ੍ਠਕਥਾ) • Khuddakanikāya (aṭṭhakathā) / ਸੁਤ੍ਤਨਿਪਾਤ-ਅਟ੍ਠਕਥਾ • Suttanipāta-aṭṭhakathā / ੪. ਸੁਦ੍ਧਟ੍ਠਕਸੁਤ੍ਤવਣ੍ਣਨਾ • 4. Suddhaṭṭhakasuttavaṇṇanā
