| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
២. សុទស្សនត្ថេរអបទានវណ្ណនា
2. Sudassanattheraapadānavaṇṇanā
វិត្ថតាយ នទីតីរេតិអាទិកំ អាយស្មតោ សុទស្សនត្ថេរស្ស អបទានំ។ អយម្បិ បុរិមជិនវរេសុ កតាធិការោ តត្ថ តត្ថ ភវេ កតបុញ្ញូបចយោ សិខិស្ស ភគវតោ កាលេ កុលគេហេ និព្ពត្តោ វុទ្ធិប្បត្តោ ឃរាវាសំ សណ្ឋបេត្វា វសន្តោ វិត្ថតាយ នាម គង្គាយ សមីបេ បិលក្ខុផលិតំ បរិយេសន្តោ តស្សា តីរេ និសិន្នំ ជលមានអគ្គិសិខំ ឥវ សិខិំ សម្មាសម្ពុទ្ធំ ទិស្វា បសន្នមានសោ កេតកីបុប្ផំ វណ្ដេនេវ ឆិន្ទិត្វា បូជេន្តោ ឯវមាហ – ‘‘ភន្តេ, យេន ញាណេន ត្វំ ឯវំ មហានុភាវោ សព្ពញ្ញុពុទ្ធោ ជាតោ, តំ ញាណំ អហំ បូជេមី’’តិ។ អថ ភគវា អនុមោទនមកាសិ។ សោ តេន បុញ្ញេន ទេវមនុស្សេសុ ជាតោ ឧភយសម្បត្តិយោ អនុភវិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ សត្ថរិ បសន្នោ បព្ពជិត្វា នចិរស្សេវ អរហា អហោសិ។
Vitthatāya nadītīretiādikaṃ āyasmato sudassanattherassa apadānaṃ. Ayampi purimajinavaresu katādhikāro tattha tattha bhave katapuññūpacayo sikhissa bhagavato kāle kulagehe nibbatto vuddhippatto gharāvāsaṃ saṇṭhapetvā vasanto vitthatāya nāma gaṅgāya samīpe pilakkhuphalitaṃ pariyesanto tassā tīre nisinnaṃ jalamānaaggisikhaṃ iva sikhiṃ sammāsambuddhaṃ disvā pasannamānaso ketakīpupphaṃ vaṇṭeneva chinditvā pūjento evamāha – ‘‘bhante, yena ñāṇena tvaṃ evaṃ mahānubhāvo sabbaññubuddho jāto, taṃ ñāṇaṃ ahaṃ pūjemī’’ti. Atha bhagavā anumodanamakāsi. So tena puññena devamanussesu jāto ubhayasampattiyo anubhavitvā imasmiṃ buddhuppāde ekasmiṃ kulagehe nibbatto satthari pasanno pabbajitvā nacirasseva arahā ahosi.
១០. សោ អត្តនោ កតកុសលំ សរិត្វា សោមនស្សជាតោ បុព្ពចរិតាបទានំ បកាសេន្តោ វិត្ថតាយ នទីតីរេតិអាទិមាហ។ តត្ថ វិត្ថតាយាតិ វិត្ថរតិ បត្ថរតិ វិត្ថិណ្ណា ហោតីតិ វិត្ថតា, នទន្តិ សទ្ទំ ករោន្តិ ឥតា គតា បវត្តាតិ នទី, នទិំ តរន្តា ឯតំ បត្វា តិណ្ណា នាម ហោន្តីតិ តីរំ, តស្សា វិត្ថតាយ នទិយា តីរេ តីរសមីបេតិ អត្ថោ។ កេតកិំ បុប្ផិតំ ទិស្វាតិ កុច្ឆិតាការេន គណ្ហន្តានំ ហត្ថំ កណ្ឌកោ ឆិន្ទតិ វិជ្ឈតីតិ កេតំ, កេតស្ស ឯសា កេតកីបុប្ផំ, តំ ទិស្វា វណ្ដំ ឆិន្ទិត្វាតិ សម្ពន្ធោ។
10. So attano katakusalaṃ saritvā somanassajāto pubbacaritāpadānaṃ pakāsento vitthatāya nadītīretiādimāha. Tattha vitthatāyāti vittharati pattharati vitthiṇṇā hotīti vitthatā, nadanti saddaṃ karonti itā gatā pavattāti nadī, nadiṃ tarantā etaṃ patvā tiṇṇā nāma hontīti tīraṃ, tassā vitthatāya nadiyā tīre tīrasamīpeti attho. Ketakiṃ pupphitaṃ disvāti kucchitākārena gaṇhantānaṃ hatthaṃ kaṇḍako chindati vijjhatīti ketaṃ, ketassa esā ketakīpupphaṃ, taṃ disvā vaṇṭaṃ chinditvāti sambandho.
១១. សិខិនោ លោកពន្ធុនោតិ សិខី វុច្ចតិ អគ្គិ, សិខីសទិសា នីលបីតាទិភេទា ជលមានា ឆព្ពណ្ណឃនរំសិយោ យស្ស សោ សិខី, លោកស្ស សកលលោកត្តយស្ស ពន្ធុ ញាតកោតិ លោកពន្ធុ, តស្ស សិខិនោ លោកពន្ធុនោ កេតកីបុប្ផំ វណ្ដេ ឆិន្ទិត្វា បូជេសិន្តិ សម្ពន្ធោ។ សេសំ ឧត្តានត្ថមេវាតិ។
11.Sikhino lokabandhunoti sikhī vuccati aggi, sikhīsadisā nīlapītādibhedā jalamānā chabbaṇṇaghanaraṃsiyo yassa so sikhī, lokassa sakalalokattayassa bandhu ñātakoti lokabandhu, tassa sikhino lokabandhuno ketakīpupphaṃ vaṇṭe chinditvā pūjesinti sambandho. Sesaṃ uttānatthamevāti.
សុទស្សនត្ថេរអបទានវណ្ណនា សមត្តា។
Sudassanattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ២. សុទស្សនត្ថេរអបទានំ • 2. Sudassanattheraapadānaṃ
