| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៦. សុចិន្តិតត្ថេរអបទានវណ្ណនា
6. Sucintitattheraapadānavaṇṇanā
គិរិទុគ្គចរោ អាសិន្តិអាទិកំ អាយស្មតោ សុចិន្តិតត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ អត្ថទស្សិស្ស ភគវតោ កាលេ ហិមវន្តប្បទេសេ នេសាទកុលេ ឧប្បន្នោ មិគសូករាទយោ វធិត្វា ខាទន្តោ វិហរតិ។ តទា លោកនាថោ លោកានុគ្គហំ សត្តានុទ្ទយតញ្ច បដិច្ច ហិមវន្តមគមាសិ។ តទា សោ នេសាទោ ភគវន្តំ ទិស្វា បសន្នមានសោ អត្តនោ ខាទនត្ថាយ អានីតំ វរមធុរមំសំ អទាសិ។ បដិគ្គហេសិ ភគវា តស្សានុកម្បាយ, តំ ភុញ្ជិត្វា អនុមោទនំ វត្វា បក្កាមិ។ សោ តេនេវ បុញ្ញេន តេនេវ សោមនស្សេន តតោ ចុតោ សុគតីសុ សំសរន្តោ ឆ កាមាវចរសម្បត្តិយោ អនុភវិត្វា មនុស្សេសុ ចក្កវត្តិសម្បត្តិអាទយោ អនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តោ សត្ថរិ បសីទិត្វា បព្ពជិតោ នចិរស្សេវ អរហា អហោសិ។
Giriduggacaro āsintiādikaṃ āyasmato sucintitattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle himavantappadese nesādakule uppanno migasūkarādayo vadhitvā khādanto viharati. Tadā lokanātho lokānuggahaṃ sattānuddayatañca paṭicca himavantamagamāsi. Tadā so nesādo bhagavantaṃ disvā pasannamānaso attano khādanatthāya ānītaṃ varamadhuramaṃsaṃ adāsi. Paṭiggahesi bhagavā tassānukampāya, taṃ bhuñjitvā anumodanaṃ vatvā pakkāmi. So teneva puññena teneva somanassena tato cuto sugatīsu saṃsaranto cha kāmāvacarasampattiyo anubhavitvā manussesu cakkavattisampattiādayo anubhavitvā imasmiṃ buddhuppāde kulagehe nibbatto satthari pasīditvā pabbajito nacirasseva arahā ahosi.
៣៦. ចតុបដិសម្ភិទាបញ្ចាភិញ្ញាទិភេទំ បត្វា អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ គិរិទុគ្គចរោ អាសិន្តិអាទិមាហ។ គិរតិ សទ្ទំ ករោតីតិ គិរិ, កោ សោ? សិលាបំសុមយបព្ពតោ, ទុដ្ឋុ ទុក្ខេន គមនីយំ ទុគ្គំ, គិរីហិ ទុគ្គំ គិរិទុគ្គំ, ទុគ្គមោតិ អត្ថោ។ តស្មិំ គិរិទុគ្គេ បព្ពតន្តរេ ចរោ ចរណសីលោ អាសិំ អហោសិំ។ អភិជាតោវ កេសរីតិ អភិ វិសេសេន ជាតោ និព្ពត្តោ កេសរីវ កេសរសីហោ ឥវ គិរិទុគ្គស្មិំ ចរាមីតិ អត្ថោ។
36. Catupaṭisambhidāpañcābhiññādibhedaṃ patvā attano pubbakammaṃ saritvā somanassajāto pubbacaritāpadānaṃ pakāsento giriduggacaro āsintiādimāha. Girati saddaṃ karotīti giri, ko so? Silāpaṃsumayapabbato, duṭṭhu dukkhena gamanīyaṃ duggaṃ, girīhi duggaṃ giriduggaṃ, duggamoti attho. Tasmiṃ giridugge pabbatantare caro caraṇasīlo āsiṃ ahosiṃ. Abhijātova kesarīti abhi visesena jāto nibbatto kesarīva kesarasīho iva giriduggasmiṃ carāmīti attho.
៤០. គិរិទុគ្គំ បវិសិំ អហន្តិ អហំ តទា តេន មំសទានេន បីតិសោមនស្សជាតោ បព្ពតន្តរំ បាវិសិំ។ សេសំ ឧត្តានត្ថមេវាតិ។
40.Giriduggaṃ pavisiṃ ahanti ahaṃ tadā tena maṃsadānena pītisomanassajāto pabbatantaraṃ pāvisiṃ. Sesaṃ uttānatthamevāti.
សុចិន្តិតត្ថេរអបទានវណ្ណនា សមត្តា។
Sucintitattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៦. សុចិន្តិតត្ថេរអបទានំ • 6. Sucintitattheraapadānaṃ
