| Library / Tipiṭaka / তিপিটক • Tipiṭaka / সুত্তনিপাতপাল়ি • Suttanipātapāḷi |
৫. সূচিলোমসুত্তং
5. Sūcilomasuttaṃ
এৰং মে সুতং – একং সমযং ভগৰা গযাযং ৰিহরতি টঙ্কিতমঞ্চে সূচিলোমস্স যক্খস্স ভৰনে। তেন খো পন সমযেন খরো চ যক্খো সূচিলোমো চ যক্খো ভগৰতো অৰিদূরে অতিক্কমন্তি। অথ খো খরো যক্খো সূচিলোমং যক্খং এতদৰোচ – ‘‘এসো সমণো’’তি। ‘‘নেসো সমণো, সমণকো এসো। যাৰাহং জানামি 1 যদি ৰা সো সমণো 2, যদি ৰা সো সমণকো’’তি 3।
Evaṃ me sutaṃ – ekaṃ samayaṃ bhagavā gayāyaṃ viharati ṭaṅkitamañce sūcilomassa yakkhassa bhavane. Tena kho pana samayena kharo ca yakkho sūcilomo ca yakkho bhagavato avidūre atikkamanti. Atha kho kharo yakkho sūcilomaṃ yakkhaṃ etadavoca – ‘‘eso samaṇo’’ti. ‘‘Neso samaṇo, samaṇako eso. Yāvāhaṃ jānāmi 4 yadi vā so samaṇo 5, yadi vā so samaṇako’’ti 6.
অথ খো সূচিলোমো যক্খো যেন ভগৰা তেনুপসঙ্কমি; উপসঙ্কমিত্ৰা ভগৰতো কাযং উপনামেসি। অথ খো ভগৰা কাযং অপনামেসি। অথ খো সূচিলোমো যক্খো ভগৰন্তং এতদৰোচ – ‘‘ভাযসি মং, সমণা’’তি? ‘‘ন খ্ৰাহং তং, আৰুসো, ভাযামি; অপি চ তে সপ্ফস্সো পাপকো’’তি।
Atha kho sūcilomo yakkho yena bhagavā tenupasaṅkami; upasaṅkamitvā bhagavato kāyaṃ upanāmesi. Atha kho bhagavā kāyaṃ apanāmesi. Atha kho sūcilomo yakkho bhagavantaṃ etadavoca – ‘‘bhāyasi maṃ, samaṇā’’ti? ‘‘Na khvāhaṃ taṃ, āvuso, bhāyāmi; api ca te sapphasso pāpako’’ti.
‘‘পঞ্হং তং, সমণ, পুচ্ছিস্সামি। সচে মে ন ব্যাকরিস্সসি, চিত্তং ৰা তে খিপিস্সামি, হদযং ৰা তে ফালেস্সামি, পাদেসু ৰা গহেত্ৰা পারগঙ্গায খিপিস্সামী’’তি।
‘‘Pañhaṃ taṃ, samaṇa, pucchissāmi. Sace me na byākarissasi, cittaṃ vā te khipissāmi, hadayaṃ vā te phālessāmi, pādesu vā gahetvā pāragaṅgāya khipissāmī’’ti.
‘‘ন খ্ৰাহং তং, আৰুসো, পস্সামি সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায যো মে চিত্তং ৰা খিপেয্য হদযং ৰা ফালেয্য পাদেসু ৰা গহেত্ৰা পারগঙ্গায খিপেয্য। অপি চ ত্ৰং, আৰুসো, পুচ্ছ যদাকঙ্খসী’’তি। অথ খো সূচিলোমো যক্খো ভগৰন্তং গাথায অজ্ঝভাসি –
‘‘Na khvāhaṃ taṃ, āvuso, passāmi sadevake loke samārake sabrahmake sassamaṇabrāhmaṇiyā pajāya sadevamanussāya yo me cittaṃ vā khipeyya hadayaṃ vā phāleyya pādesu vā gahetvā pāragaṅgāya khipeyya. Api ca tvaṃ, āvuso, puccha yadākaṅkhasī’’ti. Atha kho sūcilomo yakkho bhagavantaṃ gāthāya ajjhabhāsi –
২৭৩.
273.
‘‘রাগো চ দোসো চ কুতোনিদানা, অরতী রতী লোমহংসো কুতোজা।
‘‘Rāgo ca doso ca kutonidānā, aratī ratī lomahaṃso kutojā;
কুতো সমুট্ঠায মনোৰিতক্কা, কুমারকা ধঙ্কমিৰোস্সজন্তি’’॥
Kuto samuṭṭhāya manovitakkā, kumārakā dhaṅkamivossajanti’’.
২৭৪.
274.
‘‘রাগো চ দোসো চ ইতোনিদানা, অরতী রতী লোমহংসো ইতোজা।
‘‘Rāgo ca doso ca itonidānā, aratī ratī lomahaṃso itojā;
ইতো সমুট্ঠায মনোৰিতক্কা, কুমারকা ধঙ্কমিৰোস্সজন্তি॥
Ito samuṭṭhāya manovitakkā, kumārakā dhaṅkamivossajanti.
২৭৪.
274.
‘‘স্নেহজা অত্তসম্ভূতা, নিগ্রোধস্সেৰ খন্ধজা।
‘‘Snehajā attasambhūtā, nigrodhasseva khandhajā;
পুথূ ৰিসত্তা কামেসু, মালুৰাৰ ৰিততাৰনে॥
Puthū visattā kāmesu, māluvāva vitatāvane.
২৭৫.
275.
‘‘যে নং পজানন্তি যতোনিদানং, তে নং ৰিনোদেন্তি সুণোহি যক্খ।
‘‘Ye naṃ pajānanti yatonidānaṃ, te naṃ vinodenti suṇohi yakkha;
তে দুত্তরং ওঘমিমং তরন্তি, অতিণ্ণপুব্বং অপুনব্ভৰাযা’’তি॥
Te duttaraṃ oghamimaṃ taranti, atiṇṇapubbaṃ apunabbhavāyā’’ti.
সূচিলোমসুত্তং পঞ্চমং নিট্ঠিতং।
Sūcilomasuttaṃ pañcamaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / সুত্তনিপাত-অট্ঠকথা • Suttanipāta-aṭṭhakathā / ৫. সূচিলোমসুত্তৰণ্ণনা • 5. Sūcilomasuttavaṇṇanā
