| Library / Tipiṭaka / तिपिटक • Tipiṭaka / अपदानपाळि • Apadānapāḷi |
७. सोवण्णवटंसकियत्थेरअपदानं
7. Sovaṇṇavaṭaṃsakiyattheraapadānaṃ
३४.
34.
‘‘उय्यानभूमिं निय्यन्तो, अद्दसं लोकनायकं।
‘‘Uyyānabhūmiṃ niyyanto, addasaṃ lokanāyakaṃ;
वटंसकं गहेत्वान, सोवण्णं साधुनिम्मितं॥
Vaṭaṃsakaṃ gahetvāna, sovaṇṇaṃ sādhunimmitaṃ.
३५.
35.
‘‘सीघं ततो समारुय्ह, हत्थिक्खन्धगतो अहं।
‘‘Sīghaṃ tato samāruyha, hatthikkhandhagato ahaṃ;
बुद्धस्स अभिरोपेसिं, सिखिनो लोकबन्धुनो॥
Buddhassa abhiropesiṃ, sikhino lokabandhuno.
३६.
36.
‘‘एकत्तिंसे इतो कप्पे, यं पुप्फमभिरोपयिं।
‘‘Ekattiṃse ito kappe, yaṃ pupphamabhiropayiṃ;
दुग्गतिं नाभिजानामि, पुप्फपूजायिदं फलं॥
Duggatiṃ nābhijānāmi, pupphapūjāyidaṃ phalaṃ.
३७.
37.
‘‘सत्तवीसे इतो कप्पे, एको आसिं जनाधिपो।
‘‘Sattavīse ito kappe, eko āsiṃ janādhipo;
महापतापनामेन, चक्कवत्ती महब्बलो॥
Mahāpatāpanāmena, cakkavattī mahabbalo.
३८.
38.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा सोवण्णवटंसकियो थेरो इमा गाथायो अभासित्थाति।
Itthaṃ sudaṃ āyasmā sovaṇṇavaṭaṃsakiyo thero imā gāthāyo abhāsitthāti.
सोवण्णवटंसकियत्थेरस्सापदानं सत्तमं।
Sovaṇṇavaṭaṃsakiyattherassāpadānaṃ sattamaṃ.
