| Library / Tipiṭaka / ติปิฎก • Tipiṭaka / จริยาปิฎกปาฬิ • Cariyāpiṭakapāḷi |
๕. โสณปณฺฑิตจริยา
5. Soṇapaṇḍitacariyā
๔๒.
42.
‘‘ปุนาปรํ ยทา โหมิ, นคเร พฺรหฺมวฑฺฒเน;
‘‘Punāparaṃ yadā homi, nagare brahmavaḍḍhane;
ตตฺถ กุลวเร เสเฎฺฐ, มหาสาเล อชายหํฯ
Tattha kulavare seṭṭhe, mahāsāle ajāyahaṃ.
๔๓.
43.
‘‘ตทาปิ โลกํ ทิสฺวาน, อนฺธีภูตํ ตโมตฺถฎํ;
‘‘Tadāpi lokaṃ disvāna, andhībhūtaṃ tamotthaṭaṃ;
จิตฺตํ ภวโต ปติกุฎติ, ตุตฺตเวคหตํ วิยฯ
Cittaṃ bhavato patikuṭati, tuttavegahataṃ viya.
๔๔.
44.
‘‘ทิสฺวาน วิวิธํ ปาปํ, เอวํ จิเนฺตสหํ ตทา;
‘‘Disvāna vividhaṃ pāpaṃ, evaṃ cintesahaṃ tadā;
‘กทาหํ เคหา นิกฺขมฺม, ปวิสิสฺสามิ กานนํ’ฯ
‘Kadāhaṃ gehā nikkhamma, pavisissāmi kānanaṃ’.
๔๕.
45.
‘‘ตทาปิ มํ นิมเนฺตสุํ, กามโภเคหิ ญาตโย;
‘‘Tadāpi maṃ nimantesuṃ, kāmabhogehi ñātayo;
เตสมฺปิ ฉนฺทมาจิกฺขิํ, ‘มา นิมเนฺตถ เตหิ มํ’ฯ
Tesampi chandamācikkhiṃ, ‘mā nimantetha tehi maṃ’.
๔๖.
46.
‘‘โย เม กนิฎฺฐโก ภาตา, นโนฺท นามาสิ ปณฺฑิโต;
‘‘Yo me kaniṭṭhako bhātā, nando nāmāsi paṇḍito;
โสปิ มํ อนุสิกฺขโนฺต, ปพฺพชฺชํ สมโรจยิฯ
Sopi maṃ anusikkhanto, pabbajjaṃ samarocayi.
๔๗.
47.
‘‘อหํ โสโณ จ นโนฺท จ, อุโภ มาตาปิตา มม;
‘‘Ahaṃ soṇo ca nando ca, ubho mātāpitā mama;
ตทาปิ โภเค ฉเฑฺฑตฺวา, ปาวิสิมฺหา มหาวน’’นฺติฯ
Tadāpi bhoge chaḍḍetvā, pāvisimhā mahāvana’’nti.
โสณปณฺฑิตจริยํ ปญฺจมํฯ
Soṇapaṇḍitacariyaṃ pañcamaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จริยาปิฎก-อฎฺฐกถา • Cariyāpiṭaka-aṭṭhakathā / ๕. โสณปณฺฑิตจริยาวณฺณนา • 5. Soṇapaṇḍitacariyāvaṇṇanā
