| Library / Tipiṭaka / តិបិដក • Tipiṭaka / វិមានវត្ថុ-អដ្ឋកថា • Vimānavatthu-aṭṭhakathā |
៦. សោណទិន្នាវិមានវណ្ណនា
6. Soṇadinnāvimānavaṇṇanā
អភិក្កន្តេន វណ្ណេនាតិ សោណទិន្នាវិមានំ។ តស្ស កា ឧប្បត្តិ? ភគវា សាវត្ថិយំ វិហរតិ ជេតវនេ។ តេន ច សមយេន នាឡន្ទាយំ សោណទិន្នា នាម ឯកា ឧបាសិកា សទ្ធា បសន្នា ភិក្ខូនំ ចតូហិ បច្ចយេហិ សក្កច្ចំ ឧបដ្ឋហន្តី សុវិសុទ្ធនិច្ចសីលា អដ្ឋង្គសមន្នាគតំ ឧបោសថម្បិ ឧបវសតិ។ សា ធម្មសវនសប្បាយំ បដិលភិត្វា ឧបនិស្សយសម្បន្នតាយ ចតុសច្ចកម្មដ្ឋានំ បរិព្រូហន្តី សោតាបន្នា អហោសិ។ អថ អញ្ញតរេន រោគេន ផុដ្ឋា កាលំ កត្វា តាវតិំសេសុ ឧប្បជ្ជិ។ តំ អាយស្មា មហាមោគ្គល្លានោ –
Abhikkantenavaṇṇenāti soṇadinnāvimānaṃ. Tassa kā uppatti? Bhagavā sāvatthiyaṃ viharati jetavane. Tena ca samayena nāḷandāyaṃ soṇadinnā nāma ekā upāsikā saddhā pasannā bhikkhūnaṃ catūhi paccayehi sakkaccaṃ upaṭṭhahantī suvisuddhaniccasīlā aṭṭhaṅgasamannāgataṃ uposathampi upavasati. Sā dhammasavanasappāyaṃ paṭilabhitvā upanissayasampannatāya catusaccakammaṭṭhānaṃ paribrūhantī sotāpannā ahosi. Atha aññatarena rogena phuṭṭhā kālaṃ katvā tāvatiṃsesu uppajji. Taṃ āyasmā mahāmoggallāno –
២១៧.
217.
‘‘អភិក្កន្តេន វណ្ណេន, យា ត្វំ តិដ្ឋសិ ទេវតេ;
‘‘Abhikkantena vaṇṇena, yā tvaṃ tiṭṭhasi devate;
ឱភាសេន្តី ទិសា សព្ពា, ឱសធី វិយ តារកា។
Obhāsentī disā sabbā, osadhī viya tārakā.
២១៨.
218.
‘‘កេន តេតាទិសោ វណ្ណោ, កេន តេ ឥធ មិជ្ឈតិ;
‘‘Kena tetādiso vaṇṇo, kena te idha mijjhati;
ឧប្បជ្ជន្តិ ច តេ ភោគា, យេ កេចិ មនសោ បិយា។
Uppajjanti ca te bhogā, ye keci manaso piyā.
២១៩.
219.
‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;
‘‘Pucchāmi taṃ devi mahānubhāve, manussabhūtā kimakāsi puññaṃ;
កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ។ –
Kenāsi evaṃ jalitānubhāvā, vaṇṇo ca te sabbadisā pabhāsatī’’ti. –
ឥមាហិ តីហិ គាថាហិ បដិបុច្ឆិ។
Imāhi tīhi gāthāhi paṭipucchi.
២២០.
220.
‘‘សា ទេវតា អត្តមនា, មោគ្គល្លានេន បុច្ឆិតា;
‘‘Sā devatā attamanā, moggallānena pucchitā;
បញ្ហំ បុដ្ឋា វិយាកាសិ, យស្ស កម្មស្សិទំ ផលំ’’។
Pañhaṃ puṭṭhā viyākāsi, yassa kammassidaṃ phalaṃ’’.
២២១-២២៦.
221-226.
‘‘សោណទិន្នាតិ មំ អញ្ញំសុ…បេ.… គោតមស្ស យសស្សិនោ។
‘‘Soṇadinnāti maṃ aññaṃsu…pe… gotamassa yasassino.
២២៧.
227.
‘‘តេន មេតាទិសោ វណ្ណោ…បេ.… វណ្ណោ ច មេ សព្ពទិសា បភាសតី’’តិ។ –
‘‘Tena metādiso vaṇṇo…pe… vaṇṇo ca me sabbadisā pabhāsatī’’ti. –
ទេវតា ព្យាកាសិ។ តំ សព្ពំ ហេដ្ឋា វុត្តនយមេវ។
Devatā byākāsi. Taṃ sabbaṃ heṭṭhā vuttanayameva.
សោណទិន្នាវិមានវណ្ណនា និដ្ឋិតា។
Soṇadinnāvimānavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / វិមានវត្ថុបាឡិ • Vimānavatthupāḷi / ៦. សោណទិន្នាវិមានវត្ថុ • 6. Soṇadinnāvimānavatthu
