| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂. သောမာသုတ္တဝဏ္ဏနာ
2. Somāsuttavaṇṇanā
၁၆၃. ဌာနန္တိ ဣသ္သရိယဋ္ဌာနံ ဝိသယဇ္ဈတ္တံ။ ဒုပ္ပသဟံ အကမ္ပိယဘာဝတ္တာ။ ဒ္ဝင္ဂုလပညာယာတိ ဧတ္ထ ဣတ္ထိယော ဟိ ဒဟရကုမာရိကာကာလတော ပဋ္ဌာယ ဩဒနပစနဝိဓိံ အနုတိဋ္ဌန္တိယော ဥက္ခလိယံ ဥဒကံ တာပေတ္ဝာ တဏ္ဍုလေ ပက္ခိပိတ္ဝာ အတ္တနော ဗုဒ္ဓိယာ တေသံ ပာကကာလပ္ပမာဏံ ပရိစ္ဆိန္ဒိတုံ တာနိ ဒဗ္ဗိယာ ဥဒ္ဓရိတ္ဝာပိ ဝဏ္ဏသဏ္ဌာနဂ္ဂဟဏမတ္တေန ပက္ကာပက္ကဘာဝံ ဇာနိတုံ န သက္ကောန္တိ, ကေဝလံ ပန ဒ္ဝီဟိ အင္ဂုလီဟိ ဥပ္ပီဠိတကာလေ ဧဝ ဇာနန္တိ, တသ္မာ ဒ္ဝီဟင္ဂုလိကေဟိ ဒုဗ္ဗလပညတ္တာ ‘‘ဒ္ဝင္ဂုလပညာ’’တိ ဝုစ္စန္တိ။ ဖလသမာပတ္တိဉာဏပ္ပဝတ္တိကိတ္တနေန စတူသု သစ္စေသု အသမ္မောဟဝိဟာရော ဒီပိတော ဟောတီတိ အာဟ ‘‘ဉာဏမ္ဟိ ဝတ္တမာနမ္ဟီတိ ဖလသမာပတ္တိဉာဏေ ပဝတ္တမာနေ’’တိ။ ဝိပသ္သန္တသ္သာတိ အသမ္မောဟပဋိဝေဓတော ဝိသေသေန ပသ္သန္တသ္သ ခန္ဓပဉ္စကမေဝ သစ္စာဘိသမယတော ပုဗ္ဗဘာဂေ ဝိပသ္သန္တသ္သ။ အညံ ဝာတိ ဣတ္ထိပုရိသတော အညံ ဝာ ကိဉ္စိ ဝတ္ထုံ။ ‘‘အဟံ အသ္မီ’’တိ မာနဒိဋ္ဌိဂာဟတဏ္ဟာဂာဟဝသေန ဂဟိတဝတ္ထုသ္မိံ ယေဝာတိ အာဟ ‘‘အဟံ အသ္မီတိ တဏ္ဟာမာနဒိဋ္ဌိဝသေနာ’’တိ။
163.Ṭhānanti issariyaṭṭhānaṃ visayajjhattaṃ. Duppasahaṃ akampiyabhāvattā. Dvaṅgulapaññāyāti ettha itthiyo hi daharakumārikākālato paṭṭhāya odanapacanavidhiṃ anutiṭṭhantiyo ukkhaliyaṃ udakaṃ tāpetvā taṇḍule pakkhipitvā attano buddhiyā tesaṃ pākakālappamāṇaṃ paricchindituṃ tāni dabbiyā uddharitvāpi vaṇṇasaṇṭhānaggahaṇamattena pakkāpakkabhāvaṃ jānituṃ na sakkonti, kevalaṃ pana dvīhi aṅgulīhi uppīḷitakāle eva jānanti, tasmā dvīhaṅgulikehi dubbalapaññattā ‘‘dvaṅgulapaññā’’ti vuccanti. Phalasamāpattiñāṇappavattikittanena catūsu saccesu asammohavihāro dīpito hotīti āha ‘‘ñāṇamhi vattamānamhīti phalasamāpattiñāṇe pavattamāne’’ti. Vipassantassāti asammohapaṭivedhato visesena passantassa khandhapañcakameva saccābhisamayato pubbabhāge vipassantassa. Aññaṃ vāti itthipurisato aññaṃ vā kiñci vatthuṃ. ‘‘Ahaṃ asmī’’ti mānadiṭṭhigāhataṇhāgāhavasena gahitavatthusmiṃ yevāti āha ‘‘ahaṃ asmīti taṇhāmānadiṭṭhivasenā’’ti.
သောမာသုတ္တဝဏ္ဏနာ နိဋ္ဌိတာ။
Somāsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. သောမာသုတ္တံ • 2. Somāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. သောမာသုတ္တဝဏ္ဏနာ • 2. Somāsuttavaṇṇanā
