| Library / Tipiṭaka / ತಿಪಿಟಕ • Tipiṭaka / ಇತಿವುತ್ತಕಪಾಳಿ • Itivuttakapāḷi |
೫. ಸೀಲಸಮ್ಪನ್ನಸುತ್ತಂ
5. Sīlasampannasuttaṃ
೧೦೪. ವುತ್ತಞ್ಹೇತಂ ಭಗವತಾ, ವುತ್ತಮರಹತಾತಿ ಮೇ ಸುತಂ –
104. Vuttañhetaṃ bhagavatā, vuttamarahatāti me sutaṃ –
‘‘ಯೇ ತೇ, ಭಿಕ್ಖವೇ, ಭಿಕ್ಖೂ ಸೀಲಸಮ್ಪನ್ನಾ ಸಮಾಧಿಸಮ್ಪನ್ನಾ ಪಞ್ಞಾಸಮ್ಪನ್ನಾ ವಿಮುತ್ತಿಸಮ್ಪನ್ನಾ ವಿಮುತ್ತಿಞಾಣದಸ್ಸನಸಮ್ಪನ್ನಾ ಓವಾದಕಾ ವಿಞ್ಞಾಪಕಾ ಸನ್ದಸ್ಸಕಾ ಸಮಾದಪಕಾ ಸಮುತ್ತೇಜಕಾ ಸಮ್ಪಹಂಸಕಾ ಅಲಂಸಮಕ್ಖಾತಾರೋ ಸದ್ಧಮ್ಮಸ್ಸ ದಸ್ಸನಮ್ಪಹಂ, ಭಿಕ್ಖವೇ, ತೇಸಂ ಭಿಕ್ಖೂನಂ ಬಹೂಪಕಾರಂ ವದಾಮಿ; ಸವನಮ್ಪಹಂ, ಭಿಕ್ಖವೇ, ತೇಸಂ ಭಿಕ್ಖೂನಂ ಬಹೂಪಕಾರಂ ವದಾಮಿ; ಉಪಸಙ್ಕಮನಮ್ಪಹಂ, ಭಿಕ್ಖವೇ, ತೇಸಂ ಭಿಕ್ಖೂನಂ ಬಹೂಪಕಾರಂ ವದಾಮಿ; ಪಯಿರುಪಾಸನಮ್ಪಹಂ, ಭಿಕ್ಖವೇ, ತೇಸಂ ಭಿಕ್ಖೂನಂ ಬಹೂಪಕಾರಂ ವದಾಮಿ; ಅನುಸ್ಸರಣಮ್ಪಹಂ, ಭಿಕ್ಖವೇ, ತೇಸಂ ಭಿಕ್ಖೂನಂ ಬಹೂಪಕಾರಂ ವದಾಮಿ; ಅನುಪಬ್ಬಜ್ಜಮ್ಪಹಂ 1, ಭಿಕ್ಖವೇ, ತೇಸಂ ಭಿಕ್ಖೂನಂ ಬಹೂಪಕಾರಂ ವದಾಮಿ। ತಂ ಕಿಸ್ಸ ಹೇತು? ತಥಾರೂಪೇ, ಭಿಕ್ಖವೇ, ಭಿಕ್ಖೂ ಸೇವತೋ ಭಜತೋ ಪಯಿರುಪಾಸತೋ ಅಪರಿಪೂರೋಪಿ ಸೀಲಕ್ಖನ್ಧೋ ಭಾವನಾಪಾರಿಪೂರಿಂ ಗಚ್ಛತಿ, ಅಪರಿಪೂರೋಪಿ ಸಮಾಧಿಕ್ಖನ್ಧೋ ಭಾವನಾಪಾರಿಪೂರಿಂ ಗಚ್ಛತಿ, ಅಪರಿಪೂರೋಪಿ ಪಞ್ಞಾಕ್ಖನ್ಧೋ ಭಾವನಾಪಾರಿಪೂರಿಂ ಗಚ್ಛತಿ, ಅಪರಿಪೂರೋಪಿ ವಿಮುತ್ತಿಕ್ಖನ್ಧೋ ಭಾವನಾಪಾರಿಪೂರಿಂ ಗಚ್ಛತಿ, ಅಪರಿಪೂರೋಪಿ ವಿಮುತ್ತಿಞಾಣದಸ್ಸನಕ್ಖನ್ಧೋ ಭಾವನಾಪಾರಿಪೂರಿಂ ಗಚ್ಛತಿ। ಏವರೂಪಾ ಚ ತೇ, ಭಿಕ್ಖವೇ, ಭಿಕ್ಖೂ ಸತ್ಥಾರೋತಿಪಿ ವುಚ್ಚನ್ತಿ, ಸತ್ಥವಾಹಾತಿಪಿ ವುಚ್ಚನ್ತಿ, ರಣಞ್ಜಹಾತಿಪಿ ವುಚ್ಚನ್ತಿ, ತಮೋನುದಾತಿಪಿ ವುಚ್ಚನ್ತಿ, ಆಲೋಕಕರಾತಿಪಿ ವುಚ್ಚನ್ತಿ, ಓಭಾಸಕರಾತಿಪಿ ವುಚ್ಚನ್ತಿ, ಪಜ್ಜೋತಕರಾತಿಪಿ ವುಚ್ಚನ್ತಿ, ಉಕ್ಕಾಧಾರಾತಿಪಿ ವುಚ್ಚನ್ತಿ, ಪಭಙ್ಕರಾತಿಪಿ ವುಚ್ಚನ್ತಿ, ಅರಿಯಾತಿಪಿ ವುಚ್ಚನ್ತಿ, ಚಕ್ಖುಮನ್ತೋತಿಪಿ ವುಚ್ಚನ್ತೀ’’ತಿ। ಏತಮತ್ಥಂ ಭಗವಾ ಅವೋಚ। ತತ್ಥೇತಂ ಇತಿ ವುಚ್ಚತಿ –
‘‘Ye te, bhikkhave, bhikkhū sīlasampannā samādhisampannā paññāsampannā vimuttisampannā vimuttiñāṇadassanasampannā ovādakā viññāpakā sandassakā samādapakā samuttejakā sampahaṃsakā alaṃsamakkhātāro saddhammassa dassanampahaṃ, bhikkhave, tesaṃ bhikkhūnaṃ bahūpakāraṃ vadāmi; savanampahaṃ, bhikkhave, tesaṃ bhikkhūnaṃ bahūpakāraṃ vadāmi; upasaṅkamanampahaṃ, bhikkhave, tesaṃ bhikkhūnaṃ bahūpakāraṃ vadāmi; payirupāsanampahaṃ, bhikkhave, tesaṃ bhikkhūnaṃ bahūpakāraṃ vadāmi; anussaraṇampahaṃ, bhikkhave, tesaṃ bhikkhūnaṃ bahūpakāraṃ vadāmi; anupabbajjampahaṃ 2, bhikkhave, tesaṃ bhikkhūnaṃ bahūpakāraṃ vadāmi. Taṃ kissa hetu? Tathārūpe, bhikkhave, bhikkhū sevato bhajato payirupāsato aparipūropi sīlakkhandho bhāvanāpāripūriṃ gacchati, aparipūropi samādhikkhandho bhāvanāpāripūriṃ gacchati, aparipūropi paññākkhandho bhāvanāpāripūriṃ gacchati, aparipūropi vimuttikkhandho bhāvanāpāripūriṃ gacchati, aparipūropi vimuttiñāṇadassanakkhandho bhāvanāpāripūriṃ gacchati. Evarūpā ca te, bhikkhave, bhikkhū satthārotipi vuccanti, satthavāhātipi vuccanti, raṇañjahātipi vuccanti, tamonudātipi vuccanti, ālokakarātipi vuccanti, obhāsakarātipi vuccanti, pajjotakarātipi vuccanti, ukkādhārātipi vuccanti, pabhaṅkarātipi vuccanti, ariyātipi vuccanti, cakkhumantotipi vuccantī’’ti. Etamatthaṃ bhagavā avoca. Tatthetaṃ iti vuccati –
ಯದಿದಂ ಭಾವಿತತ್ತಾನಂ, ಅರಿಯಾನಂ ಧಮ್ಮಜೀವಿನಂ॥
Yadidaṃ bhāvitattānaṃ, ariyānaṃ dhammajīvinaṃ.
‘‘ತೇ ಜೋತಯನ್ತಿ ಸದ್ಧಮ್ಮಂ, ಭಾಸಯನ್ತಿ ಪಭಙ್ಕರಾ।
‘‘Te jotayanti saddhammaṃ, bhāsayanti pabhaṅkarā;
ಆಲೋಕಕರಣಾ ಧೀರಾ, ಚಕ್ಖುಮನ್ತೋ ರಣಞ್ಜಹಾ॥
Ālokakaraṇā dhīrā, cakkhumanto raṇañjahā.
‘‘ಯೇಸಂ ವೇ ಸಾಸನಂ ಸುತ್ವಾ, ಸಮ್ಮದಞ್ಞಾಯ ಪಣ್ಡಿತಾ।
‘‘Yesaṃ ve sāsanaṃ sutvā, sammadaññāya paṇḍitā;
ಜಾತಿಕ್ಖಯಮಭಿಞ್ಞಾಯ , ನಾಗಚ್ಛನ್ತಿ ಪುನಬ್ಭವ’’ನ್ತಿ॥
Jātikkhayamabhiññāya , nāgacchanti punabbhava’’nti.
ಅಯಮ್ಪಿ ಅತ್ಥೋ ವುತ್ತೋ ಭಗವತಾ, ಇತಿ ಮೇ ಸುತನ್ತಿ। ಪಞ್ಚಮಂ।
Ayampi attho vutto bhagavatā, iti me sutanti. Pañcamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಇತಿವುತ್ತಕ-ಅಟ್ಠಕಥಾ • Itivuttaka-aṭṭhakathā / ೫. ಸೀಲಸಮ್ಪನ್ನಸುತ್ತವಣ್ಣನಾ • 5. Sīlasampannasuttavaṇṇanā
