| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. ஸீஹஸுத்தங்
9. Sīhasuttaṃ
99. ‘‘ஸீஹோ, பி⁴க்க²வே, மிக³ராஜா ஸாயன்ஹஸமயங் ஆஸயா நிக்க²மதி; ஆஸயா நிக்க²மித்வா விஜம்ப⁴தி; விஜம்பி⁴த்வா ஸமந்தா சதுத்³தி³ஸங் 1 அனுவிலோகேதி; ஸமந்தா சதுத்³தி³ஸங் 2 அனுவிலோகெத்வா திக்க²த்துங் ஸீஹனாத³ங் நத³தி; திக்க²த்துங் ஸீஹனாத³ங் நதி³த்வா கோ³சராய பக்கமதி. ஸோ ஹத்தி²ஸ்ஸ சேபி பஹாரங் தே³தி, ஸக்கச்சஞ்ஞேவ பஹாரங் தே³தி, நோ அஸக்கச்சங்; மஹிங்ஸஸ்ஸ 3 சேபி பஹாரங் தே³தி, ஸக்கச்சஞ்ஞேவ பஹாரங் தே³தி, நோ அஸக்கச்சங்; க³வஸ்ஸ சேபி பஹாரங் தே³தி, ஸக்கச்சஞ்ஞேவ பஹாரங் தே³தி, நோ அஸக்கச்சங்; தீ³பிஸ்ஸ சேபி பஹாரங் தே³தி, ஸக்கச்சஞ்ஞேவ பஹாரங் தே³தி , நோ அஸக்கச்சங்; கு²த்³த³கானஞ்சேபி பாணானங் பஹாரங் தே³தி அந்தமஸோ ஸஸபி³ளாரானம்பி 4, ஸக்கச்சஞ்ஞேவ பஹாரங் தே³தி, நோ அஸக்கச்சங். தங் கிஸ்ஸ ஹேது? ‘மா மே யொக்³க³பதோ² நஸ்ஸா’தி.
99. ‘‘Sīho, bhikkhave, migarājā sāyanhasamayaṃ āsayā nikkhamati; āsayā nikkhamitvā vijambhati; vijambhitvā samantā catuddisaṃ 5 anuviloketi; samantā catuddisaṃ 6 anuviloketvā tikkhattuṃ sīhanādaṃ nadati; tikkhattuṃ sīhanādaṃ naditvā gocarāya pakkamati. So hatthissa cepi pahāraṃ deti, sakkaccaññeva pahāraṃ deti, no asakkaccaṃ; mahiṃsassa 7 cepi pahāraṃ deti, sakkaccaññeva pahāraṃ deti, no asakkaccaṃ; gavassa cepi pahāraṃ deti, sakkaccaññeva pahāraṃ deti, no asakkaccaṃ; dīpissa cepi pahāraṃ deti, sakkaccaññeva pahāraṃ deti , no asakkaccaṃ; khuddakānañcepi pāṇānaṃ pahāraṃ deti antamaso sasabiḷārānampi 8, sakkaccaññeva pahāraṃ deti, no asakkaccaṃ. Taṃ kissa hetu? ‘Mā me yoggapatho nassā’ti.
‘‘ஸீஹோதி கோ², பி⁴க்க²வே, ததா²க³தஸ்ஸேதங் அதி⁴வசனங் அரஹதோ ஸம்மாஸம்பு³த்³த⁴ஸ்ஸ. யங் கோ², பி⁴க்க²வே, ததா²க³தோ பரிஸாய த⁴ம்மங் தே³ஸேதி, இத³மஸ்ஸ ஹோதி ஸீஹனாத³ஸ்மிங். பி⁴க்கூ²னஞ்சேபி, பி⁴க்க²வே, ததா²க³தோ த⁴ம்மங் தே³ஸேதி, ஸக்கச்சஞ்ஞேவ ததா²க³தோ த⁴ம்மங் தே³ஸேதி, நோ அஸக்கச்சங்; பி⁴க்கு²னீனஞ்சேபி, பி⁴க்க²வே, ததா²க³தோ த⁴ம்மங் தே³ஸேதி, ஸக்கச்சஞ்ஞேவ ததா²க³தோ த⁴ம்மங் தே³ஸேதி, நோ அஸக்கச்சங்; உபாஸகானஞ்சேபி, பி⁴க்க²வே, ததா²க³தோ த⁴ம்மங் தே³ஸேதி, ஸக்கச்சஞ்ஞேவ ததா²க³தோ த⁴ம்மங் தே³ஸேதி, நோ அஸக்கச்சங்; உபாஸிகானஞ்சேபி, பி⁴க்க²வே, ததா²க³தோ த⁴ம்மங் தே³ஸேதி, ஸக்கச்சஞ்ஞேவ ததா²க³தோ த⁴ம்மங் தே³ஸேதி, நோ அஸக்கச்சங்; புது²ஜ்ஜனானஞ்சேபி, பி⁴க்க²வே, ததா²க³தோ த⁴ம்மங் தே³ஸேதி அந்தமஸோ அன்னபா⁴ரனேஸாதா³னம்பி 9, ஸக்கச்சஞ்ஞேவ ததா²க³தோ த⁴ம்மங் தே³ஸேதி, நோ அஸக்கச்சங். தங் கிஸ்ஸ ஹேது? த⁴ம்மக³ரு, பி⁴க்க²வே, ததா²க³தோ த⁴ம்மகா³ரவோ’’தி. நவமங்.
‘‘Sīhoti kho, bhikkhave, tathāgatassetaṃ adhivacanaṃ arahato sammāsambuddhassa. Yaṃ kho, bhikkhave, tathāgato parisāya dhammaṃ deseti, idamassa hoti sīhanādasmiṃ. Bhikkhūnañcepi, bhikkhave, tathāgato dhammaṃ deseti, sakkaccaññeva tathāgato dhammaṃ deseti, no asakkaccaṃ; bhikkhunīnañcepi, bhikkhave, tathāgato dhammaṃ deseti, sakkaccaññeva tathāgato dhammaṃ deseti, no asakkaccaṃ; upāsakānañcepi, bhikkhave, tathāgato dhammaṃ deseti, sakkaccaññeva tathāgato dhammaṃ deseti, no asakkaccaṃ; upāsikānañcepi, bhikkhave, tathāgato dhammaṃ deseti, sakkaccaññeva tathāgato dhammaṃ deseti, no asakkaccaṃ; puthujjanānañcepi, bhikkhave, tathāgato dhammaṃ deseti antamaso annabhāranesādānampi 10, sakkaccaññeva tathāgato dhammaṃ deseti, no asakkaccaṃ. Taṃ kissa hetu? Dhammagaru, bhikkhave, tathāgato dhammagāravo’’ti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. ஸீஹஸுத்தவண்ணனா • 9. Sīhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. பட²மஸம்பதா³ஸுத்தாதி³வண்ணனா • 1-10. Paṭhamasampadāsuttādivaṇṇanā
