| Library / Tipiṭaka / তিপিটক • Tipiṭaka / জাতক-অট্ঠকথা • Jātaka-aṭṭhakathā |
[১৮৮] ৮. সীহকোত্থুজাতকৰণ্ণনা
[188] 8. Sīhakotthujātakavaṇṇanā
সীহঙ্গুলী সীহনখোতি ইদং সত্থা জেতৰনে ৰিহরন্তো কোকালিকং আরব্ভ কথেসি। একদিৰসং কির কোকালিকো অঞ্ঞেসু বহুস্সুতেসু ধম্মং কথেন্তেসু সযম্পি কথেতুকামো অহোসীতি সব্বং হেট্ঠা ৰুত্তনযেনেৰ ৰিত্থারেতব্বং। তং পন পৰত্তিং সুত্ৰা সত্থা ‘‘ন, ভিক্খৰে, কোকালিকো ইদানেৰ অত্তনো সদ্দেন পাকটো জাতো, পুব্বেপি পাকটো অহোসী’’তি ৰত্ৰা অতীতং আহরি।
Sīhaṅgulī sīhanakhoti idaṃ satthā jetavane viharanto kokālikaṃ ārabbha kathesi. Ekadivasaṃ kira kokāliko aññesu bahussutesu dhammaṃ kathentesu sayampi kathetukāmo ahosīti sabbaṃ heṭṭhā vuttanayeneva vitthāretabbaṃ. Taṃ pana pavattiṃ sutvā satthā ‘‘na, bhikkhave, kokāliko idāneva attano saddena pākaṭo jāto, pubbepi pākaṭo ahosī’’ti vatvā atītaṃ āhari.
অতীতে বারাণসিযং ব্রহ্মদত্তে রজ্জং কারেন্তে বোধিসত্তো হিমৰন্তপদেসে সীহো হুত্ৰা একায সিঙ্গালিযা সদ্ধিং সংৰাসমন্ৰায পুত্তং পটিলভি। সো অঙ্গুলীহি নখেহি কেসরেন ৰণ্ণেন সণ্ঠানেনাতি ইমেহি আকারেহি পিতুসদিসো অহোসি, সদ্দেন মাতুসদিসো। অথেকদিৰসং দেৰে ৰস্সিত্ৰা ৰিগতে সীহেসু নদিত্ৰা সীহকীল়ং কীল়ন্তেসু সোপি তেসং অন্তরে নদিতুকামো হুত্ৰা সিঙ্গালিকং নাদং নদি। অথস্স সদ্দং সুত্ৰা সীহা তুণ্হী অহেসুং। তস্স সদ্দং সুত্ৰা অপরো বোধিসত্তস্স সজাতিপুত্তো ‘‘তাত, অযং সীহো ৰণ্ণাদীহি অম্হেহি সমানো, সদ্দো পনস্স অঞ্ঞাদিসো, কো নামেসো’’তি পুচ্ছন্তো পঠমং গাথমাহ –
Atīte bārāṇasiyaṃ brahmadatte rajjaṃ kārente bodhisatto himavantapadese sīho hutvā ekāya siṅgāliyā saddhiṃ saṃvāsamanvāya puttaṃ paṭilabhi. So aṅgulīhi nakhehi kesarena vaṇṇena saṇṭhānenāti imehi ākārehi pitusadiso ahosi, saddena mātusadiso. Athekadivasaṃ deve vassitvā vigate sīhesu naditvā sīhakīḷaṃ kīḷantesu sopi tesaṃ antare naditukāmo hutvā siṅgālikaṃ nādaṃ nadi. Athassa saddaṃ sutvā sīhā tuṇhī ahesuṃ. Tassa saddaṃ sutvā aparo bodhisattassa sajātiputto ‘‘tāta, ayaṃ sīho vaṇṇādīhi amhehi samāno, saddo panassa aññādiso, ko nāmeso’’ti pucchanto paṭhamaṃ gāthamāha –
৭৫.
75.
‘‘সীহঙ্গুলী সীহনখো, সীহপাদপতিট্ঠিতো।
‘‘Sīhaṅgulī sīhanakho, sīhapādapatiṭṭhito;
সো সীহো সীহসঙ্ঘম্হি, একো নদতি অঞ্ঞথা’’তি॥
So sīho sīhasaṅghamhi, eko nadati aññathā’’ti.
তত্থ সীহপাদপতিট্ঠিতোতি সীহপাদেহেৰ পতিট্ঠিতো। একো নদতি অঞ্ঞথাতি একোৰ অৰসেসসীহেহি অসদিসেন সিঙ্গালসদ্দেন নদন্তো অঞ্ঞথা নদতি।
Tattha sīhapādapatiṭṭhitoti sīhapādeheva patiṭṭhito. Eko nadati aññathāti ekova avasesasīhehi asadisena siṅgālasaddena nadanto aññathā nadati.
তং সুত্ৰা বোধিসত্তো ‘‘তাত, এস তৰ ভাতা সিঙ্গালিযা পুত্তো, রূপেন মযা সদিসো, সদ্দেন মাতরা সদিসো’’তি ৰত্ৰা সিঙ্গালিপুত্তং আমন্তেত্ৰা ‘‘তাত, ত্ৰং ইতো পট্ঠায ইধ ৰসন্তো অপ্পসদ্দো ৰস, সচে পুন নদিস্সসি, সিঙ্গালভাৰং তে জানিস্সন্তী’’তি ওৰদন্তো দুতিযং গাথমাহ –
Taṃ sutvā bodhisatto ‘‘tāta, esa tava bhātā siṅgāliyā putto, rūpena mayā sadiso, saddena mātarā sadiso’’ti vatvā siṅgāliputtaṃ āmantetvā ‘‘tāta, tvaṃ ito paṭṭhāya idha vasanto appasaddo vasa, sace puna nadissasi, siṅgālabhāvaṃ te jānissantī’’ti ovadanto dutiyaṃ gāthamāha –
৭৬.
76.
‘‘মা ত্ৰং নদি রাজপুত্ত, অপ্পসদ্দো ৰনে ৰস।
‘‘Mā tvaṃ nadi rājaputta, appasaddo vane vasa;
সরেন খো তং জানেয্যুং, ন হি তে পেত্তিকো সরো’’তি॥
Sarena kho taṃ jāneyyuṃ, na hi te pettiko saro’’ti.
তত্থ রাজপুত্তাতি সীহস্স মিগরঞ্ঞো পুত্ত। ইমঞ্চ পন ওৰাদং সুত্ৰা পুন সো নদিতুং নাম ন উস্সহি।
Tattha rājaputtāti sīhassa migarañño putta. Imañca pana ovādaṃ sutvā puna so nadituṃ nāma na ussahi.
সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা সিঙ্গালো কোকালিকো অহোসি, সজাতিপুত্তো রাহুলো, মিগরাজা পন অহমেৰ অহোসি’’ন্তি।
Satthā imaṃ dhammadesanaṃ āharitvā jātakaṃ samodhānesi – ‘‘tadā siṅgālo kokāliko ahosi, sajātiputto rāhulo, migarājā pana ahameva ahosi’’nti.
সীহকোত্থুজাতকৰণ্ণনা অট্ঠমা।
Sīhakotthujātakavaṇṇanā aṭṭhamā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / জাতকপাল়ি • Jātakapāḷi / ১৮৮. সীহকোত্থুজাতকং • 188. Sīhakotthujātakaṃ
