| Library / Tipiṭaka / তিপিটক • Tipiṭaka / জাতক-অট্ঠকথা • Jātaka-aṭṭhakathā |
[১৮৯] ৯. সীহচম্মজাতকৰণ্ণনা
[189] 9. Sīhacammajātakavaṇṇanā
নেতং সীহস্স নদিতন্তি ইদং সত্থা জেতৰনে ৰিহরন্তো কোকালিকঞ্ঞেৰ আরব্ভ কথেসি। সো ইমস্মিং কালে সরভঞ্ঞং ভণিতুকামো অহোসি। সত্থা তং পৰত্তিং সুত্ৰা অতীতং আহরি।
Netaṃ sīhassa naditanti idaṃ satthā jetavane viharanto kokālikaññeva ārabbha kathesi. So imasmiṃ kāle sarabhaññaṃ bhaṇitukāmo ahosi. Satthā taṃ pavattiṃ sutvā atītaṃ āhari.
অতীতে বারাণসিযং ব্রহ্মদত্তে রজ্জং কারেন্তে বোধিসত্তো কস্সককুলে নিব্বত্তিত্ৰা ৰযপ্পত্তো কসিকম্মেন জীৰিকং কপ্পেসি। তস্মিং কালে একো ৰাণিজো গদ্রভভারকেন ৰোহারং করোন্তো ৰিচরতি। সো গতগতট্ঠানে গদ্রভস্স পিট্ঠিতো ভণ্ডিকং ওতারেত্ৰা গদ্রভং সীহচম্মেন পারুপিত্ৰা সালিযৰখেত্তেসু ৰিস্সজ্জেতি। খেত্তরক্খকা তং দিস্ৰা ‘‘সীহো’’তি সঞ্ঞায উপসঙ্কমিতুং ন সক্কোন্তি। অথেকদিৰসং সো ৰাণিজো একস্মিং গামদ্ৰারে নিৰাসং গহেত্ৰা পাতরাসং পচাপেন্তো ততো গদ্রভং সীহচম্মং পারুপিত্ৰা যৰখেত্তে ৰিস্সজ্জেসি। খেত্তরক্খকা ‘‘সীহো’’তি সঞ্ঞায তং উপসঙ্কমিতুং অসক্কোন্তা গেহং গন্ত্ৰা আরোচেসুং। সকলগামৰাসিনো আৰুধানি গহেত্ৰা সঙ্খে ধমেন্তা ভেরিযো ৰাদেন্তা খেত্তসমীপং গন্ত্ৰা উন্নদিংসু, গদ্রভো মরণভযভীতো গদ্রভরৰং রৰি। অথস্স গদ্রভভাৰং ঞত্ৰা বোধিসত্তো পঠমং গাথমাহ –
Atīte bārāṇasiyaṃ brahmadatte rajjaṃ kārente bodhisatto kassakakule nibbattitvā vayappatto kasikammena jīvikaṃ kappesi. Tasmiṃ kāle eko vāṇijo gadrabhabhārakena vohāraṃ karonto vicarati. So gatagataṭṭhāne gadrabhassa piṭṭhito bhaṇḍikaṃ otāretvā gadrabhaṃ sīhacammena pārupitvā sāliyavakhettesu vissajjeti. Khettarakkhakā taṃ disvā ‘‘sīho’’ti saññāya upasaṅkamituṃ na sakkonti. Athekadivasaṃ so vāṇijo ekasmiṃ gāmadvāre nivāsaṃ gahetvā pātarāsaṃ pacāpento tato gadrabhaṃ sīhacammaṃ pārupitvā yavakhette vissajjesi. Khettarakkhakā ‘‘sīho’’ti saññāya taṃ upasaṅkamituṃ asakkontā gehaṃ gantvā ārocesuṃ. Sakalagāmavāsino āvudhāni gahetvā saṅkhe dhamentā bheriyo vādentā khettasamīpaṃ gantvā unnadiṃsu, gadrabho maraṇabhayabhīto gadrabharavaṃ ravi. Athassa gadrabhabhāvaṃ ñatvā bodhisatto paṭhamaṃ gāthamāha –
৭৭.
77.
‘‘নেতং সীহস্স নদিতং, ন ব্যগ্ঘস্স ন দীপিনো।
‘‘Netaṃ sīhassa naditaṃ, na byagghassa na dīpino;
পারুতো সীহচম্মেন, জম্মো নদতি গদ্রভো’’তি॥
Pāruto sīhacammena, jammo nadati gadrabho’’ti.
তত্থ জম্মোতি লামকো। গামৰাসিনোপি তস্স গদ্রভভাৰং ঞত্ৰা তং অট্ঠীনি ভঞ্জন্তা পোথেত্ৰা সীহচম্মং আদায অগমংসু।
Tattha jammoti lāmako. Gāmavāsinopi tassa gadrabhabhāvaṃ ñatvā taṃ aṭṭhīni bhañjantā pothetvā sīhacammaṃ ādāya agamaṃsu.
অথ সো ৰাণিজো আগন্ত্ৰা তং ব্যসনভাৰপ্পত্তং গদ্রভং দিস্ৰা দুতিযং গাথমাহ –
Atha so vāṇijo āgantvā taṃ byasanabhāvappattaṃ gadrabhaṃ disvā dutiyaṃ gāthamāha –
৭৮.
78.
‘‘চিরম্পি খো তং খাদেয্য, গদ্রভো হরিতং যৰং।
‘‘Cirampi kho taṃ khādeyya, gadrabho haritaṃ yavaṃ;
পারুতো সীহচম্মেন, রৰমানোৰ দূসযী’’তি॥
Pāruto sīhacammena, ravamānova dūsayī’’ti.
তত্থ তন্তি নিপাতমত্তং, অযং গদ্রভো অত্তনো গদ্রভভাৰং অজানাপেত্ৰা সীহচম্মেন পারুতো চিরম্পি কালং হরিতং যৰং খাদেয্যাতি অত্থো। রৰমানোৰ দূসযীতি অত্তনো পন গদ্রভরৰং রৰমানোৰেস অত্তানং দূসযি, নত্থেত্থ সীহচম্মস্স দোসোতি। তস্মিং এৰং কথেন্তেযেৰ গদ্রভো তত্থেৰ নিপন্নো মরি, ৰাণিজোপি তং পহায পক্কামি।
Tattha tanti nipātamattaṃ, ayaṃ gadrabho attano gadrabhabhāvaṃ ajānāpetvā sīhacammena pāruto cirampi kālaṃ haritaṃ yavaṃ khādeyyāti attho. Ravamānova dūsayīti attano pana gadrabharavaṃ ravamānovesa attānaṃ dūsayi, natthettha sīhacammassa dosoti. Tasmiṃ evaṃ kathenteyeva gadrabho tattheva nipanno mari, vāṇijopi taṃ pahāya pakkāmi.
সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা ৰাণিজো দেৰদত্তো অহোসি, গদ্রভো কোকালিকো, পণ্ডিতকস্সকো পন অহমেৰ অহোসি’’ন্তি।
Satthā imaṃ dhammadesanaṃ āharitvā jātakaṃ samodhānesi – ‘‘tadā vāṇijo devadatto ahosi, gadrabho kokāliko, paṇḍitakassako pana ahameva ahosi’’nti.
সীহচম্মজাতকৰণ্ণনা নৰমা।
Sīhacammajātakavaṇṇanā navamā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / জাতকপাল়ি • Jātakapāḷi / ১৮৯. সীহচম্মজাতকং • 189. Sīhacammajātakaṃ
