| Library / Tipiṭaka / तिपिटक • Tipiṭaka / विनयविनिच्छय-उत्तरविनिच्छय • Vinayavinicchaya-uttaravinicchaya |
सेदमोचनकथा
Sedamocanakathā
क.
Ka.
सोळसपरिवारस्स , परिवारस्स सादरा।
Soḷasaparivārassa , parivārassa sādarā;
सुणाथ निपुणे पञ्हे, गूळ्हत्थे भणतो मम॥
Suṇātha nipuṇe pañhe, gūḷhatthe bhaṇato mama.
ख.
Kha.
दिवापज्जति नो रत्तिं, रत्तिंयेव च नो दिवा।
Divāpajjati no rattiṃ, rattiṃyeva ca no divā;
कथञ्च पटिग्गण्हन्तो, न गण्हन्तो कथं पन॥
Kathañca paṭiggaṇhanto, na gaṇhanto kathaṃ pana.
ग.
Ga.
छिन्दन्तस्स सियापत्ति, तथेवाछिन्दतोपि च।
Chindantassa siyāpatti, tathevāchindatopi ca;
छादेन्तस्स तथापत्ति-न छादेन्तस्स भिक्खुनो॥
Chādentassa tathāpatti-na chādentassa bhikkhuno.
घ.
Gha.
का चापत्ति समापत्ति-लाभिनोयेव भिक्खुनो।
Kā cāpatti samāpatti-lābhinoyeva bhikkhuno;
असमापत्तिलाभिस्स, का च नामस्स सा भवे॥
Asamāpattilābhissa, kā ca nāmassa sā bhave.
ङ.
Ṅa.
गरुकं भणतो सच्चं, अलिकं भणतो सियुं।
Garukaṃ bhaṇato saccaṃ, alikaṃ bhaṇato siyuṃ;
लहुं सच्चं भणन्तस्स, मुसा च भणतो गरुं॥
Lahuṃ saccaṃ bhaṇantassa, musā ca bhaṇato garuṃ.
च.
Ca.
पविसन्तो च आरामं, आपज्जति न निक्खमं।
Pavisanto ca ārāmaṃ, āpajjati na nikkhamaṃ;
निक्खमन्तोव आपत्ति, न चेव पविसं पन।
Nikkhamantova āpatti, na ceva pavisaṃ pana;
छ.
Cha.
समादियन्तो असमादियन्तो।
Samādiyanto asamādiyanto;
अनादियन्तोपि च आदियन्तो।
Anādiyantopi ca ādiyanto;
देन्तो अदेन्तोपि सिया सदोसो।
Dento adentopi siyā sadoso;
तथा करोन्तोपि च नो करोन्तो॥
Tathā karontopi ca no karonto.
ज.
Ja.
आपज्जति च धारेन्तो, अधारेन्तो तथेव च।
Āpajjati ca dhārento, adhārento tatheva ca;
द्विन्नं माता पिता साव, कथं होति? भणाहि मे॥
Dvinnaṃ mātā pitā sāva, kathaṃ hoti? Bhaṇāhi me.
झ.
Jha.
उभतोब्यञ्जना इत्थी, गब्भं गण्हाति अत्तना।
Ubhatobyañjanā itthī, gabbhaṃ gaṇhāti attanā;
गण्हापेति परं गब्भं, तस्मा मातापिता च सा॥
Gaṇhāpeti paraṃ gabbhaṃ, tasmā mātāpitā ca sā.
ञ.
Ña.
गामे वा यदि वारञ्ञे, यं परेसं ममायितं।
Gāme vā yadi vāraññe, yaṃ paresaṃ mamāyitaṃ;
न हरन्तोव तं थेय्या, कथं पाराजिको भवे।
Na harantova taṃ theyyā, kathaṃ pārājiko bhave;
ट.
Ṭa.
थेय्यसंवासको एसो, लिङ्गसंवासथेनको।
Theyyasaṃvāsako eso, liṅgasaṃvāsathenako;
परभण्डं अगण्हन्तो, तेन होति पराजितो॥
Parabhaṇḍaṃ agaṇhanto, tena hoti parājito.
ठ.
Ṭha.
नारिं रूपवतिं भिक्खु, रत्तचित्तो असञ्ञतो।
Nāriṃ rūpavatiṃ bhikkhu, rattacitto asaññato;
मेथुनं ताय कत्वापि, न सो पाराजिको कथं।
Methunaṃ tāya katvāpi, na so pārājiko kathaṃ;
ड.
Ḍa.
अच्छरासदिसं नारिं, सुपिनन्तेन पस्सति।
Accharāsadisaṃ nāriṃ, supinantena passati;
ताय मेथुनसंयोगे, कतेपि न भविस्सति॥
Tāya methunasaṃyoge, katepi na bhavissati.
ढ.
Ḍha.
बहिद्धा गेहतो भिक्खु, इत्थी गब्भन्तरं गता।
Bahiddhā gehato bhikkhu, itthī gabbhantaraṃ gatā;
छिद्दं गेहस्स नेवत्थि, कथं मेथुनतो चुतो।
Chiddaṃ gehassa nevatthi, kathaṃ methunato cuto;
ण.
Ṇa.
अन्तोदुस्सकुटिट्ठेन, मातुगामेन मेथुनं।
Antodussakuṭiṭṭhena, mātugāmena methunaṃ;
सन्थतादिवसेनेव, कत्वा होति पराजितो॥
Santhatādivaseneva, katvā hoti parājito.
त.
Ta.
सुत्ते च विनयेयेव, खन्धके सानुलोमिके।
Sutte ca vinayeyeva, khandhake sānulomike;
सब्बत्थ निपुणा धीरा, इमे पञ्हे भणन्ति ते॥
Sabbattha nipuṇā dhīrā, ime pañhe bhaṇanti te.
थ.
Tha.
खन्धके परिवारे च, विनये सानुलोमिके।
Khandhake parivāre ca, vinaye sānulomike;
आदरो करणीयोव, पटुभावं पनिच्छिता॥
Ādaro karaṇīyova, paṭubhāvaṃ panicchitā.
सेदमोचनकथा।
Sedamocanakathā.
