3. Sayanadāyakattheraapadānaṃ

20.

‘‘Padumuttarabuddhassa, sabbalokānukampino;

Sayanaṃ tassa pādāsiṃ, vippasannena cetasā.

21.

‘‘Tena sayanadānena, sukhette bījasampadā;

Bhogā nibbattare tassa, sayanassa idaṃ phalaṃ.

22.

‘‘Ākāse seyyaṃ kappemi, dhāremi pathaviṃ imaṃ;

Pāṇesu me issariyaṃ, sayanassa idaṃ phalaṃ.

23.

‘‘Pañcakappasahassamhi, aṭṭha āsuṃ mahātejā ²;

Catuttiṃse kappasate, caturo ca mahabbalā.

24.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sayanadāyako thero imā gāthāyo abhāsitthāti.

Sayanadāyakattherassāpadānaṃ tatiyaṃ.