| Library / Tipiṭaka / তিপিটক • Tipiṭaka / জাতকপাল়ি • Jātakapāḷi |
৪০২. সত্তুভস্তজাতকং (৭-১-৭)
402. Sattubhastajātakaṃ (7-1-7)
৪৬.
46.
ৰিব্ভন্তচিত্তো কুপিতিন্দ্রিযোসি, নেত্তেহি তে ৰারিগণা সৰন্তি।
Vibbhantacitto kupitindriyosi, nettehi te vārigaṇā savanti;
কিং তে নট্ঠং কিং পন পত্থযানো, ইধাগমা ব্রহ্মে তদিঙ্ঘ 1 ব্রূহি॥
Kiṃ te naṭṭhaṃ kiṃ pana patthayāno, idhāgamā brahme tadiṅgha 2 brūhi.
৪৭.
47.
মিয্যেথ ভরিযা ৰজতো মমজ্জ, অগচ্ছতো মরণমাহ যক্খো।
Miyyetha bhariyā vajato mamajja, agacchato maraṇamāha yakkho;
এতেন দুক্খেন পৰেধিতোস্মি, অক্খাহি মে সেনক এতমত্থং॥
Etena dukkhena pavedhitosmi, akkhāhi me senaka etamatthaṃ.
৪৮.
48.
বহূনি ঠানানি ৰিচিন্তযিত্ৰা, যমেত্থ ৰক্খামি তদেৰ সচ্চং।
Bahūni ṭhānāni vicintayitvā, yamettha vakkhāmi tadeva saccaṃ;
মঞ্ঞামি তে ব্রাহ্মণ সত্তুভস্তং, অজানতো কণ্হসপ্পো পৰিট্ঠো॥
Maññāmi te brāhmaṇa sattubhastaṃ, ajānato kaṇhasappo paviṭṭho.
৪৯.
49.
আদায দণ্ডং পরিসুম্ভ ভস্তং, পস্সেল়মূগং উরগং দুজিৰ্হং 3।
Ādāya daṇḍaṃ parisumbha bhastaṃ, passeḷamūgaṃ uragaṃ dujivhaṃ 4;
ছিন্দজ্জ কঙ্খং ৰিচিকিচ্ছিতানি, ভুজঙ্গমং পস্স পমুঞ্চ ভস্তং॥
Chindajja kaṅkhaṃ vicikicchitāni, bhujaṅgamaṃ passa pamuñca bhastaṃ.
৫০.
50.
সংৰিগ্গরূপো পরিসায মজ্ঝে, সো ব্রাহ্মণো সত্তুভস্তং পমুঞ্চি।
Saṃviggarūpo parisāya majjhe, so brāhmaṇo sattubhastaṃ pamuñci;
অথ নিক্খমি উরগো উগ্গতেজো, আসীৰিসো সপ্পো ফণং করিত্ৰা॥
Atha nikkhami urago uggatejo, āsīviso sappo phaṇaṃ karitvā.
৫১.
51.
সুলদ্ধলাভা জনকস্স রঞ্ঞো, যো পস্সতী সেনকং সাধুপঞ্ঞং।
Suladdhalābhā janakassa rañño, yo passatī senakaṃ sādhupaññaṃ;
ৰিৰট্টছদ্দো 5 নুসি সব্বদস্সী, ঞাণং নু তে ব্রাহ্মণ ভিংসরূপং॥
Vivaṭṭachaddo 6 nusi sabbadassī, ñāṇaṃ nu te brāhmaṇa bhiṃsarūpaṃ.
৫২.
52.
ইমানি মে সত্তসতানি অত্থি, গণ্হাহি সব্বানি দদামি তুয্হং।
Imāni me sattasatāni atthi, gaṇhāhi sabbāni dadāmi tuyhaṃ;
তযা হি মে জীৰিতমজ্জ লদ্ধং, অথোপি ভরিযায মকাসি সোত্থিং॥
Tayā hi me jīvitamajja laddhaṃ, athopi bhariyāya makāsi sotthiṃ.
৫৩.
53.
ন পণ্ডিতা ৰেতনমাদিযন্তি, চিত্রাহি গাথাহি সুভাসিতাহি।
Na paṇḍitā vetanamādiyanti, citrāhi gāthāhi subhāsitāhi;
ইতোপি তে ব্রহ্মে দদন্তু ৰিত্তং, আদায ত্ৰং গচ্ছ সকং নিকেতন্তি॥
Itopi te brahme dadantu vittaṃ, ādāya tvaṃ gaccha sakaṃ niketanti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / জাতক-অট্ঠকথা • Jātaka-aṭṭhakathā / [৪০২] ৭. সত্তুভস্তজাতকৰণ্ণনা • [402] 7. Sattubhastajātakavaṇṇanā
