| Library / Tipiṭaka / ติปิฎก • Tipiṭaka / เปตวตฺถุปาฬิ • Petavatthupāḷi |
๗. สตฺตปุตฺตขาทเปติวตฺถุ
7. Sattaputtakhādapetivatthu
๓๕.
35.
‘‘นคฺคา ทุพฺพณฺณรูปาสิ, ทุคฺคนฺธา ปูติ วายสิ;
‘‘Naggā dubbaṇṇarūpāsi, duggandhā pūti vāyasi;
มกฺขิกาหิ ปริกิณฺณา, กา นุ ตฺวํ อิธ ติฎฺฐสี’’ติฯ
Makkhikāhi parikiṇṇā, kā nu tvaṃ idha tiṭṭhasī’’ti.
๓๖.
36.
‘‘อหํ ภทเนฺต เปตีมฺหิ, ทุคฺคตา ยมโลกิกา;
‘‘Ahaṃ bhadante petīmhi, duggatā yamalokikā;
ปาปกมฺมํ กริตฺวาน, เปตโลกํ อิโต คตาฯ
Pāpakammaṃ karitvāna, petalokaṃ ito gatā.
๓๗.
37.
‘‘กาเลน สตฺต ปุตฺตานิ, สายํ สตฺต ปุนาปเร;
‘‘Kālena satta puttāni, sāyaṃ satta punāpare;
วิชายิตฺวาน ขาทามิ, เตปิ นา โหนฺติ เม อลํฯ
Vijāyitvāna khādāmi, tepi nā honti me alaṃ.
๓๘.
38.
‘‘ปริฑยฺหติ ธูมายติ, ขุทาย หทยํ มม;
‘‘Pariḍayhati dhūmāyati, khudāya hadayaṃ mama;
นิพฺพุติํ นาธิคจฺฉามิ, อคฺคิทฑฺฒาว อาตเป’’ติฯ
Nibbutiṃ nādhigacchāmi, aggidaḍḍhāva ātape’’ti.
๓๙.
39.
‘‘กิํ นุ กาเยน วาจาย, มนสา ทุกฺกฎํ กตํ;
‘‘Kiṃ nu kāyena vācāya, manasā dukkaṭaṃ kataṃ;
กิสฺส กมฺมวิปาเกน, ปุตฺตมํสานิ ขาทสี’’ติฯ
Kissa kammavipākena, puttamaṃsāni khādasī’’ti.
๔๐.
40.
‘‘อหู มยฺหํ ทุเว ปุตฺตา, อุโภ สมฺปตฺตโยพฺพนา;
‘‘Ahū mayhaṃ duve puttā, ubho sampattayobbanā;
สาหํ ปุตฺตพลูเปตา, สามิกํ อติมญฺญิสํฯ
Sāhaṃ puttabalūpetā, sāmikaṃ atimaññisaṃ.
๔๑.
41.
‘‘ตโต เม สามิโก กุโทฺธ, สปตฺติํ มยฺหมานยิ;
‘‘Tato me sāmiko kuddho, sapattiṃ mayhamānayi;
สา จ คพฺภํ อลภิตฺถ, ตสฺสา ปาปํ อเจตยิํฯ
Sā ca gabbhaṃ alabhittha, tassā pāpaṃ acetayiṃ.
๔๒.
42.
‘‘สาหํ ปทุฎฺฐมนสา, อกริํ คพฺภปาตนํ;
‘‘Sāhaṃ paduṭṭhamanasā, akariṃ gabbhapātanaṃ;
๔๓.
43.
‘‘ตทสฺสา มาตา กุปิตา, มยฺหํ ญาตี สมานยิ;
‘‘Tadassā mātā kupitā, mayhaṃ ñātī samānayi;
สปถญฺจ มํ กาเรสิ, ปริภาสาปยี จ มํฯ
Sapathañca maṃ kāresi, paribhāsāpayī ca maṃ.
๔๔.
44.
‘‘สาหํ โฆรญฺจ สปถํ, มุสาวาทํ อภาสิสํ;
‘‘Sāhaṃ ghorañca sapathaṃ, musāvādaṃ abhāsisaṃ;
‘ปุตฺตมํสานิ ขาทามิ, สเจ ตํ ปกตํ มยา’ฯ
‘Puttamaṃsāni khādāmi, sace taṃ pakataṃ mayā’.
๔๕.
45.
‘‘ตสฺส กมฺมสฺส วิปาเกน, มุสาวาทสฺส จูภยํ;
‘‘Tassa kammassa vipākena, musāvādassa cūbhayaṃ;
ปุตฺตมํสานิ ขาทามิ, ปุพฺพโลหิตมกฺขิตา’’ติฯ
Puttamaṃsāni khādāmi, pubbalohitamakkhitā’’ti.
สตฺตปุตฺตขาทเปติวตฺถุ สตฺตมํฯ
Sattaputtakhādapetivatthu sattamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เปตวตฺถุ-อฎฺฐกถา • Petavatthu-aṭṭhakathā / ๗. สตฺตปุตฺตขาทกเปติวตฺถุวณฺณนา • 7. Sattaputtakhādakapetivatthuvaṇṇanā
