| Library / Tipiṭaka / ติปิฎก • Tipiṭaka / เปตวตฺถุปาฬิ • Petavatthupāḷi |
๘. โคณเปตวตฺถุ
8. Goṇapetavatthu
๔๖.
46.
‘‘กิํ นุ อุมฺมตฺตรูโปว, ลายิตฺวา หริตํ ติณํ;
‘‘Kiṃ nu ummattarūpova, lāyitvā haritaṃ tiṇaṃ;
ขาท ขาทาติ ลปสิ, คตสตฺตํ ชรคฺควํฯ
Khāda khādāti lapasi, gatasattaṃ jaraggavaṃ.
๔๗.
47.
‘‘น หิ อเนฺนน ปาเนน, มโต โคโณ สมุฎฺฐเห;
‘‘Na hi annena pānena, mato goṇo samuṭṭhahe;
ตฺวํสิ พาโล จ 1 ทุเมฺมโธ, ยถา ตโญฺญว ทุมฺมตี’’ติฯ
Tvaṃsi bālo ca 2 dummedho, yathā taññova dummatī’’ti.
๔๘.
48.
‘‘อิเม ปาทา อิทํ สีสํ, อยํ กาโย สวาลธิ;
‘‘Ime pādā idaṃ sīsaṃ, ayaṃ kāyo savāladhi;
เนตฺตา ตเถว ติฎฺฐนฺติ, อยํ โคโณ สมุฎฺฐเหฯ
Nettā tatheva tiṭṭhanti, ayaṃ goṇo samuṭṭhahe.
๔๙.
49.
‘‘นายฺยกสฺส หตฺถปาทา, กาโย สีสญฺจ ทิสฺสติ;
‘‘Nāyyakassa hatthapādā, kāyo sīsañca dissati;
รุทํ มตฺติกถูปสฺมิํ, นนุ ตฺวเญฺญว ทุมฺมตี’’ติฯ
Rudaṃ mattikathūpasmiṃ, nanu tvaññeva dummatī’’ti.
๕๐.
50.
‘‘อาทิตฺตํ วต มํ สนฺตํ, ฆตสิตฺตํว ปาวกํ;
‘‘Ādittaṃ vata maṃ santaṃ, ghatasittaṃva pāvakaṃ;
วารินา วิย โอสิญฺจํ, สพฺพํ นิพฺพาปเย ทรํฯ
Vārinā viya osiñcaṃ, sabbaṃ nibbāpaye daraṃ.
๕๑.
51.
โย เม โสกปเรตสฺส, ปิตุโสกํ อปานุทิฯ
Yo me sokaparetassa, pitusokaṃ apānudi.
๕๒.
52.
‘‘สฺวาหํ อพฺพูฬฺหสโลฺลสฺมิ, สีติภูโตสฺมิ นิพฺพุโต;
‘‘Svāhaṃ abbūḷhasallosmi, sītibhūtosmi nibbuto;
น โสจามิ น โรทามิ, ตว สุตฺวาน มาณว’ฯ
Na socāmi na rodāmi, tava sutvāna māṇava’.
๕๓.
53.
เอวํ กโรนฺติ สปฺปญฺญา, เย โหนฺติ อนุกมฺปกา;
Evaṃ karonti sappaññā, ye honti anukampakā;
วินิวตฺตยนฺติ โสกมฺหา, สุชาโต ปิตรํ ยถาติฯ
Vinivattayanti sokamhā, sujāto pitaraṃ yathāti.
โคณเปตวตฺถุ อฎฺฐมํฯ
Goṇapetavatthu aṭṭhamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เปตวตฺถุ-อฎฺฐกถา • Petavatthu-aṭṭhakathā / ๘. โคณเปตวตฺถุวณฺณนา • 8. Goṇapetavatthuvaṇṇanā
