| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
១១១. សត្តន្នំ អប្បហិតេបិ អនុជាននា
111. Sattannaṃ appahitepi anujānanā
១៩៨. តេន ខោ បន សមយេន អញ្ញតរស្ស ភិក្ខុនោ មាតា គិលានា ហោតិ។ សា បុត្តស្ស សន្តិកេ ទូតំ បាហេសិ – ‘‘អហញ្ហិ គិលានា, អាគច្ឆតុ មេ បុត្តោ, ឥច្ឆាមិ បុត្តស្ស អាគត’’ន្តិ។ អថ ខោ តស្ស ភិក្ខុនោ ឯតទហោសិ – ‘‘ភគវតា បញ្ញត្តំ សត្តន្នំ សត្តាហករណីយេន បហិតេ គន្តុំ, ន ត្វេវ អប្បហិតេ; បញ្ចន្នំ សត្តាហករណីយេន អប្បហិតេបិ គន្តុំ, បគេវ បហិតេតិ។ អយញ្ច មេ មាតា គិលានា, សា ច អនុបាសិកា, កថំ នុ ខោ មយា បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, សត្តន្នំ សត្តាហករណីយេន អប្បហិតេបិ គន្តុំ, បគេវ បហិតេ។ ភិក្ខុស្ស, ភិក្ខុនិយា, សិក្ខមានាយ, សាមណេរស្ស, សាមណេរិយា, មាតុយា ច បិតុស្ស ច – អនុជានាមិ, ភិក្ខវេ, ឥមេសំ សត្តន្នំ សត្តាហករណីយេន អប្បហិតេបិ គន្តុំ, បគេវ បហិតេ។ សត្តាហំ សន្និវត្តោ កាតព្ពោ។
198. Tena kho pana samayena aññatarassa bhikkhuno mātā gilānā hoti. Sā puttassa santike dūtaṃ pāhesi – ‘‘ahañhi gilānā, āgacchatu me putto, icchāmi puttassa āgata’’nti. Atha kho tassa bhikkhuno etadahosi – ‘‘bhagavatā paññattaṃ sattannaṃ sattāhakaraṇīyena pahite gantuṃ, na tveva appahite; pañcannaṃ sattāhakaraṇīyena appahitepi gantuṃ, pageva pahiteti. Ayañca me mātā gilānā, sā ca anupāsikā, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, sattannaṃ sattāhakaraṇīyena appahitepi gantuṃ, pageva pahite. Bhikkhussa, bhikkhuniyā, sikkhamānāya, sāmaṇerassa, sāmaṇeriyā, mātuyā ca pitussa ca – anujānāmi, bhikkhave, imesaṃ sattannaṃ sattāhakaraṇīyena appahitepi gantuṃ, pageva pahite. Sattāhaṃ sannivatto kātabbo.
ឥធ បន, ភិក្ខវេ, ភិក្ខុស្ស មាតា គិលានា ហោតិ។ សា ចេ បុត្តស្ស សន្តិកេ ទូតំ បហិណេយ្យ – ‘‘អហញ្ហិ គិលានា, អាគច្ឆតុ មេ បុត្តោ, ឥច្ឆាមិ បុត្តស្ស អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘គិលានភត្តំ វា បរិយេសិស្សាមិ, គិលានុបដ្ឋាកភត្តំ វា បរិយេសិស្សាមិ, គិលានភេសជ្ជំ វា បរិយេសិស្សាមិ, បុច្ឆិស្សាមិ វា, ឧបដ្ឋហិស្សាមិ វា’’តិ។ សត្តាហំ សន្និវត្តោ កាតព្ពោ។
Idha pana, bhikkhave, bhikkhussa mātā gilānā hoti. Sā ce puttassa santike dūtaṃ pahiṇeyya – ‘‘ahañhi gilānā, āgacchatu me putto, icchāmi puttassa āgata’’nti, gantabbaṃ, bhikkhave, sattāhakaraṇīyena, appahitepi, pageva pahite – ‘‘gilānabhattaṃ vā pariyesissāmi, gilānupaṭṭhākabhattaṃ vā pariyesissāmi, gilānabhesajjaṃ vā pariyesissāmi, pucchissāmi vā, upaṭṭhahissāmi vā’’ti. Sattāhaṃ sannivatto kātabbo.
ឥធ បន, ភិក្ខវេ, ភិក្ខុស្ស បិតា គិលានោ ហោតិ។ សោ ចេ បុត្តស្ស សន្តិកេ ទូតំ បហិណេយ្យ – ‘‘អហញ្ហិ គិលានោ, អាគច្ឆតុ មេ បុត្តោ, ឥច្ឆាមិ បុត្តស្ស អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘គិលានភត្តំ វា បរិយេសិស្សាមិ, គិលានុបដ្ឋាកភត្តំ វា បរិយេសិស្សាមិ, គិលានភេសជ្ជំ វា បរិយេសិស្សាមិ, បុច្ឆិស្សាមិ វា, ឧបដ្ឋហិស្សាមិ វា’’តិ។ សត្តាហំ សន្និវត្តោ កាតព្ពោ។
Idha pana, bhikkhave, bhikkhussa pitā gilāno hoti. So ce puttassa santike dūtaṃ pahiṇeyya – ‘‘ahañhi gilāno, āgacchatu me putto, icchāmi puttassa āgata’’nti, gantabbaṃ, bhikkhave, sattāhakaraṇīyena, appahitepi, pageva pahite – ‘‘gilānabhattaṃ vā pariyesissāmi, gilānupaṭṭhākabhattaṃ vā pariyesissāmi, gilānabhesajjaṃ vā pariyesissāmi, pucchissāmi vā, upaṭṭhahissāmi vā’’ti. Sattāhaṃ sannivatto kātabbo.
សត្តន្នំ អប្បហិតេបិ អនុជាននា និដ្ឋិតា។
Sattannaṃ appahitepi anujānanā niṭṭhitā.
