| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂. ဒုတိယဝဂ္ဂော
2. Dutiyavaggo
၁. သတ္တဇဋိလသုတ္တဝဏ္ဏနာ
1. Sattajaṭilasuttavaṇṇanā
၁၂၂. ပုဗ္ဗာရာမသင္ခာတေတိ သာဝတ္ထိနဂရသ္သ ပုဗ္ဗဒိသာယ ကတတ္တာ ပုဗ္ဗာရာမေတိ သင္ခံ ဂတေ။ တတ္ရာတိ ‘‘မိဂာရမာတုယာ ပာသာဒေ’’တိ တသ္မိံ သံခိတ္တဝစနေ။ အယံ ဣဒာနိ ဝုစ္စမာနာ အနုပုဗ္ဗိကထာ အာဒိတော ပဋ္ဌာယ အနုက္ကမကထာ။ ပတ္ထနံ အကာသိ တသ္သ ဘဂဝတော အဂ္ဂုပဋ္ဌာယိကံ ဧကံ ဥပာသိကံ ဒိသ္ဝာ တံ ဌာနန္တရံ အာကင္ခန္တီ။ မေဏ္ဍကပုတ္တသ္သာတိ မေဏ္ဍကသေဋ္ဌိပုတ္တသ္သ။ မာတိဋ္ဌာနေ ဌပေသိ တသ္သာ ဥပကာရံ ဂရုဘာဝဉ္စ ဒိသ္ဝာ။ တာယ ကာရိတေ ပာသာဒေတိ တာယ မဟာဥပာသိကာယ မဟာလတာပသာဓနံ ဝိသ္သဇ္ဇေတ္ဝာ နဝဟိ ကောဋီဟိ ကရီသမတ္တေ ဘူမိဘာဂေ ကာရိတေ သဟသ္သဂဗ္ဘပဋိမဏ္ဍိတေ ပာသာဒေ။
122.Pubbārāmasaṅkhāteti sāvatthinagarassa pubbadisāya katattā pubbārāmeti saṅkhaṃ gate. Tatrāti ‘‘migāramātuyā pāsāde’’ti tasmiṃ saṃkhittavacane. Ayaṃ idāni vuccamānā anupubbikathā ādito paṭṭhāya anukkamakathā. Patthanaṃ akāsi tassa bhagavato aggupaṭṭhāyikaṃ ekaṃ upāsikaṃ disvā taṃ ṭhānantaraṃ ākaṅkhantī. Meṇḍakaputtassāti meṇḍakaseṭṭhiputtassa. Mātiṭṭhāneṭhapesi tassā upakāraṃ garubhāvañca disvā. Tāya kārite pāsādeti tāya mahāupāsikāya mahālatāpasādhanaṃ vissajjetvā navahi koṭīhi karīsamatte bhūmibhāge kārite sahassagabbhapaṭimaṇḍite pāsāde.
ပရူဠ္ဟကစ္ဆာတိ ပရူဠ္ဟကစ္ဆလောမာ။ ကမဏ္ဍလုဃဋိကာဒိံ ပဗ္ဗဇိတပရိက္ခာရံ။ နဂ္ဂဘောဂ္ဂနိသ္သိရိကာနန္တိ နဂ္ဂာနဉ္စေဝ ဘောဂ္ဂာနဉ္စ နိသ္သိရိကာနဉ္စ။ တေ ဟိ အနိဝတ္ထဝတ္ထတာယ နဂ္ဂာ စေဝ, အစေလကဝတာဒိနာ ဘောဂ္ဂသရီရတာယ ဘောဂ္ဂာ, သောဘာရဟိတတာယ နိသ္သိရိကာ စ။ အတ္တနာ ဒိဋ္ဌသုတံ ပဋိစ္ဆာဒေတ္ဝာ န ကထေယ္ယုန္တိ အကာရဏမေတံ တေသံ ရညာ ပယုတ္တစရပုရိသဘာဝတော။ ဧဝံ ကတေ ပန တေ ‘‘အညေပိ ပဗ္ဗဇိတာ အတ္ထီတိ အယံ ဇာနာတီ’’တိ မညေယ္ယုန္တိ ကောဟညစိတ္တော ဧဝံ အကာသီတိ သက္ကာ ဝိညာတုံ။ တထာ ဟိ တေနတ္ထေန အပရိတောသမာနော ‘‘အပိစာ’’တိအာဒိမာဟ။
Parūḷhakacchāti parūḷhakacchalomā. Kamaṇḍalughaṭikādiṃ pabbajitaparikkhāraṃ. Naggabhogganissirikānanti naggānañceva bhoggānañca nissirikānañca. Te hi anivatthavatthatāya naggā ceva, acelakavatādinā bhoggasarīratāya bhoggā, sobhārahitatāya nissirikā ca. Attanā diṭṭhasutaṃpaṭicchādetvā na katheyyunti akāraṇametaṃ tesaṃ raññā payuttacarapurisabhāvato. Evaṃ kate pana te ‘‘aññepi pabbajitā atthīti ayaṃ jānātī’’ti maññeyyunti kohaññacitto evaṃ akāsīti sakkā viññātuṃ. Tathā hi tenatthena aparitosamāno ‘‘apicā’’tiādimāha.
ကာသိကစန္ဒနန္တိ ဥဇ္ဇလစန္ဒနံ။ တံ ကိရ ဝဏ္ဏဝသေန သမုဇ္ဇလံ ဟောတိ ပဘသ္သရံ, တဒတ္ထမေဝ နံ သဏ္ဟတရံ ကရောန္တိ။ တေနာဟ ‘‘ကာသိကစန္ဒနန္တိ သဏ္ဟစန္ဒန’’န္တိ။ ဝဏ္ဏဂန္ဓတ္ထာယာတိ ဝဏ္ဏသောဘတ္ထဉ္စေဝ သုဂန္ဓဘာဝတ္ထဉ္စ။ ဝဏ္ဏဂန္ဓတ္ထာယာတိ ဆဝိရာဂကရဏတ္ထဉ္စေဝ သုဂန္ဓတ္ထာယ စ။ ‘‘ဂိဟိနာ’’တိအာဒီဟိ ပဒေဟိ ဧဝံ ပမာဒဝိဟာရိနာ တယာ အရဟန္တော ဒုဝိညေယ္ယာတိ ဒသ္သေတိ။
Kāsikacandananti ujjalacandanaṃ. Taṃ kira vaṇṇavasena samujjalaṃ hoti pabhassaraṃ, tadatthameva naṃ saṇhataraṃ karonti. Tenāha ‘‘kāsikacandananti saṇhacandana’’nti. Vaṇṇagandhatthāyāti vaṇṇasobhatthañceva sugandhabhāvatthañca. Vaṇṇagandhatthāyāti chavirāgakaraṇatthañceva sugandhatthāya ca. ‘‘Gihinā’’tiādīhi padehi evaṃ pamādavihārinā tayā arahanto duviññeyyāti dasseti.
သံဝာသော နာမ ဣဓ ကာလေန ဥပသင္ကမနန္တိ ဒသ္သေန္တော ‘‘ဥပသင္ကမန္တေနာ’’တိ အာဟ။ ကာယဝာစာဟိ အသံယတေနပိ သံယတာကာရော, အသံဝုတိန္ဒ္ရိယေနပိ သံဝုတိန္ဒ္ရိယာကာရော။ ပရိဂ္ဂဟေသ္သာမီတိ ဝီမံသိသ္သာမိ ‘‘ပရိသုဒ္ဓံ နု ခော, နော’’တိ။ သပ္ပညေနာတိ သီလပရိဂ္ဂဏ္ဟနပညာယ သပ္ပညေန။ ဇာနိတုံ န သက္ကောတိ သဘာဝသ္သ သတော သီလသ္သ အနုပဓာရဏတော။
Saṃvāso nāma idha kālena upasaṅkamananti dassento ‘‘upasaṅkamantenā’’ti āha. Kāyavācāhi asaṃyatenapi saṃyatākāro, asaṃvutindriyenapi saṃvutindriyākāro. Pariggahessāmīti vīmaṃsissāmi ‘‘parisuddhaṃ nu kho, no’’ti. Sappaññenāti sīlapariggaṇhanapaññāya sappaññena. Jānituṃ na sakkoti sabhāvassa sato sīlassa anupadhāraṇato.
ကထနေနာတိ အပရာပရံ ကထနေန။ တထာ ဟိ ဝက္ခတိ ‘‘ဧကစ္စသ္သ ဟီ’’တိအာဒိ။ အရိယဝောဟာရောတိ ဒိဋ္ဌာဒိလက္ခဏေန ဝောဟရိတော ‘‘ဒိဋ္ဌံ အဒိဋ္ဌ’’န္တိအာဒိနာ ပဝုတ္တသဒ္ဒဝောဟာရော။ တသ္သ ပန ကာရဏမေဝ ဂဏ္ဟန္တော ‘‘ဧတ္ထ စေတနာ’’တိ အာဟ။ ဧသ နယော အနရိယဝောဟာရေပိ။ ပရမတ္ထတော ဟိ သစ္စဝာစာဒယော မုသာဝာဒာဒယော စေတနာလက္ခဏာတိ။ ပညတ္တိဝောဟာရော တထာ တထာ ဝောဟရိတဗ္ဗတော ဧဝမာဟ ‘‘သံဝောဟာရေန ခော, မဟာရာဇ, သောစေယ္ယံ ဝေဒိတဗ္ဗ’’န္တိ။
Kathanenāti aparāparaṃ kathanena. Tathā hi vakkhati ‘‘ekaccassa hī’’tiādi. Ariyavohāroti diṭṭhādilakkhaṇena voharito ‘‘diṭṭhaṃ adiṭṭha’’ntiādinā pavuttasaddavohāro. Tassa pana kāraṇameva gaṇhanto ‘‘ettha cetanā’’ti āha. Esa nayo anariyavohārepi. Paramatthato hi saccavācādayo musāvādādayo cetanālakkhaṇāti. Paññattivohāro tathā tathā voharitabbato evamāha ‘‘saṃvohārena kho, mahārāja, soceyyaṃ veditabba’’nti.
ဉာဏထာမောတိ ဉာဏဂုဏဗလံ, ယေန ဌာနုပ္ပတ္တိကပဋိဘာနာဒိနာ အစ္စာယိကကိစ္စကရဏီယာနိ နိဋ္ဌာပေတိ။ သံကထာယာတိ အတ္ထဝီမံသနဝသေန ပဝတ္တာယ သမ္မာကထာယ။ ဥပ္ပိလဝတိ လဟုကဘာဝတော။ ဟေဋ္ဌာစရကာတိ အဝစရကာ။ ယေ အနုပဝိသိတ္ဝာ ပရေသံ ရဟသ္သဝီမံသနဝသေန ပဝတ္တာ, တေသု ဩစရကဝောဟာရောတိ ဝုတ္တံ ‘‘စရာ ဟီ’’တိအာဒိ။
Ñāṇathāmoti ñāṇaguṇabalaṃ, yena ṭhānuppattikapaṭibhānādinā accāyikakiccakaraṇīyāni niṭṭhāpeti. Saṃkathāyāti atthavīmaṃsanavasena pavattāya sammākathāya. Uppilavati lahukabhāvato. Heṭṭhācarakāti avacarakā. Ye anupavisitvā paresaṃ rahassavīmaṃsanavasena pavattā, tesu ocarakavohāroti vuttaṃ ‘‘carā hī’’tiādi.
ဝဏ္ဏသဏ္ဌာနေနာတိ ဝဏ္ဏေန ဝာ သဏ္ဌာနေန ဝာ ဝဏ္ဏပောက္ခရတာယ ဝာ သဏ္ဌာနသမ္ပတ္တိယာ ဝာ။ သုဇာနော ပေသလော ဝိသ္သသေတိ ယောဇနာ။ လဟုကဒသ္သနေနာတိ ပရိတ္တဒသ္သနေန ဝိဇ္ဇုကေန ဝိယ။ ပရိက္ခာရဘဏ္ဍကေနာတိ ပဗ္ဗဇိတပရိက္ခာရဘူတေန ဘဏ္ဍကေန။ လောဟဍ္ဎမာသောတိ လောဟမယော ဥပဍ္ဎဂ္ဃနကမာသော။
Vaṇṇasaṇṭhānenāti vaṇṇena vā saṇṭhānena vā vaṇṇapokkharatāya vā saṇṭhānasampattiyā vā. Sujāno pesalo vissaseti yojanā. Lahukadassanenāti parittadassanena vijjukena viya. Parikkhārabhaṇḍakenāti pabbajitaparikkhārabhūtena bhaṇḍakena. Lohaḍḍhamāsoti lohamayo upaḍḍhagghanakamāso.
သတ္တဇဋိလသုတ္တဝဏ္ဏနာ နိဋ္ဌိတာ။
Sattajaṭilasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. သတ္တဇဋိလသုတ္တံ • 1. Sattajaṭilasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. သတ္တဇဋိလသုတ္တဝဏ္ဏနာ • 1. Sattajaṭilasuttavaṇṇanā
