6. Saparivārāsanattheraapadānaṃ

43.

‘‘Padumuttarabuddhassa, piṇḍapātaṃ adāsahaṃ;

Gantvā kiliṭṭhakaṃ ṭhānaṃ ³, mallikāhi parikkhitaṃ ⁴.

44.

‘‘Tamhāsanamhi āsīno, buddho lokagganāyako;

Akittayi piṇḍapātaṃ, ujubhūto samāhito.

45.

‘‘Yathāpi bhaddake khette, bījaṃ appampi ropitaṃ;

Sammā dhāraṃ pavecchante, phalaṃ toseti kassakaṃ.

46.

‘‘Tathevāyaṃ piṇḍapāto, sukhette ropito tayā;

Bhave nibbattamānamhi, phalaṃ te ⁷ tosayissati ⁸.

47.

‘‘Idaṃ vatvāna sambuddho, jalajuttamanāmako;

Piṇḍapātaṃ gahetvāna, pakkāmi uttarāmukho.

48.

‘‘Saṃvuto pātimokkhasmiṃ, indriyesu ca pañcasu;

Pavivekamanuyutto, viharāmi anāsavo.

49.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā saparivārāsano thero imā gāthāyo abhāsitthāti.

Saparivārāsanattherassāpadānaṃ chaṭṭhaṃ.