| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
(೮) ೩. ಸನಿಮಿತ್ತವಗ್ಗವಣ್ಣನಾ
(8) 3. Sanimittavaggavaṇṇanā
೭೮-೭೯. ತತಿಯಸ್ಸ ಪಠಮೇ ನಿಮೀಯತಿ ಏತ್ಥ ಫಲಂ ಅವಸೇಸಪಚ್ಚಯೇಹಿ ಪಕ್ಖಿಪೀಯತಿ ವಿಯಾತಿ ನಿಮಿತ್ತಂ, ಕಾರಣನ್ತಿ ಆಹ ‘‘ಸನಿಮಿತ್ತಾತಿ ಸಕಾರಣಾ’’ತಿ। ದುತಿಯಾದೀಸೂತಿ ದುತಿಯಸುತ್ತಾದೀಸು। ಏಸೇವ ನಯೋತಿ ಇಮಿನಾ ನಿದಾನಾದಿಪದಾನಮ್ಪಿ ಕಾರಣಪರಿಯಾಯಮೇವ ದೀಪೇತಿ। ನಿದದಾತಿ ಫಲನ್ತಿ ನಿದಾನಂ, ಹಿನೋತಿ ಫಲಂ ಪತಿಟ್ಠಾತಿ ಏತೇನಾತಿ ಹೇತು, ಸಙ್ಖರೋತಿ ಫಲನ್ತಿ ಸಙ್ಖಾರೋ, ಪಟಿಚ್ಚ ಏತಸ್ಮಾ ಫಲಂ ಏತೀತಿ ಪಚ್ಚಯೋ, ರುಪ್ಪತಿ ನಿರುಪ್ಪತಿ ಫಲಂ ಏತ್ಥಾತಿ ರೂಪನ್ತಿ ಏವಂ ನಿದಾನಾದಿಪದಾನಮ್ಪಿ ಹೇತುಪರಿಯಾಯತಾ ವೇದಿತಬ್ಬಾ।
78-79. Tatiyassa paṭhame nimīyati ettha phalaṃ avasesapaccayehi pakkhipīyati viyāti nimittaṃ, kāraṇanti āha ‘‘sanimittāti sakāraṇā’’ti. Dutiyādīsūti dutiyasuttādīsu. Eseva nayoti iminā nidānādipadānampi kāraṇapariyāyameva dīpeti. Nidadāti phalanti nidānaṃ, hinoti phalaṃ patiṭṭhāti etenāti hetu, saṅkharoti phalanti saṅkhāro, paṭicca etasmā phalaṃ etīti paccayo, ruppati niruppati phalaṃ etthāti rūpanti evaṃ nidānādipadānampi hetupariyāyatā veditabbā.
೮೪. ಸತ್ತಮೇ ಪಚ್ಚಯಭೂತಾಯಾತಿ ಸಹಜಾತಾದಿಪಚ್ಚಯಭೂತಾಯ।
84. Sattame paccayabhūtāyāti sahajātādipaccayabhūtāya.
೮೭. ದಸಮೇ ಸಮೇಚ್ಚ ಸಮ್ಭುಯ್ಯ ಪಚ್ಚಯೇಹಿ ಕತೋತಿ ಸಙ್ಖತೋ, ಸಙ್ಖತೋ ಧಮ್ಮೋ ಆರಮ್ಮಣಂ ಏತೇಸನ್ತಿ ಸಙ್ಖತಾರಮ್ಮಣಾ। ಮಗ್ಗಕ್ಖಣೇ ನ ಹೋನ್ತಿ ನಾಮ ಪಹೀಯನ್ತೀತಿ ಕತ್ವಾ। ನಾಹೇಸುನ್ತಿ ಏತ್ಥ ‘‘ವುಚ್ಚನ್ತೀ’’ತಿ ಅಜ್ಝಾಹರಿತಬ್ಬಂ। ಯಾವ ಅರಹತ್ತಾ ದೇಸನಾ ದೇಸಿತಾ ತಂತಂಸುತ್ತಪರಿಯೋಸಾನೇ ‘‘ನ ಹೋನ್ತೀ’’ತಿ ವುತ್ತತ್ತಾ।
87. Dasame samecca sambhuyya paccayehi katoti saṅkhato, saṅkhato dhammo ārammaṇaṃ etesanti saṅkhatārammaṇā. Maggakkhaṇe na honti nāma pahīyantīti katvā. Nāhesunti ettha ‘‘vuccantī’’ti ajjhāharitabbaṃ. Yāva arahattā desanā desitā taṃtaṃsuttapariyosāne ‘‘na hontī’’ti vuttattā.
ಸನಿಮಿತ್ತವಗ್ಗವಣ್ಣನಾ ನಿಟ್ಠಿತಾ।
Sanimittavaggavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / (೮) ೩. ಸನಿಮಿತ್ತವಗ್ಗೋ • (8) 3. Sanimittavaggo
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / (೮) ೩. ಸನಿಮಿತ್ತವಗ್ಗವಣ್ಣನಾ • (8) 3. Sanimittavaggavaṇṇanā
