| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
(៨) ៣. សនិមិត្តវគ្គវណ្ណនា
(8) 3. Sanimittavaggavaṇṇanā
៧៨-៧៩. តតិយស្ស បឋមេ និមីយតិ ឯត្ថ ផលំ អវសេសបច្ចយេហិ បក្ខិបីយតិ វិយាតិ និមិត្តំ, ការណន្តិ អាហ ‘‘សនិមិត្តាតិ សការណា’’តិ។ ទុតិយាទីសូតិ ទុតិយសុត្តាទីសុ។ ឯសេវ នយោតិ ឥមិនា និទានាទិបទានម្បិ ការណបរិយាយមេវ ទីបេតិ។ និទទាតិ ផលន្តិ និទានំ, ហិនោតិ ផលំ បតិដ្ឋាតិ ឯតេនាតិ ហេតុ, សង្ខរោតិ ផលន្តិ សង្ខារោ, បដិច្ច ឯតស្មា ផលំ ឯតីតិ បច្ចយោ, រុប្បតិ និរុប្បតិ ផលំ ឯត្ថាតិ រូបន្តិ ឯវំ និទានាទិបទានម្បិ ហេតុបរិយាយតា វេទិតព្ពា។
78-79. Tatiyassa paṭhame nimīyati ettha phalaṃ avasesapaccayehi pakkhipīyati viyāti nimittaṃ, kāraṇanti āha ‘‘sanimittāti sakāraṇā’’ti. Dutiyādīsūti dutiyasuttādīsu. Eseva nayoti iminā nidānādipadānampi kāraṇapariyāyameva dīpeti. Nidadāti phalanti nidānaṃ, hinoti phalaṃ patiṭṭhāti etenāti hetu, saṅkharoti phalanti saṅkhāro, paṭicca etasmā phalaṃ etīti paccayo, ruppati niruppati phalaṃ etthāti rūpanti evaṃ nidānādipadānampi hetupariyāyatā veditabbā.
៨៤. សត្តមេ បច្ចយភូតាយាតិ សហជាតាទិបច្ចយភូតាយ។
84. Sattame paccayabhūtāyāti sahajātādipaccayabhūtāya.
៨៧. ទសមេ សមេច្ច សម្ភុយ្យ បច្ចយេហិ កតោតិ សង្ខតោ, សង្ខតោ ធម្មោ អារម្មណំ ឯតេសន្តិ សង្ខតារម្មណា។ មគ្គក្ខណេ ន ហោន្តិ នាម បហីយន្តីតិ កត្វា។ នាហេសុន្តិ ឯត្ថ ‘‘វុច្ចន្តី’’តិ អជ្ឈាហរិតព្ពំ។ យាវ អរហត្តា ទេសនា ទេសិតា តំតំសុត្តបរិយោសានេ ‘‘ន ហោន្តី’’តិ វុត្តត្តា។
87. Dasame samecca sambhuyya paccayehi katoti saṅkhato, saṅkhato dhammo ārammaṇaṃ etesanti saṅkhatārammaṇā. Maggakkhaṇe na honti nāma pahīyantīti katvā. Nāhesunti ettha ‘‘vuccantī’’ti ajjhāharitabbaṃ. Yāva arahattā desanā desitā taṃtaṃsuttapariyosāne ‘‘na hontī’’ti vuttattā.
សនិមិត្តវគ្គវណ្ណនា និដ្ឋិតា។
Sanimittavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / (៨) ៣. សនិមិត្តវគ្គោ • (8) 3. Sanimittavaggo
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / (៨) ៣. សនិមិត្តវគ្គវណ្ណនា • (8) 3. Sanimittavaggavaṇṇanā
