| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၀. သင္ဃဝန္ဒနာသုတ္တဝဏ္ဏနာ
10. Saṅghavandanāsuttavaṇṇanā
၂၆၆. ပူတိမ္ဟိ ဒေဟေ မာတု သရီရေ သယနတော, အတ္တနော ဧဝ ဝာ ပူတိဒေဟံ သရီရံ တသ္မိံ ဌိတတာယ အဝတ္ထရိတ္ဝာ သယနတော ပူတိဒေဟသယာတိ ယောဇနာ။ ကုဏပမ္ဟေတေတိ ဧတေ မနုသ္သာ အသုစိဒုဂ္ဂန္ဓဇေဂုစ္ဆပဋိက္ကူလေ မာတုကုစ္ဆိသင္ခာတေ ကုဏပသ္မိံ ဒသ မာသေ နိမုဂ္ဂာ။ တေသံ ကိန္နာမ တ္ဝံ ပိဟယသီတိ ယောဇနာ။ ဧတေသံ ဧတံ ဝိဟယာမီတိ ဧတေသံ ဣသီနံ ဧတံ သမ္မာပဋိပတ္တိံ ဝိဟယာမိ။ ဣဒာနိ တံ ပဋိပတ္တိံ ဒသ္သေတုံ ‘‘န တေ သံ ကောဋ္ဌေ ဩပေန္တီ’’တိ ဝုတ္တံ။ ဓညံ ကောဋ္ဌေ န ပက္ခိပန္တိ ပက္ခိပိတဗ္ဗသ္သ စ အဘာဝတော။ တေနာဟ ‘‘န ဟိ ဧတေသံ ဓည’’န္တိ။ ပရေသံ နိဋ္ဌိတန္တိ ပရေသံ ဂဟိတံ သန္တကံ တေသံ ပာကာယ နိဋ္ဌိတံ။ ဘိက္ခာစာရဝတ္တေနာတိ ပိဏ္ဍာစရိယာယ။ ဧသမာနာ ပရိယေသန္တာ။ ဧဝံ ပရိယိဋ္ဌေန။ ယာပေန္တိ, န ဧသန္တိ အနေသနံ။ သုသမာဒိန္နသုန္ဒရဝတာတိ သုဋ္ဌု သမာဒိန္နသောဘနဝတာ။
266.Pūtimhi dehe mātu sarīre sayanato, attano eva vā pūtidehaṃ sarīraṃ tasmiṃ ṭhitatāya avattharitvā sayanato pūtidehasayāti yojanā. Kuṇapamheteti ete manussā asuciduggandhajegucchapaṭikkūle mātukucchisaṅkhāte kuṇapasmiṃ dasa māse nimuggā. Tesaṃ kinnāma tvaṃ pihayasīti yojanā. Etesaṃ etaṃ vihayāmīti etesaṃ isīnaṃ etaṃ sammāpaṭipattiṃ vihayāmi. Idāni taṃ paṭipattiṃ dassetuṃ ‘‘na te saṃ koṭṭhe opentī’’ti vuttaṃ. Dhaññaṃ koṭṭhe na pakkhipanti pakkhipitabbassa ca abhāvato. Tenāha ‘‘na hi etesaṃ dhañña’’nti. Paresaṃ niṭṭhitanti paresaṃ gahitaṃ santakaṃ tesaṃ pākāya niṭṭhitaṃ. Bhikkhācāravattenāti piṇḍācariyāya. Esamānā pariyesantā. Evaṃ pariyiṭṭhena. Yāpenti, na esanti anesanaṃ. Susamādinnasundaravatāti suṭṭhu samādinnasobhanavatā.
ဧဝံ သုဘာသိတဘာသိနောတိ ဂန္ထဓုရဝိပသ္သနာဓုရာနံ ဝသေန ဂုဏပရိမာဏသုဘာသိတသ္သေဝ ဘာသနသီလာ ။ အရိယေန တုဏ္ဟီဘူတေန တုဏ္ဟီဘူတာ။ တတော ဧဝ မနသ္သ သာတိသယံ သမဉ္စရာ။ ဂဟိတဒဏ္ဍေသု ပရာမာသာဒိပယုတ္တေသု ဒဏ္ဍာဒာနာဒိဟေတု ဥပ္ပဇ္ဇနကကိလေသပရိဠာဟာဘာဝတော နိဗ္ဗုတာ။ တေနာဟ ‘‘ဝိသ္သဋ္ဌဒဏ္ဍာ’’တိ။ သာဒာနေသူတိ သဘဝာဒာနေသု။ အနာဒာနာတိ တဗ္ဗိရဟိတာ။ တေနာဟ ‘‘ဘဝယောနီ’’တိအာဒိ။
Evaṃ subhāsitabhāsinoti ganthadhuravipassanādhurānaṃ vasena guṇaparimāṇasubhāsitasseva bhāsanasīlā . Ariyena tuṇhībhūtena tuṇhībhūtā. Tato eva manassa sātisayaṃ samañcarā. Gahitadaṇḍesu parāmāsādipayuttesu daṇḍādānādihetu uppajjanakakilesapariḷāhābhāvato nibbutā. Tenāha ‘‘vissaṭṭhadaṇḍā’’ti. Sādānesūti sabhavādānesu. Anādānāti tabbirahitā. Tenāha ‘‘bhavayonī’’tiādi.
သင္ဃဝန္ဒနာသုတ္တဝဏ္ဏနာ နိဋ္ဌိတာ။
Saṅghavandanāsuttavaṇṇanā niṭṭhitā.
ဒုတိယဝဂ္ဂဝဏ္ဏနာ နိဋ္ဌိတာ။
Dutiyavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. သင္ဃဝန္ဒနာသုတ္တံ • 10. Saṅghavandanāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. သင္ဃဝန္ဒနာသုတ္တဝဏ္ဏနာ • 10. Saṅghavandanāsuttavaṇṇanā
