| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
2. සඞ්ඝාදිසෙසනිද්දෙසො
2. Saṅghādisesaniddeso
ගරුකා නවාති –
Garukānavāti –
19.
19.
මොචෙතුකාමතා සුක්ක-ස්සුපක්කම්ම විමොචයං;
Mocetukāmatā sukka-ssupakkamma vimocayaṃ;
අඤ්ඤත්ර සුපිනන්තෙන, සමණො ගරුකං ඵුසෙ.
Aññatra supinantena, samaṇo garukaṃ phuse.
20.
20.
ඉත්ථිසඤ්ඤී මනුස්සිත්ථිං, කායසංසග්ගරාගවා;
Itthisaññī manussitthiṃ, kāyasaṃsaggarāgavā;
සම්ඵුසන්තො උපක්කම්ම, සමණො ගරුකං ඵුසෙ.
Samphusanto upakkamma, samaṇo garukaṃ phuse.
21.
21.
තථා සුණන්තිං විඤ්ඤුඤ්ච, මග්ගං වාරබ්භ මෙථුනං;
Tathā suṇantiṃ viññuñca, maggaṃ vārabbha methunaṃ;
දුට්ඨුල්ලවාචාරාගෙන, ඔභාසෙත්වා ගරුං ඵුසෙ.
Duṭṭhullavācārāgena, obhāsetvā garuṃ phuse.
22.
22.
වත්වාත්තකාමුපට්ඨාන-වණ්ණං මෙථුනරාගිනො;
Vatvāttakāmupaṭṭhāna-vaṇṇaṃ methunarāgino;
වාචා මෙථුනයුත්තෙන, ගරුං මෙථුනයාචනෙ.
Vācā methunayuttena, garuṃ methunayācane.
23.
23.
පටිග්ගහෙත්වා සන්දෙසං, ඉත්ථියා පුරිසස්ස වා;
Paṭiggahetvā sandesaṃ, itthiyā purisassa vā;
වීමංසිත්වා හරං පච්චා, සමණො ගරුකං ඵුසෙ.
Vīmaṃsitvā haraṃ paccā, samaṇo garukaṃ phuse.
24.
24.
සංයාචිතපරික්ඛාරං, කත්වාදෙසිතවත්ථුකං;
Saṃyācitaparikkhāraṃ, katvādesitavatthukaṃ;
කුටිං පමාණාතික්කන්තං, අත්තුද්දෙසං ගරුං ඵුසෙ.
Kuṭiṃ pamāṇātikkantaṃ, attuddesaṃ garuṃ phuse.
25.
25.
මහල්ලකං විහාරං වා, කත්වාදෙසිතවත්ථුකං;
Mahallakaṃ vihāraṃ vā, katvādesitavatthukaṃ;
අත්තනො වසනත්ථාය, සමණො ගරුකං ඵුසෙ.
Attano vasanatthāya, samaṇo garukaṃ phuse.
26.
26.
අමූලකෙන චොදෙන්තො, චොදාපෙන්තොව වත්ථුනා;
Amūlakena codento, codāpentova vatthunā;
අන්තිමෙන ච චාවෙතුං, සුණමානං ගරුං ඵුසෙ.
Antimena ca cāvetuṃ, suṇamānaṃ garuṃ phuse.
27.
27.
අඤ්ඤස්ස කිරියං දිස්වා, තෙන ලෙසෙන චොදයං;
Aññassa kiriyaṃ disvā, tena lesena codayaṃ;
වත්ථුනා අන්තිමෙනාඤ්ඤං, චාවෙතුං ගරුකං ඵුසෙ.
Vatthunā antimenāññaṃ, cāvetuṃ garukaṃ phuse.
28.
28.
ඡාදෙති ජානමාපන්නං, පරිවසෙය්ය තාවතා;
Chādeti jānamāpannaṃ, parivaseyya tāvatā;
චරෙය්ය සඞ්ඝෙ මානත්තං, පරිවුත්ථො ඡ රත්තියො.
Careyya saṅghe mānattaṃ, parivuttho cha rattiyo.
චිණ්ණමානත්තමබ්භෙය්ය, තං සඞ්ඝො වීසතීගණො.
Ciṇṇamānattamabbheyya, taṃ saṅgho vīsatīgaṇo.
29.
29.
ආපත්තිනුක්ඛිත්තමනන්තරාය
Āpattinukkhittamanantarāya
පහුත්තතායො තථසඤ්ඤිතා ච;
Pahuttatāyo tathasaññitā ca;
ඡාදෙතුකාමො අථ ඡාදනාති,
Chādetukāmo atha chādanāti,
ඡන්නා දසඞ්ගෙහ්යරුණුග්ගමම්හීති.
Channā dasaṅgehyaruṇuggamamhīti.
