| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
২. সঙ্ঘাদিসেসনিদ্দেসো
2. Saṅghādisesaniddeso
গরুকা নৰাতি –
Garukānavāti –
১৯.
19.
মোচেতুকামতা সুক্ক-স্সুপক্কম্ম ৰিমোচযং।
Mocetukāmatā sukka-ssupakkamma vimocayaṃ;
অঞ্ঞত্র সুপিনন্তেন, সমণো গরুকং ফুসে॥
Aññatra supinantena, samaṇo garukaṃ phuse.
২০.
20.
ইত্থিসঞ্ঞী মনুস্সিত্থিং, কাযসংসগ্গরাগৰা।
Itthisaññī manussitthiṃ, kāyasaṃsaggarāgavā;
সম্ফুসন্তো উপক্কম্ম, সমণো গরুকং ফুসে॥
Samphusanto upakkamma, samaṇo garukaṃ phuse.
২১.
21.
তথা সুণন্তিং ৰিঞ্ঞুঞ্চ, মগ্গং ৰারব্ভ মেথুনং।
Tathā suṇantiṃ viññuñca, maggaṃ vārabbha methunaṃ;
দুট্ঠুল্লৰাচারাগেন, ওভাসেত্ৰা গরুং ফুসে॥
Duṭṭhullavācārāgena, obhāsetvā garuṃ phuse.
২২.
22.
ৰত্ৰাত্তকামুপট্ঠান-ৰণ্ণং মেথুনরাগিনো।
Vatvāttakāmupaṭṭhāna-vaṇṇaṃ methunarāgino;
ৰাচা মেথুনযুত্তেন, গরুং মেথুনযাচনে॥
Vācā methunayuttena, garuṃ methunayācane.
২৩.
23.
পটিগ্গহেত্ৰা সন্দেসং, ইত্থিযা পুরিসস্স ৰা।
Paṭiggahetvā sandesaṃ, itthiyā purisassa vā;
ৰীমংসিত্ৰা হরং পচ্চা, সমণো গরুকং ফুসে॥
Vīmaṃsitvā haraṃ paccā, samaṇo garukaṃ phuse.
২৪.
24.
সংযাচিতপরিক্খারং, কত্ৰাদেসিতৰত্থুকং।
Saṃyācitaparikkhāraṃ, katvādesitavatthukaṃ;
কুটিং পমাণাতিক্কন্তং, অত্তুদ্দেসং গরুং ফুসে॥
Kuṭiṃ pamāṇātikkantaṃ, attuddesaṃ garuṃ phuse.
২৫.
25.
মহল্লকং ৰিহারং ৰা, কত্ৰাদেসিতৰত্থুকং।
Mahallakaṃ vihāraṃ vā, katvādesitavatthukaṃ;
অত্তনো ৰসনত্থায, সমণো গরুকং ফুসে॥
Attano vasanatthāya, samaṇo garukaṃ phuse.
২৬.
26.
অমূলকেন চোদেন্তো, চোদাপেন্তোৰ ৰত্থুনা।
Amūlakena codento, codāpentova vatthunā;
অন্তিমেন চ চাৰেতুং, সুণমানং গরুং ফুসে॥
Antimena ca cāvetuṃ, suṇamānaṃ garuṃ phuse.
২৭.
27.
অঞ্ঞস্স কিরিযং দিস্ৰা, তেন লেসেন চোদযং।
Aññassa kiriyaṃ disvā, tena lesena codayaṃ;
ৰত্থুনা অন্তিমেনাঞ্ঞং, চাৰেতুং গরুকং ফুসে॥
Vatthunā antimenāññaṃ, cāvetuṃ garukaṃ phuse.
২৮.
28.
ছাদেতি জানমাপন্নং, পরিৰসেয্য তাৰতা।
Chādeti jānamāpannaṃ, parivaseyya tāvatā;
চরেয্য সঙ্ঘে মানত্তং, পরিৰুত্থো ছ রত্তিযো॥
Careyya saṅghe mānattaṃ, parivuttho cha rattiyo.
চিণ্ণমানত্তমব্ভেয্য, তং সঙ্ঘো ৰীসতীগণো।
Ciṇṇamānattamabbheyya, taṃ saṅgho vīsatīgaṇo.
২৯.
29.
আপত্তিনুক্খিত্তমনন্তরায
Āpattinukkhittamanantarāya
পহুত্ততাযো তথসঞ্ঞিতা চ।
Pahuttatāyo tathasaññitā ca;
ছাদেতুকামো অথ ছাদনাতি,
Chādetukāmo atha chādanāti,
ছন্না দসঙ্গেহ্যরুণুগ্গমম্হীতি॥
Channā dasaṅgehyaruṇuggamamhīti.
