| Library / Tipiṭaka / ติปิฎก • Tipiṭaka / จูฬวคฺค-อฎฺฐกถา • Cūḷavagga-aṭṭhakathā |
สงฺฆเภทกกถา
Saṅghabhedakakathā
๓๔๔. อถ โข เทวทโตฺต สงฺฆํ ภินฺทิตฺวาติ โส กิร เอวํ สลากํ คาเหตฺวา ตเตฺถว อาเวณิกํ อุโปสถํ กตฺวา คโต, เตเนตํ วุตฺตํฯ
344.Atha kho devadatto saṅghaṃ bhinditvāti so kira evaṃ salākaṃ gāhetvā tattheva āveṇikaṃ uposathaṃ katvā gato, tenetaṃ vuttaṃ.
๓๔๕. ปิฎฺฐิ เม อาคิลายตีติ จิรนิสชฺชาย เวทนาภิภูตา พาธติฯ ตมหํ อายมิสฺสามีติ ตํ อหํ ปสาเรสฺสามิฯ อาเทสนาปาฎิหาริยานุสาสนี นาม ‘‘เอวมฺปิ เต มโน, ตถาปิ เต มโน’’ติ เอวํ ปรสฺส จิตฺตํ ชานิตฺวา ตทนุรูปา ธมฺมเทสนาฯ
345.Piṭṭhime āgilāyatīti ciranisajjāya vedanābhibhūtā bādhati. Tamahaṃ āyamissāmīti taṃ ahaṃ pasāressāmi. Ādesanāpāṭihāriyānusāsanī nāma ‘‘evampi te mano, tathāpi te mano’’ti evaṃ parassa cittaṃ jānitvā tadanurūpā dhammadesanā.
๓๔๖. มมานุกุพฺพนฺติ มมานุกิริยํ กุรุมาโนฯ กปโณติ ทุกฺขิโตฯ มหาวราหสฺสาติ มหานาคสฺสฯ มหิํ วิกุพฺพโตติ ปถวิํ ปทาเลนฺตสฺสฯ ภิสํ ฆสมานสฺสาติ ภิสํ ขาทนฺตสฺสฯ นทีสุ ชคฺคโตติ เอตฺถ โส กิร หตฺถินาโค สายนฺหสมยํ ตํ นทินามกํ โปกฺขรณิํ โอคาเหตฺวา กิลโนฺต สพฺพรตฺติํ วีตินาเมสิ, ชาลิกํ กโรติ, เตน วุตฺตํ ‘‘นทีสุ ชคฺคโต’’ติฯ
346.Mamānukubbanti mamānukiriyaṃ kurumāno. Kapaṇoti dukkhito. Mahāvarāhassāti mahānāgassa. Mahiṃ vikubbatoti pathaviṃ padālentassa. Bhisaṃ ghasamānassāti bhisaṃ khādantassa. Nadīsu jaggatoti ettha so kira hatthināgo sāyanhasamayaṃ taṃ nadināmakaṃ pokkharaṇiṃ ogāhetvā kilanto sabbarattiṃ vītināmesi, jālikaṃ karoti, tena vuttaṃ ‘‘nadīsu jaggato’’ti.
๓๔๗. สุตาติ โสตาฯ อสนฺทิโทฺธ จ อกฺขาตีติ นิสฺสเนฺทโห หุตฺวา อกฺขาติ อนุสนฺธิวเสน โยเชตฺวา โยเชตฺวาฯ
347.Sutāti sotā. Asandiddho ca akkhātīti nissandeho hutvā akkhāti anusandhivasena yojetvā yojetvā.
๓๕๐. อปาเย นิพฺพตฺติสฺสตีติ อาปายิโกฯ เอวํ เนรยิโกฯ กปฺปํ ฐสฺสตีติ กปฺปโฎฺฐฯ อิทานิ พุทฺธสหเสฺสนาปิ ติกิจฺฉิตุํ น สกฺกาติ อเตกิโจฺฉฯ
350. Apāye nibbattissatīti āpāyiko. Evaṃ nerayiko. Kappaṃ ṭhassatīti kappaṭṭho. Idāni buddhasahassenāpi tikicchituṃ na sakkāti atekiccho.
มา ชาตุ โกจิ โลกสฺมินฺติ มา กทาจิปิ โกจิ สโตฺต โลกสฺมิํฯ อุทปชฺชถาติ อุปปชฺชถ ฯ ชลํว ยสสา อฎฺฐาติ ยสสา ชลโนฺต วิย ฐิโตฯ เทวทโตฺตติ เม สุตนฺติ ‘‘อีทิโส เทวทโตฺต’’ติ ภควตา สุตมฺปิ อตฺถิ, ตเทว คเหตฺวา อิทํ วุตฺตํฯ โส ปมาทมนุจิโณฺณติ เอตฺถ ปมาทํ อนุจินาตีติ อนุจิโณฺณ, ปมาโท อปฺปหีโนติ อโตฺถฯ อาสชฺช นนฺติ ปาปเกน จิเตฺตน ปตฺวา, วิโสเสตฺวาติ วา อโตฺถฯ อวีจินิรยํ ปโตฺตติ อิทํ ปน อาสีสายํ อตีตวจนํฯ เภสฺมาติ ภยานโกฯ
Mā jātu koci lokasminti mā kadācipi koci satto lokasmiṃ. Udapajjathāti upapajjatha . Jalaṃva yasasā aṭṭhāti yasasā jalanto viya ṭhito. Devadattoti me sutanti ‘‘īdiso devadatto’’ti bhagavatā sutampi atthi, tadeva gahetvā idaṃ vuttaṃ. So pamādamanuciṇṇoti ettha pamādaṃ anucinātīti anuciṇṇo, pamādo appahīnoti attho. Āsajja nanti pāpakena cittena patvā, visosetvāti vā attho. Avīcinirayaṃ pattoti idaṃ pana āsīsāyaṃ atītavacanaṃ. Bhesmāti bhayānako.
สงฺฆเภทกกถา นิฎฺฐิตาฯ
Saṅghabhedakakathā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / จูฬวคฺคปาฬิ • Cūḷavaggapāḷi / สงฺฆเภทกถา • Saṅghabhedakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / สงฺฆเภทกถาวณฺณนา • Saṅghabhedakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ฉสกฺยปพฺพชฺชากถาวณฺณนา • Chasakyapabbajjākathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / สงฺฆเภทกกถาวณฺณนา • Saṅghabhedakakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / สงฺฆเภทกถา • Saṅghabhedakathā
