| Library / Tipiṭaka / તિપિટક • Tipiṭaka / મહાવિભઙ્ગ-અટ્ઠકથા • Mahāvibhaṅga-aṭṭhakathā |
૭. સપ્પાણકવગ્ગો
7. Sappāṇakavaggo
૧. સઞ્ચિચ્ચપાણસિક્ખાપદવણ્ણના
1. Sañciccapāṇasikkhāpadavaṇṇanā
૩૮૨. સપ્પાણકવગ્ગસ્સ પઠમસિક્ખાપદે – ઇસ્સાસો હોતીતિ ગિહિકાલે ધનુગ્ગહાચરિયો હોતિ. જીવિતા વોરોપિતાતિ જીવિતા વિયોજિતા.
382. Sappāṇakavaggassa paṭhamasikkhāpade – issāso hotīti gihikāle dhanuggahācariyo hoti. Jīvitā voropitāti jīvitā viyojitā.
સિક્ખાપદેપિ વોરોપેય્યાતિ વિયોજેય્ય. યસ્મા પન વોહારમત્તમેવેતં; ન હેત્થ કિઞ્ચિ વિયોજિતે સીસાલઙ્કારે સીસં વિય જીવિતા વોરોપિતે પાણેપિ જીવિતં નામ વિસું તિટ્ઠતિ, અઞ્ઞદત્થુ અન્તરધાનમેવ ગચ્છતિ, તસ્મા તમત્થં દસ્સેતું પદભાજને ‘‘જીવિતિન્દ્રિયં ઉપચ્છિન્દતી’’તિઆદિ વુત્તં. ઇમસ્મિઞ્ચ સિક્ખાપદે તિરચ્છાનગતોયેવ ‘‘પાણો’’તિ વેદિતબ્બો. તં ખુદ્દકમ્પિ મહન્તમ્પિ મારેન્તસ્સ આપત્તિનાનાકરણં નત્થિ. મહન્તે પન ઉપક્કમમહન્તત્તા અકુસલમહત્તં હોતિ. પાણે પાણસઞ્ઞીતિ અન્તમસો મઞ્ચપીઠં સોધેન્તો મઙ્ગુલબીજકેપિ પાણસઞ્ઞી નિક્કારુણિકતાય તં ભિન્દન્તો અપનેતિ, પાચિત્તિયં. તસ્મા એવરૂપેસુ ઠાનેસુ કારુઞ્ઞં ઉપટ્ઠપેત્વા અપ્પમત્તેન વત્તં કાતબ્બં. સેસં મનુસ્સવિગ્ગહે વુત્તનયેનેવ વેદિતબ્બં સદ્ધિં સમુટ્ઠાનાદીહીતિ.
Sikkhāpadepi voropeyyāti viyojeyya. Yasmā pana vohāramattamevetaṃ; na hettha kiñci viyojite sīsālaṅkāre sīsaṃ viya jīvitā voropite pāṇepi jīvitaṃ nāma visuṃ tiṭṭhati, aññadatthu antaradhānameva gacchati, tasmā tamatthaṃ dassetuṃ padabhājane ‘‘jīvitindriyaṃ upacchindatī’’tiādi vuttaṃ. Imasmiñca sikkhāpade tiracchānagatoyeva ‘‘pāṇo’’ti veditabbo. Taṃ khuddakampi mahantampi mārentassa āpattinānākaraṇaṃ natthi. Mahante pana upakkamamahantattā akusalamahattaṃ hoti. Pāṇe pāṇasaññīti antamaso mañcapīṭhaṃ sodhento maṅgulabījakepi pāṇasaññī nikkāruṇikatāya taṃ bhindanto apaneti, pācittiyaṃ. Tasmā evarūpesu ṭhānesu kāruññaṃ upaṭṭhapetvā appamattena vattaṃ kātabbaṃ. Sesaṃ manussaviggahe vuttanayeneva veditabbaṃ saddhiṃ samuṭṭhānādīhīti.
સઞ્ચિચ્ચપાણસિક્ખાપદં પઠમં.
Sañciccapāṇasikkhāpadaṃ paṭhamaṃ.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવિભઙ્ગ • Mahāvibhaṅga / ૭. સપ્પાણકવગ્ગો • 7. Sappāṇakavaggo
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૧. સઞ્ચિચ્ચસિક્ખાપદવણ્ણના • 1. Sañciccasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૧. સઞ્ચિચ્ચપાણસિક્ખાપદવણ્ણના • 1. Sañciccapāṇasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૧. સઞ્ચિચ્ચપાણસિક્ખાપદવણ્ણના • 1. Sañciccapāṇasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૧. સઞ્ચિચ્ચપાણસિક્ખાપદ-અત્થયોજના • 1. Sañciccapāṇasikkhāpada-atthayojanā
