| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
২১. একৰীসতিমৰগ্গো
21. Ekavīsatimavaggo
(২০২) ৩. সংযোজনকথা
(202) 3. Saṃyojanakathā
৮৮১. অত্থি কিঞ্চি সংযোজনং অপ্পহায অরহত্তপ্পত্তীতি? আমন্তা। অত্থি কিঞ্চি সক্কাযদিট্ঠিং অপ্পহায…পে॰… ৰিচিকিচ্ছং অপ্পহায…পে॰… সীলব্বতপরামাসং অপ্পহায… রাগং অপ্পহায… দোসং অপ্পহায… মোহং অপ্পহায… অনোত্তপ্পং অপ্পহায অরহত্তপ্পত্তীতি? ন হেৰং ৰত্তব্বে…পে॰…।
881. Atthi kiñci saṃyojanaṃ appahāya arahattappattīti? Āmantā. Atthi kiñci sakkāyadiṭṭhiṃ appahāya…pe… vicikicchaṃ appahāya…pe… sīlabbataparāmāsaṃ appahāya… rāgaṃ appahāya… dosaṃ appahāya… mohaṃ appahāya… anottappaṃ appahāya arahattappattīti? Na hevaṃ vattabbe…pe….
অত্থি কিঞ্চি সংযোজনং অপ্পহায অরহত্তপ্পত্তীতি? আমন্তা। অরহা সরাগো সদোসো সমোহো সমানো সমক্খো সপল়াসো সউপাযাসো সকিলেসোতি? ন হেৰং ৰত্তব্বে…পে॰… ননু অরহা নিরাগো নিদ্দোসো নিম্মোহো নিম্মানো নিম্মক্খো নিপ্পল়াসো নিরুপাযাসো নিক্কিলেসোতি? আমন্তা। হঞ্চি অরহা নিরাগো…পে॰… নিক্কিলেসো, নো চ ৰত রে ৰত্তব্বে – ‘‘অত্থি কিঞ্চি সংযোজনং অপ্পহায অরহত্তপ্পত্তী’’তি।
Atthi kiñci saṃyojanaṃ appahāya arahattappattīti? Āmantā. Arahā sarāgo sadoso samoho samāno samakkho sapaḷāso saupāyāso sakilesoti? Na hevaṃ vattabbe…pe… nanu arahā nirāgo niddoso nimmoho nimmāno nimmakkho nippaḷāso nirupāyāso nikkilesoti? Āmantā. Hañci arahā nirāgo…pe… nikkileso, no ca vata re vattabbe – ‘‘atthi kiñci saṃyojanaṃ appahāya arahattappattī’’ti.
৮৮২. ন ৰত্তব্বং – ‘‘অত্থি কিঞ্চি সংযোজনং অপ্পহায অরহত্তপ্পত্তী’’তি ? আমন্তা। অরহা সব্বং বুদ্ধৰিসযং জানাতীতি? ন হেৰং ৰত্তব্বে। তেন হি অত্থি কিঞ্চি সংযোজনং অপ্পহায অরহত্তপ্পত্তীতি।
882. Na vattabbaṃ – ‘‘atthi kiñci saṃyojanaṃ appahāya arahattappattī’’ti ? Āmantā. Arahā sabbaṃ buddhavisayaṃ jānātīti? Na hevaṃ vattabbe. Tena hi atthi kiñci saṃyojanaṃ appahāya arahattappattīti.
সংযোজনকথা নিট্ঠিতা।
Saṃyojanakathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৩. সঞ্ঞোজনকথাৰণ্ণনা • 3. Saññojanakathāvaṇṇanā
