| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
৪৬. সংৰরনিদ্দেসৰণ্ণনা
46. Saṃvaraniddesavaṇṇanā
৪৫৩. সংৰরণং চক্খুদ্ৰারাদীনং সতিকৰাটেন পিদহনং সংৰরো। তত্থ কিঞ্চাপি চক্খুন্দ্রিযে সংৰরো নত্থি, ন হি চক্খুপসাদং নিস্সায সতি উপ্পজ্জতি, নেৰ ভৰঙ্গসমযে আৰজ্জনাদীনং অঞ্ঞতরসমযে, জৰনক্খণে পন উপ্পজ্জতীতি তদা সংৰরো হোতি, এৰং হোন্তে পন সো চক্খুদ্ৰারাদীনং সংৰরোতি ৰুচ্চতি। চক্খুসোতাদিভেদেহীতি চক্খু চ সোতঞ্চ, তানি আদি যেসং, তেৰ ভেদা চাতি সমাসো, তেহি দ্ৰারেহি। অভিজ্ঝাদিপ্পৰত্তিযা অচ্চন্তোপকারকত্তা করণত্থে চেত্থ ততিযা। এতেন চক্খুসোতঘানজিৰ্হাকাযমনসঙ্খাতানি দ্ৰারানি ৰুত্তানি। রূপসদ্দাদিগোচরেতি রূপসদ্দগন্ধরসফোট্ঠব্বধম্মসঙ্খাতে ৰিসযে। অভিজ্ঝাদোমনস্সাদিপ্পৰত্তিন্তি এত্থ পরসম্পত্তিং অভিমুখং ঝাযতীতি অভিজ্ঝা, বলৰতণ্হা। আদি-সদ্দেন মিচ্ছাদিট্ঠিআদযো অনেকে অকুসলা ধম্মা সঙ্গহিতা।
453. Saṃvaraṇaṃ cakkhudvārādīnaṃ satikavāṭena pidahanaṃ saṃvaro. Tattha kiñcāpi cakkhundriye saṃvaro natthi, na hi cakkhupasādaṃ nissāya sati uppajjati, neva bhavaṅgasamaye āvajjanādīnaṃ aññatarasamaye, javanakkhaṇe pana uppajjatīti tadā saṃvaro hoti, evaṃ honte pana so cakkhudvārādīnaṃ saṃvaroti vuccati. Cakkhusotādibhedehīti cakkhu ca sotañca, tāni ādi yesaṃ, teva bhedā cāti samāso, tehi dvārehi. Abhijjhādippavattiyā accantopakārakattā karaṇatthe cettha tatiyā. Etena cakkhusotaghānajivhākāyamanasaṅkhātāni dvārāni vuttāni. Rūpasaddādigocareti rūpasaddagandharasaphoṭṭhabbadhammasaṅkhāte visaye. Abhijjhādomanassādippavattinti ettha parasampattiṃ abhimukhaṃ jhāyatīti abhijjhā, balavataṇhā. Ādi-saddena micchādiṭṭhiādayo aneke akusalā dhammā saṅgahitā.
৪৫৪. সকং চিত্তং কিট্ঠাদিং দুপ্পসুং ৰিয নিগ্গণ্হেয্যাতি সম্বন্ধো। কিট্ঠন্তি কিট্ঠট্ঠানে উপ্পন্নং সস্সং গহিতং। কিট্ঠং অদতীতি কিট্ঠাদি, তং। সম্পজানোতি সাত্থকসপ্পাযগোচরঅসম্মোহসঙ্খাতেন চতুসম্পজঞ্ঞেন সম্মা পজানো। ইমিনা ইন্দ্রিযসংৰরসীলং কথিতং।
454. Sakaṃ cittaṃ kiṭṭhādiṃ duppasuṃ viya niggaṇheyyāti sambandho. Kiṭṭhanti kiṭṭhaṭṭhāne uppannaṃ sassaṃ gahitaṃ. Kiṭṭhaṃ adatīti kiṭṭhādi, taṃ. Sampajānoti sātthakasappāyagocaraasammohasaṅkhātena catusampajaññena sammā pajāno. Iminā indriyasaṃvarasīlaṃ kathitaṃ.
সংৰরনিদ্দেসৰণ্ণনা নিট্ঠিতা।
Saṃvaraniddesavaṇṇanā niṭṭhitā.
