| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
46. ஸங்வரனித்³தே³ஸவண்ணனா
46. Saṃvaraniddesavaṇṇanā
453. ஸங்வரணங் சக்கு²த்³வாராதீ³னங் ஸதிகவாடேன பித³ஹனங் ஸங்வரோ. தத்த² கிஞ்சாபி சக்கு²ந்த்³ரியே ஸங்வரோ நத்தி², ந ஹி சக்கு²பஸாத³ங் நிஸ்ஸாய ஸதி உப்பஜ்ஜதி, நேவ ப⁴வங்க³ஸமயே ஆவஜ்ஜனாதீ³னங் அஞ்ஞதரஸமயே, ஜவனக்க²ணே பன உப்பஜ்ஜதீதி ததா³ ஸங்வரோ ஹோதி, ஏவங் ஹொந்தே பன ஸோ சக்கு²த்³வாராதீ³னங் ஸங்வரோதி வுச்சதி. சக்கு²ஸோதாதி³பே⁴தே³ஹீதி சக்கு² ச ஸோதஞ்ச, தானி ஆதி³ யேஸங், தேவ பே⁴தா³ சாதி ஸமாஸோ, தேஹி த்³வாரேஹி. அபி⁴ஜ்ஜா²தி³ப்பவத்தியா அச்சந்தோபகாரகத்தா கரணத்தே² செத்த² ததியா. ஏதேன சக்கு²ஸோதகா⁴னஜிவ்ஹாகாயமனஸங்கா²தானி த்³வாரானி வுத்தானி. ரூபஸத்³தா³தி³கோ³சரேதி ரூபஸத்³த³க³ந்த⁴ரஸபொ²ட்ட²ப்³ப³த⁴ம்மஸங்கா²தே விஸயே. அபி⁴ஜ்ஜா²தோ³மனஸ்ஸாதி³ப்பவத்திந்தி எத்த² பரஸம்பத்திங் அபி⁴முக²ங் ஜா²யதீதி அபி⁴ஜ்ஜா², ப³லவதண்ஹா. ஆதி³-ஸத்³தே³ன மிச்சா²தி³ட்டி²ஆத³யோ அனேகே அகுஸலா த⁴ம்மா ஸங்க³ஹிதா.
453. Saṃvaraṇaṃ cakkhudvārādīnaṃ satikavāṭena pidahanaṃ saṃvaro. Tattha kiñcāpi cakkhundriye saṃvaro natthi, na hi cakkhupasādaṃ nissāya sati uppajjati, neva bhavaṅgasamaye āvajjanādīnaṃ aññatarasamaye, javanakkhaṇe pana uppajjatīti tadā saṃvaro hoti, evaṃ honte pana so cakkhudvārādīnaṃ saṃvaroti vuccati. Cakkhusotādibhedehīti cakkhu ca sotañca, tāni ādi yesaṃ, teva bhedā cāti samāso, tehi dvārehi. Abhijjhādippavattiyā accantopakārakattā karaṇatthe cettha tatiyā. Etena cakkhusotaghānajivhākāyamanasaṅkhātāni dvārāni vuttāni. Rūpasaddādigocareti rūpasaddagandharasaphoṭṭhabbadhammasaṅkhāte visaye. Abhijjhādomanassādippavattinti ettha parasampattiṃ abhimukhaṃ jhāyatīti abhijjhā, balavataṇhā. Ādi-saddena micchādiṭṭhiādayo aneke akusalā dhammā saṅgahitā.
454. ஸகங் சித்தங் கிட்டா²தி³ங் து³ப்பஸுங் விய நிக்³க³ண்ஹெய்யாதி ஸம்ப³ந்தோ⁴. கிட்ட²ந்தி கிட்ட²ட்டா²னே உப்பன்னங் ஸஸ்ஸங் க³ஹிதங். கிட்ட²ங் அத³தீதி கிட்டா²தி³, தங். ஸம்பஜானோதி ஸாத்த²கஸப்பாயகோ³சரஅஸம்மோஹஸங்கா²தேன சதுஸம்பஜஞ்ஞேன ஸம்மா பஜானோ. இமினா இந்த்³ரியஸங்வரஸீலங் கதி²தங்.
454. Sakaṃ cittaṃ kiṭṭhādiṃ duppasuṃ viya niggaṇheyyāti sambandho. Kiṭṭhanti kiṭṭhaṭṭhāne uppannaṃ sassaṃ gahitaṃ. Kiṭṭhaṃ adatīti kiṭṭhādi, taṃ. Sampajānoti sātthakasappāyagocaraasammohasaṅkhātena catusampajaññena sammā pajāno. Iminā indriyasaṃvarasīlaṃ kathitaṃ.
ஸங்வரனித்³தே³ஸவண்ணனா நிட்டி²தா.
Saṃvaraniddesavaṇṇanā niṭṭhitā.
