| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೧೦. ಸಂವರಕಥಾವಣ್ಣನಾ
10. Saṃvarakathāvaṇṇanā
೩೭೯. ಇದಾನಿ ಸಂವರಕಥಾ ನಾಮ ಹೋತಿ। ತತ್ಥ ಯೇಸಂ ತಾವತಿಂಸೇ ದೇವೇ ಉಪಾದಾಯ ತತುತ್ತರಿ ದೇವೇಸು ಯಸ್ಮಾ ತೇ ಪಞ್ಚ ವೇರಾನಿ ನ ಸಮಾಚರನ್ತಿ, ತಸ್ಮಾ ಸಂವರೋ ಅತ್ಥೀತಿ ಲದ್ಧಿ, ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ವೇರಸಮುದಾಚಾರಂ ಅಪಸ್ಸತೋ ಪಟಿಞ್ಞಾ ಇತರಸ್ಸ। ತತೋ ಯಸ್ಮಾ ಸಂವರೋ ನಾಮ ಸಂವರಿತಬ್ಬೇ ಅಸಂವರೇ ಸತಿ ಹೋತಿ, ತಸ್ಮಾ ಅಸಂವರಪುಚ್ಛಾ ಸಕವಾದಿಸ್ಸ, ದೇವೇಸು ಪಾಣಾತಿಪಾತಾದೀನಂ ಅಭಾವೇನ ಪಟಿಕ್ಖೇಪೋ ಇತರಸ್ಸ।
379. Idāni saṃvarakathā nāma hoti. Tattha yesaṃ tāvatiṃse deve upādāya tatuttari devesu yasmā te pañca verāni na samācaranti, tasmā saṃvaro atthīti laddhi, te sandhāya pucchā sakavādissa, verasamudācāraṃ apassato paṭiññā itarassa. Tato yasmā saṃvaro nāma saṃvaritabbe asaṃvare sati hoti, tasmā asaṃvarapucchā sakavādissa, devesu pāṇātipātādīnaṃ abhāvena paṭikkhepo itarassa.
ಅತ್ಥಿ ಮನುಸ್ಸೇಸೂತಿಆದಿ ಸಂವರೇ ಸತಿ ಅಸಂವರಸ್ಸ ಅಸಂವರೇ ಚ ಸತಿ ಸಂವರಸ್ಸ ಪವತ್ತಿದಸ್ಸನತ್ಥಂ ವುತ್ತಂ।
Atthi manussesūtiādi saṃvare sati asaṃvarassa asaṃvare ca sati saṃvarassa pavattidassanatthaṃ vuttaṃ.
೩೮೦. ಪಾಣಾತಿಪಾತಾ ವೇರಮಣೀತಿ ಆದಿಪಞ್ಹೇಸು ಪಾಣಾತಿಪಾತಾದೀನಂ ಅಸಮಾಚರಣವಸೇನ ಪಟಿಞ್ಞಾ, ಪಾಣಾತಿಪಾತಾದೀನಂ ನತ್ಥಿತಾಯ ಪಟಿಕ್ಖೇಪೋ ವೇದಿತಬ್ಬೋ। ಪಟಿಲೋಮಪಞ್ಹಾ ಉತ್ತಾನತ್ಥಾಯೇವ।
380. Pāṇātipātā veramaṇīti ādipañhesu pāṇātipātādīnaṃ asamācaraṇavasena paṭiññā, pāṇātipātādīnaṃ natthitāya paṭikkhepo veditabbo. Paṭilomapañhā uttānatthāyeva.
ಅವಸಾನೇ ನತ್ಥಿ ದೇವೇಸು ಸಂವರೋತಿಪಞ್ಹೇ ಪಾಣಾತಿಪಾತಾದೀನಿ ಕತ್ವಾ ಪುನ ತತೋ ಸಂವರಾಭಾವಂ ಸನ್ಧಾಯ ಪಟಿಞ್ಞಾ ಸಕವಾದಿಸ್ಸ। ತತೋ ಛಲವಸೇನ ಯದಿ ಸಂವರೋ ನತ್ಥಿ, ಸಬ್ಬೇ ದೇವಾ ಪಾಣಾತಿಪಾತಿನೋತಿಆದಿಪುಚ್ಛಾ ಪರವಾದಿಸ್ಸ। ದೇವಾನಂ ವೇರಸಮುದಾಚಾರಸ್ಸ ಅಭಾವೇನ ಪಟಿಕ್ಖೇಪೋ ಸಕವಾದಿಸ್ಸ। ನಹೇವನ್ತಿ ವಚನಮತ್ತಂ ಗಹೇತ್ವಾ ಲದ್ಧಿಪತಿಟ್ಠಾಪನಂ ಪರವಾದಿಸ್ಸ। ಏವಂ ಪತಿಟ್ಠಿತಾ ಪನ ಲದ್ಧಿ ಅಪ್ಪತಿಟ್ಠಿತಾವ ಹೋತೀತಿ।
Avasāne natthi devesu saṃvarotipañhe pāṇātipātādīni katvā puna tato saṃvarābhāvaṃ sandhāya paṭiññā sakavādissa. Tato chalavasena yadi saṃvaro natthi, sabbe devā pāṇātipātinotiādipucchā paravādissa. Devānaṃ verasamudācārassa abhāvena paṭikkhepo sakavādissa. Nahevanti vacanamattaṃ gahetvā laddhipatiṭṭhāpanaṃ paravādissa. Evaṃ patiṭṭhitā pana laddhi appatiṭṭhitāva hotīti.
ಸಂವರಕಥಾವಣ್ಣನಾ।
Saṃvarakathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೩೦) ೧೦. ಸಂವರಕಥಾ • (30) 10. Saṃvarakathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೧೦. ಸಂವರಕಥಾವಣ್ಣನಾ • 10. Saṃvarakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೧೦. ಸಂವರಕಥಾವಣ್ಣನಾ • 10. Saṃvarakathāvaṇṇanā
