| Library / Tipiṭaka / ತಿಪಿಟಕ • Tipiṭaka / ಪರಿವಾರಪಾಳಿ • Parivārapāḷi |
ಸಮುಟ್ಠಾನಸೀಸಸಙ್ಖೇಪೋ
Samuṭṭhānasīsasaṅkhepo
ಸಮುಟ್ಠಾನಸ್ಸುದ್ದಾನಂ
Samuṭṭhānassuddānaṃ
೨೫೭.
257.
ಅನಿಚ್ಚಾ ಸಬ್ಬೇ ಸಙ್ಖಾರಾ, ದುಕ್ಖಾನತ್ತಾ ಚ ಸಙ್ಖತಾ।
Aniccā sabbe saṅkhārā, dukkhānattā ca saṅkhatā;
ನಿಬ್ಬಾನಞ್ಚೇವ ಪಞ್ಞತ್ತಿ, ಅನತ್ತಾ ಇತಿ ನಿಚ್ಛಯಾ॥
Nibbānañceva paññatti, anattā iti nicchayā.
ಬುದ್ಧಚನ್ದೇ ಅನುಪ್ಪನ್ನೇ, ಬುದ್ಧಾದಿಚ್ಚೇ ಅನುಗ್ಗತೇ।
Buddhacande anuppanne, buddhādicce anuggate;
ತೇಸಂ ಸಭಾಗಧಮ್ಮಾನಂ, ನಾಮಮತ್ತಂ ನ ನಾಯತಿ॥
Tesaṃ sabhāgadhammānaṃ, nāmamattaṃ na nāyati.
ದುಕ್ಕರಂ ವಿವಿಧಂ ಕತ್ವಾ, ಪೂರಯಿತ್ವಾನ ಪಾರಮೀ।
Dukkaraṃ vividhaṃ katvā, pūrayitvāna pāramī;
ಉಪ್ಪಜ್ಜನ್ತಿ ಮಹಾವೀರಾ, ಚಕ್ಖುಭೂತಾ ಸಬ್ರಹ್ಮಕೇ॥
Uppajjanti mahāvīrā, cakkhubhūtā sabrahmake.
ತೇ ದೇಸಯನ್ತಿ ಸದ್ಧಮ್ಮಂ, ದುಕ್ಖಹಾನಿಂ ಸುಖಾವಹಂ।
Te desayanti saddhammaṃ, dukkhahāniṃ sukhāvahaṃ;
ಅಙ್ಗೀರಸೋ ಸಕ್ಯಮುನಿ, ಸಬ್ಬಭೂತಾನುಕಮ್ಪಕೋ॥
Aṅgīraso sakyamuni, sabbabhūtānukampako.
ಸಬ್ಬಸತ್ತುತ್ತಮೋ ಸೀಹೋ, ಪಿಟಕೇ ತೀಣಿ ದೇಸಯಿ।
Sabbasattuttamo sīho, piṭake tīṇi desayi;
ಸುತ್ತನ್ತಮಭಿಧಮ್ಮಞ್ಚ, ವಿನಯಞ್ಚ ಮಹಾಗುಣಂ॥
Suttantamabhidhammañca, vinayañca mahāguṇaṃ.
ಏವಂ ನೀಯತಿ ಸದ್ಧಮ್ಮೋ, ವಿನಯೋ ಯದಿ ತಿಟ್ಠತಿ।
Evaṃ nīyati saddhammo, vinayo yadi tiṭṭhati;
ಉಭತೋ ಚ ವಿಭಙ್ಗಾನಿ, ಖನ್ಧಕಾ ಯಾ ಚ ಮಾತಿಕಾ॥
Ubhato ca vibhaṅgāni, khandhakā yā ca mātikā.
ಮಾಲಾ ಸುತ್ತಗುಣೇನೇವ, ಪರಿವಾರೇನ ಗನ್ಥಿತಾ।
Mālā suttaguṇeneva, parivārena ganthitā;
ತಸ್ಸೇವ ಪರಿವಾರಸ್ಸ, ಸಮುಟ್ಠಾನಂ ನಿಯತೋ ಕತಂ॥
Tasseva parivārassa, samuṭṭhānaṃ niyato kataṃ.
ಸಮ್ಭೇದಂ ನಿದಾನಂ ಚಞ್ಞಂ, ಸುತ್ತೇ ದಿಸ್ಸನ್ತಿ ಉಪರಿ।
Sambhedaṃ nidānaṃ caññaṃ, sutte dissanti upari;
ತಸ್ಮಾ ಸಿಕ್ಖೇ ಪರಿವಾರಂ, ಧಮ್ಮಕಾಮೋ ಸುಪೇಸಲೋತಿ॥
Tasmā sikkhe parivāraṃ, dhammakāmo supesaloti.
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / ಸಮುಟ್ಠಾನಸೀಸವಣ್ಣನಾ • Samuṭṭhānasīsavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಸಮುಟ್ಠಾನಸೀಸವಣ್ಣನಾ • Samuṭṭhānasīsavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಸಮುಟ್ಠಾನಸೀಸವಣ್ಣನಾ • Samuṭṭhānasīsavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಸಮುಟ್ಠಾನಸೀಸವಣ್ಣನಾ • Samuṭṭhānasīsavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಸಮುಟ್ಠಾನಸೀಸವಣ್ಣನಾ • Samuṭṭhānasīsavaṇṇanā
