| Library / Tipiṭaka / तिपिटक • Tipiṭaka / परिवारपाळि • Parivārapāḷi |
समुट्ठानसीससङ्खेपो
Samuṭṭhānasīsasaṅkhepo
समुट्ठानस्सुद्दानं
Samuṭṭhānassuddānaṃ
२५७.
257.
अनिच्चा सब्बे सङ्खारा, दुक्खानत्ता च सङ्खता।
Aniccā sabbe saṅkhārā, dukkhānattā ca saṅkhatā;
निब्बानञ्चेव पञ्ञत्ति, अनत्ता इति निच्छया॥
Nibbānañceva paññatti, anattā iti nicchayā.
बुद्धचन्दे अनुप्पन्ने, बुद्धादिच्चे अनुग्गते।
Buddhacande anuppanne, buddhādicce anuggate;
तेसं सभागधम्मानं, नाममत्तं न नायति॥
Tesaṃ sabhāgadhammānaṃ, nāmamattaṃ na nāyati.
दुक्करं विविधं कत्वा, पूरयित्वान पारमी।
Dukkaraṃ vividhaṃ katvā, pūrayitvāna pāramī;
उप्पज्जन्ति महावीरा, चक्खुभूता सब्रह्मके॥
Uppajjanti mahāvīrā, cakkhubhūtā sabrahmake.
ते देसयन्ति सद्धम्मं, दुक्खहानिं सुखावहं।
Te desayanti saddhammaṃ, dukkhahāniṃ sukhāvahaṃ;
अङ्गीरसो सक्यमुनि, सब्बभूतानुकम्पको॥
Aṅgīraso sakyamuni, sabbabhūtānukampako.
सब्बसत्तुत्तमो सीहो, पिटके तीणि देसयि।
Sabbasattuttamo sīho, piṭake tīṇi desayi;
सुत्तन्तमभिधम्मञ्च, विनयञ्च महागुणं॥
Suttantamabhidhammañca, vinayañca mahāguṇaṃ.
एवं नीयति सद्धम्मो, विनयो यदि तिट्ठति।
Evaṃ nīyati saddhammo, vinayo yadi tiṭṭhati;
उभतो च विभङ्गानि, खन्धका या च मातिका॥
Ubhato ca vibhaṅgāni, khandhakā yā ca mātikā.
माला सुत्तगुणेनेव, परिवारेन गन्थिता।
Mālā suttaguṇeneva, parivārena ganthitā;
तस्सेव परिवारस्स, समुट्ठानं नियतो कतं॥
Tasseva parivārassa, samuṭṭhānaṃ niyato kataṃ.
सम्भेदं निदानं चञ्ञं, सुत्ते दिस्सन्ति उपरि।
Sambhedaṃ nidānaṃ caññaṃ, sutte dissanti upari;
तस्मा सिक्खे परिवारं, धम्मकामो सुपेसलोति॥
Tasmā sikkhe parivāraṃ, dhammakāmo supesaloti.
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / समुट्ठानसीसवण्णना • Samuṭṭhānasīsavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / समुट्ठानसीसवण्णना • Samuṭṭhānasīsavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / समुट्ठानसीसवण्णना • Samuṭṭhānasīsavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / समुट्ठानसीसवण्णना • Samuṭṭhānasīsavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / समुट्ठानसीसवण्णना • Samuṭṭhānasīsavaṇṇanā
