| Library / Tipiṭaka / তিপিটক • Tipiṭaka / জাতকপাল়ি • Jātakapāḷi |
৪৩৬. সমুগ্গজাতকং (১০)
436. Samuggajātakaṃ (10)
৮৭.
87.
কুতো নু আগচ্ছথ ভো তযো জনা, স্ৰাগতা এথ 1 নিসীদথাসনে।
Kuto nu āgacchatha bho tayo janā, svāgatā etha 2 nisīdathāsane;
কচ্চিত্থ ভোন্তো কুসলং অনামযং, চিরস্সমব্ভাগমনং হি ৰো ইধ॥
Kaccittha bhonto kusalaṃ anāmayaṃ, cirassamabbhāgamanaṃ hi vo idha.
৮৮.
88.
অহমেৰ একো ইধ মজ্জ পত্তো, ন চাপি মে দুতিযো কোচি ৰিজ্জতি।
Ahameva eko idha majja patto, na cāpi me dutiyo koci vijjati;
কিমেৰ সন্ধায তে ভাসিতং ইসে, ‘‘কুতো নু আগচ্ছথ ভো তযো জনা’’॥
Kimeva sandhāya te bhāsitaṃ ise, ‘‘kuto nu āgacchatha bho tayo janā’’.
৮৯.
89.
তুৰঞ্চ একো ভরিযা চ তে পিযা, সমুগ্গপক্খিত্তনিকিণ্ণমন্তরে ।
Tuvañca eko bhariyā ca te piyā, samuggapakkhittanikiṇṇamantare ;
৯০.
90.
সংৰিগ্গরূপো ইসিনা ৰিযাকতো 7, সো দানৰো তত্থ সমুগ্গমুগ্গিলি।
Saṃviggarūpo isinā viyākato 8, so dānavo tattha samuggamuggili;
অদ্দক্খি ভরিযং সুচি মালধারিনিং, ৰাযুস্স পুত্তেন সহা তহিং রতং॥
Addakkhi bhariyaṃ suci māladhāriniṃ, vāyussa puttena sahā tahiṃ rataṃ.
৯১.
91.
সুদিট্ঠরূপমুগ্গতপানুৰত্তিনা 9, হীনা নরা যে পমদাৰসং গতা।
Sudiṭṭharūpamuggatapānuvattinā 10, hīnā narā ye pamadāvasaṃ gatā;
যথা হৰে পাণরিৰেত্থ রক্খিতা, দুট্ঠা মযী অঞ্ঞমভিপ্পমোদযি॥
Yathā have pāṇarivettha rakkhitā, duṭṭhā mayī aññamabhippamodayi.
৯২.
92.
দিৰা চ রত্তো চ মযা উপট্ঠিতা, তপস্সিনা জোতিরিৰা ৰনে ৰসং।
Divā ca ratto ca mayā upaṭṭhitā, tapassinā jotirivā vane vasaṃ;
সা ধম্মমুক্কম্ম অধম্মমাচরি, অকিরিযরূপো পমদাহি সন্থৰো॥
Sā dhammamukkamma adhammamācari, akiriyarūpo pamadāhi santhavo.
৯৩.
93.
সরীরমজ্ঝম্হি ঠিতাতিমঞ্ঞহং, ময্হং অযন্তি অসতিং অসঞ্ঞতং।
Sarīramajjhamhi ṭhitātimaññahaṃ, mayhaṃ ayanti asatiṃ asaññataṃ;
সা ধম্মমুক্কম্ম অধম্মমাচরি, অকিরিযরূপো পমদাহি সন্থৰো॥
Sā dhammamukkamma adhammamācari, akiriyarūpo pamadāhi santhavo.
৯৪.
94.
সুরক্খিতং মেতি কথং নু ৰিস্সসে, অনেকচিত্তাসু ন হত্থি 11 রক্খণা।
Surakkhitaṃ meti kathaṃ nu vissase, anekacittāsu na hatthi 12 rakkhaṇā;
এতা হি পাতালপপাতসন্নিভা, এত্থপ্পমত্তো ব্যসনং নিগচ্ছতি॥
Etā hi pātālapapātasannibhā, etthappamatto byasanaṃ nigacchati.
৯৫.
95.
তস্মা হি তে সুখিনো ৰীতসোকা, যে মাতুগামেহি চরন্তি নিস্সটা।
Tasmā hi te sukhino vītasokā, ye mātugāmehi caranti nissaṭā;
এতং সিৰং উত্তমমাভিপত্থযং, ন মাতুগামেহি করেয্য সন্থৰন্তি॥
Etaṃ sivaṃ uttamamābhipatthayaṃ, na mātugāmehi kareyya santhavanti.
সমুগ্গজাতকং দসমং।
Samuggajātakaṃ dasamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / জাতক-অট্ঠকথা • Jātaka-aṭṭhakathā / [৪৩৬] ১০. সমুগ্গজাতকৰণ্ণনা • [436] 10. Samuggajātakavaṇṇanā
