| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၀. သမုဒ္ဒကသုတ္တဝဏ္ဏနာ
10. Samuddakasuttavaṇṇanā
၂၅၆. စက္ကဝာဠမဟာသမုဒ္ဒပိဋ္ဌိယန္တိ စက္ကဝာဠပဗ္ဗတပာဒသမန္တာ မဟာသမုဒ္ဒတီရပိဋ္ဌိယံ။ ယထေဝ သိနေရုသမီပေ မဟာသမုဒ္ဒော အနုပုဗ္ဗနိန္နော အနုပုဗ္ဗပောဏော အနုပုဗ္ဗပဗ္ဘာရော, ဧဝံ ယေဘုယ္ယေန စက္ကဝာဠပာဒသမီပေပိ။ တေနာဟ ‘‘ရဇတပဋ္ဋဝဏ္ဏေ ဝာလုကပုလိနေ’’တိ။ ဝုတ္တပ္ပကာရာသူတိ အနန္တရသုတ္တေ ဝုတ္တပ္ပကာရာသု။ အသ္သမပဒေနာတိ အသ္သမပဒဝေမဇ္ဈေန။ ဧဝံ စိန္တယိံသူတိ ‘‘ယံ နူန မယ’’န္တိအာဒိနာ ယထာ ပာဠိယံ အာဂတံ, ဧဝံ မန္တယိံသု။
256.Cakkavāḷamahāsamuddapiṭṭhiyanti cakkavāḷapabbatapādasamantā mahāsamuddatīrapiṭṭhiyaṃ. Yatheva sinerusamīpe mahāsamuddo anupubbaninno anupubbapoṇo anupubbapabbhāro, evaṃ yebhuyyena cakkavāḷapādasamīpepi. Tenāha ‘‘rajatapaṭṭavaṇṇe vālukapuline’’ti. Vuttappakārāsūti anantarasutte vuttappakārāsu. Assamapadenāti assamapadavemajjhena. Evaṃ cintayiṃsūti ‘‘yaṃ nūna maya’’ntiādinā yathā pāḷiyaṃ āgataṃ, evaṃ mantayiṃsu.
ဣစ္ဆိတကရောတိ ယဒိစ္ဆိတကရဏံ။ ဒုဋ္ဌာနန္တိ ဒုရာသယာနံ။ တေ ပန ဒုဋ္ဌဇ္ဈာသယာ ဝိရုဒ္ဓာ ဟောန္တီတိ အာဟ ‘‘ဒုဋ္ဌာနံ ဝိရုဒ္ဓာန’’န္တိ။ ပဝုတ္တန္တိ ဗီဇံ သန္ဓာယ ဝပိတံ။ တေနာဟ ‘‘ခေတ္တေ ပတိဋ္ဌာပိတ’’န္တိ။
Icchitakaroti yadicchitakaraṇaṃ. Duṭṭhānanti durāsayānaṃ. Te pana duṭṭhajjhāsayā viruddhā hontīti āha ‘‘duṭṭhānaṃ viruddhāna’’nti. Pavuttanti bījaṃ sandhāya vapitaṃ. Tenāha ‘‘khette patiṭṭhāpita’’nti.
သာယမာသဘတ္တန္တိ သာယံ အသိတဗ္ဗဘောဇနံ။ ယထာဝာရံ ဘက္ခိတမေတံ ဒေဝာနံ ဝိယ သုခုမံ ဂုရုဝာသဉ္စ န ဟောတီတိ ‘‘ဘတ္တ’’န္တိ ဝုတ္တံ။ ဂေလညဇာတန္တိ သဉ္ဇာတဂေလညံ။ ဝေပတီတိ ကမ္ပတိ ပဝေဓတိ။
Sāyamāsabhattanti sāyaṃ asitabbabhojanaṃ. Yathāvāraṃ bhakkhitametaṃ devānaṃ viya sukhumaṃ guruvāsañca na hotīti ‘‘bhatta’’nti vuttaṃ. Gelaññajātanti sañjātagelaññaṃ. Vepatīti kampati pavedhati.
သမုဒ္ဒကသုတ္တဝဏ္ဏနာ နိဋ္ဌိတာ။
Samuddakasuttavaṇṇanā niṭṭhitā.
ပဌမဝဂ္ဂဝဏ္ဏနာ နိဋ္ဌိတာ။
Paṭhamavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. သမုဒ္ဒကသုတ္တံ • 10. Samuddakasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. သမုဒ္ဒကသုတ္တဝဏ္ဏနာ • 10. Samuddakasuttavaṇṇanā
