| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
১১. সম্পক্খন্দনলক্খণসদ্ধাপঞ্হো
11. Sampakkhandanalakkhaṇasaddhāpañho
১১. ‘‘কথং , ভন্তে, সম্পক্খন্দনলক্খণা সদ্ধা’’তি,? ‘‘যথা, মহারাজ, যোগাৰচরো অঞ্ঞেসং চিত্তং ৰিমুত্তং পস্সিত্ৰা সোতাপত্তিফলে ৰা সকদাগামিফলে ৰা অনাগামিফলে ৰা অরহত্তে ৰা সম্পক্খন্দতি যোগং করোতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায। এৰং খো, মহারাজ, সম্পক্খন্দনলক্খণা সদ্ধা’’তি।
11. ‘‘Kathaṃ , bhante, sampakkhandanalakkhaṇā saddhā’’ti,? ‘‘Yathā, mahārāja, yogāvacaro aññesaṃ cittaṃ vimuttaṃ passitvā sotāpattiphale vā sakadāgāmiphale vā anāgāmiphale vā arahatte vā sampakkhandati yogaṃ karoti appattassa pattiyā anadhigatassa adhigamāya asacchikatassa sacchikiriyāya. Evaṃ kho, mahārāja, sampakkhandanalakkhaṇā saddhā’’ti.
‘‘ওপম্মং করোহী’’তি। ‘‘যথা, মহারাজ, উপরিপব্বতে মহামেঘো অভিপ্পৰস্সেয্য, তং উদকং যথানিন্নং পৰত্তমানং পব্বতকন্দরপদরসাখা পরিপূরেত্ৰা নদিং পরিপূরেয্য, সা উভতো কূলানি সংৰিস্সন্দন্তী গচ্ছেয্য, অথ মহাজনকাযো আগন্ত্ৰা তস্সা নদিযা উত্তানতং ৰা গম্ভীরতং ৰা অজানন্তো ভীতো ৰিত্থতো তীরে তিট্ঠেয্য, অথঞ্ঞতরো পুরিসো আগন্ত্ৰা অত্তনো থামঞ্চ বলঞ্চ সম্পস্সন্তো গাল়্হং কচ্ছং বন্ধিত্ৰা পক্খন্দিত্ৰা তরেয্য, তং তিণ্ণং পস্সিত্ৰা মহাজনকাযোপি তরেয্য। এৰমেৰ খো, মহারাজ, যোগাৰচরো অঞ্ঞেসং চিত্তং ৰিমুত্তং পস্সিত্ৰা সোতাপত্তিফলে ৰা সকদাগামিফলে ৰা অনাগামিফলে ৰা অরহত্তে ৰা সম্পক্খন্দতি যোগং করোতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায। এৰং খো, মহারাজ, সম্পক্খন্দনলক্খণা সদ্ধাতি। ভাসিতম্পেতং, মহারাজ, ভগৰতা সংযুত্তনিকাযৰরে –
‘‘Opammaṃ karohī’’ti. ‘‘Yathā, mahārāja, uparipabbate mahāmegho abhippavasseyya, taṃ udakaṃ yathāninnaṃ pavattamānaṃ pabbatakandarapadarasākhā paripūretvā nadiṃ paripūreyya, sā ubhato kūlāni saṃvissandantī gaccheyya, atha mahājanakāyo āgantvā tassā nadiyā uttānataṃ vā gambhīrataṃ vā ajānanto bhīto vitthato tīre tiṭṭheyya, athaññataro puriso āgantvā attano thāmañca balañca sampassanto gāḷhaṃ kacchaṃ bandhitvā pakkhanditvā tareyya, taṃ tiṇṇaṃ passitvā mahājanakāyopi tareyya. Evameva kho, mahārāja, yogāvacaro aññesaṃ cittaṃ vimuttaṃ passitvā sotāpattiphale vā sakadāgāmiphale vā anāgāmiphale vā arahatte vā sampakkhandati yogaṃ karoti appattassa pattiyā anadhigatassa adhigamāya asacchikatassa sacchikiriyāya. Evaṃ kho, mahārāja, sampakkhandanalakkhaṇā saddhāti. Bhāsitampetaṃ, mahārāja, bhagavatā saṃyuttanikāyavare –
‘‘‘সদ্ধায তরতী ওঘং, অপ্পমাদেন অণ্ণৰং।
‘‘‘Saddhāya taratī oghaṃ, appamādena aṇṇavaṃ;
ৰীরিযেন দুক্খমচ্চেতি, পঞ্ঞায পরিসুজ্ঝতী’’’তি 1॥
Vīriyena dukkhamacceti, paññāya parisujjhatī’’’ti 2.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
সম্পক্খন্দনলক্খণসদ্ধাপঞ্হো একাদসমো।
Sampakkhandanalakkhaṇasaddhāpañho ekādasamo.
Footnotes:
