| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
১২. ৰীরিযলক্খণপঞ্হো
12. Vīriyalakkhaṇapañho
১২. রাজা আহ ‘‘ভন্তে নাগসেন, কিংলক্খণং ৰীরিয’’ন্তি? ‘‘উপত্থম্ভনলক্খণং, মহারাজ, ৰীরিযং, ৰীরিযূপত্থম্ভিতা সব্বে কুসলা ধম্মা ন পরিহাযন্তী’’তি।
12. Rājā āha ‘‘bhante nāgasena, kiṃlakkhaṇaṃ vīriya’’nti? ‘‘Upatthambhanalakkhaṇaṃ, mahārāja, vīriyaṃ, vīriyūpatthambhitā sabbe kusalā dhammā na parihāyantī’’ti.
‘‘ওপম্মং করোহী’’তি। ‘‘যথা, মহারাজ, পুরিসো গেহে পতন্তে অঞ্ঞেন দারুনা উপত্থম্ভেয্য, উপত্থম্ভিতং সন্তং এৰং তং গেহং ন পতেয্য। এৰমেৰ খো, মহারাজ, উপত্থম্ভনলক্খণং ৰীরিযং, ৰীরিযূপত্থম্ভিতা সব্বে কুসলা ধম্মা ন পরিহাযন্তী’’তি।
‘‘Opammaṃ karohī’’ti. ‘‘Yathā, mahārāja, puriso gehe patante aññena dārunā upatthambheyya, upatthambhitaṃ santaṃ evaṃ taṃ gehaṃ na pateyya. Evameva kho, mahārāja, upatthambhanalakkhaṇaṃ vīriyaṃ, vīriyūpatthambhitā sabbe kusalā dhammā na parihāyantī’’ti.
‘‘ভিয্যো ওপম্মং করোহী’’তি। ‘‘যথা, মহারাজ, পরিত্তকং সেনং মহতী সেনা ভঞ্জেয্য, ততো রাজা অঞ্ঞমঞ্ঞং অনুস্সারেয্য অনুপেসেয্য অত্তনো পরিত্তকায সেনায বলং অনুপদং দদেয্য, তায সদ্ধিং পরিত্তকা সেনা মহতিং সেনং ভঞ্জেয্য। এৰমেৰ খো, মহারাজ, উপত্থম্ভনলক্খণং ৰীরিযং, ৰীরিযূপত্থম্ভিতা সব্বে কুসলা ধম্মা ন পরিহাযন্তি। ভাসিতম্পেতং , মহারাজ, ভগৰতা – ‘ৰীরিযৰা খো, ভিক্খৰে, অরিযসাৰকো অকুসলং পজহতি, কুসলং ভাৰেতি। সাৰজ্জং পজহতি, অনৰজ্জং ভাৰেতি। সুদ্ধমত্তানং পরিহরতী’’’তি।
‘‘Bhiyyo opammaṃ karohī’’ti. ‘‘Yathā, mahārāja, parittakaṃ senaṃ mahatī senā bhañjeyya, tato rājā aññamaññaṃ anussāreyya anupeseyya attano parittakāya senāya balaṃ anupadaṃ dadeyya, tāya saddhiṃ parittakā senā mahatiṃ senaṃ bhañjeyya. Evameva kho, mahārāja, upatthambhanalakkhaṇaṃ vīriyaṃ, vīriyūpatthambhitā sabbe kusalā dhammā na parihāyanti. Bhāsitampetaṃ , mahārāja, bhagavatā – ‘vīriyavā kho, bhikkhave, ariyasāvako akusalaṃ pajahati, kusalaṃ bhāveti. Sāvajjaṃ pajahati, anavajjaṃ bhāveti. Suddhamattānaṃ pariharatī’’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
ৰীরিযলক্খণপঞ্হো দ্ৰাদসমো।
Vīriyalakkhaṇapañho dvādasamo.
