| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂. သမိဒ္ဓိသုတ္တဝဏ္ဏနာ
2. Samiddhisuttavaṇṇanā
၁၅၈. မယ္ဟံ လာဘာတိ ဧဝရူပသ္သ နာမ သမ္မာသမ္ဗုဒ္ဓသ္သ သတ္ထုသ္သ ပဋိလာဘော, ဧဝရူပသ္သ စ နာမ နိယ္ယာနိကသ္သ သဒ္ဓမ္မသ္သ ပဋိလာဘော, ဧဝရူပာနဉ္စ သုပ္ပဋိပန္နာနံ သဗ္ရဟ္မစာရီနံ ပဋိလာဘော, ဧတေ မယ္ဟံ သုလဒ္ဓလာဘာ။ မယ္ဟံ သုလဒ္ဓန္တိ ယဉ္စေတံ မမ နိယ္ယာနိကသာသနေ ပဗ္ဗဇ္ဇာ ဥပသမ္ပဒာ, တသ္မိဉ္စ အဘိရတီတိ သဗ္ဗဉ္စေတံ မယာ သုလဒ္ဓံ။ ယထာ ပနသ္သ ဧဝံ စေတသော ပရိဝိတက္ကော ဥပ္ပန္နော, တံ ဒသ္သေတုံ ‘‘သော ကိရာ’’တိအာဒိ ဝုတ္တံ။ စရိတာနုရူပဝသေန ဂဟိတံ မူလကမ္မဋ္ဌာနံ။ ပာသာဒိကန္တိ ပသာဒာဝဟံ။ ဧဝမဟောသီတိ ‘‘လာဘာ ဝတ မေ’’တိအာဒိနာ ဧဝံ ပရိဝိတက္ကော အဟောသိ။ နိသိန္နသဒိသောတိ နိသိန္နော ဝိယ။ တသ္မိံယေဝ ဌာနေတိ ယသ္မိံ ဌာနေ နိသိန္နံ မာရော ဥပသင္ကမိ, တသ္မိံယေဝ ဌာနေ။ တသ္သာတိ သမိဒ္ဓိတ္ထေရသ္သ။ ကမ္မဋ္ဌာနံ သပ္ပာယန္တိ ကမ္မဋ္ဌာနဘာဝနာယ အနုယုဉ္ဇနံ သပ္ပာယံ ဥပကာရာဝဟံ ဘဝိသ္သတိ။
158.Mayhaṃlābhāti evarūpassa nāma sammāsambuddhassa satthussa paṭilābho, evarūpassa ca nāma niyyānikassa saddhammassa paṭilābho, evarūpānañca suppaṭipannānaṃ sabrahmacārīnaṃ paṭilābho, ete mayhaṃ suladdhalābhā. Mayhaṃ suladdhanti yañcetaṃ mama niyyānikasāsane pabbajjā upasampadā, tasmiñca abhiratīti sabbañcetaṃ mayā suladdhaṃ. Yathā panassa evaṃ cetaso parivitakko uppanno, taṃ dassetuṃ ‘‘so kirā’’tiādi vuttaṃ. Caritānurūpavasena gahitaṃ mūlakammaṭṭhānaṃ. Pāsādikanti pasādāvahaṃ. Evamahosīti ‘‘lābhā vata me’’tiādinā evaṃ parivitakko ahosi. Nisinnasadisoti nisinno viya. Tasmiṃyeva ṭhāneti yasmiṃ ṭhāne nisinnaṃ māro upasaṅkami, tasmiṃyeva ṭhāne. Tassāti samiddhittherassa. Kammaṭṭhānaṃ sappāyanti kammaṭṭhānabhāvanāya anuyuñjanaṃ sappāyaṃ upakārāvahaṃ bhavissati.
မယ္ဟန္တိ မယာ။ သတိ စ ပညာ စ သတိပညာ, တာ အရိယမဂ္ဂေန ဇာနနသမတ္ထနဘာဝေန အဝဗုဒ္ဓာ။ ထေရော ကိရ တဒာ ဝိပသ္သနံ ဥသ္သုက္ကာပေသိ။ ကာမန္တိ ယထာရုစိ။ ကေစိ ‘‘ကာမံ ကရသ္သူတိ အာယသ္မတော ‘ကာမာ’တိ မာရသ္သ အာလပန’’န္တိ ဝဒန္တိ။ ဝိဘိံသကာရဟာနီတိ ဘယာနကာရဟာနိ။ ရူပာနီတိ ဝိပ္ပကာရာနိ။ ဝိပ္ပကာရတ္ထောပိ ဟိ ရူပသဒ္ဒော ‘‘ရူပံ ဒသ္သေတိ အနပ္ပက’’န္တိအာဒီသု ဝိယ။ န ကမ္ပေသ္သသီတိ သမဏဓမ္မကရဏတော န စလိသ္သသိ။
Mayhanti mayā. Sati ca paññā ca satipaññā, tā ariyamaggena jānanasamatthanabhāvena avabuddhā. Thero kira tadā vipassanaṃ ussukkāpesi. Kāmanti yathāruci. Keci ‘‘kāmaṃ karassūti āyasmato ‘kāmā’ti mārassa ālapana’’nti vadanti. Vibhiṃsakārahānīti bhayānakārahāni. Rūpānīti vippakārāni. Vippakāratthopi hi rūpasaddo ‘‘rūpaṃ dasseti anappaka’’ntiādīsu viya. Na kampessasīti samaṇadhammakaraṇato na calissasi.
သမိဒ္ဓိသုတ္တဝဏ္ဏနာ နိဋ္ဌိတာ။
Samiddhisuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. သမိဒ္ဓိသုတ္တံ • 2. Samiddhisuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. သမိဒ္ဓိသုတ္တဝဏ္ဏနာ • 2. Samiddhisuttavaṇṇanā
